കൊച്ചി: ദുബായില് ഗോള്ഡന് വിസ സ്വീകരിക്കാനെത്തിയപ്പോള് ധരിച്ച വസ്ത്രത്തെ വിമര്ശിച്ചവര്ക്ക് സമൂഹമാദ്ധ്യമങ്ങളിലൂടെ മറുപടിയുമായി നടി ഭാവന. ടോപ്പിന് താഴെ വസ്ത്രമൊന്നും ധരിക്കാതെയാണ് ഭാവന എത്തിയതെന്നും നടിക്ക് ഇങ്ങനെ പോകാന് നാണമില്ലേയെന്നുമൊക്കെയായിരുന്നു സൈബര് ആക്രമണങ്ങള്. ഭാവന കൈ ഉയര്ത്തുമ്ബോള് ടോപ്പിന് താഴെ ശരീര ഭാഗങ്ങള് കണ്ടു എന്നായിരുന്നു വിമര്ശനം
എന്നാല്, താന് ടോപ്പിന് താഴെ ധരിച്ചിരിക്കുന്നത് ശരീരത്തിന്റെ നിറമുള്ള വസ്ത്രമാണെന്നും അതും ടോപ്പിന്റെ ഭാഗം തന്നെയാണെന്നും നടി വ്യക്തമാക്കി. ‘അകത്ത് സ്ലിപ്പെന്ന ഭാഗം ചേര്ത്തുള്ളതാണ് പരിപാടിയില് ധരിച്ച വസ്ത്രം. ആ സ്ലിപ്പ് ദേഹത്തോട് ചേര്ന്ന് കിടക്കുന്ന വസ്ത്രമാണ്. ഇതൊന്നും ഒരു പുതിയ കണ്ടുപിടിത്തമേ അല്ല. നിരവധി പേര് ഇത്തരത്തിലുള്ള വസ്ത്രങ്ങള് ഉപയോഗിക്കാറുണ്ട്. ഇത്തരം വസ്ത്രങ്ങള് ധരിക്കുന്നവര്ക്കും ഇത് കണ്ടവര്ക്കുമെല്ലാം വസ്ത്രങ്ങളെ കുറിച്ച് കൃത്യമായി അറിയാം. എന്ത് കിട്ടിയാലും തന്നെ ആക്ഷേപിക്കാനും വേദനിപ്പിക്കാനും വരുന്ന ചിലരുണ്ടെന്നും അവര്ക്ക് തന്നെ അസഭ്യം പറയുന്നതിലും പരിഹസിക്കുന്നതിലുമാണ് താത്പര്യം എന്നും ഭാവന പറഞ്ഞു. തന്നെ വിമര്ശിച്ചവര്ക്ക് സന്തോഷവും മനസുഖവും കിട്ടുന്നുണ്ടെങ്കില് ആവട്ടെ. അത്തരക്കാരോട് മറ്റൊന്നും എനിക്ക് പറയാനില്ല. എല്ലാം ശരിയാവും എന്ന് ഓരോ ദിവസവും സ്വയം പറഞ്ഞു ജീവിച്ചു തീര്ക്കാന് ശ്രമിക്കുകയാണ്. പ്രിയപ്പെട്ടവരെ വിഷമിപ്പിക്കരുത് എന്ന് വിചാരിച്ചു സങ്കടങ്ങള് മാറ്റി വെക്കാന് നോക്കുകയാണ്. താന് എന്തു ചെയ്താലും ആക്ഷേപിക്കാനും, ചീത്ത വാക്കുകള് ഉപയോഗിച്ച് വേദനിപ്പിച്ചു വീണ്ടും ഇരുട്ടിലേക്ക് വിടാനും നോക്കുന്ന ഒരുപാട് പേര് ഉണ്ടെന്ന് ബോധ്യമുണ്ട്. അങ്ങനെ ആണ് അവരൊക്കെ സന്തോഷം കണ്ടെത്തുന്നതെന്നും അറിയാം. അങ്ങനെ ആണ് നിങ്ങള്ക്കു സന്തോഷം കിട്ടുന്നത് എങ്കില് അതിലും ഞാന് തടസം നില്ക്കില്ല’- നടി ഇന്സ്റ്റഗ്രാമില് വ്യക്തമാക്കി.