കൊച്ചി: രാജ്യത്ത് കൊവിഡ് വാക്സിനേഷന് സര്ട്ടിഫിക്കറ്റില് നിന്ന് പ്രധാനമന്ത്രി നരേന്ദ്രമോദിയുടെ ചിത്രം നീക്കണമെന്ന ഹര്ജി തള്ളുകയും ഹര്ജിക്കാരന് ഒരു ലക്ഷം രൂപ പിഴ ചുമത്തുകയും ചെയ്ത് ഹൈക്കോടതി. ആറാഴ്ചയ്ക്കകം പിഴ കേരള ലീഗല് സര്വ്വീസ് സൊസൈറ്റിയില് അടയ്ക്കണമെന്നാണ് നിര്ദ്ദേശം.
പണം കൊടുത്ത് സ്വകാര്യ ആശുപത്രിയില് വാക്സിന് എടുക്കുമ്പോള് മോദിയുടെ ചിത്രം പതിക്കുന്നത് മാലികവകാശ ലംഘനം എന്നായിരുന്നു ഹര്ജിക്കാരന്റെ വാദം.
എന്നാല്, ഹര്ജിക്ക് പിന്നില് രാഷ്ട്രീയ താല്പര്യമുണ്ടെന്ന് കോടതി നിരീക്ഷിച്ചു. ഇത് തീര്ത്തും ബാലിശമായ ഹര്ജിയാണ്. പൊതുതാല്പര്യമല്ല, പ്രശസ്തി താല്പര്യമാണ് ഹര്ജിക്ക് പിന്നിലെന്നും ജസ്റ്റിസ് പി.വി.കുഞ്ഞികൃഷ്ണന് അഭിപ്രായപ്പെട്ടു. കോടതികളില് ഗൗരവമുള്ള കേസുകള് കെട്ടിക്കിടക്കുമ്പോള് ഇത്തരം അനാവശ്യ ഹര്ജികള് പ്രോല്സാഹിപ്പിക്കാനാകില്ലെന്നും കോടതി വ്യക്തമാക്കി.