General (Page 1,469)

On:

ന്യൂഡൽഹി: അടുത്ത വർഷത്തോടെ ചന്ദ്രയാൻ 3 ദൗത്യം വിക്ഷേപിക്കാൻ ലക്ഷ്യമിട്ട് ഐഎസ്ആർഒ. 2022-ന്റെ മൂന്നാം പാദത്തോടെ ചന്ദ്രയാൻ 3 വിക്ഷേപിക്കാനാണ് ഐ.എസ്.ആർ.ഒ. ലക്ഷ്യമിടുന്നത്. കേന്ദ്രമന്ത്രി ജിതേന്ദ്ര സിംഗാണ് ഇക്കാര്യം അറിയിച്ചത്.

ചന്ദ്രയാൻ 3 ദൗത്യത്തിന് വേണ്ടിയുളള നടപടികൾ പുരോഗമിക്കുകയാണെന്ന് കേന്ദ്രമന്ത്രി അദ്ദേഹം വ്യക്തമാക്കി. പുതിയ സമയക്രമവും അദ്ദേഹം പുറത്തുവിട്ടു. ഈ വർഷം ചന്ദ്രയാൻ 3 വിക്ഷേപിക്കാനായിരുന്നു ഐഎസ്ആർഒ ആദ്യം പദ്ധതിയിട്ടിരുന്നത്. എന്നാൽ കോവിഡ് വൈറസ് വ്യാപനത്തെ തുടർന്നാണ് വിക്ഷേപണം നീട്ടിവെയ്ക്കുകയായിരുന്നു. ലോക്ക് ഡൗൺ കാലയളവിൽ വർക്ക് ഫ്രം ഹോമിലിരുന്ന് ചെയ്യാൻ സാധ്യമായതെല്ലാം ചെയ്തിരുന്നതായി ബഹിരാകാശ വകുപ്പ് വ്യക്തമാക്കി.

ലോക്ക് ഡൗൺ മാറിയതോടെ വീണ്ടും ചന്ദ്രയാൻ 3 യ്ക്ക് വേണ്ടിയുള്ള പ്രവർത്തനങ്ങൾ ആരംഭിച്ചു. നിലവിൽ ഭൂരിഭാഗം പ്രവർത്തനങ്ങളും പൂർത്തിയാക്കിയിട്ടുണ്ടെന്നും അദ്ദേഹം ലോക്‌സഭയിൽ നൽകിയ മറുപടിയിൽ വിശദമാക്കുന്നു.

covid

On:

ന്യൂഡൽഹി: രാജ്യത്ത് കഴിഞ്ഞ 24 മണിക്കൂറിനിടെ റിപ്പോർട്ട് ചെയ്യപ്പെട്ട കോവിഡ് കേസുകളിൽ പകുതിയിൽ അധികവും കേരളത്തിൽ. രാജ്യത്ത് ആകെ 43,509 പേർക്കാണ് 24 മണിക്കൂറിനിടെ രോഗബാധ സ്ഥിരീകരിച്ചത്. ഇതിൽ 22,056 കേസുകളും റിപ്പോർട്ട് ചെയ്യപ്പെട്ടത് കേരളത്തിൽ നിന്നാണ്.

കഴിഞ്ഞ 24 മണിക്കൂറിനിടെ റിപ്പോർട്ട് ചെയ്യപ്പെട്ട 640 കോവിഡ് മരണങ്ങളിൽ 131 മരണങ്ങളും കേരളത്തിൽ നിന്നുള്ളതാണ്. 4,22,662 പേർക്കാണ് കോവിഡ് ബാധയെ തുടർന്ന് രാജ്യത്ത് ഇതുവരെ ജീവൻ നഷ്ടപ്പെട്ടത്. 38,465 പേർ 24 മണിക്കൂറിനിടെ രോഗമുക്തി നേടുകയും ചെയ്തു. 4,03,840 പേരാണ് രാജ്യത്തിന്റെ വിവിധ ഭാഗങ്ങളിലായി ചികിത്സയിലുള്ളത്.

സംസ്ഥാനത്തിന്റെ കോവിഡ് പ്രതിരോധ പ്രവർത്തനങ്ങൾക്ക് സംഘം സഹായങ്ങൾ നൽകുമെന്ന് കേന്ദ്ര ആരോഗ്യമന്ത്രി മൻസുഖ് മാണ്ഡവ്യ വ്യക്തമാക്കി. 97.38 ശതമാനമാണ് നിലവിൽ രാജ്യത്തെ രോഗമുക്തി നിരക്ക്. ജൂലായ് 28 വരെ 46,26,29,773 സാമ്പിളുകൾ പരിശോധിച്ചു. ഇന്നലെ മാത്രം 17,28,795 സാമ്പിളുകൾ പരിശോധിതച്ചതായാണ് ഇന്ത്യൻ കൗൺസിൽ ഫോർ മെഡിക്കൽ റിസർച്ച് അറിയിച്ചു.

അതേസമയം കേരളത്തിൽ കോവിഡ് പ്രതിദിന കേസുകൾ വർധിക്കുന്ന സാഹചര്യം കണക്കിലെടുത്ത് കേന്ദ്രം ആറംഗ വിദഗ്ധ സംഘത്തെ സംസ്ഥാനത്തേക്ക് അയക്കും. നാഷണൽ സെന്റർ ഫോർ ഡിസീസ് കൺട്രോളിൽ നിന്നുള്ള വിദഗ്ധരാണ് സംസ്ഥാനത്തെ സ്ഥിതിഗതികൾ വിലയിരുത്താനായി എത്തുന്നത്.

On:

റാഞ്ചി: ജില്ലാ ജഡ്ജി വാഹനമിടിച്ച് മരിച്ച സംഭവത്തിൽ നിർണായക വഴിത്തിരിവ്. സംഭവം കൊലപാതകമെന്നാണ് പോലീസിന്റെ നിഗമനം. അപകടത്തിന്റെ സിസിടിവി ദൃശ്യങ്ങൾ പുറത്തുവന്നതോടെയാണ് പോലീസിന് കൊലപാതകമാണോയെന്ന സംശയം തോന്നി തുടങ്ങിയത്. കഴിഞ്ഞ ദിവസമാണ് ധൻബാദിലെ ജില്ലാ അഡീഷണൽ ജഡ്ജി ഉത്തം ആനന്ദ് പ്രഭാതസവാരിക്കിടെ വാഹനമിടിച്ച് മരിച്ചത്. വീടിന് അര കിലോമീറ്റർ അകലെയായി അദ്ദേഹത്തെ അജ്ഞാത വാഹനമിടിക്കുകയായിരുന്നു.

കഴിഞ്ഞ ദിവസം രാവിലെ 5 മണിക്കായിരുന്നു ജഡ്ജിയെ വാഹനം ഇടിച്ചത്. തിരക്കില്ലാത്ത റോഡിലൂടെ നടക്കുകയായിരുന്ന ജഡ്ജിയെ ഒരു ഒട്ടോറിക്ഷ പിന്നാലെ വന്ന് ഇടിച്ചിട്ട ശേഷം നിർത്താതെ കടന്നു കളയുകയായിരുന്നു. ഈ സമയത്ത് മറ്റു വാഹനങ്ങളൊന്നും റോഡിലുണ്ടായിരുന്നില്ല. ഓട്ടോറിക്ഷ ജഡ്ജിയെ മനപൂർവ്വം ഇടിച്ചിട്ടതാണെന്നാണ് ദൃശ്യങ്ങളിൽ നിന്നും വ്യക്തമാകുന്നത്.

അപകടത്തിൽ ഗുരുതരമായി പരിക്കേറ്റ് നിലത്തു വീണ ജഡ്ജിയെ നാട്ടുകാരിലൊരാൾ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പ്രഭാതസവാരിക്ക് പോയ ഉത്തം ആനന്ദിനെ കാണാനില്ലെന്ന് ചൂണ്ടിക്കാട്ടി അദ്ദേഹത്തിന്റെ കുടുംബം പരാതി നൽകിയതിനെ തുടർന്നാണ് മരിച്ചത് ഉത്തം ആനന്ദാണെന്ന് തിരിച്ചറിഞ്ഞത്. അപകടമുണ്ടാക്കിയ വാഹനം മോഷ്ടിക്കപ്പെട്ടതാണെന്ന് പോലീസ് കണ്ടെത്തിയിട്ടുണ്ട്. അപകടം നടക്കുന്നതിന്റെ മണിക്കൂറുകൾക്ക് മുമ്പാണ് വാഹനം മോഷ്ടിച്ചതെന്നും സംഭവത്തിൽ അന്വേഷണം തുടരുകയാണെന്നും പോലീസ് അറിയിച്ചു. അടുത്തിടെ രണ്ട് പ്രധാന ഗുണ്ടാത്തലവന്മാരുടെ ജാമ്യാപേക്ഷ അദ്ദേഹം നിരസിക്കുകയും ചെയ്തു. ഇതിന്റെ പകയാണോ കൊലപാതകത്തിന് കാരണമെന്നാണ് പോലീസ് സംശയിക്കുന്നത്.

On:

തിരുവനന്തപുരം: കരുവന്നൂർ സഹകരണ ബാങ്ക് തട്ടിപ്പുമായി ബന്ധപ്പെട്ട് കുറ്റക്കാരായി കണ്ടെത്തുന്ന ഉദ്യോഗസ്ഥർക്കെതിരെ നടപടി സ്വീകരിക്കുമെന്ന് സഹകരണ മന്ത്രി വി എൻ വാസവൻ. ബാങ്കിലെ നിക്ഷേപകരുടെ ആശങ്ക പരിഹരിക്കുന്നതിനും നിക്ഷേപങ്ങളുടെ സുരക്ഷയും തിരികെ കിട്ടലും ഉറപ്പുവരുത്തുന്നതിനുമുള്ള പുനരുദ്ധാരണ പാക്കേജ് മൂന്നാഴ്ചയ്ക്കകം സർക്കാരിൽ സമർപ്പിക്കുമെന്നും അദ്ദേഹം വ്യക്തമാക്കി.

സർക്കാർ നിയോഗിച്ച അന്വേഷണ സമിതി സമർപ്പിക്കുന്ന റിപ്പോർട്ടിൽ കുറ്റക്കാരായി കണ്ടെത്തുന്നവർക്ക് കർശന ശിക്ഷ നൽകുമെന്ന് അദ്ദേഹം ഉറപ്പ് നൽകി. 250 കോടി രൂപയ്ക്കു മുകളിൽ പ്രവർത്തന മൂലധനവും ബിസിനസുമുള്ള ബാങ്കുകളെ ഒരു ഗ്രൂപ്പ് ആക്കി മൂന്ന് ഓഡിറ്റർമാരുള്ള ടീം രൂപീകരിച്ച് കണക്കുകൾ പരിശോധിക്കുമെന്നും ഇതിന്റെ മേൽനോട്ടം ജില്ലാതല ജോയിന്റ് ഡയറക്ടർക്കും അസിസ്റ്റന്റ് ഡയറക്ടർക്കും ആയിരിക്കുമെന്നും അദ്ദേഹം പറഞ്ഞു.

സഹകരണ മേഖലയിലെ ഓഡിറ്റ് സംവിധാനം ശക്തിപ്പെടുത്തും. ഇതിനായി ഡപ്യൂട്ടി അക്കൗണ്ട് ജനറൽ റാങ്കിൽ കുറയാത്ത ഉദ്യോഗസ്ഥനെ ഡപ്യൂട്ടേഷനിൽ നിയമിക്കും. സാമ്പത്തിക ക്രമക്കേടുകൾ, പണം മോഷണം, വായ്പാതട്ടിപ്പ്, സ്വർണപ്പണയത്തട്ടിപ്പ് തുടങ്ങിയവ നടന്നതായി ബോധ്യപ്പെട്ടാൽ ക്രിമിനൽ കേസുകൾ രജിസ്റ്റർ ചെയ്യും. കുറ്റക്കാരുടെ വസ്തുവകകൾ നിയമപരമായി മരവിപ്പിക്കുമെന്നും ഭേഗഗതിയോടു കൂടിയ കരടു നിയമം രണ്ടുമാസത്തിനകം കൊണ്ടുവരുമെന്നും അദ്ദേഹം പറഞ്ഞു. സഹകരണ സംഘങ്ങളിൽ പരിശോധന നടത്തി ക്രമക്കേടുകളിൽ സത്വര നടപടി സ്വീകരിക്കാൻ സഹകരണസംഘം രജിസ്ട്രാറെ ചുമതലപ്പെടുത്തിയതായും അദ്ദേഹം കൂട്ടിച്ചേർത്തു.

സഹകരണ സംഘങ്ങളിൽ നേരിട്ട് പരിശോധന നടത്താനും ക്രമക്കേടുകളിൽ ക്രിമിനൽ നടപടി സ്വീകരിക്കാനും അധികാരം നൽകുന്ന തരത്തിൽ സഹകരണ നിയമത്തിൽ മാറ്റം വരുത്തുമെന്നും സഹകരണ വിജിലൻസിന്റെ പ്രവർത്തനങ്ങൾ ശക്തിപ്പെടുത്തുമെന്നും വി എൻ വാസവൻ വിശദമാക്കി.

On:

തൃശൂർ: കടകൾ തുറക്കാൻ അനുവദിക്കാത്തതിനെ തുടർന്ന് സർക്കാരിനെതിരെ വീണ്ടും പ്രതിഷേധം ശക്തമാക്കാനൊരുങ്ങി വ്യാപാരി വ്യവസായി ഏകോപന സമിതി. പെരുന്നാളിന് ശേഷം കടകൾ തുറക്കാൻ സർക്കാർ അനുവദിക്കാത്തതിനെ തുടർന്നാണ് വീണ്ടും സമരവുമായി മുന്നോട്ട് പോകാൻ വ്യാപാരി വ്യവസായി ഏകോപന സമിതി തീരുമാനിച്ചത്. തൃശൂരിൽ ചേർന്ന വ്യാപാരി വ്യവസായി സംസ്ഥാന സമിതിയുടെ യോഗത്തിലാണ് ഇതുസംബന്ധിച്ച തീരുമാനമായത്.

ഓഗസ്റ്റ് രണ്ട് മുതൽ സമിതി സെക്രട്ടറിയേറ്റ് പടിക്കൽ ധർണയിരിക്കാനാണ് വ്യാപാരികളുടെ തീരുമാനം. ഓഗസ്റ്റ് ഒൻപതിന് സംസ്ഥാന വ്യാപകമായി കടകൾ തുറക്കുമെന്നും അന്നേദിവസം സർക്കാർ ഉദ്യോഗസ്ഥരിൽ നിന്ന് മോശമായ അനുഭവമുണ്ടായാൽ മരണം വരെ നിരാഹാരം കിടക്കുമെന്നും സമിതി അദ്ധ്യക്ഷൻ ടി.നസിറുദ്ദീൻ വ്യക്തമാക്കി.

സംസ്ഥാനത്തെ വ്യാപാരികൾ ആത്മഹത്യയുടെ വക്കിലാണെന്നാണ് വ്യാപാരികൾ പറയുന്നത്. മുഖ്യമന്ത്രിയുടെ വാക്ക് കേട്ടാണ് കടകൾ തുറക്കാനുളള തീരുമാനത്തിൽ നിന്ന് പിന്നോട്ട് പോയതെന്നും എന്നാൽ ചർച്ചയിലെ വാക്ക് മുഖ്യമന്ത്രി പാലിച്ചില്ലെന്ന് വ്യാപാരികൾ വ്യക്തമാക്കുന്നു.

On:

മലപ്പുറം: നിയമസഭാ കയ്യാങ്കളി കേസിൽ സുപ്രീം കോടതി വിധിയെ സ്വാഗതം ചെയ്യുന്നുവെന്ന് മുൻമന്ത്രി കെ ടി ജലീൽ. കേസിൽ വിചാരണ നേരിടാൻ തയ്യാറാണെന്ന് അദ്ദേഹം വ്യക്തമാക്കി. ഫേസ്ബുക്ക് കുറിപ്പിലൂടെയായിരുന്നു അദ്ദേഹത്തിന്റെ പ്രതികരണം.

കട്ടതിനോ കവർന്നതിനോ അല്ല, യുഡിഎഫിന്റെ കവർച്ചയെ എതിർത്തതിനാണ് കേസെന്നാണ് അദ്ദേഹം പറയുന്നത്. കേസിൽ വിചാരണ നടക്കട്ടേയെന്നും പറയാനുള്ളത് ബന്ധപ്പെട്ട കോടതിയെ ബോധിപ്പിക്കുമെന്നും അദ്ദേഹം വ്യക്തമാക്കി.

ഫേസ്ബുക്ക് കുറിപ്പിന്റെ പൂർണ്ണരൂപം:

യുഡിഎഫ് സർക്കാരിന്റെ അഴിമതിക്കെതിരെ നടത്തിയ സമരത്തിൽ നിയമസഭക്കകത്ത് വെച്ച് പ്രക്ഷുബ്ധമായ ചില രംഗങ്ങൾ അരങ്ങേറി. ബഹുമാനപ്പെട്ട സുപ്രിംകോടതി പ്രസ്തുത സംഭവവുമായി ബന്ധപ്പെട്ട് അന്നത്തെ നിയമസഭാ സെക്രട്ടറി നൽകിയ പരാതിയെ തുടർന്ന് എടുത്ത കേസിലെ പ്രതികൾ വിചാരണ നേരിടം എന്ന് വിധി പ്രസ്താവിച്ചിരിക്കയാണ്. വിധിയെ സ്വാഗതം ചെയ്യുന്നു. വിചാരണ നടക്കട്ടെ. പറയാനുള്ളത് ബന്ധപ്പെട്ട കോടതിയെ ബോധിപ്പിക്കും. കട്ടതിനോ കവർന്നതിനോ അല്ല യുഡിഎഫിന്റെ കവർച്ചയെ എതിർത്തതിനാണ് കേസ്.

On:

തിരുവനന്തപുരം: ചരിത്രത്തിലാദ്യമായി മിൽമയുടെ ഭരണം ഇടതുപക്ഷത്തിന്. മിൽമയിൽ തെരഞ്ഞെടുക്കപ്പെട്ട ഭരണസമിതി നിലവിൽ വന്നതിന് ശേഷം ആദ്യമായാണ് ഇടതുപക്ഷം ഭരണം നേടുന്നത്. ചെയർമാനായി മലബാർ മേഖലാ ക്ഷീരോത്പാദക യൂണിയൻ ചെയർമാൻ കെ.എസ്. മണി തെരഞ്ഞെടുക്കപ്പെട്ടു. 1983 ൽ മിൽമയിൽ ഭരണസമിതി നിലവിൽ വന്നത് മുതൽ ക്ഷീരോത്പാദക സഹകരണസംഘം ഭരിച്ചിരുന്നത് കോൺഗ്രസ് ആയിരുന്നു ചെയർമാനായിരുന്ന പി എ ബാലൻ മാസ്റ്ററുടെ മരണത്തെ തുടർന്നാണ് ഭരണ സമിതി തെരഞ്ഞെടുപ്പ് നടന്നത്.

മിൽമയിൽ തെരഞ്ഞെടുക്കപ്പെട്ട ഭരണ സമിതി നിലവിൽ വന്ന 1983 മുതൽ കോൺഗ്രസ് നേതാവ് പ്രയാർ ഗോപാലകൃഷ്ണനായിരുന്നു ഫെഡറേഷൻ ചെയർമാൻ. 2019 ൽ പ്രയാർ ഗോപാലകൃഷ്ണൻ ഒഴിഞ്ഞപ്പോഴാണ് പി എ ബാലൻ മാസ്റ്റർ ചെയർമാനായത്. ഇക്കഴിഞ്ഞ ജൂലൈ 10 നായിരുന്നു ബാലൻ മാസ്റ്റർ അന്തരിച്ചത്.

തെരഞ്ഞെടുപ്പിൽ എൽ.ഡി.എഫിന് ഏഴ് വോട്ടുകളും യുഡിഎഫിന് അഞ്ച് വോട്ടുകളുമാണ് ലഭിച്ചത്. അഡ്മിനിസ്‌ട്രേറ്റീവ് കമ്മിറ്റിയിലേക്ക് നോമിനേറ്റ് ചെയ്യപ്പെട്ട മൂന്ന് വോട്ടും മലബാർ മേഖലയിൽ നിന്നുമുള്ള നാല് വോട്ടുമാണ് എൽഡിഎഫിന് ലഭിച്ചത്.

കാലങ്ങളായുള്ള സിപിഎമ്മിന്റെ ലക്ഷ്യമായിരുന്നു മിൽമയിൽ ഭരണം പിടിക്കുക എന്നത്. ഇതിന്റെ ഭാഗമായി മലബാർ മേഖല ക്ഷീരോത്പാദക യൂണിയനിൽ ഭരണസമിതി പിരിച്ചുവിട്ട് ഉദ്യോഗസ്ഥഭരണം ഏർപ്പെടുത്തി. തുടർന്ന് തിരഞ്ഞെടുപ്പിൽ സി.പി.എം. ഭരണം പിടിച്ചെടുക്കുകയായിരുന്നു. സമാനമായി കാലാവധി പൂർത്തിയാക്കാൻ അഞ്ചുദിവസം ബാക്കിനിൽക്കേ തിരുവനന്തപുരം മേഖലാ ക്ഷീരോത്പാദക യൂണിയൻ ഭരണസമിതിയും ഓർഡിനൻസിലൂടെ പിരിച്ചുവിട്ടു. തുടർന്ന് സി.പി.എമ്മിന്റെ നേതൃത്വത്തിലുള്ള അഡ്മിനിസ്‌ട്രേറ്റീവ് കമ്മിറ്റിക്ക് ഭരണവും ഈ സമിതിക്ക് വോട്ട് ചെയ്യാനുള്ള അവകാശവും നൽകി. തെരഞ്ഞെടുപ്പ് നടത്തിയാൽ തിരുവനന്തപുരം മേഖല പിടിക്കാനാകുമെന്നായിരുന്നു കോൺഗ്രസിന്റെ പ്രതീക്ഷ. എന്നാൽ ഭരണം സിപിഎം പിടിച്ചെടുക്കുകയായിരുന്നു.

On:

ന്യൂഡൽഹി: ഇനി തീപിടുത്തത്തിന്റെ അപകട സാധ്യതയില്ലാതെ സുരക്ഷിതമായി ട്രെയിനിൽ യാത്ര ചെയ്യാം. തീപിടുത്തം ചെറുക്കാൻ കഴിവുള്ള യാത്രാ കോച്ചുകൾ റെയിൽവേ നിർമ്മിച്ചു. പഞ്ചാബിലെ കപൂർത്തലയിലെ റെയിൽ കോച്ച് ഫാക്ടറിയിൽ പുതുതായി നിർമ്മിച്ച യാത്രാ കോച്ചുകൾക്കാണ് തീപിടുത്തം ചെറുക്കാൻ കഴിവുള്ളത്. വിവിധ പരീക്ഷണങ്ങൾക്കൊടുവിലാണ് റെയിൽവേ ഇത്തരത്തിലൊരു കോച്ച് വികസിപ്പിച്ചെടുത്തത്. ആർസിഎഫ് ജനറൽ മാനേജർ രവീന്ദർ ഗുപ്തയാണ് ഇക്കാര്യം അറിയിച്ചത്. പുതിയ കോച്ചിന്റെ പ്രകടനം നിരീക്ഷിച്ച ശേഷം അവ മറ്റിടങ്ങളിലേക്ക് നൽകുന്ന കാര്യം ആലോചിക്കുമെന്ന് അദ്ദേഹം വ്യക്തമാക്കി.

ഇലക്ട്രിക്കൽ ഫിറ്റിംഗ്, ടെർമിനൽ ബോർഡ്, കണക്ടർ ഇവയ്ക്കെല്ലാമായി മെച്ചപ്പെട്ട വസ്തുക്കളാണ് ഉപയോഗിച്ചിരിക്കുന്നത്. കോച്ചിൽ യാത്രക്കാരുടെ സുരക്ഷക്കായി അഗ്‌നിശമന ഉപകരണങ്ങൾ സ്ഥാപിക്കുമെന്നും ഇതിലൂടെ തീപിടിത്തത്തിൽ നിന്ന് യാത്രക്കാർ പരമാവധി സുരക്ഷിതരെന്ന് റെയിൽവെ ഉറപ്പാക്കുമെന്നും റെയിൽവേ വൃത്തങ്ങൾ അറിയിക്കുന്നു. 1992 ൽ മേൽക്കൂരയിൽ എസി ഘടിപ്പിച്ച് കോച്ചുകൾ പുറത്തിറക്കിയതും കപൂർത്തലയിലെ കോച്ച് ഫാക്ടറിയിലാണ്.

On:

തിരുവനന്തപുരം: എ പി ജെ അബ്ദുൾ കലാം സാങ്കേതിക സർവകലാശാല പരീക്ഷകൾ റദ്ദാക്കിക്കൊണ്ടുള്ള ഹൈക്കോടതി സിംഗിൾ ബെഞ്ച് ഉത്തരവിന് സ്‌റ്റേ. ഹൈക്കോടതി ഡിവിഷൻ ബെഞ്ചാണ് ഉത്തരവ് സ്‌റ്റേ ചെയ്തത്. സർവകലാശാല സമർപ്പിച്ച അപ്പീലിന്റെ അടിസ്ഥാനത്തിലാണ് നടപടി. ചീഫ് ജസ്റ്റിസ് എസ് മണികുമാർ, ജസ്റ്റിസ് ഷാജി പി ചാലി എന്നിവരടങ്ങിയ ബെഞ്ചാണ് സിംഗിൾ ബെഞ്ച് ഉത്തരവ് സ്റ്റേ ചെയ്തത്. ഉത്തരവ് സ്റ്റേ ചെയ്ത സാഹചര്യത്തിൽ സാങ്കേതിക സർവ്വകാലാശാല പരീക്ഷകൾ നാളെ മുതൽ ആരംഭിക്കും.

മുൻ നിശ്ചയിച്ച പ്രകാരമുള്ള എല്ലാ പരീക്ഷകളുടെയും നടത്തിപ്പുമായി മുന്നോട്ട് പോകാൻ കോടതി അനുമതി നൽകിയതായി സർവകലാശാല വ്യക്തമാക്കി. ജൂലൈ 29 മുതൽ ഷെഡ്യൂൾ ചെയ്തിട്ടുള്ള എല്ലാ പരീക്ഷകളും ടൈംടേബിൾ പ്രകാരം നടത്തുമെന്നും മാറ്റിവെച്ച ജൂലൈ 28 ലെ പരീക്ഷകളുടെ പുതുക്കിയ തീയതി ഉടൻ അറിയിക്കുമെന്നും സർവകലാശാല അധികൃതർ കൂട്ടിച്ചേർത്തു.

On:

പാലക്കാട്: മുകേഷുമായുള്ള വിവാഹബന്ധം വേർപ്പെടുത്തുന്നതായുള്ള വാർത്തകൾ പുറത്തു വന്നതിന് പിന്നാലെ വിഷയത്തിൽ തന്റെ നിലപാട് വ്യക്തമാക്കി നർത്തകി മേതിൽ ദേവിക. പിരിയാനുള്ള കാരണം വ്യക്തിപരമാണെന്ന് മേതിൽ ദേവിക പ്രതികരിച്ചു. വേർപിരിയാനുള്ള തീരുമാനമെടുത്ത സന്ദർഭം വളരെ പ്രയാസകരമായ ഘട്ടമാണെന്നും സമാധാനപരമായി അത് മറികടക്കാൻ എല്ലാവരും അനുവദിക്കണമെന്നും മേതിൽ ദേവിക പറഞ്ഞു.

വിവാഹ മോചന ഹർജി നൽകിയിരിക്കുന്നത് തന്റെ ഭാഗത്തു നിന്നാണ്. ഇക്കാര്യത്തിൽ മുകേഷിന്റെ നിലപാട് ഇനിയും വ്യക്തമാക്കിയിട്ടില്ല. മുകേഷിന്റെ രാഷ്ട്രീയമായ പശ്ചാത്തലം മുൻനിർത്തിയാണ് ഇപ്പോൾ ഇക്കാര്യങ്ങൾ വിശദീകരിക്കാൻ നിർബന്ധിതയായത്. മുതിർന്ന ആൾക്കാരാണ് ഞങ്ങൾ രണ്ടുപേരും. അദ്ദേഹത്തിനു മേൽ ചെളിവാരിയെറിയാൻ താൽപര്യമില്ലെന്നും നടൻ എന്ന നിലയിലും രാഷ്ട്രീയ പ്രവർത്തകൻ എന്ന നിലയിലുമുള്ള മുകേഷിന്റെ നിലയുമായി ഇത്തരം വ്യക്തിപരമായ കാര്യങ്ങൾ കൂട്ടിക്കുഴയ്ക്കാൻ പാടില്ലെന്നും ദേവിക വ്യക്തമാക്കി.

മുകേഷുമായി ദേഷ്യത്തോടെ പിരിയേണ്ട കാര്യമുണ്ടെന്ന് കരുതുന്നില്ല. വിവാഹ മോചന ഹർജി നൽകുന്നതിന് തെരഞ്ഞെടുപ്പ് കഴിയാൻ കാത്തിരിക്കുകയായിരുന്നു. ഗാർഹിക പീഡനവുമായി ബന്ധപ്പെട്ട് മുകേഷിനെതിരെ നടപടിയെടുക്കണമെന്ന ആവശ്യങ്ങൾ സംബന്ധിച്ച് പ്രതികരിക്കാനില്ലെന്നും മേതിൽ ദേവിക പറഞ്ഞു. വിവാഹ മോചനവുമായി ബന്ധപ്പെട്ട് തനിക്കുള്ള ആരോപണങ്ങളിൽ ഗാർഹിക പീഡനം ഉൾപ്പെടുന്നില്ല. രാഷ്ട്രീയ പ്രതികരണങ്ങളോട് പ്രതികരിക്കാൻ ആഗ്രഹിക്കുന്നില്ലെന്നും ദേവിക കൂട്ടിച്ചേർത്തു.