2023-ലെ ഓസ്‌കറിനുളള ഇന്ത്യയുടെ ഔദ്യോഗിക എന്‍ട്രി നേടിയ ചിത്രമാണ് ‘ചെല്ലോ ഷോ’. ട്രൈബെക്ക ഫിലിം ഫെസ്റ്റിവലിലടക്കം പ്രദര്‍ശിപ്പിച്ച ചിത്രം ഒക്ടോബര്‍ 14-ന് തിയറ്ററുകളില്‍ റിലീസ് ചെയ്യാന്‍ ഒരുങ്ങുകയാണ്. ഇതിന്റെ ഭാഗമായി സിനിമയുടെ ട്രെയിലര്‍ പുറത്തു വിട്ടിരിക്കുകയാണ് അണിയറ പ്രവര്‍ത്തകര്‍.
സൗരാഷ്ട്രയിലെ ഒരു വിദൂര ഗ്രാമീണമേഖലയിലാണ് കഥ നടക്കുന്നത്. ഒമ്ബത് വയസ്സ് പ്രായമുള്ള സമയ് എന്ന ബാലന്‍ സിനിമാ പ്രൊജക്ടര്‍ ടെക്‌നീഷ്യനായ ഫസലിനെ സ്വാധീനിച്ച് സിനിമകള്‍ കാണുന്നതും സിനിമ സ്വപ്നം കാണുന്നതുമാണ് ‘ചെല്ലോ ഷോ’യില്‍ ദൃശ്യവത്കരിച്ചിരിക്കുന്നത്. ചെല്ലോ ഷോ എന്ന വാക്കിന്റെ അര്‍ത്ഥം അവസാന സിനിമാ പ്രദര്‍ശനം എന്നാണ്. സംവിധായകന്റെ തന്നെ കുട്ടിക്കാലത്തെ ഓര്‍മ്മകളെ അടിസ്ഥാനമാക്കിയാണ് ചിത്രം ഒരുക്കിയിരിക്കുന്നത്.
ഈ മാസം ആദ്യമാണ് ഫിലിം ഫെഡറേഷന്‍ ഓഫ് ഇന്ത്യ രൂപീകരിച്ച സെലക്ഷന്‍ കമ്മിറ്റി പാന്‍ നളിന്‍ സംവിധാനം ചെയ്ത ഗുജറാത്തി ചിത്രമായ ‘ചെല്ലോ ഷോ’ ഏകകണ്ഠമായി തിരഞ്ഞെടുത്തത്.