കോഴിക്കോട്: കോഴിക്കോട് ഹൈലൈറ്റ് മാളില്‍ സിനിമയുടെ പ്രമോഷന്റെ ഭാഗമായി നടന്ന പരിപാടിയ്ക്കിടെ ലൈംഗികാതിക്രമം ഉണ്ടായെന്ന പരാതിയുമായി പ്രശസ്ത യുവനടി ഗ്രേസ് ആന്റണി രംഗത്ത്. ഫേസ്ബുക്ക് പോസ്റ്റിലൂടെയായിരുന്നു നടി പരാതി ഉന്നയിച്ചത്. തന്റെ സഹപ്രവര്‍ത്തകയ്ക്കും സമാനമായ അനുഭവം ഉണ്ടായതായി ഗ്രേസ് ആന്റണി ഫേസ്ബുക്ക് കുറിപ്പില്‍ വ്യക്തമാക്കി.
പരിപാടി കഴിഞ്ഞ് തിരികെ പോകുന്നതിനിടെ ആള്‍ക്കൂട്ടത്തില്‍ നിന്നൊരാള്‍ ശരീരത്തില്‍ കടന്നു പിടിക്കുകയായിരുന്നു. ഗ്രേസ് ആന്റണിയ്ക്കൊപ്പം ഉണ്ടായിരുന്ന സഹപ്രവര്‍ത്തകയ്ക്കും സമാന അനുഭവം ഉണ്ടായി. തനിക്ക് ഏറ്റവും ഇഷ്ടമുള്ള സ്ഥലമാണ് കോഴിക്കോട് എന്നും, അവിടെ വെച്ച് തനിക്ക് മോശം അനുഭവം ഉണ്ടായത് തന്റെ മനസ്സ് മരവിപ്പിച്ചെന്ന് നടി ഫേസ്ബുക്കില്‍ കുറിച്ചു. എവിടെയാണ് കയറിപ്പിടിച്ചത് എന്നു പറയാന്‍ അറപ്പു തോന്നുന്നു. പ്രമോഷന്റെ ഭാഗമായി പല സ്ഥലങ്ങളിലേക്കും പോയിട്ടുണ്ട്. എന്നാല്‍ അവിടെയൊന്നും ഇത്തരത്തില്‍ ഒരു അനുഭവം നേരിടേണ്ടിവന്നിട്ടില്ല. മോശം അനുഭവം ഉണ്ടായപ്പോള്‍ സഹപ്രവര്‍ത്തക പ്രതികരിച്ചു. എന്നാല്‍ തനിക്ക് അതിന് കഴിഞ്ഞില്ല. ഒരു നിമിഷം ഞാന്‍ മരവിച്ചു പോയി. ആ മരവിപ്പില്‍ തന്നെ നിന്നു കൊണ്ട് ചോദിക്കുവാണ്.. തീര്‍ന്നോ നിന്റെയൊക്കെ അസുഖമെന്നും ഗ്രേസ് ആന്റണി ചോദിച്ചു.