International (Page 165)

ഹൂസ്റ്റൻ: അമേരിക്കയിൽ കോവിഡ് വൈറസിന്റെ ജനിതക വകഭേദമായ ഒമിക്രോൺ വ്യാപനം വർധിക്കുന്നു. 10 ലക്ഷത്തിലേറെ പേർക്കാണ് തിങ്കളാഴ്ച മാത്രം അമേരിക്കയിൽ കോവിഡ് സ്ഥിരീകരിച്ചത്. ഒമിക്രോൺ വകഭേദമാണ് കോവിഡ് കേസുകൾ വർധിക്കാൻ കാരണമെന്നാണ് ഇആരോഗ്യ വിദഗ്ധർ വ്യക്തമാക്കുന്നത്. കോവിഡ് കേസുകൾ ഉയരുന്നുണ്ടെങ്കിലും കൂടുതൽ മരണങ്ങളോ, ഗുരുതരാവസ്ഥയോ റിപ്പോർട്ട് ചെയ്യുന്നില്ലെന്ന ആശ്വാസത്തിലാണ് അധികൃതർ.

കോവിഡ് വ്യാപനം വർധിക്കുന്ന സാഹചര്യത്തിൽ അമേരിക്കയിൽ പലസ്ഥലങ്ങളിലും സ്‌കൂളുകൾ അടച്ചുപൂട്ടി. വീണ്ടും ഓൺലൈൻ പഠനത്തിലേക്കുള്ള ചുവടുമാറ്റത്തിന് തയ്യാറെടുക്കുകയാണ് സ്‌കൂളുകൾ.നെവാർക്ക്, അറ്റ്ലാന്റ, മിൽവാക്കി, ക്ലീവ്‌ലാൻഡ് എന്നിവയുൾപ്പെടെ പബ്ലിക് സ്‌കൂൾ ഡിസ്ട്രിക്റ്റുകൾ താൽക്കാലികമായി വിദൂര പഠനത്തിലേക്ക് മാറിയിട്ടുണ്ട്. കൂടുതൽ സ്‌കൂളുകളിൽ ഉടൻ ഓൺലൈൻ പഠനം ആരംഭിക്കുമെന്നാണ് റിപ്പോർട്ട്.

രാജ്യത്ത് കോവിഡ് കേസുകൾ കുത്തനെ ഉയരുകയാണെങ്കിലും ആശുപത്രിയിൽ പ്രവശിപ്പിക്കപ്പെടുന്നവരുടെ എണ്ണം കുറവാണ്. രോഗികളിൽ പലരും വീടുകളിൽ തന്നെ നിരീക്ഷണത്തിൽ കഴിയുകയാണ്. അമേരിക്കയിൽ കോവിഡ് കേസുകളുടെ എണ്ണം ഉയരുമെന്ന് റിപ്പോർട്ടുകളുണ്ടായിരുന്നെങ്കിലും ഇത്രത്തോളം വർധനവ് ഉണ്ടായിരിക്കുമെന്ന് അധികൃതർ പ്രതീക്ഷിച്ചിരുന്നില്ല. കോവിഡ് വ്യാപനം പൊട്ടിപ്പുറപ്പെട്ടതിന് ശേഷം ലോകരാജ്യങ്ങളിൽ ഉണ്ടാകുന്ന ഏറ്റവും ഉയർന്ന നിരക്കാണ് അമേരിക്കയിൽ റിപ്പോർട്ട് ചെയ്തിരിക്കുന്നത്.

ന്യൂയോർക്ക്: ലോകരാഷ്ട്രങ്ങൾക്കെതിരെ വിമർശനവുമായി ലോകാരോഗ്യ സംഘടന. കോവിഡ് വൈറസിന്റെ ജനിതക വകഭേദമായ ഒമിക്രോൺ വ്യാപനം വർധിക്കുന്ന സാഹചര്യത്തിൽ ലോകരാഷ്ട്രങ്ങളുടെ മെല്ലപോക്കിനെതിരെയാണ് ലോകാരോഗ്യ സംഘടന രംഗത്തെത്തിയത്. എല്ലാവരും ആഗ്രഹിക്കുന്ന പോലെ 2022 ൽ തന്നെ കോവിഡ് മഹാമാരിയെ ഈ ഭൂമുഖത്തു നിന്നും തുടച്ചുനീക്കാം. എന്നാൽ സമൂഹങ്ങളോട് കാണിക്കുന്ന നീതികേടും മാറ്റിനിർത്തലും അവസാനിച്ചാൽ മാത്രമേ അത് സാധിക്കൂവെന്നാണ് ലോകാരോഗ്യ സംഘടന അഭിപ്രായപ്പെടുന്നത്. ഡബ്ലു.എച്ച്.ഒ മേധാവി ടെഡ്രോസ് ഗബ്രിയേസൂസാണ് ഇക്കാര്യം അറിയിച്ചത്.

എല്ലാവരും ദരിദ്ര സമൂഹങ്ങളോടുള്ള നീതികേട് അവസാനിപ്പിച്ചാൽ ഈ ഒറ്റവർഷംകൊണ്ട് കോവിഡിനെ തുടച്ചു നീക്കാമെന്ന് അദ്ദേഹം അഭിപ്രായപ്പെട്ടു. ഒരു രാജ്യവും ഈ മഹാമാരിയിൽ നിന്നും മുക്തമല്ല. എവിടെ പുതിയ വകഭേദമുണ്ടായാലും അത് ഒരു മാസത്തിനകം ലോകം മഴുവൻ വ്യാപിക്കുകയാണ്. നിരവധി സംവിധാനങ്ങൾ രാഷ്ട്രങ്ങൾ വികസിപ്പിച്ചിട്ടുമുണ്ട്. എന്നാൽ രാജ്യങ്ങളോട് കാണിക്കുന്ന നീതികേടും അസമത്വവും ഇല്ലാതാക്കാൻ ആദ്യം പരിശ്രമിക്കണമെന്ന് അദ്ദേഹം ആവശ്യപ്പെട്ടു.

ഇന്ത്യ ഉൾപ്പെടെയുള്ള വികസ്വര രാജ്യങ്ങൾ പോലും ചുറ്റുമുള്ള നിരവധി രാജ്യങ്ങൾക്ക് അടിയന്തിരസഹായം നൽകുകയാണ്. എന്നാൽ ആഫ്രിക്കൻ മേഖലയെ ലോകരാജ്യങ്ങൾ അവഗണിക്കുന്നു. ദരിദ്രരാജ്യങ്ങളുടെ പ്രകൃതി വിഭവങ്ങളും സമ്പത്തും മുഴുവൻ കവർന്നെടുക്കുന്ന പാശ്ചാത്യരാജ്യങ്ങൾ വാക്സിൻ കാര്യത്തിലും മരുന്നുകളുടെ കാര്യത്തിലും മെല്ലെപോക്ക് തുടരുന്ന സാഹചര്യത്തിലാണ് അദ്ദേഹത്തിന്റെ വാക്കുകൾക്ക് പ്രസക്തിയേറുന്നത്.

ബെർലിൻ: ജർമ്മനിയിലെ ആണവനിലയങ്ങളിൽ മൂന്നെണ്ണം അടച്ചുപൂട്ടി. പതിറ്റാണ്ടുകളായി പ്രവർത്തനം തുടരുന്ന ആറു ആണവനിലയങ്ങളിൽ പകുതിയും അടച്ചുപൂട്ടിയതെന്നാണ് റിപ്പോർട്ട്. ബാക്കിയുള്ളവ ഈ വർഷം അവസാനത്തോടെ അടച്ചുപൂട്ടാനാണ് ജർമ്മനിയുടെ തീരുമാനം. മൂന്ന് ബില്യൻ ഡോളർ നഷ്ടപരിഹാരം നൽകിയാണ് ആണവോർജ കമ്പനികൾ സർക്കാർ അടച്ചു പൂട്ടുന്നത്. ഫോണിൽ ഇന്ധനങ്ങളിൽ നിന്നും പുനരുപയോഗ ഇന്ധന സ്രോതസ്സുകളിലേക്ക് മടങ്ങാനും ഊർജാവശ്യത്തിന് ആണവനിലയങ്ങൾ ഉപയോഗിക്കുന്നത് അവസാനിപ്പിക്കാനും കഴിഞ്ഞ വർഷം ജർമനി തീരുമാനിച്ചിരുന്നു. ഇതിന്റെ ഭാഗമായാണ് പുതിയ നടപടി.

1980-കളിൽ ജർമനിയിൽ പ്രവർത്തനമാരംഭിച്ച മൂന്ന് ആണവനിലയങ്ങളാണ് അടച്ചു പൂട്ടിയത്. ബ്രോക്ഡോർഫ് ആണവനിലയവും ഉൾപ്പെടെയുള്ളവയാണ് അടച്ചു പൂട്ടിയതെന്ന് അധികൃതർ വ്യക്തമാക്കി. 1986-ൽ സോവിയറ്റ് യൂണിയനിൽ ഉണ്ടായ ചെർണോബിൽ ആണവനിലയ ദുരന്തത്തിന്റെ പശ്ചാത്തലത്തിൽ ബ്രോക്‌ഡോർഫ് ആണവനിലയത്തിനെതിരെ പ്രതിഷേധം നടത്തിയിരുന്നു. ഗ്രോന്ദെ ആണവനിലയം, പടിഞ്ഞാറൻ മ്യൂണിച്ചിൽ നിന്നും 80 കിലോമീറ്റർ അകലെയുള്ള ഗ്രന്ദർമിൻജൻ ആണവനിലയം തുടങ്ങിയവയും അടച്ചു പൂട്ടിയിട്ടുണ്ട്. ഇനി അവശേഷിക്കുന്ന മൂന്ന് ആണവനിലയങ്ങൾ 2022 അവസാനത്തോടെ പ്രവർത്തനം അവസാനിപ്പിക്കും.

ജെറാർഡ് ഷ്രോഡറിന്റെ നേതൃത്വത്തിലുള്ള മധ്യ-ഇടതുപക്ഷ സർക്കാർ 2002-ലാണ് ആണവനിലയങ്ങളുടെ പ്രവർത്തനം അവസാനിപ്പിക്കുന്നതിനെ കുറിച്ച് ചിന്തിക്കുന്നത്. അതിന്റെ തുടർച്ചയായാണ് അദ്ദേഹത്തിന്റെ പിൻഗാമിയായ ആഞ്ചലാ മെർക്കൽ, 2022-ഓടെ ആണവനിലയങ്ങൾ അടച്ചുപൂട്ടാനുള്ള തീരുമാനമെടുത്തത്. 2011-ൽ ജപ്പാനിലുണ്ടായ ഫുക്കുഷിമ ആണവ ദുരന്തത്തിന്റെ പശ്ചാത്തലത്തിലാണ് ആണവനിലയങ്ങളുടെ പ്രവർത്തനം തുടരാനുള്ള മുൻ തീരുമാനം മെർക്കൽ തിരുത്തിയത്.

മോസ്‌കോ: ബഹിരാകാശത്തും പുതുവത്സരാഘോഷം നടത്തി സഞ്ചാരികൾ. അന്താരാഷ്ട്ര ബഹിരാകാശ നിലയത്തിലാണ് സഞ്ചാരികൾ പുതുവത്സരാഘോഷം നടത്തിയത്. റഷ്യൻ സ്‌പേസ് ഏജൻസ് റോസ്‌കോസ്മോസ് ആണ് ഇക്കാര്യം പുറത്തുവിട്ടത്.

21 വർഷമായി ബഹിരാകാശ നിലയിൽ പുതുവത്സരാഘോഷം നടക്കുന്നുണ്ട്. എന്നാൽ ഇത്തവണത്തെ ആഘോഷത്തിന് ചെറിയൊരു പ്രത്യേകതയുണ്ട്. പത്ത് പേരാണ് ഇത്തവണത്തെ ആഘോഷത്തിൽ പങ്കെടുത്തത്. ഭൂമിയിലെ ആഘോഷത്തിന് ഈ സംഖ്യയ്ക്ക് വലിയ പ്രത്യേകതയൊന്നുമില്ലെങ്കിലും ബഹിരാകാശത്ത് ഇത് വലിയൊരു സംഖ്യയാണ്. ആദ്യമായാണ് ബഹിരാകാശത്ത് പത്ത് പേർ പങ്കെടുക്കുന്ന ഒരു ആഘോഷം നടക്കുന്നത്.

അന്താരാഷ്ട്ര ബഹിരാകാശ നിലയത്തിൽ ഏഴുപേരും ചൈനീസ് സ്‌പേസ് സ്റ്റേഷനായ ടിയാങ്കോംഗിൽ മൂന്നുപേരുംഹാപ്പി ന്യൂ ഇയർ പറഞ്ഞു. റഷ്യയുടെ ആന്റൺ ഷ്‌കാപ്ലെറോവ്, പ്യോട്ടർ ഡുബ്രോവ്, നാസയുടെ മാർക്ക് വാൻഡ്‌ഹേ, തോമസ് മാർഷ്‌ബേൺ, രാജാ ചാരി, കെയ്ല ബാരൺ, യൂറോപ്യൻ സ്‌പേസ് ഏജൻസിയുടെ മത്യാസ് മൗറർ എന്നിവർ അന്താരാഷ്ട്ര ബഹിരാകാശ നിലയത്തിലും ഹായ് സിഗാങ്, വാങ് യാപ്പിംഗ്, ഗുവാങ്ഹു തുടങ്ങിയവർ ചൈനയുടെ ബഹിരാകാശ നിലയമായ ടിയാങ്കോംഗിലും പുതുവത്സരാഘോഷത്തിൽ പങ്കെടുത്തു.

മനുഷ്യന്റെ ബഹിരാകാശ പര്യവേക്ഷണ ചരിത്രത്തിലെ എക്കാലത്തെയും ഏറ്റവും തിരക്കേറിയ പുതുവത്സരാഘോഷം എന്നാണ് റോസ്‌കോസ്‌മോസ് ഇതിനെ വിശേഷിപ്പിച്ചത്. 83 പേരാണ് കഴിഞ്ഞ 21 വർഷത്തിനിടെ അന്താരാഷ്ട്ര ബഹിരാകാശ നിലയത്തിൽ പുതുവർഷ രാവ് ചെലവഴിച്ചത്. ആഘോഷത്തിൽ ഒന്നിലധികം തവണ പങ്കെടുത്തവരുമുണ്ട്. നാല് പുതുവർഷമാണ് റഷ്യൻ ബഹിരാകാശയാത്രികനായ ആന്റൺ ഷ്‌കാപ്ലെറോവ് ബഹിരാകാശത്ത് ആഘോഷിച്ചത്.

ജനീവ: കോവിഡ് വൈറസ് വ്യാപനത്തിന്റെ പുതിയ വകഭേദങ്ങൾ കൂടുതൽ രാജ്യങ്ങളിൽ റിപ്പോർട്ട് ചെയ്യുന്ന സാഹചര്യത്തിൽ രാജ്യങ്ങൾക്ക് മുന്നറിയിപ്പുമായി ലോകാരോഗ്യ സംഘടന. ഡെൽറ്റ, ഒമിക്രോൺ വകഭേദങ്ങൾ ‘ഇരട്ട ഭീഷണികൾ’ ആണെന്നാണ് ലോകാരോഗ്യ സംഘടന മുന്നറിയിപ്പ് നൽകുന്നത്.

കൊവിഡിന്റെ പുതിയ വകഭേദങ്ങൾ മിക്രോൺ, ഡെൽറ്റാ വകഭേദങ്ങൾ മുലം കൊവിഡ് കേസുകൾ വർധിക്കുന്നത് ആരോഗ്യ സംവിധാനത്തെ തന്നെ തകിടം മറിക്കുമെന്ന് ലോകാരോഗ്യ തലവൻ ടെഡ്രോസ് അഥനോം ഗബ്രയേസസ് വ്യക്തമാക്കി. കോവിഡിന്റെ ജനിതക വകഭേദങ്ങൾ പുതിയ കേസുകളുടെ എണ്ണം റെക്കോർഡ് ഉയരത്തിലേക്ക് എത്തിക്കാൻ കാരണമാകും. രോഗം ബാധിച്ച് ആശുപത്രികളിൽ പ്രവേശിക്കുന്നവരുടേയും മരിക്കുന്നവരുടേയും എണ്ണം വർദ്ധിക്കുന്നതിന് കാരണമാകുന്നുവെന്നും അദ്ദേഹം ചൂണ്ടിക്കാട്ടി.

ആഗോളതലത്തിൽ കോവിഡ് കേസുകളിൽ 11 ശതമാനം വർധനവാണ് കഴിഞ്ഞ ആഴ്ച്ച റിപ്പോർട്ട് ചെയ്തത്. യുഎസിലും ഫ്രാൻസിലുമാണ് ഏറ്റവും അധികം കേസുകൾ റിപ്പോർട്ട് ചെയ്തത്. ഡെൽറ്റ വകഭേദത്തെ അപേക്ഷിച്ച് ഒമിക്രോൺ കൂടുതൽ പ്രചരിക്കാൻ സാധ്യതയുണ്ട്. അതിനാൽ തന്നെ കേസുകളുടെ എണ്ണം ഒരു സുനാമിയിലേക്ക് നയിക്കാൻ ഇടവരുത്തുമെന്നും ലോകാരോഗ്യ തലവൻ ടെഡ്രോസ് അഥനോം ഗബ്രയേസസ് പറഞ്ഞു. ഇത് തളർന്നുപോയ ആരോഗ്യ പ്രവർത്തകർക്കും ആരോഗ്യ സംവിധാനങ്ങൾ കൂടുതൽ തകർച്ചയുടെ വക്കിലും കടുത്ത സമ്മർദ്ദത്തിലേക്കും വീഴ്ത്തുന്നുവെന്നും അദ്ദേഹം വ്യക്തമാക്കി.

ഈ വർഷം അവസാനത്തോടെ എല്ലാ രാജ്യങ്ങളിലെയും ജനസംഖ്യയുടെ 40 ശതമാനം പൂർണമായി വാക്‌സിനേഷൻ നൽകണമെന്നാണ് ലോകാരോഗ്യ സംഘടന ആഗ്രഹിക്കുന്നത്. 2022-ന്റെ മധ്യത്തോടെ 70 ശതമാനം ആളുകളും വാക്‌സിനേഷൻ നൽകാനാണ് ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.

ന്യൂയോർക്ക്: ന്യൂയോർക്കിൽ കോവിഡ് ബാധിച്ച് ആശുപത്രിയിൽ പ്രവേശിപ്പിക്കപ്പെടുന്ന കുട്ടികളുടെ എണ്ണം വർധിക്കുന്നു. ആശുപത്രിയിൽ പ്രവേശിപ്പിക്കപ്പെടുന്ന 18 വയസിൽ താഴെയുള്ളവരിൽ പകുതിയിലേറെയും അഞ്ച് വയസ്സിൽ താഴെയുള്ളവരാണെന്നാണ് വിവരം. അമേരിക്കയിൽ കോവിഡ് കേസുകൾ കുതിച്ചുയരുകയാണ്.

കഴിഞ്ഞ ഒരാഴ്ചത്തെ കൊവിഡ് കേസുകളുടെ കണക്കെടുത്താൽ 1.90 ലക്ഷമാണ് അമേരിക്കയിലെ ശരാശരി. കോവിഡ് വൈറസിന്റെ ജനിതക വകഭേദം ഒമിക്രോൺ വ്യാപിക്കുന്ന സാഹചര്യത്തിൽ അമേരിക്കയിൽ ജാഗ്രത കർശനമാക്കിയിരിക്കുകയാണ്. അടുത്ത മാസത്തോടെ അമേരിക്കയിൽ പരിശോധനകൾ വർധിപ്പിക്കാനുള്ള സൗകര്യം ഒരുക്കുമെന്ന് അധികൃതർ അറിയിച്ചു.

കോവിഡ് കേസുകൾ ക്രമാതീതമായി ഉയരാനുള്ള സാധ്യതയുണ്ടെന്നാണ് ആരോഗ്യ വിദഗ്ധർ നൽകുന്ന മുന്നറിയിപ്പ്. രോഗവ്യാപനം തടയാൻ പ്രതിരോധ മാർഗങ്ങൾ സ്വീകരിക്കുകയാണ് വേണ്ടതെന്ന് അധികൃതർ മുന്നറിയിപ്പ് നൽകുന്നു.