General (Page 1,271)

On:

കവരത്തി: പുതുവത്സരത്തിൽ ലക്ഷദ്വീപ് നിവാസികൾക്ക് സമ്മാനവുമായി നരേന്ദ്ര മോദി സർക്കാർ. രണ്ട് ആർട്സ് ആൻഡ് സയൻസ് കോളജുകളാണ് ഉപരാഷ്ട്രപതി എം. വെങ്കയ്യ നായിഡു നാടിന് സമർപ്പിച്ചത്. കടമത്ത് ദ്വീപിലും ആന്ത്രോത്ത് ദ്വീപിലുമാണ് കോളേജുകൾ സ്ഥാപിച്ചത്.

ലക്ഷദ്വീപുകാരുടെ ആതിഥേയ മര്യാദ മാതൃകപരമാണെന്ന് ഉദ്ഘാടന ചടങ്ങിൽ വെങ്കയ്യാ നായിഡു വ്യക്തമാക്കി. പെൺകുട്ടികൾ അടക്കമുള്ളവർക്ക് ഉന്നത വിദ്യാഭ്യാസം നേടാനും മികച്ച ഉദ്യോഗങ്ങൾ സ്വന്തമാക്കാനും പുതിയ കലാലയങ്ങൾ വഴി തുറക്കുമെന്ന് അദ്ദേഹം അറിയിച്ചു. കുട്ടികളുടെ നൈപുണ്യം വികസിപ്പിക്കണം. കൂടുതൽ ഹ്രസ്വകാല കോഴ്സുകൾ തുടങ്ങാൻ കോളജുകൾ അഫിലിയേറ്റ് ചെയ്തിരിക്കുന്ന പോണ്ടിച്ചേരി സർവ്വകലാശാലയ്ക്ക് അദ്ദേഹം നിർദ്ദേശം നൽകി. ഇത്തരം കോഴ്സുകൾ കുട്ടികളുടെ തൊഴിൽ ലഭ്യത വർധിപ്പിക്കുമെന്നും അദ്ദേഹം കൂട്ടിച്ചേർത്തു.

കോളജുകളിലെ അക്വാകൾച്ചർ, ടൂറിസം, ഹോസ്പിറ്റാലിറ്റി കോഴ്സുകൾ വിദ്യാർത്ഥികൾ പഠിക്കണം. ലക്ഷദ്വീപിൽ ഇക്കോ ടൂറിസം, മത്സ്യബന്ധനം എന്നിവയ്ക്ക് വൻ സാധ്യതകളുണ്ടെന്നും അദ്ദേഹം ചൂണ്ടിക്കാട്ടി.

On:

തിരുവനന്തപുരം: മുഖ്യമന്ത്രിയുടെ ദുരിതാശ്വാസ നിധിയിലേക്ക് പണം നൽകാനാകില്ലെന്ന ഉത്തരവിനെതിരെ സുപ്രീം കോടതിയെ സമീപിച്ച് ഗുരുവായൂർ ദേവസ്വം. ദുരിതാശ്വാസ നിധിയിലേക്ക് പണം നൽകുന്നത് നിയമപരമാണെന്ന് ദേവസ്വം ബോർഡ് ഫയൽ ചെയ്ത ഹർജിയിൽ വ്യക്തമാക്കുന്നത്. ഭക്തരുടെ താത്പര്യം കൂടി കണക്കിലെടുത്താണ് ദുരിതാശ്വാസ നിധിയിലേക്ക് പണം നൽകിയതെന്നും ക്ഷേത്ര ആവശ്യങ്ങൾക്കല്ലാതെയും ഫണ്ട് നൽകുന്നതിൽ തെറ്റില്ലെന്നും ഹർജിയിൽ പറയുന്നു. സ്റ്റാൻഡിങ് കൗൺസൽ എം.എൽ. ജിഷ്ണുവാണ് ഗുരുവായൂർ ദേവസ്വം ബോർഡിന് വേണ്ടി ഹർജി സമർപ്പിച്ചത്.

10 കോടി രൂപയാണ് മുഖ്യമന്ത്രിയുടെ ദുരിതാശ്വാസനിധിയിലേക്ക് ഗുരുവായൂർ ദേവസ്വം ബോർഡ് പ്രളയ കാലത്തും കോവിഡ് കാലത്തുമായി കൈമാറിയിരുന്നത്. ദുരിതാശ്വാസനിധിയിലേക്ക് സംഭാവന നൽകിയത് ദേവസ്വം ബോർഡിന്റെ പ്രവർത്തന പരിധിയിൽ വരില്ലെന്നായിരുന്നു ഹൈക്കോടതി ഫുൾ ബെഞ്ചിന്റെ ഉത്തരവ്. ഗുരുവായൂർ ദേവസ്വം നിയമത്തിലെ വകുപ്പ് 27 പ്രകാരം ദുരിതാശ്വാസ ഫണ്ടിനായി പണം നീക്കിവയ്ക്കാനാകില്ലെന്ന് കോടതി അറിയിച്ചിരുന്നു.

ട്രസ്റ്റി എന്ന നിലയിൽ സ്വത്തുവകകൾ പരിപാലിക്കൽ ആണ് ദേവസ്വം ബോർഡിന്റെ ചുമതല. ഗുരുവായൂർ ക്ഷേത്രത്തിലെ സ്വത്തുവകകളുടെ അവകാശി ഗുരുവായൂരപ്പനാണെന്നും ഹൈക്കോടതി പറഞ്ഞിരുന്നു. അതേസമയം ദേവസ്വം നിയമത്തിന്റെ അടിസ്ഥാനത്തിൽ സംഭാവന കൈമാറാൻ തങ്ങൾക്ക് അവകാശം ഉണ്ടെന്നാണ് സുപ്രീം കോടതിയിൽ ഫയൽ ചെയ്തിരിക്കുന്ന ഹർജിയിൽ ദേവസ്വം ബോർഡ് ചൂണ്ടിക്കാട്ടുന്നു.

On:

പാലക്കാട്: കേരളാ പോലീസിനും മുൻ എംഎൽഎയും കെടിഡിസി ചെയർമാനുമായ പി.കെ.ശശിക്കുമെതിരെ സിപിഎം ജില്ലാ സമ്മേളനത്തിൽ രൂക്ഷ വിമർശനം. സർക്കാരിന് നാണക്കേടുണ്ടാക്കുന്ന രീതിയിലാണ് പോലീസ് പ്രവർത്തിക്കുന്നതെന്ന് പ്രതിനിധികൾ സമ്മേളനത്തിൽ ചൂണ്ടിക്കാട്ടി. മുഖ്യമന്ത്രിയുടെ സാന്നിധ്യത്തിലായിരുന്നു പ്രതിനിധികളുടെ വിമർശനം.

പോലീസിന്റെ സമീപനം ശരിയല്ല. സർക്കാരിനെ പ്രതിരോധത്തിലാക്കുന്ന സമീപനമാണ് പോലീസിന്റെ ഭാഗത്ത് നിന്നുണ്ടാകുന്നതെന്നായിരുന്നു പ്രതിനിധികളുടെ പ്രതികരണം. സാധാരണ മറ്റ് നേതാക്കൻമാർക്ക് ഇല്ലാത്ത പരിഗണനയാണ് പി.കെ ശശിക്ക് ലഭിച്ചതെന്ന വിമർശനവും സമ്മേളനത്തിൽ ഉയർന്നു. പട്ടാമ്പി ഏരിയയിൽ നിന്നുള്ള പ്രതിനിധികളാണ് ചർച്ചയിൽ പങ്കെടുത്തത്. ജില്ല നേതൃത്വത്തിനെതിരെയും സംസ്ഥാന കമ്മറ്റി അംഗങ്ങൾക്കെതിരെയും വിമർശനങ്ങളുണ്ടായി. ജില്ലാ നേതൃത്വം ഒന്നിനും കൊള്ളാത്തവരായി മാറിയതിനാലാണ് ജില്ലയിൽ പ്രാദേശിക ഘടകങ്ങളിൽ വിഭാഗീയത രൂക്ഷമായതെന്ന് പ്രതിനിധികൾ പറഞ്ഞു.

പല സ്ഥലങ്ങളിലും പ്രശ്നങ്ങൾ രൂക്ഷമായത് ജില്ല സെക്രട്ടറിയുടെ പിടിപ്പ് കേട് കാരണമാണ്. സംസ്ഥാന കമ്മറ്റി അംഗം എൻ.എൻ കൃഷ്ണദാസിനെതിരെയും സമ്മേളനത്തിൽ വിമർശനമുയർന്നു. ചില നേതാക്കൾ ചിലരെ തോഴൻമാരാക്കി കൊണ്ടുനടക്കുന്നു. ഇത് പാർട്ടിക്ക് ഭൂഷണമല്ലെന്നാണ് പ്രതിനിധികളുടെ വാദം.

On:

തിരുവനന്തപുരം: ഗവർണർ ആരിഫ് മുഹമ്മദ് ഖാനെതിരെ ആരോപണവുമായി പ്രതിപക്ഷനേതാവ് വി ഡി സതീശൻ. രാഷ്ട്രപതിക്ക് ഡി.ലിറ്റ് നൽകുന്നതുമായി ബന്ധപ്പെട്ട വിഷയവുമായി ബന്ധപ്പെട്ടാണ് വി ഡി സതീശൻ ഗവർണർക്കെതിരെ രംഗത്തെത്തിയത്. രാഷ്ട്രപതിക്ക് ഡി.ലിറ്റ് നൽകാൻ കേരള യൂണിവേഴ്‌സിറ്റി വൈസ് ചാൻസലർക്ക് ഗവർണർ നിർദേശം നൽകിയത് തെറ്റാണെന്നും തെറ്റ് തിരുത്തണമെന്നും അദ്ദേഹം ആവശ്യപ്പെട്ടു.

ഗവർണർ വി.സിയെ വിളിച്ച് വരുത്തി ആർക്കെങ്കിലും ഡീലിറ്റ് കൊടുക്കാൻ പറഞ്ഞിട്ടുണ്ടെങ്കിൽ അത് നിയമ വിരുദ്ധമാണ്. പക്ഷേ ഇവിടുത്തെ യഥാർഥ പ്രശ്‌നം അതല്ല. സർവകലാശാലകളുടെ കാര്യത്തിൽ സർക്കാരിന്റെ വഴിവിട്ട ഇടപെടലുകൾ ആദ്യം ഗവർണർ അംഗീകരിക്കുകയാണ് ചെയ്തത്. കണ്ണൂർ വി.സി നിയമനത്തിൽ തെറ്റ് പറ്റിയെന്ന് ഗവർണർക്ക് ബോധ്യം ഉണ്ടെങ്കിൽ തെറ്റ് തിരുത്തണമെന്ന് അദ്ദേഹം വ്യക്തമാക്കി.

വൈസ് ചാൻസലറെ സ്ഥാനത്ത് നിന്നും നീക്കണം. സർവകലാശാലകളുമായി ബന്ധപ്പെട്ട വിവാദത്തിൽ നിന്ന് ഒളിച്ചോടാനുള്ള തന്ത്രമാണ് ഡീലിറ്റുമായി ബന്ധപ്പെട്ട വാർത്തകളെന്നും അദ്ദേഹം ചൂണ്ടിക്കാട്ടി.

അതേസമയം കെ റെയിൽ പദ്ധതിക്കെതിരെയും അദ്ദേഹം വിമർശനം ഉന്നയിച്ചു. ഡി.പി.ആർ പുറത്ത് വിടാതെ എന്തിനാണ് സിൽവർ ലൈൻ പദ്ധതിക്കായി സ്ഥലം ഏറ്റെടുക്കണമെന്ന വാശിയെന്ന് അദ്ദേഹം ചോദിച്ചു. സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും ഈ പദ്ധതി എന്താണെന്ന് അറിയില്ല. കോടിയേരിയുടെ നിസഹായാവസ്ഥയിൽ സഹതാപമുണ്ട്. ചോദ്യങ്ങൾക്ക് ഉത്തരം പറയാതെ പദ്ധതി നടപ്പാക്കാൻ അനുവദിക്കില്ല. സർക്കാരിന്റെ ധാർഷ്ട്യവും ധിക്കാരവും പ്രതിപക്ഷത്തോട് വേണ്ട. അതിനെ ചെറുത്ത് തോൽപ്പിക്കാനുള്ള കരുത്ത് യു.ഡി.എഫിനുണ്ടെന്ന് മുഖ്യമന്ത്രിക്ക് ബോധ്യപ്പെടുമെന്നും അദ്ദേഹം കൂട്ടിച്ചേർത്തു.

On:

ജമ്മു കശ്മീരിലെ മാതാ വൈഷ്‌ണോ ദേവി ക്ഷേത്രത്തില്‍ പുതുവര്‍ഷത്തോടനുബന്ധിച്ചുള്ള പ്രത്യേക പ്രാര്‍ത്ഥനക്കിടെയുണ്ടായ തിക്കിലും തിരക്കിലും പെട്ട് 12 മരണം. നിരവധി പേര്‍ക്ക് പരിക്കേല്‍ക്കുകയും പരിക്കേറ്റവരെ ആശുപത്രിയിലേക്ക് മാറ്റുകയും ചെയ്തു.

ത്രികുട മലയിലെ ക്ഷേത്രത്തില്‍ ശനിയാഴ്ച പുലര്‍ച്ചെ 2.45 ഓടെയാണ് സംഭവം നടന്നത്. പ്രവേശന പാസ്സില്ലാതെ വലിയൊരു കൂട്ടം ഭക്തര്‍ ക്ഷേത്ര ഭവനില്‍ പ്രവേശിക്കുകയായിരുന്നെന്ന് അധികൃതര്‍ പറഞ്ഞു. ചെറിയ വാക്കുതര്‍ക്കങ്ങളെ തുടര്‍ന്ന് പരസ്പരം ഉന്തും തള്ളുമുണ്ടാവുകയും ഇതിനെ തുടര്‍ന്നുണ്ടായ തിക്കിലും തിരക്കിലുമാണ് അപകടമുണ്ടായതെന്നും ജമ്മുകശ്മീര്‍ ഡിജിപി ദില്‍ബാഗ് സിങ് വ്യക്തമാക്കി. ഡല്‍ഹി, ഹരിയാണ, പഞ്ചാബ് എന്നിവിടങ്ങളില്‍ നിന്നുള്ളവരും ജമ്മുകശ്മീരില്‍ നിന്നുള്ളവരുമാണ് മരിച്ചതെന്നാണ് പ്രാഥമിക വിവരം. രക്ഷാപ്രവര്‍ത്തനം പുരോഗമിക്കുകയാണെന്ന് എഡിജിപി മുകേഷ് സിങ് അറിയിച്ചു.

അപകടത്തില്‍ മരിച്ചവരുടെ കുടുംബാംഗങ്ങളെ പ്രധാനമന്ത്രി നരേന്ദ്ര മോദി അനുശോചനം അറിയിക്കുകയും ദേശീയ ദുരിതാശ്വാസ നിധിയില്‍ നിന്ന് രണ്ടു ലക്ഷം രൂപ വീതം പ്രഖ്യാപിക്കുകയും ചെയ്തിട്ടുണ്ട്. പരിക്കേറ്റവര്‍ക്ക് 50,000 രൂപയും അനുവദിച്ചു. മരിച്ചവരുടെ അടുത്ത ബന്ധുക്കള്‍ക്ക് 10 ലക്ഷം രൂപ വീതവും പരിക്കേറ്റവര്‍ക്ക് 2 ലക്ഷം രൂപ വീതവും ജമ്മു കശ്മീര്‍ ലെഫ്റ്റണന്റ് ജനറല്‍ മനോജ് സിന്‍ഹയും പ്രഖ്യാപിച്ചിട്ടുണ്ട്.

On:

ന്യൂഡൽഹി: ഇന്ത്യയിൽ പ്രവാസത്തിൽ കഴിയുന്ന ടിബറ്റ് ഭരണകൂടം സംഘടിപ്പിച്ച പരിപാടിയിൽ പങ്കെടുത്ത ഇന്ത്യൻ എം പിമാർക്ക് കത്ത് നൽകി ചൈന. എംപിമാരെ താക്കീത് നൽകി കൊണ്ടുള്ള കത്താണ് ചൈന കൈമാറിയത്. ചെനീസ് എംബസിയുടെ രാഷ്ട്രീയ ഉപദേശകൻ ഷൂ യോംഗ്‌ഷെംഗിന്റെ പേരിലുള്ള കത്താണ് എംപിമാർക്ക് ലഭിച്ചത്. ജയറാം രമേശ്, മനീഷ് തിവാരി, സുജീത് കുമാർ, രാജീവ് ചന്ദ്രശേഖർ, രാംദാസ് അത്താവാലെ, മേനകാ ഗാന്ധി തുടങ്ങിയവരാണ് ടിബറ്റ് ഭരണകൂടം സംഘടിപ്പിച്ച പരിപാടിയിൽ പങ്കെടുത്തത്.

ദലൈലാമ നേതൃത്വം നൽകുന്ന ടിബറ്റ് ഭരണകൂടത്തെ വിഘടനവാദികളെന്നും അനധികൃത സംഘടനയെന്നുമാണ് എംപിമാർക്ക് അയച്ച ചൈന കത്തിൽ വിശേഷിപ്പിച്ചിരിക്കുന്നത്. ഇന്ത്യൻ സർക്കാർ ടിബറ്റ് സ്വയംഭരണപ്രദേശത്തെ ചൈനയുടെ ഭാഗമായി അംഗീകരിച്ചിട്ടുണ്ടെന്നും ടിബറ്റിനെ ചൈനയിൽ നിന്നും വേർതിരിക്കാനുള്ള വിഘടനവാദികളുടെ എല്ലാ ശ്രമങ്ങളെയും ഏതുവിധേനയും അടിച്ചമർത്തുമെന്നും കത്തിൽ വ്യക്തമാക്കിയിട്ടുണ്ട്. ഇന്ത്യൻ നേതാക്കൾക്കെതിരെ അപകീർത്തികരമായ പരാമർശങ്ങളും കത്തിലുണ്ടെന്നാണ് വിവരം. നിങ്ങൾ ഇന്ത്യയിലെ മുതിർന്ന രാഷ്ട്രീയ പ്രവർത്തകൻ ആയതിനാൽ തന്നെ ഇരു രാജ്യങ്ങളും തമ്മിലുള്ള ബന്ധങ്ങളെ കുറിച്ച് അറിഞ്ഞിരിക്കേണ്ടതുണ്ടെന്നും വിഷയത്തിന്റെ ഗൗരവം ഉൾക്കൊണ്ട് ഇത്തരം കാര്യങ്ങളിൽ നിന്ന് ഭാവിയിൽ വിട്ടുനിൽക്കുന്നതാണ് നല്ലതെന്നും കത്തിൽ പറയുന്നു.

അതേസമയം ചടങ്ങിൽ പങ്കെടുത്ത എല്ലാ ജനപ്രതിനിധികൾക്കും കത്ത് ലഭിച്ചിട്ടില്ലെന്നാണ് വിവരം. മനീഷ് തിവാരിയ്ക്ക് ഇതുവരെ കത്ത് ലഭിച്ചിട്ടില്ല. അദ്ദേഹം തന്നെയാണ് ഇക്കാര്യം അറിയിച്ചത്. അഥവാ കിട്ടിയാൽ തന്നെ ഇത്തരം തരംതാണ കത്തുകൾക്ക് വിശദീകരണം നൽകി തന്റെ വില നശിപ്പിക്കാൻ ഉദ്ദേശിക്കുന്നില്ലെന്നും തിവാരി ട്വിറ്ററിൽ കുറിച്ചു.

ചൈനയുടെ നടപടിക്കെതിരെ ടിബറ്റ് പ്രവാസ ഭരണകൂടത്തിന്റെ വക്താവ് ടെൻസിംഗ് ലക്ഷയ് രൂക്ഷ വിമർശനം ഉന്നയിച്ചു. ടിബറ്റ് വിഷയം ചൈനയുടെ ആഭ്യന്തരപ്രശ്‌നമല്ലെന്നും ടിബറ്റിൽ സംഭവിക്കുന്ന കാര്യങ്ങളിൽ ലോകത്തുള്ള എല്ലാ രാജ്യങ്ങൾക്കും ആശങ്കയുണ്ടെന്നും ടെൻസിംഗ് വ്യക്തമാക്കി.

On:

തിരുവനന്തപുരം: പുതുവർഷത്തിൽ പൊതുമരാമത്ത് വകുപ്പിലെ മുഴുവൻ ഓഫീസുകളിലും ഇ-ഓഫീസ് സംവിധാനം നിലവിൽ വരും. വകുപ്പിലെ 716 ഓഫീസുകളിലും ഇ-ഓഫീസ് സംവിധാനം സജ്ജമാക്കി കഴിഞ്ഞു. സമ്പൂർണ്ണ ഇ-ഓഫീസ് പ്രഖ്യാപനം പൊതുമരാമത്ത്-ടൂറിസം വകുപ്പ് മന്ത്രി പി എ മുഹമ്മദ് റിയാസ് തിരുവനന്തപുരത്ത് നിർവ്വഹിക്കും.

ജനുവരി 1 രാവിലെ 9 മണിക്ക് പി എം ജിയിലെ പൊതുമരാമത്ത് കെട്ടിട ഉപവിഭാഗം ഓഫീസിലാണ് ഉദ്ഘാടനം. ഇ-ഓഫീസ് നിലവിൽ വരുന്നതോടെ വകുപ്പിലെ ഫയൽ നീക്കം കൂടുതൽ വേഗത്തിലും സുതാര്യവും ആകും. എൻ.ഐ.സി വികസിപ്പിച്ച സോഫ്റ്റ്വെയർ ഐ.ടി മിഷൻ മുഖേനയാണ് നടപ്പാക്കിയത്. ഓഫീസുകളിൽ നെറ്റ്‌വർക്ക് സംവിധാനം നടപ്പാക്കുന്നത് പൊതുമരാമത്ത് ഇലക്ട്രോണിക്സ് വിഭാഗമാണ്.

12 സർക്കിൾ ഓഫീസുകളിലും 68 ഡിവിഷൻ ഓഫീസുകളിലും 206 സബ്-ഡിവിഷൻ ഓഫീസുകളിലും 430 സെക്ഷൻ ഓഫീസുകളിലും വി.പി.എൻ നെറ്റ്‌വർക്ക് വഴിയോ കെ-സ്വാൻ വഴിയോ ബന്ധിപ്പിച്ചാണ് ഇ-ഓഫീസ് സംവിധാനം നടപ്പാക്കുന്നത്. ഇതിന്റെ ഭാഗമായി സോഫ്റ്റ്‌വെയറിൽ 6900 ൽ പരം ഉദ്യോഗസ്ഥർക്ക് കൈകാര്യം ചെയ്യാനുള്ള ക്രമീകരണം നടത്തി. ഇവർക്കായുള്ള ഇ-മെയിൽ ഐ.ഡിയും നൽകി. ഫയലുകളിൽ അനാവശ്യമായ കാലതാമസം ഒഴിവാക്കാൻ കഴിയുമെന്നതും ഇതിന്റെ പ്രത്യേകതയാണ്.

On:

തിരുവനന്തപുരം: രാഷ്ട്രപതി രാം നാഥ് കോവിന്ദിനു ഡി ലിറ്റ് നൽകണമെന്ന ഗവർണർ ആരിഫ് മുഹമ്മദ് ഖാന്റെ നിർദേശം നിരസിച്ച് കേരള സർവകലാശാല. രാംനാഥ് കോവിന്ദിന് ഡി ലിറ്റ് നൽകാൻ സർക്കാരിനും സിൻഡിക്കറ്റിനും താത്പര്യമില്ലെന്നാണ് വൈസ് ചാൻസലർ ഡോ.വി.പി.മഹാദേവൻ പിള്ള ഗവർണർക്ക് രേഖാമൂലം നൽകിയ മറുപടി.

അതേസമയം സർക്കാർ നീക്കത്തിന് തിരിച്ചടിയായി സംസ്‌കൃത സർവകലാശാലയിൽ സർക്കാർ നിർദേശിച്ചവർക്കു ഡി ലിറ്റ് നൽകാനുള്ള തീയതി ഗവർണർ മരവിപ്പിച്ചു. മുൻ വിസി ഡോ.എൻ.പി.ഉണ്ണി, നടി ശോഭന, ഡോ.ടി.എം.കൃഷ്ണ എന്നിവർക്കു ഡി ലിറ്റ് നൽകാനാണു സംസ്‌കൃത സർവകലാശാല തീരുമാനിച്ചത്. ഇതു സംബന്ധിച്ച സിൻഡിക്കറ്റ് യോഗത്തിന്റെ നിർദേശം ഗവർണർ അംഗീകരിക്കുകയും ചെയ്തിരുന്നു. ഇതാണ് ഗവർണർ ഇപ്പോൾ മരവിപ്പിച്ചത്. താൻ ചാൻസലർ പദവി വഹിക്കുമ്പോൾ രാജ്യത്തിന്റെ അഭിമാനത്തിനു ക്ഷതം ഉണ്ടാക്കുന്ന തീരുമാനങ്ങൾ സർക്കാരിന്റെ ഭാഗത്തു നിന്ന് ഉണ്ടായെന്നായിരുന്നു ഗവർണറുടെ പ്രതികരണം.

രാഷ്ട്രപതിക്കു ഡി ലിറ്റ് നൽകണമെന്നു ഗവർണർ നിർദ്ദേശിച്ചത് കേരള വിസിയെ വിളിച്ചു വരുത്തിയാണ്. ഇക്കാര്യം രേഖാമൂലം നൽകുകയും ചെയ്തു. മുൻപ് കെ.ആർ.നാരായണനു ഡി ലിറ്റ് അനുവദിച്ച കീഴ്‌വഴക്കമുണ്ട്. ഗവർണറുടെ നിർദേശം വൈസ് ചാൻസലർ, സിൻഡിക്കറ്റ് അംഗങ്ങളെ അറിയിക്കുകയും അവർ ഭരണ നേതൃത്വത്തിന്റെ അഭിപ്രായം തേടുകയും ചെയ്തു.

എന്നാൽ രാഷ്ട്രപതിക്കു ഡി ലിറ്റ് നൽകാൻ താൽപര്യം ഇല്ലെന്നായിരുന്നു ഭരണ നേതൃത്വത്തിന്റെ മറുപടി. തുടർന്നാണു വിസി ഗവർണറെ നേരിൽ കണ്ട് രേഖാമൂലം മറുപടി നൽകുകയായിരുന്നു. സിൻഡിക്കറ്റ് യോഗം ചേരാതെയാണു തീരുമാനം എടുത്തതെന്നാണ് ആക്ഷേപം. സിൻഡിക്കറ്റ് ചേർന്നാൽ അംഗങ്ങളായ 6 സർക്കാർ പ്രതിനിധികൾക്ക് അവിടെ സർക്കാരിന്റെ അഭിപ്രായം പറയേണ്ടി വരുമായിരുന്നു. അത് ഒഴിവാക്കാൻ യോഗം തന്നെ വേണ്ടെന്നുവച്ചെന്ന ആരോപണമാണ് ഉയരുന്നത്.

On:

തിരുവനന്തപുരം: കേരളാ പോലീസ് സേനയിൽ വൻ അഴിച്ചുപണി. വിവിധ ജില്ലാ പോലീസ് മേധാവിമാർക്ക് സ്ഥലംമാറ്റവും സീനിയർ ഉദ്യോഗസ്ഥർക്ക് പ്രമോഷനും നൽകി. തിരുവനന്തപുരത്ത് പുതിയ കമ്മീഷണറും റൂറൽ എസ്.പിയും എത്തുന്നു എന്നതാണ് നിർണായകമായ മാറ്റം. കോഴിക്കോട് സിറ്റി പൊലീസ് കമ്മീഷണർ പദവി ഐജി റാങ്കിലേക്ക് ഉയർത്തുകയും ചെയ്തിട്ടുണ്ട്. എഡിജിപി, ഐജി റാങ്കിലേക്ക് പ്രമോഷനോട് കൂടി വിവിധ ഉദ്യോ?ഗസ്ഥരെ മാറ്റിനിയമിച്ചിട്ടുള്ള ഉത്തരവും പുറത്തുവന്നു. ഐജിമാരായ മഹിപാൽ യാദവ്, ബൽറാം കുമാർ ഉപാധ്യായ എന്നിവർക്ക് എഡിജിപിമാരായി സ്ഥാനക്കയറ്റം നൽകി.

എഡിജിപി യോഗോഷ് ഗുപ്തയെ പോലീസ് അക്കാദമി ഡയറക്ടറായി മാറ്റി നിയമിച്ചു. ട്രെയിനിംഗ് ചുമതലയുള്ള എഡിജിപിയായി ബൽറാം കുമാർ ഉപാധ്യായക്ക് പുതിയ നിയമനം നൽകി. ക്രമസമാധാന ചുമതലയുള്ള ദക്ഷിണമേഖല ഐ.ജി ഹർഷിത അട്ടല്ലൂരിയെ ഇന്റലിജൻസിലേക്ക് മാറ്റുകയും ചെയ്തു. ഐ.ജി ജി.സ്പർജൻ കുമാർ തിരുവനന്തപുരം സിറ്റി പൊലീസ് കമ്മീഷണറാവും. ആറ് ഡിഐജിമാർക്ക് ഐജി റാങ്കിലേക്ക് സ്ഥാനക്കയറ്റം നൽകി.

ഐജി റാങ്കിലേക്ക് എത്തിയ അനൂപ് കുരുവിള ജോണിനെ തീവ്രവാദ വിരുദ്ധ സ്‌ക്വാഡിൽ നിയമിച്ചു. ട്രാഫിക്കിന്റെ ചുമതലയും അദ്ദേഹത്തിന് നൽകും. പുതിയ ദക്ഷിണമേഖല ഐജിയായി പി.പ്രകാശിനെയും പോലീസ് അക്കാദമിയിലേക്ക് കെ.സേതുരാമനെയും നിയമിച്ചു. കെ പി ഫിലിപ്പിന് ക്രൈംബ്രാഞ്ചിൽ നിയമിക്കുകയും ചെയ്തു. കോഴിക്കോട് സിറ്റി പോലീസ് കമ്മീഷണർ സ്ഥാനം ഐജി റാങ്കിലേക്ക് ഉയർത്തുകയും ചെയ്തിട്ടുണ്ട്. പ്രമോഷൻ ലഭിച്ച നിലവിലെ കമ്മീഷണർ എ.വി.ജോർജ് കോഴിക്കോട് സിറ്റി പോലീസ് കമ്മീഷണറായി തുടരും.

അഞ്ച് എസ്.പിമാരെ ഡിഐജി റാങ്കിലേക്കും ഉയർത്തിയിട്ടുണ്ട്. പ്രമോഷൻ ലഭിച്ച ആർ.നിശാന്തിനി തിരുവനന്തപുരം റേഞ്ച് ഡിഐജിയാവും. ഗരുഡിൻ ആംഡ് പോലീസ് ബറ്റാലിയനിൽ സഞ്ജയ് കുമാർ നിയമിതനായി. കണ്ണൂർ റേഞ്ച് ഐജിയായി രാഹുൽ ആർ നായർ തുടരും. പുട്ട വിമലാദിത്യ, അജിത ബീഗം, സതീഷ് ബിനോ എന്നിവർ കേന്ദ്ര സർവ്വീസിലേക്ക് ഡെപ്യൂട്ടേഷനിൽ പ്രവേശിച്ചു.

എസ്.പി അംഗിത് അശോകിനെ തിരുവനന്തപുരം ഡിസിപിയായി നിയമിച്ചു. വൈഭവ് സക്ക്‌സേനയാണ് പുതിയ കാസർകോഡ് എസ്.പി. പി.ബി രാജീവിനെ കണ്ണൂർ റൂറൽ എസ്.പിയായും ആമോസ് മാമനെ കോഴിക്കോട് ഡിസിപിയായും നിയമിച്ചു. സ്വപ്നിൽ മധു കർ മഹാജൻ പുതിയ പത്തനംതിട്ട എസ്.പിയാവും. ദിവ്യ ഗോപിനാഥിന് തിരുവനന്തപുരം റൂറൽ എസ്.പിയായും ഐശ്വര്യ ഡോഗ്രയ്ക്കും തൃശ്ശൂർ റൂറൽ എസ്.പിയായും നിയമനം നൽകി.

On:

ന്യൂഡൽഹി: 2019-20 സാമ്പത്തിക വർഷത്തേക്കുള്ള ഇൻകം ടാക്‌സ് റിട്ടേൺ ഇ-വെരിഫിക്കേഷൻ പൂർത്തിയാക്കാത്ത ഉപഭോക്താക്കൾക്ക് സമയം നീട്ടി നൽകി. കേന്ദ്ര പ്രത്യക്ഷ നികുതി ബോർഡാണ് സമയം നീട്ടി നൽകിയുള്ള ഉത്തരവ് പുറപ്പെടുവിച്ചത്. 2022 ഫെബ്രുവരി 28 വരെയാണ് ഇ-വെരിഫിക്കേഷൻ പൂർത്തിയാക്കാൻ സമയം നീട്ടി നൽകിയത്. ഡിജിറ്റൽ സിഗ്‌നേച്ചറില്ലാതെ ഇല്‌ക്ട്രോണിക് മാർഗങ്ങളിലൂടെ സമർപ്പിക്കുന്ന ഐടി റിട്ടേണുകൾ, ആധാർ ഒടിപി, നെറ്റ് ബാങ്കിങ്, ഡിമാറ്റ് അക്കൗണ്ട് വഴിയുള്ള കോഡ്, എടിഎം കാർഡ് തുടങ്ങിയ ഏതെങ്കിലും മാർഗത്തിലൂടെ റിട്ടേൺ സമർപ്പിച്ച് 120 ദിവസത്തിനുള്ളിൽ വെരിഫിക്കേഷൻ പൂർത്തിയാക്കണമെന്നാണ് വ്യവസ്ഥ.

സമാന്തരമായി നികുതി ദായകർക്ക് ഐടി റിട്ടേൺ അപേക്ഷയുടെ ഫിസിക്കൽ കോപ്പി ബെംഗളൂരുവിലെ സെൻട്രലൈസ്ഡ് പ്രൊസസിങ് സെന്ററിലേക്ക് അയച്ചുകൊടുക്കുകയും ചെയ്യാം. വെരിഫിക്കേഷൻ പൂർത്തിയാകാത്ത കേസുകളിൽ ഐടി റിട്ടേൺ സമർപ്പിച്ചിട്ടില്ലെന്നാണ് കണക്കാക്കപ്പെടുന്നത്.