International (Page 150)

മോസ്‌കോ: സംഘർഷത്തിന്റെ പശ്ചാത്തലത്തിൽ യുക്രൈനിൽ കുടുങ്ങിയ ഇന്ത്യക്കാരെ രക്ഷിക്കാനുള്ള ദൗത്യവുമായി സഹകരിക്കാമെന്ന് അറിയിച്ച് റഷ്യ. ഇന്ത്യയിലെ റഷ്യൻ അംബാസിഡർ ഡെനീസ് അലിപോവ് ആണ് ഇക്കാര്യം അറിയിച്ചത്. യുക്രൈന്റെ കിഴക്കൻ അതിർത്തിയിൽ കുടുങ്ങിയ ഇന്ത്യക്കാരെ റഷ്യ വഴി ഇന്ത്യയിൽ തിരിച്ചെത്തിക്കാൻ സഹായിക്കണമെന്ന് ഇന്ത്യ നേരത്തെ റഷ്യയോട് അഭ്യർത്ഥിച്ചിരുന്നെങ്കിലും റഷ്യയുടെ ഭാഗത്ത് നിന്നും അനുകൂല നിലപാട് ഉണ്ടായിരുന്നില്ല.

എന്നാൽ ഇപ്പോൾ റഷ്യൻ അംബാസിഡർ അനുകൂലമായി പ്രതികരണം നൽകിയെങ്കിലും രക്ഷാപ്രവർത്തനം എപ്പോൾ മുതൽ ആരംഭിക്കുമെന്ന് വ്യക്തമല്ല. മാനുഷിക പരിഗണന നൽകി യുക്രൈനിൽ കുടുങ്ങിയവർക്ക് തിരികെ വരാൻ സുരക്ഷിത പാതയൊരുക്കാം എന്നാണ് റഷ്യയുടെ നിലപാട്.

ഖർഖീവ്, സുമി നഗരങ്ങളിലായി കുടുങ്ങി കിടക്കുന്ന നാലായിരത്തോളം ഇന്ത്യൻ വിദ്യാർത്ഥികളെ റഷ്യ വഴി പുറത്ത് എത്തിക്കാനുള്ള ആലോചനയും നടക്കുന്നുണ്ട്. ഇത് വിജയിച്ചാൽ യുക്രൈൻ രക്ഷാദൗത്യത്തിലെ നിർണായക പ്രതിസന്ധി ഇല്ലാതാകും. ഇന്ത്യൻ വിദ്യാർത്ഥികൾ കൊല്ലപ്പെടുമ്പോൾ കൈയും കെട്ടി നോക്കി നിൽക്കാനാവില്ലെന്ന നിലപാട് ഇന്ത്യ റഷ്യയെ അറിയിച്ചിരുന്നു. ഈ സാഹചര്യത്തിലാണ് റഷ്യ അനുകൂല നിലപാട് സ്വീകരിച്ചതെന്നാണ് റിപ്പോർട്ടുകൾ.

ലണ്ടൻ: യുക്രൈൻ സംഘർഷം ആരംഭിച്ചതിന് ശേഷം പല രാജ്യങ്ങളും റഷ്യയ്ക്ക് ഉപരോധം ഏർപ്പെടുത്തിയിരിക്കുകയാണ്. എന്നാൽ ഇതോടെ യൂറോപ്യൻ രാജ്യങ്ങൾ പലതും കടുത്ത ഇന്ധന പ്രതിസന്ധി നേരിടുകയാണ്. യൂറോപ്യൻ രാജ്യങ്ങൾ പ്രകൃതി വാതകത്തിനും എണ്ണയ്ക്കും കൂടുതലായും ആശ്രയിക്കുന്നത് റഷ്യയെയാണ്. എന്നാൽ ഉപരോധം ഏർപ്പെടുത്തിയതോടെ റഷ്യയ്ക്ക് പകരം ആഫ്രിക്കയിൽ നിന്ന് ഇന്ധനമെത്തിക്കാൻ പറ്റുമോയെന്ന സാധ്യത പരിശോധിക്കുകയാണ് രാജ്യങ്ങൾ.

യൂറോപ്യൻ രാജ്യങ്ങൾക്ക് ആവശ്യമായ പ്രകൃതി വാതകത്തിന്റെ 40 ശതമാനത്തോളം വരുന്നത് റഷ്യയിൽ നിന്നാണ്. അതിൽ തന്നെ എറ്റവും കൂടുതൽ വാങ്ങുന്നത് ജർമ്മനിയാണ്. റഷ്യയിൽ നിന്ന് ജർമ്മനിയിലേക്ക് പ്രകൃതി വാതകമെത്തിക്കാനുള്ള ബൃഹദ് പദ്ധതിയായിരുന്നു നോർഡ് സ്ട്രീം 2. ബാൽടിക് കടൽ കടന്ന് വരുന്ന പൈപ്പ്‌ലൈന്റെ നീളം 1,222 കിലോമീറ്ററാണ്. ഇതിന്റെ നിർമ്മാണമെല്ലാം ഏകദേശം പൂർത്തിയായിരുന്നെങ്കിലും പദ്ധതിയ്ക്ക് തത്ക്കാലം അംഗീകാരം നൽകേണ്ടതില്ലെന്നാണ് ജർമ്മനിയുടെ തീരുമാനം. യുക്രൈൻ സംഘർഷത്തിന് പിന്നാലെയാണ് ജർമ്മനി ഇത്തരമൊരു നിലപാട് സ്വീകരിച്ചത്.

യുക്രൈൻ പ്രതിസന്ധി തുടങ്ങിയ ശേഷം അറുപത് ശതമാനത്തോളം വർധനവാണ് പ്രകൃതിവാതക വിലയിൽ ഉണ്ടായത്. പ്രതിസന്ധികാലം കഴിഞ്ഞാലും റഷ്യക്കപ്പുറമുള്ള ഊർജ്ജ സാധ്യതകളെ പറ്റി യൂറോപ്പിന് ചിന്തിക്കേണ്ടതായി വരും. അതേസമയം, വലിയ ഊർജ്ജ പ്രതിസന്ധിയിലേക്ക് യൂറോപ്പ് നീങ്ങുമെന്ന ആശങ്കക്കിടെ യൂറോപ്പ് ഇതിനുള്ള ബദൽ സാധ്യതകളും തേടുന്നുണ്ട്. ആഫ്രിക്കയാണ് യൂറോപ്യൻ രാജ്യങ്ങളുടെ ഇനിയുള്ള പ്രതീക്ഷ.

ലണ്ടൻ: റഷ്യയുമായി ബന്ധമുള്ള എല്ലാ കപ്പലുകൾക്കും നിരോധനം ഏർപ്പെടുത്തി ബ്രിട്ടീഷ് തുറമുഖം. യുക്രൈൻ സംഘർഷത്തിന്റെ പശ്ചാത്തലത്തിലാണ് നടപടി. ബ്രിട്ടീഷ് ട്രാൻസ്‌പോർട്ട് സെക്രട്ടറി ഗ്രാന്റ് ഷാപ്പ്‌സ് ട്വിറ്ററിലൂടെയാണ് റഷ്യയുമായി ബന്ധപ്പെട്ട എല്ലാ കപ്പലുകൾക്കും നിരോധനം ഏർപ്പെടുത്തിയതായി അറിയിച്ചത്. റഷ്യയുമായി ബന്ധമുള്ള കപ്പലുകൾക്ക് ബ്രിട്ടീഷ് തുറമുഖങ്ങളിൽ പ്രവേശിക്കുന്നതിൽ നിന്ന് പൂർണ നിരോധനം ഏർപ്പെടുത്തുന്ന ആദ്യ രാജ്യമാണ് തങ്ങളെന്ന് അദ്ദേഹം അറിയിച്ചു.

അതേസമയം സംഘർഷത്തിന്റെ പശ്ചാത്തലത്തിൽ വിവിധ രാജ്യങ്ങൾ റഷ്യയ്ക്ക് ഉപരോധം ഏർപ്പെടുത്തിയിരിക്കുകയാണ്. ഏഴ് റഷ്യൻ ബാങ്കുകൾക്ക് ദക്ഷിണ കൊറിയ വിലക്കേർപ്പെടുത്തി. റഷ്യക്കെതിരായ സാമ്പത്തിക ഉപരോധത്തിന്റെ ഭാഗമായാണ് ധനമന്ത്രാലയത്തിന്റെ നടപടി. Sberbank, VEB, PSB, VTB, Otkritie, Sovcom, ovikom എന്നിവയാണ് വിലക്കേർപ്പെടുത്തിയ ബാങ്കുകളെന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്.

യൂറോപ്യൻ യൂണിയൻ വിഷയത്തിൽ തുടർനടപടികൾ കൈക്കൊണ്ട ശേഷം സ്വിഫ്റ്റ് ഗ്ലോബൽ പേയ്മെന്റ് സിസ്റ്റത്തിൽ നിന്നും റഷ്യൻ ബാങ്കുകളെ ഉടനടി തടയുമെന്നും ധനകാര്യമന്ത്രാലയം വ്യക്തമാക്കി. കഴിഞ്ഞ ദിവസം ദക്ഷിണ കൊറിയ റഷ്യക്കെതിരെ കയറ്റുമതിക്ക് നിയന്ത്രണവും ഏർപ്പെടുത്തിയിരുന്നു. ഐടി, വ്യോമയാനം, ബഹിരാകാശം എന്നീ മേഖലകളുമായി ബന്ധപ്പെട്ട തന്ത്രപ്രധാനമായ വസ്തുക്കളുടെ കയറ്റുമതിക്കാണ് നിയന്ത്രണം ഏർപ്പെടുത്തിയിട്ടുള്ളത്. ലോകത്തെ ഏറ്റവും വലിയ എണ്ണ- വാതക നിർമാതാക്കളിലൊന്നായ എക്സോൺ, ആപ്പിൾ, ഫോർഡ്, ജനറൽ മോട്ടേഴ്സ് ഉൾപ്പെടെയുള്ള കമ്പനികളും റഷ്യക്കെതിരെ നിയന്ത്രണമേർപ്പെടുത്തിയിട്ടുണ്ട്. യുഎസ് എയ്റോസ്പേസ് കമ്പനിയായ ബോയിങും റഷ്യൻ വിമാനക്കമ്പനികൾക്കുള്ള സേവനങ്ങൾക്കും താത്ക്കാലികമായി വിലക്ക് ഏർപ്പെടുത്തി.

കീവ്: യൂറോപ്യൻ യൂണിയനിൽ തങ്ങളെയും ഉൾപ്പെടുത്തിയാൽ രാജ്യാന്തര സഖ്യം കൂടുതൽ കരുത്തുറ്റതാകുമെന്ന് വ്യക്തമാക്കി യുക്രൈൻ പ്രസിഡന്റ് സെലെൻസ്‌കി. യൂറോപ്യൻ യൂണിയനിൽ ചേരുന്നതിനുള്ള അപേക്ഷ സമർപ്പിച്ചതിന് പിന്നാലെയാണ് അദ്ദേഹത്തിന്റെ പ്രതികരണം. യുക്രൈന് യൂറോപ്യൻ യൂണിയന്റെ സഹായം ഏറ്റവും കൂടുതൽ ആവശ്യമുള്ള സമയമാണിതെന്നും ഇപ്പോൾ സഹായിച്ചില്ലെങ്കിൽ രാജ്യം എന്നന്നേക്കുമായി ഒറ്റപ്പെട്ട് പോകുമെന്നും അദ്ദേഹം അറിയിച്ചു.

നിങ്ങൾ യുക്രൈനൊപ്പമാണ് എന്ന് തെളിയിക്കാനുള്ള സമയമായി. അതിന് സാധിച്ചാൽ മരണത്തെ തോൽപിക്കാൻ ജീവിതത്തിനും ഇരുട്ടിനെ പരാജയപ്പെടുത്താൻ വെളിച്ചത്തിനും സാധിക്കുമെന്നും അദ്ദേഹം കൂട്ടിച്ചേർത്തു. അതേസമയം, യുക്രൈൻ സംഘർഷത്തിന്റെ പശ്ചാത്തലത്തിൽ പല രാജ്യങ്ങളും റഷ്യയ്ക്ക് ഉപരോധം ഏർപ്പെടുത്തി. യൂറോപ്യൻ യൂണിയനിലെ മൂന്ന് രാജ്യങ്ങൾ യുക്രൈന് എഴുപതോളം യുദ്ധവിമാനങ്ങൾ നൽകാൻ തീരുമാനമെടുത്തയായ വിവരങ്ങളും പുറ്ത്തുവരുന്നുണ്ട്. മിഗ് 29, എസ് യു 25 തുടങ്ങിയ വിമാനങ്ങൾ നൽകാനാണ് ബൾഗേറിയ, പോളണ്ട്, സ്ലൊവാക്യ എന്നീ രാജ്യങ്ങൾ തീരുമാനിച്ചത്. ഇതിൽ ബൾഗേറിയ 16 മിഗ് 29 യുദ്ധവിമാനങ്ങളും 14 എസ് യു 25 യുദ്ധവിമാനങ്ങളും നൽകും. പോളണ്ട്, സ്ലൊവാക്യ എന്നിവ യഥാക്രമം 28ഉം 12 ഉം മിഗ്29 യുദ്ധവിമാനങ്ങളും നൽകും.

യുക്രൈന് ആയുധങ്ങൾ വാങ്ങുന്നതിനായി ധനസഹായം നൽകാനും യൂറോപ്യൻ യൂണിയൻ തീരുമാനിച്ചിട്ടുണ്ട്. തങ്ങളിൽ ഒരാളായാണ് യുക്രെയിനെ കാണുന്നതെന്ന് യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ അറിയിച്ചു.