Entertainment (Page 97)

ദി കശ്മീര്‍ ഫയല്‍സിനെതിരെ നടന്‍ പ്രകാശ് രാജ് നടത്തിയ വിമര്‍ശനങ്ങള്‍ക്ക് മറുപടിയുമായി സംവിധായകന്‍ വിവേക് അഗ്‌നിഹോത്രി രംഗത്ത്.

തന്റെ സിനിമ അര്‍ബന്‍ നക്സലുകള്‍ക്ക് ഉറക്കമില്ലാത്ത രാത്രികള്‍ സമ്മാനിച്ചുവെന്ന് വിവേക് അഗ്‌നിഹോത്രി ട്വിറ്ററില്‍ കുറിച്ചു. ഇത് ചെറിയ ആളുകളുടെ സിനിമയാണെന്ന് പറഞ്ഞ വിവേക് അഗ്‌നിഹോത്രി പ്രകാശ് രാജിനെ അന്ധകാര്‍ രാജെന്നാണ് വിശേഷിപ്പിച്ചത്. പ്രകാശ് രാജ് കാഴ്ച്ചക്കാരെ കുരയ്ക്കുന്ന നായ്ക്കള്‍ എന്ന് വിളിച്ചുവെന്നും അദ്ദേഹം കൂട്ടിച്ചേര്‍ത്തു.

‘ഞാന്‍ കണ്ടതില്‍വെച്ച് ഏറ്റവും മോശം ചിത്രമാണ് കശ്മീര്‍ ഫയല്‍സ്, നമുക്കറിയാം ഇതാര് നിര്‍മിച്ചതാണെന്നത്, അന്താരാഷ്ട്ര ജൂറി അതിനെ മാറ്റി നിര്‍ത്തി, എന്തുകൊണ്ടാണ് തനിക്ക് ഓസ്‌കാര്‍ ലഭിക്കാത്തതെന്നാണ് സംവിധായകന്‍ ചോദിക്കുന്നത്. വളരെ സെന്‍സിറ്റിവായിട്ടുള്ള മാധ്യമമാണ് നമുക്ക് ചുറ്റുമുള്ളത്. ഒരു പ്രത്യേക അജണ്ടയിലുള്ള ചിത്രം ഇവിടെ ചെയ്യാനാകും. എനിക്കു ലഭിച്ച വിവരങ്ങള്‍ അനുസരിച്ച് 2000 കോടിയാണ് ഇത്തരം ചിത്രങ്ങള്‍ ഒരുക്കാന്‍ അവര്‍ മാറ്റിവച്ചിരിക്കുന്നത്. പക്ഷെ നിങ്ങള്‍ക്ക് എപ്പോഴും ഒരാളെ വിഡ്ഡിയാക്കാനാകില്ല’- മാതൃഭൂമി ഇന്റര്‍നാഷണല്‍ ഫെസ്റ്റിവല്‍ ഓഫ് ലെറ്റേഴ്‌സിലെ സെഷനിലായിരുന്നു പ്രകാശ് രാജ് കശ്മീര്‍ ഫയല്‍സിനെതിരെ രൂക്ഷ വിമര്‍ശനമുന്നയിച്ചത്.

വിവേക് അഗ്‌നിഹോത്രി സംവിധാനം ചെയ്ത കശ്മീര്‍ ഫയല്‍സിനെ വിമര്‍ശിച്ച് നടന്‍ പ്രകാശ് രാജ് രംഗത്ത്. മാതൃഭൂമി അന്താരാഷ്ട്ര അക്ഷരോത്സവത്തില്‍ സംസാരിക്കുമ്‌ബോഴായിരുന്നു പ്രകാശ് രാജിന്റെ വാക്കുകള്‍.

കശ്മീര്‍ ഫയല്‍സ് എന്ന ചിത്രം അസംബന്ധ സിനിമയാണെന്നും, ഓസ്‌കാര്‍ പോയിട്ട് ഭാസ്‌കര്‍ പോലും അതിനു കിട്ടില്ലെന്ന് അദ്ദേഹം പരിഹസിച്ചു. സിനിമ ഓസ്‌കാറിന് വേണ്ടി അയച്ചതുമായി ബന്ധപ്പെട്ടായിരുന്നു താരത്തിന്റെ പരാമര്‍ശം. ബാന്‍ ചെയ്യണമെന്ന് പറഞ്ഞ പത്താന്‍ ആകട്ടെ 700 കോടി രൂപയിലേറെയാണ് കളക്ഷന്‍ നേടിയതെന്നും പ്രകാശ് രാജ് പറഞ്ഞു.

‘കശ്മീര്‍ ഫയല്‍സ് ഒരു പ്രൊപ്പഗാണ്ട ചിത്രമാണ്. അസംബന്ധവും നാണക്കേടുമാണ് ആ ചിത്രം. ഓസ്‌കാര്‍ അല്ല ഭാസ്‌കര്‍ പോലും ആ സിനിമക്ക് കിട്ടില്ല. അന്താരാഷ്ട്ര ജൂറി അംഗങ്ങള്‍ പോലും ചിത്രത്തെ വിമര്‍ശിച്ചിരുന്നു. സ്വന്തം രാജ്യത്തെ സ്‌നേഹിക്കുന്നു എന്ന് ഓരോരുത്തരും തെളിയിക്കേണ്ടി വരുന്നതിന്റെ ആവശ്യമെന്താണ്. നിങ്ങളുടെ അമ്മ ആരാണെന്ന് എല്ലാ ദിവസവും തെളിയിക്കേണ്ടി വരുന്നുണ്ടോ?. ബാന്‍ ചെയ്യണമെന്നാവശ്യപ്പെട്ട് പ്രതിഷേധിച്ച ബോളിവുഡ് ചിത്രം ‘പത്താന്‍’ 700 കോടിയിലേറെ രൂപയാണ് കളക്ഷന്‍ നേടിയത്. മലയാളത്തിലെ പല ചിത്രങ്ങളും ഇപ്പോള്‍ ഡബ്ബിംഗ് പോലുമില്ലാതെ ഒ.ടി.ടി. പ്ലാറ്റ് ഫോമുകളില്‍ പ്രചരിപ്പിക്കുന്നുണ്ട്. ഒ.ടി.ടി. പ്ലാറ്റ് ഫോമില്‍ കാണേണ്ടവര്‍ അത്തരത്തില്‍ സിനിമ കാണട്ടെ’-പ്രകാശ് രാജ് പറഞ്ഞു.