General (Page 1,307)

കൊച്ചി: മിസ് കേരള 2021 മത്സരത്തിൽ സൗന്ദര്യ റാണിയായി തെരഞ്ഞെടുക്കപ്പെട്ട് ഗോപിക സുരേഷ്. കൊച്ചിയിൽ നടന്ന മത്സരത്തിലാണ് കണ്ണൂർ സ്വദേശിനിയായ ഗോപിക സൗന്ദര്യ റാണിയായി തെരഞ്ഞെടുക്കപ്പെട്ടത്. 24 സുന്ദരികളെ പിന്തള്ളിയാണ് ഗോപിക സുരേഷ് സൗന്ദര്യ റാണിയായത്. മത്സരത്തിൽ എറണാകുളം സ്വദേശിനി ലിവ്യ ലിഫി ഫസ്റ്റ് റണ്ണറപ്പായി. ഗഗന ഗോപാൽ ആണ് സെക്കന്റ് റണ്ണറപ്പ്. തൃശൂർ സ്വദേശിയും ഓസ്ട്രേലിയയിൽ വിദ്യാർത്ഥിയുമാണ് ഗഗന ഗോപാൽ.

സംഗീത സംവിധായകൻ ദീപക് ദേവ്, സംവിധായകൻ ജീത്തു ജോസഫ് തുടങ്ങിയവർ ഉൾപ്പെട്ട ജഡ്ജിങ് പാനലാണ് വിജയികളെ തെരഞ്ഞെടുത്തത്. ഫൈനൽ റൗണ്ടിലേക്ക് അഞ്ചു പേർ തെരഞ്ഞെടുക്കപ്പെട്ടു. വിധികർത്താക്കളുടെ ചോദ്യോത്തര റൗണ്ടിനൊടുവിലാണ് വിജയികളെ തെരഞ്ഞെടുത്തത്. യുവാക്കളിലെ ലഹരി ഉപയോഗം സംബന്ധിച്ച ചോദ്യത്തിന് മികച്ച ഉത്തരം നൽകിയതിലൂടെയാണ് ഗോപികയെ വിജയിയായി തെരഞ്ഞെടുക്കപ്പെട്ടത്.

കേരളീയം, ലെഹംഗ, ഗൗൺ എന്നീ മൂന്ന് റൗണ്ടുകളിൽ മികച്ച പ്രകടനം നടത്തിയവരാണ് വിജയികളായി തെരഞ്ഞെടുത്തത്. മിസ് ബ്യൂട്ടിഫുൾ ഹെയർ, മിസ് ബ്യൂട്ടിഫുൾ സ്‌കിൻ, മിസ് ബ്യൂട്ടിഫുൾ സ്മൈൽ, മിസ് ബ്യൂട്ടിഫുൾ ഐസ്, മിസ് ഫോട്ടോജനിക്, മിസ് കൺജീനിയാലിറ്റി, മിസ് ടാലന്റഡ് തുടങ്ങിയവയും തെരഞ്ഞെടുക്കപ്പെട്ടു.

തിരുവല്ല: സിപിഎം നേതാവിനെ വെട്ടിക്കൊന്നു. പത്തനംതിട്ടയിലാണ് സംഭവം. സിപിഎം പെരിങ്ങര ലോക്കൽ കമ്മിറ്റി സെക്രട്ടറിയും മുൻ പെരിങ്ങര ഗ്രാമപഞ്ചായത്ത് അംഗവുമായ പിബി സന്ദീപ് കുമാറിനെയാണ് കൊലപ്പെടുത്തിയത്. കൊലപാതകത്തിന് പിന്നിൽ ആർഎസ്എസ് ആണെന്നാണ് സിപിഎം ആരോപിക്കുന്നത്.

വ്യാഴാഴ്ച രാത്രി എട്ട് മണിയോടെ നെടുമ്പ്രം ചാത്തങ്കരിമുക്കിന് അരക്കിലോമീറ്റർ മാറിയുള്ള കലുങ്കിനടുത്ത് വെച്ചാണ് ആക്രമണമുണ്ടായത്. ബൈക്കിൽ സഞ്ചരിക്കുകയായിരുന്ന സന്ദീപിനെ പിന്നാലെ മൂന്ന് ബൈക്കുകളിലെത്തിയ ആറംഗസംഘം തടഞ്ഞുനിർത്തി വെട്ടിപ്പരിക്കേൽപ്പിക്കുകയായിരുന്നു. ആക്രമണത്തിൽ സന്ദീപിന്റെ കഴുത്തിലും നെഞ്ചിലും കുത്തേറ്റു. ഓടിരക്ഷപ്പെടാനായി വയലിലേക്ക് ചാടിയ സന്ദീപിനെ വീണ്ടു അക്രമികൾ പിന്തുടർന്ന് ആക്രമിച്ചു.

ഗുരുതരമായി പരിക്കേറ്റ സന്ദീപിനെ തിരുവല്ലയിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. ജിഷ്ണു എന്നയാളുടെ നേതൃത്വത്തിലുള്ള സംഘമാണ് ആക്രമണത്തിന് പിന്നിലെന്നാണ് റിപ്പോർട്ട്. ജയിലിലായിരുന്ന ജിഷ്ണു ദിവസങ്ങൾക്ക് മുമ്പാണ് പുറത്തിറങ്ങിയതെന്നാണ് വിവരം. സംഭവത്തിൽ കേസ് രജിസ്റ്റർ ചെയ്ത് അന്വേഷണ ആരംഭിച്ചതായി പോലീസ് അറിയിച്ചു.

തിരുവനന്തപുരം: സംസ്ഥാനത്ത് പച്ചക്കറി വില ഉയരുന്ന സാഹചര്യത്തിൽ പുതിയ നടപടികളുമായി കേരളം. തമിഴ്‌നാട്ടിലെ തെങ്കാശിയിൽ നിന്ന് നേരിട്ട് പച്ചക്കറി വാങ്ങാനാണ് കേരളത്തിന്റെ തീരുമാനം. തെങ്കാശിയിലെ 6000 കർഷകരിൽ നിന്നും കേരളം നേരിട്ട് പച്ചക്കറി വാങ്ങുമെന്നാണ് റിപ്പോർട്ട്.

ഈ മാസം എട്ടിന് ഇത് സംബന്ധിച്ച ധാരണാപത്രം ഒപ്പിടും. തെങ്കാശിയിൽ നടന്ന കേരള-തമിഴ്‌നാട് ഉദ്യോഗസ്ഥ തല ചർച്ചയിലാണ് ഇത് സംബന്ധിച്ച തീരുമാനം ഉണ്ടായത്. 6000 കർഷകരെ പ്രതിനിധീകരിക്കുന്ന 6 സംഘടനാ നേതാക്കളും കേരള, തമിഴ്‌നാട് സംസ്ഥാനങ്ങളിലെ കൃഷിവകുപ്പ് ഉദ്യോഗസ്ഥരും കേരളത്തിലെ ഹോർട്ടികോർപ്പ് എംഡിയും ചർച്ചയിൽ പങ്കെടുത്തു. കർഷകരെ പ്രതിനിധീകരിക്കുന്ന സംഘടനകൾക്ക് നൽകേണ്ട വിഹിതം എത്രയാണെന്ന കാര്യങ്ങളിൽ പിന്നീട് തീരുമാനമുണ്ടാകും. ഇടനിലക്കാരെ പൂർണമായി ഒഴിവാക്കിയായിരിക്കും പച്ചക്കറികൾ വാങ്ങുക.

കോഴിക്കോട്: വഖഫ് നിയമനങ്ങൾ പിഎസ്സിക്ക് വിട്ടതിനെതിരെ പള്ളികളിൽ പ്രതിഷേധം നടത്തുമെന്ന മുസ്ലീം ലീഗിന്റെ തീരുമാനത്തെ തള്ളി സമസ്ത. വിഷയത്തിൽ മുഖ്യമന്ത്രി ചർച്ചയ്ക്ക് സന്നദ്ധത കാണിച്ചിട്ടുണ്ടെന്നും അതുകൊണ്ട് തന്നെ ആ രീതിയിലുള്ള പ്രതിഷേധം ആവശ്യമില്ലെന്നുമാണ് സമസ്തയുടെ നിലപാട്. സമസ്ത കേരള ജംഇയ്യത്തുൽ ഉലമ അധ്യക്ഷൻ ജിഫ്രി മുത്തുക്കോയ തങ്ങളാണ് ഇക്കാര്യം അറിയിച്ചത്.

മുഖ്യമന്ത്രി പിണറായി വിജയൻ രണ്ടാഴ്ച മുമ്പ് ബന്ധപ്പെട്ട് വഖഫ് നിയമം പിഎസ് സിക്ക് വിട്ടതിൽ സമസ്‌ക്കുള്ള എതിർപ്പ് സംബന്ധിച്ച് നമുക്ക് കൂടിയാലോചിക്കാമെന്ന് അറിയിക്കുകയും ചെയ്തിരുന്നു. ഇന്നും അദ്ദേഹം വിളിച്ച് സംസാരിച്ചിരുന്നുവെന്നാണ് ജിഫ്രി മുത്തുക്കോയ പറയുന്നത്. വഖഫ് നിയമനങ്ങൾ പിഎസ്സിക്ക് വിട്ടതിൽ പ്രതിഷേധമുണ്ട്. അത് വേണ്ടപ്പെട്ടവരെ അറിയിക്കും. പരിഹാരമുണ്ടായില്ലെങ്കിൽ മറ്റു പ്രതിഷേധങ്ങളിലേക്ക് കടക്കുമെന്നും അദ്ദേഹം അറിയിച്ചു. മുഖ്യമന്ത്രിയുടെ പ്രതിനിധിയായി എളമരം കരീം എം.പിയും സമസ്ത നേതാക്കളെ ചർച്ചയ്ക്ക് വിളിച്ചിരുന്നു. വിഷയത്തിൽ ഏതെങ്കിലും തരത്തിലുള്ള പ്രതിഷേധം വേണമെന്ന് സമസ്ത ഇതുവരെ തീരുമാനിച്ചിട്ടില്ല. പ്രതിഷേധം ഏത് രീതിയിലായിരിക്കണമെന്ന് തീരുമാനിക്കേണ്ടത് സമസ്തയാണ്. മാന്യമായി മുഖ്യമന്ത്രി ചർച്ചയ്ക്ക് വിളിച്ച സാഹചര്യത്തിൽ നമ്മളും ആ രീതിയിൽ നീങ്ങേണ്ടതുണ്ട്. പരിഹാരമാർഗങ്ങളുണ്ടോ എന്നതാണ് ആദ്യം ചിന്തിക്കേണ്ടതെന്ന് അദ്ദേഹം അഭിപ്രായപ്പെട്ടു.

പരിഹാര മാർഗങ്ങളില്ലെങ്കിൽ പ്രതിഷേധത്തിന് മുന്നിൽ സമസ്ത ഉണ്ടാകും. പള്ളികളിൽ ഒരു പ്രതിഷേധവുമുണ്ടാകില്ല. പള്ളി അല്ലാത്ത ഇടങ്ങളിൽ ഉത്ബോധനം നടത്തും. വഖഫ് വകുപ്പ് മന്ത്രി വി.അബ്ദുറഹ്മാനെതിരെ ജിഫ്രി തങ്ങൾ രൂക്ഷവിമർശനം ഉന്നയിച്ചു. പ്രതിഷേധിക്കേണ്ട സമയം വരുമ്പോൾ പ്രതിഷേധിക്കേണ്ടി വരും. അത് ഏത് സർക്കാരാണെങ്കിലും യുഡിഎഫാണെങ്കിലും എൽഡിഎഫാണെങ്കിലും. എല്ലാം പള്ളിയിൽ നിന്ന് പ്രതിഷേധിക്കാൻ പറ്റില്ല. വഖഫ് ബോർഡുമായി ബന്ധപ്പെട്ട നിയമനം പിഎസ്സിക്ക് വിടുന്നതിലൂടെ ചില നഷ്ടങ്ങളുണ്ട്. ഇതിൽ ഒരു പ്രതിഷേധം ആവശ്യമുണ്ട്. പ്രതിഷേധിച്ചുകൊണ്ട് ഒരു പ്രമേയം സമസ്ത പാസാക്കിയിട്ടുണ്ട്. എന്നാൽ ഇപ്പോഴത്തെ പ്രതിഷേധം പള്ളിയിൽ വേണ്ടെന്നും അദ്ദേഹം കൂട്ടിച്ചേർത്തു.