ജീവനക്കാര്ക്കുള്ള സൗജന്യ സേവനങ്ങള് നിര്ത്തലാക്കി മെറ്റ
അമേരിക്കന് ഐടി കമ്പനികളിലെ ജീവനക്കാര്ക്ക് ലഭിക്കുന്ന സുഖസൗകര്യങ്ങള് ഏറെയാണെന്ന് നാം കേട്ടിട്ടുണ്ട്. വസ്ത്രങ്ങള് സൗജന്യമായി കഴുകാനുള്ള സൗകര്യവും ഡ്രൈ ക്ലീന്, പരിചാരക സേവനം പോലുള്ളവയും ജീവനക്കാര്ക്ക് മെറ്റ നല്കി വന്നിരുന്നു. എന്നാല്, ഇനി മുതല് ജീവനക്കാര്ക്ക് ഇത്തരം സംവിധാനങ്ങളൊന്നുമുണ്ടാവില്ലെന്ന് കമ്പനി അറിയിച്ചു. ഓഫീസിലെത്തി ജോലി ചെയ്യുന്നവര്ക്ക് നല്കി വന്നിരുന്ന അധിക സൗകര്യങ്ങളാണ് കമ്പനി നിര്ത്തലാക്കുന്നത്.
ഒപ്പം സൗജന്യമായി നല്കി വന്നിരുന്ന രാത്രിഭക്ഷണ സമയം ആറ് മണിയായിരുന്നത് 6.30 ആക്കി മാറ്റിയെന്നും ജീവനക്കാര് പറയുന്നു. ഇതിനാല് വളരെ കുറച്ച് പേര്ക്ക് മാത്രമേ സൗജന്യ ഭക്ഷണം ലഭിക്കുകയുള്ളൂ. കാരണം 6.00 മണിക്ക് തന്നെ അവസാന ഷിഫ്റ്റ് കഴിയും. വീട്ടിലും ഓഫീസിലുമായി ജോലി ചെയ്യുന്ന ഹൈബ്രിഡ് തൊഴിലാളികളുടെ ആവശ്യങ്ങള് നടപ്പിലാക്കുന്നതിനായി ഓണ്സൈറ്റ് സേവനങ്ങളും സൗകര്യങ്ങളും ക്രമീകരിച്ചതായി ഫേസ്ബുക്ക് വക്താവ് പറഞ്ഞു.
6.30 വരെ കാത്തിരുന്ന് സൗജന്യ ഭക്ഷണം കഴിക്കണോ അതോ വീട്ടിലേക്ക് സൗജന്യയാത്ര വേണോ എന്ന് ജീവനക്കാര്ക്ക് തീരുമാനിക്കാം. മാര്ച്ച് 28-നാണ് വീടുകളില് നിന്ന് ജീവനക്കാര് ഫേസ്ബുക്ക് ഓഫീസുകളിലേക്ക് തിരിച്ചുവരുന്നത്. ഓഫീസിലെത്തുന്നവര് ബൂസ്റ്റര് ഡോസ് വാക്സിനെടുക്കണം. സ്ഥിരം വര്ക്ക് അറ്റ് ഹോമിന് അപേക്ഷിക്കാനുള്ള സൗകര്യമുണ്ടെന്നും കമ്പനി അറിയിച്ചു.
