Latest News (Page 2,383)

കോഴിക്കോട്: കെപിസിസി അദ്ധ്യക്ഷൻ കെ സുധാകരനെതിരെ രൂക്ഷ വിമർശനവുമായി മുഖ്യമന്ത്രി പിണറായി വിജയൻ. മരണം ഇരന്ന് വാങ്ങിയവനെന്ന് പറയാൻ കോൺഗ്രസ് തയ്യാറാവുന്നു. ഇത്തരം കാര്യങ്ങളിൽ ഇങ്ങനെയാണോ പ്രതികരിക്കേണ്ടതെന്ന് അദ്ദേഹം ചോദിച്ചു. സമാധാന അന്തരീക്ഷം തകർക്കുന്നതിൽ കോൺഗ്രസും ഭാഗമായി എന്നതാണ് ധീരജിന്റെ മരണത്തിലൂടെ കാണേണ്ടതെന്ന് അദ്ദേഹം പറഞ്ഞു. മരണം ഇരന്ന് വാങ്ങിയതാണെന്ന കെ.പി.സി.സി പ്രസിഡന്റ് സുധാകരന്റെ പ്രസ്താവനയ്ക്ക് മറുപടിയുമായാണ് മുഖ്യമന്ത്രി രംഗത്തെത്തിയത്.

കുറ്റം ചെയ്തവരെ തള്ളിപ്പറയുന്ന സൂചന പോലും സുധാകരന്റെ ഭാഗത്ത് നിന്നും ഉണ്ടായില്ല. സംഘർഷത്തിലുടെയും കലാപത്തിലൂടെയും എന്തെങ്കിലും നേടാമെന്ന് കരുതേണ്ടെന്ന് മുഖ്യമന്ത്രി മുന്നറിയിപ്പ് നൽകി. കുറ്റക്കാർക്കെതിരെ ശക്തമായ നടപടിയുണ്ടാകും. നാട് അതിന്റെ കൂടെ നിൽക്കണമെന്ന് അദ്ദേഹം ആവശ്യപ്പെട്ടു.

അതേസമയം ധീരജിന്റെ കൊലപാതകം ആസൂത്രിതമാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ പറഞ്ഞു. ധീരജിന്റെ കുടുംബത്തിന് ഉണ്ടായ നഷ്ടം പരിഹരിക്കാൻ കഴിയാത്തതാണ്. കോളേജിന് പുറത്ത് നിന്നുള്ളവർ എത്തിയാണ് കൊലപാതകം നടത്തിയത്. ഗൗരവതരമായ അന്വേഷണം സർക്കാരിന്റെ ഭാഗത്ത് നിന്ന് സ്വീകരിക്കണം. കൊലപാതകക്കേസിലെ പ്രതി നിഖിൽ പൈലിക്ക് ഒളിസങ്കേതം എറണാകുളത്ത് ഒരുക്കാൻ ശ്രമിച്ചത് ആരാണ് എന്നതും അന്വേഷിക്കണം. കെപിസിസി പ്രസിഡന്റ് കെ സുധാകരന്റെ പരാമർശം പ്രകോപനപരമാണ്. രക്തസാക്ഷി ധീരജിനെ ഇനിയും അപമാനിക്കരുത്. കൊലപാതകം നടത്തിയിട്ട് വീണ്ടും കൊല്ലുക എന്നതാണ് കോൺഗ്രസിന്റെ സമീപനം. പ്രകോപനം സൃഷ്ടിക്കാനുള്ള ഇത്തരം നീക്കങ്ങളിൽ നിന്ന് പിൻവാങ്ങാൻ കോൺഗ്രസ് തയ്യാറാകണം. ഒരാൾ കൊല്ലപ്പെട്ടാൽ സന്തോഷിക്കുന്നത് കോൺഗ്രസിന്റെ സംസ്‌കാരമാണ്. കോൺഗ്രസ് സെമി കേഡർ ആകുന്നത് കൊലപാതകം നടത്തിയാണോയെന്നും അദ്ദേഹം ചോദിച്ചു.

കണ്ണൂർ: എസ്എഫ്‌ഐ പ്രവർത്തകൻ ധീരജിനെ കൊലപ്പെടുത്തിയത് എസ്.ഡി.പി.ഐയുടെ പരിശീലനം നേടിയ യൂത്ത് കോൺഗ്രസ് പ്രവർത്തകരാണെന്ന് എസ്.എഫ്.ഐ അഖിലേന്ത്യാ പ്രസിഡന്റ് വി.പി സാനു. എസ്.ഡി.പി.ഐയും ആർ.എസ്.എസും തമ്മിൽ ഏറ്റവും കൂടുതൽ അടുപ്പം പുലർത്തുന്നയാളാണ് ഇപ്പോഴത്തെ കെപിസിസി പ്രസിഡന്റ് കെ.സുധാകരനെന്നും അദ്ദേഹം പറഞ്ഞു. കണ്ണൂരിൽ നടത്തിയ വാർത്താ സമ്മേളനത്തിലാണ് അദ്ദേഹം ഇക്കാര്യം അറിയിച്ചത്. മഹാരാജാസിലെ അഭിമന്യുവിന് സമാനമായി നെഞ്ചിലേറ്റ ഒരൊറ്റ കുത്തിൽ ഹൃദയത്തിന്റെ അറകൾ തകർന്നാണ് തൊട്ടടുത്ത ആശുപത്രിയിലെത്തിക്കും മുൻപേ നീരജ് മരണമടഞ്ഞത്. നെഞ്ചിൽ ഒരൊറ്റ കുത്തിന് ഒരാളെ കൊല്ലുകയന്നെത് എസ്.ഡി.പി.ഐയുടെ ശൈലിയാണെന്നും ആർഎസ്എസ് ക്രിമിനലുകളും ഇതേ രീതി സ്വീകരിക്കാറുണ്ടെന്നും അദ്ദേഹം വ്യക്തമാക്കി.

കൊലപാതകം നടത്തിയ നിഖിൽ പൈലി കെപിസിസി അധ്യക്ഷൻ കെ.സുധാകരനുമായും ഡി.സി.സി. പ്രസിഡന്റ് സ്ഥലം എംപി എന്നിവരുമായും അടുത്ത ബന്ധം പുലർത്തുന്ന വ്യക്തിയാണ്. ഇയാളെ സംരക്ഷിക്കുകയും സംഭവത്തെ ന്യായീകരിക്കുകയുമാണ് കെ.എസ്.യുവും യുത്ത് കോൺഗ്രസും ചെയ്യുന്നതെന്നും അദ്ദേഹം വ്യക്തമാക്കി. മൂന്ന് സെന്റിമീറ്റർ ആഴത്തിൽ കുത്തിയാൽ ഇത്തരം മരണങ്ങൾ സംഭവിക്കുമോയെന്നാണ് യുത്ത് കോൺഗ്രസ് സംസ്ഥാന പ്രസിഡന്റ് ചോദിക്കുന്നത്. ഇത്തരം കുത്തുകളുടെ കണക്കെടുക്കുന്നതും കുത്താനുള്ള പരിശീലനം നടത്തുന്നതും യൂത്ത് കോൺഗ്രസിന്റെ പണിയാണെന്നും അദ്ദേഹം പറഞ്ഞു.

ധീരജിന്റെ കൊലപാതകത്തിന് പിന്നിൽ ഗൂഢാലോചന നടന്നിട്ടുണ്ട്. ക്യാംപസിൽ വിദ്യാർത്ഥികളുടെ മനസിൽ നിന്നും എന്നോ ഇറങ്ങിപ്പോയ കെ.എസ്.യുവിനെ കൊലക്കത്തി രാഷ്ട്രീയത്തിലുടെ തിരിച്ചു കൊണ്ടുവരാനാണ് കെ.സുധാകരൻ ശ്രമിക്കുന്നതെന്ന് അദ്ദേഹം വിമർശിച്ചു. സംസ്ഥാനത്താകമാനം കോൺഗ്രസ് -കെ.എസ്.യു കൊലപാതക രാഷ്ട്രീയത്തിനെതിരെ എസ്.എഫ്.ഐയുടെ നേതൃത്വത്തിൽ ജനുവരി 14 ന് സംസ്ഥാനത്തെ മുഴുവൻ ഏരിയ കേന്ദ്രങ്ങളിലും പ്രതിരോധ സദസ് സംഘടിപ്പിക്കുമെന്നും അദ്ദേഹം അറിയിച്ചു. എന്തുകൊണ്ട് അന്വേഷണ വിധേയമായി കൊലപാതകികളെ പുറത്താക്കാൻ കോൺഗ്രസ് തയ്യാറാവുന്നില്ലെന്ന് ജനങ്ങളോട് തുറന്നു പറയണമെന്നും അദ്ദേഹം ആവശ്യപ്പെട്ടു. സാധാരണയായി ഇത്തരം ദൗർഭാഗ്യകരമായ കൊലപാതകങ്ങളുണ്ടായാൽ അതിനെ തള്ളിപ്പറയുകയാണ് എല്ലാ പാർട്ടികളും ചെയ്യാറുള്ളത് എന്നാൽ കൊലപാതകത്തെ ന്യായീകരിക്കുന്ന നികൃഷ്ടമായ ശൈലിയാണ് കോൺഗ്രസ് സ്വീകരിക്കുന്നതെന്നും അദ്ദേഹം ചോദിച്ചു.

ധീരജിന് കുത്തേറ്റതിനു ശേഷം പെട്ടന്ന് ആശുപത്രിയിലെത്തിക്കാൻ പൊലിസ് തയ്യാറായില്ലെന്ന പരാതി കോളേജിലെ ചില വിദ്യാർത്ഥികൾ ഉയർത്തിയിട്ടുണ്ട്. ഇക്കാര്യം ബന്ധപ്പെട്ടവരുടെ ശ്രദ്ധയിൽപ്പെടുത്തുമെന്നും അദ്ദേഹം കൂട്ടിച്ചേർത്തു.