National (Page 593)

ന്യൂഡൽഹി: തൃണമൂൽ കോൺഗ്രസ് എം.പി ഡെറിക് ഒബ്രിയാനെതിരെ നടപടി. ഡെറിക് ഒബ്രിയാനെ രാജ്യസഭയിൽ നിന്ന് സസ്പെൻഡ് ചെയ്തു. മോശം പെരുമാറ്റത്തെ തുടർന്നാണ് നടപടി.

രാജ്യസഭയുടെ ശീതകാല സമ്മേളനത്തിന്റെ അവശേഷിക്കുന്ന സമ്മേളനങ്ങളിൽ ഒബ്രിയാന് പങ്കെടുക്കാൻ കഴിയില്ല. ബുധനാഴ്ച്ചയാണ് പാർലമെന്റിന്റെ ശീതകാല സമ്മേളനം അവസാനിക്കുന്നത്. രാജ്യസഭാ റൂൾബുക്ക് സഭാധ്യക്ഷനു നേർക്ക് കീറിയെറിഞ്ഞെന്നാണ് ഒബ്രിയാനെതിരെയുള്ള കുറ്റം. തെരഞ്ഞെടുപ്പ് പരിഷ്‌കരണ ബില്ലിനെതിരായ പ്രതിഷേധത്തിനിടെയാണ് ഡെറിക് ഒബ്രിയാൻ രാജ്യസഭാ റൂൾബുക്ക് സഭാധ്യക്ഷൻ സസ്മിത് പത്രയ്ക്ക് നേരെ കീറിയെറിഞ്ഞത്.

ഡെറിക് ഒബ്രിയാൻ കീറിയെറിഞ്ഞ റൂൾബുക്ക് സഭാധ്യക്ഷന്റെയോ സെക്രട്ടറി ജനറലിന്റെയോ മറ്റ് ജീവനക്കാരുടെയോ ദേഹത്തു കൊള്ളുമായിരുവെന്നാണ് സസ്മിത് പത്ര ആരോപിക്കുന്നത്.

ന്യൂഡൽഹി: പെൺകുട്ടികളുടെ വിവാഹ പ്രായം 18 ൽ നിന്നും 21 ആക്കി ഉയർത്താനുള്ള ബില്ല് പാർലമെന്ററി സ്റ്റാൻഡിങ് കമ്മിറ്റിക്ക് വിട്ടു. വിഷയത്തിൽ സ്റ്റാൻഡിഗ് കമ്മിറ്റി പഠനം നടത്തിയ ശേഷം വീണ്ടും ബില്ല് പാർലമെന്റിൽ അവതരിപ്പിക്കാൻ സമയമെടുക്കുമെന്നാണ് വിവരം. ഈ സമ്മേളന കാലയളവിൽ ബിൽ നിയമം ആകില്ലെന്നാണ് വിലയിരുത്തപ്പെടുന്നത്.

രാജ്യത്തെ പെൺമക്കളുടെ ഭാവി മുന്നിൽക്കണ്ടുകൊണ്ടാണ് അവരുടെ വിവാഹപ്രായം ഉയർത്തുന്നതെന്നാണ് പ്രധാനമന്ത്രി നരേന്ദ്രമോദി വ്യക്തമാക്കിയത്. വിവാഹത്തിന് മുൻപ് വിദ്യാഭ്യാസം പൂർത്തിയാക്കാനും സ്വന്തം കാലിൽ നിൽക്കാനും സ്ത്രീകളെ പ്രാപ്തമാക്കുകയാണ് നിയമഭേദഗതിയുടെ ലക്ഷ്യവെയ്ക്കുന്നതെന്നും അദ്ദേഹം അറിയിച്ചു. കേന്ദ്രസർക്കാരിന്റെ ഈ ലക്ഷ്യമാണ് ചിലർക്ക് വേദനയുണ്ടാക്കുന്നതെന്നും അദ്ദേഹം അഭിപ്രായപ്പെട്ടു.

ഓരോ സ്ത്രീകളും മികച്ച ഭാവി ആഗ്രഹിച്ചാണ് ജീവിക്കുന്നത്. അവർ ഒരുപാട് മുന്നോട്ട് പോകാൻ ആഗ്രഹിക്കുന്നുണ്ട്. അവരുടെ ഉയർച്ചയ്ക്ക് വിവാഹം ഒരു തടസ്സമാകരുത്. സ്ത്രീ ശാക്തീകരണം ലക്ഷ്യമിട്ടാണ് പെൺകുട്ടികളുടെ വിവാഹ പ്രായം ഉയർത്തുന്നത്. ആരെയാണ് ഈ പദ്ധതി വേദനിപ്പിക്കുന്നതെന്നാണ് അദ്ദേഹം ചോദിക്കുന്നത്. രാജ്യത്തെ പെൺകുട്ടികളുടെ ആഗ്രഹ പ്രകാരമാണ് വിവാഹ പ്രായം 21ആയി ഉയർത്തുന്നതെന്നും അദ്ദേഹം കൂട്ടിച്ചേർത്തു.

ന്യൂഡൽഹി: ഇന്ത്യാ വിരുദ്ധതയും തെറ്റായ വാർത്തകളും പ്രചരിപ്പിക്കുന്ന യൂട്യൂബ് ചാനലുകൾക്കെതിരെ നടപടിയുമായി കേന്ദ്ര സർക്കാർ. ഇത്തരത്തിലുള്ള 20 യൂട്യൂബ് ചാനലുകളും രണ്ട് വാർത്താ വെബ്സൈറ്റുകളും കേന്ദ്ര സർക്കാർ നിരോധിച്ചു.

പാകിസ്താൻ കേന്ദ്രമാക്കി പ്രവർത്തിക്കുന്ന യുട്യൂബ് ചാനലുകൾക്കാണ് നിരോധനം ഏർപ്പെടുത്തിയത്. കേന്ദ്ര വാർത്താ വിനിമയ മന്ത്രാലയത്തിന്റേതാണ് നടപടി. ഇതിനായി രണ്ട് പ്രത്യേക ഉത്തരവുകളാണ് സർക്കാർ പുറപ്പെടുവിച്ചിരിക്കുന്നത്. നിരവധി യൂട്യൂബ് ചാനകളുടെ ശൃംഖലയുള്ള ‘നയാ പാകിസ്താൻ’ ഗ്രൂപ്പിന്റെ ചാനലുകളും നിരോധിച്ചിട്ടുണ്ട്.

കശ്മീർ, ഇന്ത്യൻ ആർമി, രാജ്യത്തെ ന്യൂനപക്ഷ സമൂഹം, രാമക്ഷേത്രം, ഹെലികോപ്റ്റർ അപകടത്തിൽ കൊല്ലപ്പെട്ട ജനറൽ ബിപിൻ റാവത്ത് എന്നിവരെ കുറിച്ച് തെറ്റിദ്ധാരണ പരത്തുന്ന വിവരങ്ങൾ ഈ ചാനലുകളും സൈറ്റുകളും പ്രചരിപ്പിച്ചിരുന്നു. തുടർന്നാണ് ഇവ നിരോധിക്കാൻ തീരുമാനിച്ചത്. കേന്ദ്ര ഇന്റലിജൻസ് വിഭാഗവുമായും വിവിധ മന്ത്രാലയങ്ങളുമായും നടത്തിയ കൂടിയാലോചനയ്ക്ക് ശേഷമാണ് സർക്കാർ ഇത്തരമൊരു തീരുമാനത്തിലേക്ക് കടന്നത്.

അമൃത്സർ: മതനിന്ദ കേസുകളിൽ ഉൾപ്പെടുന്ന കുറ്റവാളികൾക്ക് കർശനശിക്ഷ നൽകണമെന്ന ആവശ്യവുമായി പഞ്ചാബ് കോൺഗ്രസ് അദ്ധ്യക്ഷൻ നവജ്യോത് സിങ് സിദ്ദു. ഇത്തരക്കാരെ പൊതു സ്ഥലത്തുവെച്ച് തൂക്കിലേറ്റണമെന്നാണ് അദ്ദേഹം ആവശ്യപ്പെടുന്നത്. മലേർകോട്‌ലയിൽ ഒരു റാലിയെ അഭിസംബോധന ചെയ്ത് സംസാരിക്കവെയായിരുന്നു അദ്ദേഹത്തിന്റെ പരാമർശം.

വിശുദ്ധ ഗ്രന്ഥത്തെ അപമാനിക്കുന്നവരെ പൊതുസ്ഥലത്ത് വെച്ച് തൂക്കിലേറ്റണം. സിഖ് സമുദായത്തിനെതിരെയുള്ള ഗൂഢാലോചനയാണ് കഴിഞ്ഞ ദിവസം പഞ്ചാബിൽ നടന്ന മതനിന്ദയുമായി ബന്ധപ്പെട്ട രണ്ടു സംഭവങ്ങളെന്നും അദ്ദേഹം പറഞ്ഞു. കഴിഞ്ഞ 48 മണിക്കൂറിനുള്ളിൽ മതനിന്ദാ കുറ്റം ആരോപിച്ച് പഞ്ചാബിൽ രണ്ടു പേരെ ആൾക്കൂട്ടം മർദ്ദിച്ച് കൊലപ്പെടുത്തിയിരുന്നു. ഇതിന് പിന്നാലെയാണ് നവജ്യോത് സിംഗ് സിദ്ദുവിന്റെ പ്രതികരണം.

സംസ്ഥാനത്തെ സമാധാനാന്തരീക്ഷം തകർക്കാൻ ശ്രമിക്കുന്ന മതമൗലികവാദ ശക്തികളാണ് സംഭവങ്ങൾക്കു പിന്നിലെന്നും അദ്ദേഹം ആരോപിച്ചു.