International (Page 164)

ലണ്ടൻ: എലിസബത്ത് രാജ്ഞിയുടെ മകനായ ആൻഡ്രൂ രാജകുമാരന്റെ രാജകീയ പദവികൾ നീക്കം ചെയ്തു. ബക്കിംങ്ഹാം കൊട്ടാരമാണ് ലൈംഗിക പീഡന ആരോപണം നേരിടുന്ന ആൻഡ്രൂവിന്റെ രാജകീയ പദവികളും സൈനിക പദവികളും നീക്കം ചെയ്തത്. എലിസബത്ത് രാജ്ഞിയാണ് ഇതുസംബന്ധിച്ച ഉത്തരവ് പുറത്തിറക്കിയത്.

ലൈംഗിക പീഡനക്കേസിൽ ആൻഡ്രൂ വിചാരണ നേരിടണമെന്ന് കോടതി വ്യക്തമാക്കിയിരുന്നു. ഇതോടെയാണ് ബ്രിട്ടീഷ് രാജകുടുംബം ആൻ്രൂവിന്റെ രാജകീയ പദവികൾ നീക്കം ചെയ്തത്. കൊട്ടാരത്തിന്റെ പേരിലുള്ള ഒരു പദവിയും ആൻഡ്രൂവിന് ഉണ്ടായിരിക്കില്ലെന്നും ഒരു സാധാരണ വ്യക്തിയെപ്പോലെ അദ്ദേഹം വിചാരണ നടപടികൾ നേരിടണമെന്നും രാജകുടുംബം അറിയിച്ച. എലിസബത്ത് രാജ്ഞിയുടെ സമ്മതത്തോടെയും അറിവോടെയുമാണ് ആൻഡ്രൂവിൽ നിന്ന് രാജകീയ – സൈനിക പദവികൾ തിരിച്ചുവാങ്ങിയതെന്ന് ബക്കിംങ്ഹാം കൊട്ടാരം വ്യക്തമാക്കി.

അതേസമയം ലൈംഗിക പീഡന ആരോപണം നിയമവിധേയമായി തന്നെ നേരിടുമെന്ന് ആൻഡ്രൂവുമായി ബന്ധപ്പെട്ട വൃത്തങ്ങൾ വ്യക്തമാക്കുന്നത്. വെർജീയ എന്ന വനിത നടത്തിയ വെളിപ്പെടുത്തലിന്റെ അടിസ്ഥാനത്തിലാണ് എലിസബത്ത് രജ്ഞിയുടെ രണ്ടാമത്തെ മകനായ ആൻഡ്രൂവിനെതിരെ കോടതി വിധിയുണ്ടായത്. പതിനേഴാം വയസിലാണ് തനിക്ക് ഇത്തരമൊരു ദുരനുഭവം ഉണ്ടായതെന്നായിരുന്നു വെർജീനയുടെ വെളിപ്പെടുത്തൽ. അമേരിക്കൻ ശതകോടീശ്വരൻ ജെഫ്രിഎപ്‌സൈറ്റന്റെ നിർദേശത്തെ തുടർന്ന് രാജകുമാരനായി തന്നെ എത്തിച്ച് നൽകിയിരുന്നുവെന്നും ഇവർ പറഞ്ഞിരുന്നു.

വിർജീനിയ നൽകിയ കേസിനെതിരെ ആൻഡ്രൂ നൽകിയ ഹർജി കോടതി തള്ളിയതോടെയാണ് വിചാരണ നേരിടേണ്ട സാഹചര്യം ഉണ്ടായത്. വിർജീനിയയ്ക്ക് കേസുമായി മുന്നോട്ട് പോകാനുള്ള അനുമതിയും കോടതി നൽകിയിട്ടുണ്ട്.

വാഷിംഗ്ടൺ: കോവിഡ് വാക്‌സിനേഷനുമായി ബന്ധപ്പെട്ട് നിർണായക കണ്ടെത്തലുമായി ഗവേഷകർ. ഗർഭിണികൾ കോവിഡ് വാക്‌സിൻ സ്വീകരിക്കുന്നതുമായി ബന്ധപ്പെട്ടുള്ള കണ്ടെത്തലുകളാണ് ഗവേഷകർ നടത്തിയത്. ഗർഭിണികൾ വാക്സിൻ സ്വീകരിക്കുന്നത് കൊണ്ട് പ്രശ്നങ്ങളൊന്നുമില്ലെന്നാണ് ആരോഗ്യ വിദഗ്ധർ ചൂണ്ടിക്കാട്ടുന്നത്. ഇതുമായി ബന്ധപ്പെട്ട് നിരവധി പഠനങ്ങളും ഗവേഷകർ നടത്തിയിട്ടുണ്ട്.

കോവിഡ് വാക്‌സിൻ സ്വീകരിച്ച അമ്മമാരിൽ നിന്ന് മുലപ്പാൽ വഴി കുഞ്ഞുങ്ങൾക്കും ആന്റിബോഡികൾ ലഭിക്കുമെന്നും അതിനാൽ കുഞ്ഞുങ്ങൾക്ക് വൈറസിൽ നിന്ന് സംരക്ഷണം ലഭിക്കുമെന്നുമാണ് പുതിയ ഒരു പഠനങ്ങൾ വ്യക്തമാക്കുന്നത്. മസാച്ചുസെറ്റ്‌സ് സർവകലാശാലയിലെ ഗവേഷകർ നടത്തിയ പഠനത്തിലാണ് ഇത്തരമൊരു കണ്ടെത്തൽ. വാക്‌സിൻ എടുത്ത അമ്മമാരുടെ മുലപ്പാലിലും ഇവർ മുലയൂട്ടുന്ന കുഞ്ഞുങ്ങളുടെ മലത്തിലും ആന്റിബോഡി സാന്നിധ്യം കണ്ടെത്തിയതായി ഗവേഷകർ അറിയിച്ചു. ഒന്നര മാസം മുതൽ 23 മാസം വരെയുള്ള കുഞ്ഞുങ്ങളിലാണ് ഇത്തരത്തിൽ ആന്റിബോഡി സാന്നിധ്യം കണ്ടെത്താൻ കഴിഞ്ഞത്. ഒബ്‌സ്‌ടെട്രിക്‌സ് ആൻഡ് ഗൈനക്കോളജി ജേണലിലാണ് പഠന റിപ്പോർട്ട് പ്രസിദ്ധീകരിച്ചത്.

അമേരിക്കയിലുള്ള മുലയൂട്ടുന്ന 30 അമ്മമാരിലും അവരുടെ കുഞ്ഞുങ്ങളിലുമാണ് വിദഗ്ധർ ഗവേഷണം നടത്തിയത്. കഴിഞ്ഞ വർഷം ജനുവരി മുതൽ ഏപ്രിൽ വരെയുള്ള മാസത്തിനിടെയാണ് ഇവർക്ക് കോവിഡ് വാക്‌സിൻ നൽകിയത്. എംആർഎൻഎ വാക്‌സിനാണ് ഗർഭിണികളിൽ കുത്തിവെച്ചത്. വാക്‌സിൻ എടുക്കുന്നതിന് മുൻപും ആദ്യ ഡോസ് എടുത്ത ശേഷം രണ്ടു മുതൽ മൂന്ന് ആഴ്ച്ചകൾക്ക് ശേഷവും രണ്ടാമത്തെ ഡോസ് സ്വീകരിച്ച് മൂന്നാഴ്ച്ച കഴിഞ്ഞുമുള്ള മുലപ്പാൽ സാംപിളുകളാണ് ഇവരിൽ നിന്ന് ശേഖരിച്ച് പഠനവിധേയമാക്കിയത്. ആദ്യ ഡോസിന് 19 ദിവസങ്ങൾക്ക് ശേഷവും രണ്ടാമത്തെ ഡോസിന് 21 ദിവസങ്ങൾക്ക് ശേഷവും ഇവരുടെ രക്ത സാംപിളുകൾ ശേഖരിച്ച് പഠന വിധേയമാക്കിയിരുന്നു. അമ്മമാർ രണ്ടാമത്തെ ഡോസ് എടുത്ത് 21 ദിവസങ്ങൾക്ക് ശേഷമാണ് കുഞ്ഞുങ്ങളുടെ മലത്തിന്റെ സാംപിൾ ശേഖരിച്ചത്. മുലപ്പാലിലും കുഞ്ഞുങ്ങളുടെ മലത്തിലും വാക്‌സിൻ എടുത്ത ശേഷം IgG, IgA ആന്റിബോഡികളുടെ സാന്നിധ്യം കണ്ടെത്താനായെന്നും പഠനത്തിൽ പറയുന്നു.

ബ്രസൽസ്: അർബുദത്തിന് കാരണമാകുന്ന കളർ ടാറ്റു മഷികൾ നിരോധിച്ച് യൂറോപ്യൻ യൂണിയൻ. ടാറ്റു മേക്കിംഗിൽ ഉപയോഗിക്കുന്ന നിറമുള്ള മഷികൾക്കും പെർമെനന്റ് മേക്ക് അപ്പ് നിർമ്മിക്കാൻ ഉപയോഗിക്കുന്ന ഏകദേശം 4,000 രാസവസ്തുക്കൾക്കുമാണ് യൂറോപ്യൻ യൂണിയൻ നിരോധനം ഏർപ്പെടുത്തിയത്. അർബുദം, ജനിതകപരിവർത്തം, അലർജി, ത്വക്ക് രോഗങ്ങൾ തുടങ്ങിയവയ്ക്ക് കാരണമാകുന്ന രാസവസ്തുക്കളാണ് നിരോധിച്ചത്. ദോഷകരമായ ഈ മഷികൾക്ക് പകരം മറ്റ് മഷികൾ ഉപയോഗിക്കാമെന്ന് യൂറോപ്യൻ യൂണിയൻ അറിയിച്ചു.

ടാറ്റുവിന് നിരോധനം ഏർപ്പെടുത്തുകയല്ല ഇതിനായി ഉപയോഗിക്കുന്ന നിറങ്ങൾ സുരക്ഷിതമാക്കുകയാണ് ചെയ്യാനുദ്ദേശിക്കുന്നതെന്നും യൂറോപ്യൻ യൂണിയൻ വ്യക്തമാക്കുന്നു. കളർ ടാറ്റുകളർ ടാറ്റൂകളിൽ ഉപയോഗിക്കുന്ന പ്രൊഫഷണൽ മഷികളിൽ ഇരുമ്പ് ഓക്സൈഡുകൾ, ലോഹ ലവണങ്ങൾ അല്ലെങ്കിൽ പ്ലാസ്റ്റിക്കുകൾ എന്നിവയുടെ സംയോജനമുണ്ട്. അലുമിനിയം, ടൈറ്റാനിയം, മെർക്കുറി, ലെഡ്, നിക്കൽ, സിങ്ക്, ചെമ്പ്, ഇരുമ്പ്, ബേരിയം തുടങ്ങിയ ലോഹങ്ങളും ഇതിൽ ഉപയോഗിച്ചിട്ടുണ്ട്. സെലിനിയം, സൾഫർ, ആർസെനിക്, ലിഥിയം തുടങ്ങിയ രാസവസ്തുക്കളും നിറത്തിനായി ഉപയോഗിക്കുന്നുണ്ട്.

അതേസമയം യൂറോപ്യൻ യൂണിയന്റെ പുതിയ തീരുമാനത്തിനെതിരെ എതിർപ്പ് അറിയിച്ച് ടാറ്റു ആർട്ടിസ്റ്റുകൾ രംഗത്തെത്തിയിട്ടുണ്ട്. പുതിയ തീരുമാനം തങ്ങളുടെ വിപണിയെ ദോഷകരമായി ബാധിക്കുമെന്നും തീരുമാനം ഏകപക്ഷീയമാണെന്നുമാണ് ഇവർ പറയുന്നത്. ടാറ്റു അർബുദത്തിന് കാരണമാകുന്നുവെന്നതിന് ശക്തമായ ശാസ്ത്രീയമായി തെളിവുകളൊന്നും ലഭിച്ചിട്ടില്ലെന്നാണ് ഇവരുടെ വാദം. എന്നാൽ പൊതുജനാരോഗ്യം കണക്കിലെടുത്താണ് ഇത്തരമൊരു തീരുമാനം സ്വീകരിക്കുന്നതെന്ന് യൂറോപ്യൻ യൂണിയൻ പ്രതികരിച്ചു.