കാട്ടാനയുടെ ആക്രമണം വീണ്ടും ദുരന്തം വിതച്ച് വയനാട്ടിൽ യുവാവിന് ദാരുണാന്ത്യം
വയനാട്ടിൽ വീണ്ടും കാട്ടാനയുടെ ആക്രമണം. സുൽത്താൻ ബത്തേരി നൂൽപ്പുഴയിൽ കാട്ടാനയുടെ ആക്രമണത്തിൽ മാനു (45) എന്ന യുവാവാണ് മരിച്ചത്. കടയിൽ നിന്ന് സാധനങ്ങൾ വാങ്ങി മടങ്ങുമ്പോഴായിരുന്നു ആക്രമണം. കഴിഞ്ഞ കുറച്ച് മാസങ്ങളിലായി സംസ്ഥാനത്ത് കാട്ടാനകളുടെ ആക്രമണം വർദ്ധിച്ചിരിക്കുകയാണ്. വന്യജീവികൾ ജനവാസമേഖലയിൽ അധിവസിക്കുന്നത് പ്രതിരോധിക്കാനുള്ള നടപടികൾ ശക്തിപ്പെടുത്തണമെന്ന ആവശ്യം വീണ്ടും ഉയരുകയാണ്. അധികൃതർ അടിയന്തര ഇടപെടലുമായി മുന്നോട്ട് വരണമെന്ന് നാട്ടുകാർ ആവശ്യപ്പെടുന്നു.
അതേസമയം, ഇടുക്കി പെരുവന്താനം കൊമ്പൻപാറയിൽ സ്ത്രീ കാട്ടാനയുടെ ആക്രമണത്തിൽ കൊല്ലപ്പെട്ട സംഭവത്തിന് പിന്നാലെയാണ് വയനാട്ടിലും ഒരു ജീവൻ നഷ്ടമായത്. പെരുവന്താനത്ത് കാട്ടാനയുടെ ആക്രമണത്തിൽ മരിച്ചത് നെല്ലിവിള പുത്തൻ വീട്ടിൽ സോഫിയ ഇസ്മയിൽ (45) ആയിരുന്നു. തുടർച്ചയായ കാട്ടാന ആക്രമണങ്ങൾ നാട്ടുകാരിൽ ഭീതി പരത്തുകയാണ്.
