National (Page 803)

ഐസ്വാൾ: ഏറ്റവും കൂടുതൽ കുഞ്ഞുങ്ങളുള്ള മാതാപിതാക്കൾക്ക് സമ്മാനതുക പ്രഖ്യാപിച്ച് മിസോറാം കായിക മന്ത്രി റോബർട്ട് റൊമാവിയ. തന്റെ നിയോജക മണ്ഡലത്തിലെ ഏറ്റവും അധികം കുഞ്ഞുങ്ങളുള്ള മാതാപിതാക്കൾക്ക് ഒരു ലക്ഷം രൂപ സമ്മാനമായി നൽകുമെന്നാണ് അദ്ദേഹം പ്രഖ്യാപിച്ചിരിക്കുന്നത്. മാതാപിതാക്കൾ ജീവിച്ചിരിക്കുന്നവർ മാത്രമായിരിക്കും സമ്മാനം ലഭിക്കുക.

ഫാദേഴ്‌സ് ഡേയിലാണ് അദ്ദേഹം ഇത് സംബന്ധിച്ച പ്രഖ്യാപനം നടത്തിയത്. വിജയിക്കുന്ന വ്യക്തിക്ക് ഒരു സർട്ടിഫിക്കറ്റും ട്രോഫിയും ലഭിക്കും. എന്നാൽ മത്സരത്തിന്റെ സമ്മാനതുകയും മറ്റ് ചെലവുമെല്ലാം വഹിക്കുന്നത് മന്ത്രിയുടെ മകന്റെ ഉടമസ്ഥതയിലുള്ള ഒരു സ്വകാര്യ നിർമ്മാണ കമ്പനിയാണ്. മിസോറാമിൽ ജനസംഖ്യ നിരക്ക് വളരെ കുറവാണെന്നും അതിനാൽ തന്നെ മറ്റ് ഇന്ത്യൻ സംസ്ഥാനങ്ങളെ അപേക്ഷിച്ച് മിസോറാമിന്റെ വളർച്ചാ നിരക്ക് വളരെ കുറവാണെന്നുമാണ് മന്ത്രി പറയുന്നത്. താരതമ്യേന കുറവ് അംഗങ്ങളുള്ള മിസോ വിഭാഗത്തിൽ അംഗസംഖ്യ കൂട്ടാനുള്ള മാർഗമായാണ് മന്ത്രിയുടെ തീരുമാനത്തെ ചിലർ വിലയിരുത്തുന്നത്. എന്നാൽ ഇതിനെതിരെ വിമർശനം ഉയർത്തുന്നവരുമുണ്ട്.

ന്യൂഡൽഹി: എടിഎം വഴിയുള്ള പണം പിൻവലിക്കലിന് ചാർജ് വർധിപ്പിക്കാൻ റിസർവ്വ് ബാങ്ക് അനുമതി നൽകിയിട്ടും ഉപഭോക്താക്കൾക്ക് സൗജന്യമായി പിരിധിയില്ലാത്ത സേവനങ്ങൾ നൽകാൻ തയ്യാറായി ബാങ്കുകൾ. ഐഡിബിഐ ബാങ്ക്, ഇൻഡസ്ഇൻഡ് ബാങ്ക് തുടങ്ങിയ ബാങ്കുകളാണ് ഉപഭോക്താക്കൾക്ക് സൗജന്യ എടിഎം സേവനങ്ങൾ നൽകാൻ തയ്യാറായിരിക്കുന്നത്.

എടിഎം വഴിയുളള പണം പിൻവലിക്കുന്നതിനും നിക്ഷേപിക്കുന്നതിനും മറ്റ് സേവനങ്ങൾക്കുമുളള ചാർജ് വർദ്ധിപ്പിക്കാൻ അടുത്തിടെയാണ് റിസർവ് ബാങ്ക് അനുമതി നൽകിയത്. സേവനങ്ങളുടെ ചാർജ് 21 രൂപയായാണ് റിസർവ്വ് ബാങ്ക് വർധിപ്പിച്ചത്. അടുത്ത വർഷം ജനുവരി ഒന്നു മുതലാണ് ഇത് നിലവിൽ വരിക. നിലവിൽ അഞ്ച് ഇടപാടുകളാണ് മിക്ക പൊതുമേഖലാ-സ്വകാര്യ ബാങ്കുകളും സ്വന്തം എടിഎമ്മുകൾ വഴി പരമാവാധി സൗജന്യമായി അനുവദിക്കുക. അതിന് ശേഷമുളള ഓരോ സേവനങ്ങൾക്കും ചെറിയൊരു തുക ബാങ്കുകൾ ചാർജായി ഈടാക്കും.

ഐഡിബിഐ ബാങ്ക് അഞ്ച് ഇടപാടുകൾ ഉപഭോക്താക്കൾക്ക് സൗജന്യമായി നൽകും. മറ്റ് ബാങ്കുകളുടെ എടിഎമ്മിൽ മൂന്ന് ഇടപാടുകളും സൗജന്യമായി അനുവദിക്കും. ചില തെരഞ്ഞെടുത്ത സേവനങ്ങൾ തികച്ചും സൗജന്യമായി അനുവദിക്കാനാണ് തീരുമാനമെന്ന് ഐഡിബിഐ എക്സിക്യൂട്ടീവ് ഡയറക്ടർ ജോർടി ചാക്കോ അറിയിച്ചു.

ഏത് ഏടിഎമ്മിലും സൗജന്യ സേവനം അനുവദിക്കാനാണ് ഇൻഡസ്ഇൻഡ് ബാങ്കിന്റെ തീരുമാനം. നിലവിൽ സിറ്റി ബാങ്കിൽ ഈ സേവനം ലഭ്യമാണ്. സ്റ്റേറ്റ് ബാങ്ക് സേവിംഗ്‌സ് അക്കൗണ്ടിൽ മിനിമം ബാലൻസായി ഒരു ലക്ഷത്തിലധികമുളളവർക്ക് സ്വന്തം എടിഎമ്മിലും മറ്റ് എടിഎമ്മിലും പരിധികളില്ലാതെ സൗജന്യ സേവനത്തിന് അനുമതിയുണ്ട്.

ന്യൂഡൽഹി: സ്വിസ് ബാങ്കിലെ ഇന്ത്യക്കാരുടെ നിക്ഷേപ തുക സംബന്ധിച്ച് വിശദീകരണവുമായി കേന്ദ്രം. കേന്ദ്ര ധനമന്ത്രാലയമാണ് ഇക്കാര്യത്തിൽ വിശദീകരണവുമായി രംഗത്തെത്തിയത്. സ്വിസ് ബാങ്കുകൾ ഔദ്യോഗികമായി പുറത്തുവിട്ട കണക്കുകളാണെന്നും ഇത് കള്ളപ്പണമല്ലെന്നും ധനമന്ത്രാലയം അറിയിച്ചു.

സ്വിസ് ബാങ്കിലെ ഇന്ത്യക്കാരുടെ നിക്ഷേപ തുക കഴിഞ്ഞ ദിവസമാണ് സെൻട്രൽ ബാങ്ക് പുറത്തുവിട്ടത്. 20700 കോടിയാണ് സ്വിസ് ബാങ്കിലെ ഇന്ത്യക്കാരുടെ നിക്ഷേപ തുക എന്നാണ് സെൻട്രൽ ബാങ്ക് പുറത്തുവിട്ട കണക്കിൽ വ്യക്തമാക്കിയിരിക്കുന്നത്. കഴിഞ്ഞ പതിമൂന്ന് വർഷത്തിനിടയിലെ ഏറ്റവുമുയർന്ന നിക്ഷേപത്തുകയാണിത്. 2019 ൽ ഇന്ത്യക്കാരുടേയും ഇന്ത്യൻ സ്ഥാപനങ്ങളുടേയും പേരിൽ സ്വിസ് ബാങ്കിൽ ഉണ്ടായിരുന്നത് 6625 കോടി രൂപയുടെ നിക്ഷേപമായിരുന്നു. പിന്നീട് രണ്ട് വർഷത്തോളം നിക്ഷേപം കുറഞ്ഞ നിലയിൽ നിന്ന ശേഷമാണ് വർധനവ് ഉണ്ടായിരിക്കുന്നത്.

2006 ന് ശേഷം ഇന്ത്യക്കാരുടെ നിക്ഷേപത്തിൽ വലിയ കുറവ് വന്നിരുന്നു. എന്നാൽ 2011, 2013, 2017 വർഷങ്ങളിൽ ഇതിൽ നേരിയ വ്യത്യാസം ഉണ്ടായി. കസ്റ്റമർ നിക്ഷേപത്തിലൂടെ 4000 കോടി രൂപയുടെയും ബാങ്ക് നിക്ഷേപത്തിലൂടെ 3100 കോടി രൂപയുടെയും ട്രസ്റ്റുകൾ മുഖേന 13500 കോടി രൂപയുടെയും നിക്ഷേപമാണ് 2020 ൽ ഇന്ത്യക്കാരുടേതായി സ്വിസ് ബാങ്കിലുള്ളത്. ബോണ്ടുകളും സെക്യൂരിറ്റിയുടേയും രൂപത്തിലുമാണ് ഇവയുള്ളത്.

കസ്റ്റമർ മുഖേനയുള്ള നിക്ഷേപത്തിൽ കുറവ് വന്നെങ്കിലും സ്ഥാപനങ്ങളും ബാങ്ക് മുഖേനയുമുള്ള നിക്ഷേപത്തിലും വർധനവ് ഉണ്ടായിട്ടുണ്ട്. 2019 നേക്കാൾ ആറിരട്ടിയാണ് ഈ തുകയെന്നാണ് റിപ്പോർട്ട്. 2018 മുതൽ ഇന്ത്യക്കാരുടെ നിക്ഷേപത്തേക്കുറിച്ച് സ്വിസ് ബാങ്ക് നികുതി വിഭാഗത്തിന് കണക്കുകൾ നൽകുന്നുണ്ട്. ഇന്ത്യയിൽ സാമ്പത്തിക തിരിമറി നടത്തുന്നവരുടെ സ്വിസ് ബാങ്ക് നിക്ഷേപങ്ങളെക്കുറിച്ചുള്ള വിവരവും ലഭിക്കുന്നുണ്ട്.