International (Page 151)

ന്യൂഡൽഹി: റഷ്യ-യുക്രൈൻ സംഘർഷത്തിൽ രണ്ടാംഘട്ട ചർച്ച ഇന്ന് നടക്കും. യുദ്ധം ആറാം ദിവസത്തേക്ക് കടന്ന സാഹചര്യത്തിലാണ് രണ്ടാംഘട്ട ചർച്ച നടക്കുന്നത്. ബെലാറൂസ്- പോളണ്ട് അതിർത്തിയിലാണ് ചർച്ച നടക്കുന്നതെന്നാണ് റഷ്യ മാദ്ധ്യമങ്ങൾ റിപ്പോർട്ട് ചെയ്യുന്നത്.

സൈനിക പിന്മാറ്റമാണ് യുക്രൈൻ ചർച്ചയിൽ റഷ്യക്ക് മുന്നിൽ വെക്കുന്ന പ്രധാന ആവശ്യം. യുക്രൈനിലൂടെ കിഴക്കൻ യൂറോപ്യൻ മേഖലയിലേക്കുള്ള അമേരിക്കൻ വേരോട്ടം തടയാനാണ് റഷ്യയുടെ പദ്ധതി.

യുക്രൈൻ സംഘർഷത്തിന്റെ പശ്ചാത്തലത്തിൽ നേരത്തെ ഇരു രാജ്യങ്ങളും തമ്മിൽ ചർച്ച നടത്തിയിരുന്നു. ആദ്യ ഘട്ട ചർച്ച ഫലം കാണാതായതോടെയാണ് രണ്ടാം ഘട്ട ചർച്ചകൾ നടത്താനൊരുങ്ങുന്നത്. സാമാധാനം നിലനിർത്താനായി എന്ത് നടപടി വേണമെങ്കിലും സ്വീകരിക്കാമെന്നാണ് ചർച്ചയ്ക്ക് വേദിയാകുന്ന ബെലാറൂസ് വ്യക്തമാക്കിയിട്ടുള്ളത്. യുക്രൈനെതിരെ ബെലാറൂസിന്റെ ഭാഗത്ത് നിന്നും ആക്രമണം ഉണ്ടാകില്ലെന്ന ഉറപ്പും ഇവർ നൽകിയിട്ടുണ്ട്.

ന്യൂഡൽഹി: യുക്രൈൻ തലസ്ഥാനമായ കീവിൽ റഷ്യ വാക്വം ബോംബുകൾ ഉപയോഗിച്ചതായി റിപ്പോർട്ട്. മനുഷ്യശരീരത്തെ ആവിയാക്കാൻ ശേഷിയുള്ള വാക്വം ബോംബുകളുടെ ഉപയോഗം അന്താരാഷ്ട്ര മനുഷ്യാവകാശസംഘടനകൾ വിലക്കിയിട്ടുള്ളതാണ്. ഒരു അപ്പാർട്ട്‌മെന്റിലോ മറ്റോ വാക്വം ബോംബുകൾ ഉപയോഗിക്കുകയാണെങ്കിൽ അതിനുള്ളിൽ താമസിക്കുന്ന മനുഷ്യരുടെ ശ്വാസകോശത്തിലെ ഓക്‌സിജൻ വരെ വലിച്ചെടുക്കാൻ ഈ ബോംബിന് കഴിവുണ്ടെന്നാണ് പറയപ്പെടുന്നത്.

വാക്വം ബോംബിന് ആംനസ്റ്റി ഇന്റർനാഷണലും ഹ്യൂമൺ റൈറ്റ്സ് വാച്ചും വിലക്ക് ഏർപ്പെടുത്തിയിട്ടുണ്ട്. കനത്ത സ്ഫോടനമുണ്ടാക്കുകയാണ് വാക്വം ബോംബിന്റെ ലക്ഷ്യം. തെർമൊബാറിക് ആയുധങ്ങൾ എന്നാണ് ഇവ അറിയപ്പെടുന്നത്. ഉയർന്ന ഊഷ്മാവിന്റെയും സമ്മർദ്ദത്തിന്റെയും ഫലം ലക്ഷ്യകേന്ദ്രത്തിൽ ഉണ്ടാക്കുന്നു എന്നതാണ് തെർമോബാറിക് ആയുധങ്ങളുടെ പ്രത്യേകത.

എയ്റോസോൾ ബോംബ് എന്നും വാക്വം ബോംബ് അറിയപ്പെടുന്നുണ്ട്. ആദ്യസ്ഫോടനത്തിൽ കാർബൺ അടിസ്ഥാനമാക്കിയുള്ള ഇന്ധനം (പെട്രോളൊ ഡീസലോ മറ്റേതെങ്കിലും ഇന്ധനമോ) കൊണ്ടുണ്ടാക്കിയ ഉയർന്ന സമ്മർദ്ദത്തിൽ സൂക്ഷിച്ചിട്ടുള്ള ദ്രാവകം അന്തരീക്ഷത്തിൽ ചെറിയ ലോഹകണങ്ങളായി ചിതറുന്നു. രണ്ടാം ഘട്ടം അന്തരീക്ഷത്തിലെ ഓക്സിജൻ വലിച്ചെടുത്ത് ചിതറിയ ലോഹകണങ്ങൾ കത്തിച്ച് വലിയൊരു സ്ഫോടന തരംഗം സൃഷ്ടിക്കുന്നു. ഇത് ബോംബിന്റെ ലക്ഷ്യസ്ഥാനത്തിന് ചുറ്റും ഒരു വാക്വം സൃഷ്ടിക്കും. സാധാരണ സ്ഫോടക വസ്തുക്കളിൽ നിന്നും വ്യത്യസ്തമായി വാക്വം ബോംബിന്റെ സ്ഫോടനം ദീർഘനേരം നിലനിൽക്കും.

ആളുകളുടെ ശ്വാസകോശത്തിൽ നിന്നുള്ള ഓക്സിജൻ വരെ വലിച്ചെടുത്ത് ചുറ്റിലും ശൂന്യത (ഓക്സിജൻ ഇല്ലാത്ത അവസ്ഥ- വാക്വം) സൃഷ്ടിക്കുമെന്നതാണ് ഈ ബോംബിന്റെ ഭയാനകതയെന്ന് ആസ്ത്രേല്യൻ സ്ട്രാറ്റജിക് പോളിസി ഇൻസ്റ്റിറ്റ്യൂട്ട് സീനിയർ അനലിസ്റ്റ് ഡോ. മാർകസ് ഹെല്ലെയർ വ്യക്തമാക്കി. ഒരു അപ്പാർട്ട്‌മെന്റ് സമുച്ചത്തിനോ മറ്റ് കെട്ടിടങ്ങൾക്കോ നേരെ ഉപയോഗിക്കാവുന്ന അങ്ങേയറ്റം വിനാശകാരിയായ ആയുധമാണിതെന്നും അദ്ദേഹം മുന്നറിയിപ്പ് നൽകി.

കീവ്: റഷ്യൻ ആക്രമണത്തെ പ്രതിരോധിക്കാൻ സജ്ജരായിട്ടുള്ള വിദേശികൾക്ക് യുക്രൈനിലെത്താൻ പ്രവേശന വിസ വേണ്ടെന്ന് യുക്രൈൻ പ്രസിഡന്റ് വ്ളാദിമിർ സെലൻസ്‌കി. വിസാ നടപടി താത്കാലികമായ എടുത്തുകളയാനാണ് യുക്രൈന്റെ തീരുമാനം. ചൊവ്വാഴ്ച്ച മുതൽ ഉത്തരവ് പ്രാബല്യത്തിൽ വന്നു. ഇനി മുതൽ യുക്രൈന് വേണ്ടി പ്രതിരോധ രംഗത്തിറങ്ങാൻ സന്നദ്ധരാവുന്ന വിദേശികൾക്ക് പ്രവേശന വിസയില്ലാതെ രാജ്യത്തേയ്ക്ക് പ്രവേശിക്കാം.

സൈനിക നിയമം പിൻവലിക്കുന്നതു വരെ ഉത്തരവ് തുടരും. യുക്രൈൻ നഗരങ്ങളിലെ റഷ്യൻ ആക്രമണം ശക്തമായതോടെ പൗരന്മാർ രാജ്യത്തേയും ജനങ്ങളേയും സംരക്ഷിക്കാൻ ഇറങ്ങണമെന്ന് സർക്കാർ ആവശ്യപ്പെട്ടിരുന്നു. ഇതിനായി 18 നും 60 നുമിടയിൽ പ്രായമുള്ളവർ രാജ്യത്തിന് പുറത്തിറങ്ങരുതെന്നും സർക്കാർ നിർദ്ദേശം നൽകിയിരുന്നു. റഷ്യയ്ക്കെതിരെ പോരാടാൻ തയ്യാറുള്ളവർക്ക് ആയുധം നൽകുമെന്നും യുക്രൈൻ വ്യക്തമാക്കിയിരുന്നു.

അതേസമയം യുക്രൈന് സംഘർഷത്തിന്റെ പശ്ചാത്തലത്തിൽ കൂടുതൽ രാജ്യങ്ങൾ റഷ്യയ്ക്ക് ഉപരോധം ഏർപ്പെടുത്തിയതിനാൽ റഷ്യൻ സാമ്പത്തികരംഗം വലിയ പ്രതിസന്ധികളാണെന്ന റിപ്പോർട്ടുകളും പുറത്തു വരുന്നുണ്ട്.

കീവ്: യുക്രൈനിൽ റഷ്യ രൂക്ഷമായ ആക്രമണം തുടരുന്നു. ആദ്യഘട്ട സമാധാന ചർച്ചകൾക്ക് ശേഷവും റഷ്യ ആക്രമണം തുടരുന്ന കാഴ്ച്ചയാണ് കാണാൻ കഴിയുന്നത്. കീവിൽ ഉൾപ്പെടെ ആക്രമണം ശക്തമായിട്ടുണ്ട്. കീവിനടത്തുള്ള ബ്രോവറിയിൽ ഉണ്ടായ വ്യോമാക്രമണത്തിൽ ബ്രോവറി മേയർക്ക് ഉൾപ്പെടെ പരിക്കേറ്റതായും റിപ്പോർട്ടുകളുണ്ട്. ആക്രമണ മേഖലയിൽ നിന്നും ജനങ്ങൾ സുരക്ഷിത സ്ഥലങ്ങളിലേക്ക് മാറണെന്നാണ് അധികൃതർ നൽകിയിരിക്കുന്ന നിർദ്ദേശം. ഖാർഖീവിലും വലിയ ആക്രമണങ്ങൾ നടക്കുകയാണ്.

അതേസമയം, സ്‌നേക്ക് ഐലൻഡിലെ 13 യുക്രൈൻ സൈനികർ ജീവനോടെയുണ്ടെന്ന് യുക്രൈൻ അറിയിച്ചു. റഷ്യൻ ആക്രണണത്തിൽ ഇവർ കൊല്ലപ്പെട്ടെന്നായിരുന്നു നേരത്തെ പുറത്തുവന്ന റിപ്പോർട്ടുകൾ. എന്നാൽ ഇവർ എല്ലാവരും റഷ്യൻ സൈന്യത്തിന്റെ പിടിയിലാണ്. റഷ്യ നടത്തിയ ആക്രമണത്തിൽ ദ്വീപിലെ ലൈറ്റ്ഹൗസും വിവര വിനിമയ സംവിധാനവുമടക്കം എല്ലാം തകർന്നിരുന്നു. പിന്നാലെ അയച്ച സിവിലിയൻ കപ്പലിലുള്ളവരെയും റഷ്യ പിടികൂടിയെന്നാണ് യുക്രൈൻ പറയുന്നത്.

യുക്രൈൻ-റഷ്യ രണ്ടാംഘട്ട ചർച്ച ഉടൻ നടക്കുമെന്നും അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നു. യുക്രൈനിൽ നിന്നും രക്ഷപ്പെടാനായി ജനങ്ങൾ കൂട്ടപ്പലായനം നടത്തുകയാണ്. 5,20,000 പേർ യുക്രൈനിൽ നിന്നും പലായനം ചെയ്തുകഴിഞ്ഞെന്ന് ഐക്യരാഷ്ട്ര സഭ അറിയിച്ചു. ഒന്നരലക്ഷത്തിലധികം പേർ ഒറ്റപ്പെട്ടു പോയെന്നും നാല് ദശലക്ഷത്തിലധികം പേർ അഭയാർഥികളാകുമെന്നും ഐക്യരാഷ്ട്ര സഭ വ്യക്തമാക്കി.