General (Page 1,308)

കൊച്ചി: പെട്രോളിയം ഉത്പന്നങ്ങളെ ജി.എസ്.ടിയിൽ ഉൾപ്പെടുത്താൻ കഴിയില്ലെന്ന് ഹൈക്കോടതിയെ അറിയിച്ച് ജി.എസ്.ടി കൗൺസിൽ. പെട്രോളിയം ഉത്പന്നങ്ങൾ സർക്കാരിന്റെ പ്രധാന വരുമാന മാർഗമാണെന്നാണ് ജിഎസ്ടി കൗൺസിൽ ഹൈക്കോടതിയിൽ വ്യക്തമാക്കിയിരിക്കുന്നത്. പെട്രോളും ഡീസലും ജിഎസ്ടിയുടെ പരിധിയിൽ ഉൾപ്പെടുത്തണമെന്ന ആവശ്യം നിരസിച്ചതിൽ നിലപാടറിയിക്കാൻ കേന്ദ്ര സർക്കാരിനോടും ജി.എസ്.ടി കൗൺസിലിനോടും ഹൈക്കോടതി നിർദേശിച്ചിരുന്നു. തുടർന്നാണ് ജിഎസ്ടി കൗൺസിലിന്റെ നടപടി.

കോവിഡ് വൈറസിന്റെ വ്യാപന ഘട്ടമായതിനാൽ നിലവിൽ ഇക്കാര്യം പരിഗണിക്കാൻ കഴിയില്ലെന്നാണ് ജിഎസ്ടി കൗൺസിൽ പറയുന്നത്. വിഷയത്തിൽ കൂടുതൽ ചർച്ചകൾ ആവശ്യമുണ്ടെന്നാണ് ജിഎസ്ടി കൗൺസിൽ വ്യക്തമാക്കിയത്. എന്നാൽ ജിഎസ്ടി കൗൺസിലിന്റെ മറുപടിയിൽ കോടതി അതൃപ്തി അറിയിച്ചു. കൃത്യമായ വിശദീകരണം നൽകണമെന്നാണ് ഹൈക്കോടതി ജി.എസ്.ടി കൗൺസിലിന് നൽകിയ നിർദ്ദേശം. ഡിസംബർ രണ്ടാം വാരം ഇതുമായി ബന്ധപ്പെട്ട ഹർജി വീണ്ടും പരിഗണിക്കുമെന്നും കോടതി അറിയിച്ചു.

കേരള പ്രദേശ് ഗാന്ധി ദർശൻ വേദിയാണ് പെടോളും ഡീസലും ജി.എസ്.ടിയിൽ ഉൾപ്പെടുത്തണമെന്നാവശ്യപ്പെട്ട് ഹർജി സമർപ്പിച്ചത്. ചീഫ് ജസ്റ്റീസ് എസ്.മണി കുമാറും ജസ്റ്റിസ് ഷാജി പി ചാലിയും അടങ്ങുന്ന ഡിവിഷൻ ബഞ്ചാണ് ഹർജി പരിഗണിക്കുന്നത്.

തിരുവനന്തപുരം: സംസ്ഥാനത്ത് ട്രാഫിക് ലംഘനങ്ങൾ നടത്തി പിഴ അടയ്ക്കാതെ മുങ്ങുന്നവരെ പിടികൂടാൻ ഇനി കേന്ദ്രവും. നിലവിൽ സംസ്ഥാന മോട്ടർ വാഹനവകുപ്പാണ് കേരളത്തിലെ റോഡുകളിലെ നിയമലംഘനങ്ങൾ കണ്ടെത്തി പിഴ ഈടാക്കുന്നത്. ഇനി ഇതിനായി കേന്ദ്രവും രംഗത്തുണ്ടാകുമെന്നാണ് വിവരം.

കേന്ദ്ര ഗതാഗത മന്ത്രാലയത്തിന്റെ കീഴിലുള്ള പരിവാഹൻ സോഫ്റ്റ്‌വെയറുമായി ലിങ്ക് ചെയ്യുന്ന ഇന്റഗ്രേറ്റഡ് ട്രാഫിക് മാനേജ്മെന്റ് സിസ്റ്റത്തിലൂടെയാണ് ഇത് സാദ്ധ്യമാക്കുന്നത്. റോഡുകളിൽ സ്ഥാപിച്ചിട്ടുള്ള ക്യാമറകളെ ഇതിനായി പരിവാഹൻ സോഫ്റ്റ്‌വെയറുമായി ലിങ്ക് ചെയ്യും. ക്യാമറകൾ പ്രവർത്തിപ്പിക്കാൻ പ്രത്യേക സംഘത്തെയും മോട്ടർ വാഹനവകുപ്പ് നിയോഗിച്ചിട്ടുണ്ട്. ഇതിൽ ആർക്കുവേണമെങ്കിലും ട്രാഫിക് നിയമ ലംഘനങ്ങളുടെ ചിത്രങ്ങൾ സഹിതമെടുത്ത് അപ്ലോഡ് ചെയ്യാനുള്ള സംവിധാനവുമുണ്ട്.

റോഡിൽ നിയമങ്ങൾ ലംഘിക്കുന്ന വാഹനങ്ങളുടെ ചിത്രങ്ങൾ ക്യാമറയിൽ പതിഞ്ഞാൽ, ഉടൻ വാഹന ഉടമയ്ക്ക് പിഴ മൊബൈലിൽ സന്ദേശമായി ലഭിക്കുന്നതാണ്. പതിനഞ്ച് ദിവസത്തിനുള്ളിൽ വീട്ടിലേക്ക് തപാൽ വഴി പിഴ അടയ്ക്കാനുള്ള നോട്ടീസ് എത്തും. പതിനഞ്ച് ദിവസത്തിനകം പിഴ നൽകാനായില്ലെങ്കിൽ പിന്നീട് തുക കോടതിയിൽ കെട്ടിവയ്ക്കേണ്ടതായി വരും. നിയമം ലംഘിക്കുന്ന വാഹനങ്ങളുടെ വിശദ വിവരങ്ങൾ എൻ ഐ സിയുടെ സെർവറിൽ രേഖപ്പെടുത്തും. പിഴ തുക അടയ്ക്കാത്തവർക്ക് പിന്നീട് നികുതി, ഫിറ്റ്‌നസ് ഉൾപ്പെടെ എല്ലാ ഇടപാടുകളും നടത്താൻ കഴിയില്ല. ഇതോടെ വാഹനത്തിന് വിലക്കേർപ്പെടുത്തുകയും ചെയ്യും.

കൊച്ചി: ക്രൈം പത്രാധിപർ ടി പി നന്ദകുമാറിന്റെ അറസ്റ്റിൽ വിശദീകരണവുമായി കൊച്ചി സൈബർ ക്രൈം പൊലീസ്. ആരോഗ്യ മന്ത്രി വീണ ജോർജിന്റെ സ്ത്രീത്വത്തെ അപമാനിക്കുന്ന രീതിയിലുള്ള വാർത്താ പ്രചരിപ്പിച്ചതിനാണ് നന്ദകുമാറിനെ അറസ്റ്റ് ചെയ്തതെന്ന് സൈബർ ക്രൈം പോലീസ് അറിയിച്ചു. ഐടി നിയമപ്രകാരവും ഇന്ത്യൻ ശിക്ഷാ നിയമപ്രകാരവുമാണ് നന്ദകുമാറിനെതിരെ കേസെടുത്തിരിക്കുന്നത്.

സ്ത്രീകൾക്കെതിരെയുള്ള അപവാദ പ്രചരണങ്ങൾക്കും സോഷ്യൽ മീഡിയ വഴിയുള്ള ആക്രമണങ്ങൾക്കും ശക്തമായ നടപടി സ്വീകരിക്കേണ്ടതാണെന്ന സർക്കാർ നയത്തിന്റെ ഭാഗമായിട്ടായിരുന്നു അറസ്റ്റെന്നും പോലീസ് വ്യക്തമാക്കി. വാർത്താ കുറിപ്പിലൂടെയാണ് സൈബർ ക്രൈം പോലീസ് ഇക്കാര്യം അറിയിച്ചത്. നന്ദകുമാർ ആരോഗ്യ മന്ത്രിയുടെ സ്ത്രീത്വത്തെ അപമാനിക്കണമെന്നും അപകീർത്തിപ്പെടുത്തണം എന്നുമുള്ള ഉദ്ദേശത്തോടെ ലൈംഗിക ചുവയുള്ള പരാമർശങ്ങൾ നടത്തുകയും മനുഷ്യമനസ്സിനെ ദുഷിപ്പിക്കുന്ന രീതിയിലുള്ള പരാമർശങ്ങൾ ഉൾപ്പെടുന്ന വീഡിയോ യൂട്യൂബിലും ഫേസ്ബുക്കിലും പ്രചരിപ്പിക്കുകയും ചെയ്തുവെന്നാണ് പോലീസിന്റെ കണ്ടെത്തൽ. ഇതിനെ തുടർന്നാണ് നന്ദകുമാറിനെ ക്രൈം ഓഫീസിൽ നിന്നും അറസ്റ്റ് ചെയ്തത്.

നന്ദകുമാറിനെതിരെ നിരവധി കേസുകൾ പല സ്റ്റേഷനുകളിലായി നിലനിൽക്കുന്നുണ്ട്. സമൂഹത്തിൽ ഉന്നത സ്ഥാനത്തിരിക്കുന്നവരും മാന്യമായി ജീവിക്കുന്നവരുമായ സ്ത്രീകൾ ഉൾപ്പടെ ഉള്ളവരെ കുറിച്ച് അശ്ലീലവും അപകീർത്തികരവുമായ പരാമർശങ്ങൾ നടത്തി സാമൂഹ്യ മാദ്ധ്യമങ്ങളിൽ സ്ഥിരമായി വീഡിയോ പോസ്റ്റ് ചെയ്യുമെന്നാണ് ഇയാൾക്കെതിരെയുള്ള പരാതി. ചാനലിന് സബ്സ്‌ക്രൈബേഴ്സിനെ വർദ്ധിപ്പിച്ച് സാമ്പത്തിക ലാഭം ഉണ്ടാക്കുക എന്നതായിരുന്നു ഇയാളുടെ ലക്ഷ്യമെന്നും പോലീസ് പറഞ്ഞു.

മന്ത്രി വീണ ജോർജിനെതിരെ അശ്ലീല പരാമർശം നടത്തിയെന്ന പരാതിയിൽ ജനപക്ഷം സെക്കുലർ നേതാവും മുൻ എംഎൽഎയുമായ പിസി ജോർജിനെതിരെ നേരത്തെ പൊലീസ് കേസടുത്തിരുന്നു. പിസി ജോർജിന്റെ ടെലിഫോൺ സംഭാഷണം സാമൂഹിക മാദ്ധ്യമത്തിലൂടെ പ്രചരിപ്പിച്ചതിന് നന്ദകുമാറിനെ പ്രതിചേർത്ത് കേസ് രജിസ്റ്റർ ചെയ്യുകയായിരുന്നു.

തിരുവനന്തപുരം: നിലപാടിൽ അയവു വരുത്തി പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ്. വകുപ്പ് മേധാവി വഴിയല്ലാതെ പൊതുമരാമത്ത് മന്ത്രിയെ സമീപിക്കരുതെന്ന വിവാദ ഉത്തരവ് റദ്ദാക്കിയിരിക്കുകയാണ് പൊതുമരാമത്ത് വകുപ്പ്. എൻജിനീയർമാരുടെ ആത്മവിശ്വാസം തകർക്കുന്ന ഉത്തരവായതിനാലാണ് റദ്ദാക്കിയതെന്നാണ് മന്ത്രി വിശദമാക്കുന്നത്.

2017 ൽ സമാനമായ ഉത്തരവ് പുറപ്പെടുവിച്ചിരുന്നുവെന്നും ട്രാൻസ്ഫർ അപേക്ഷ പോലുള്ള കാര്യങ്ങൾ വകുപ്പു മേധാവി വഴിയേ പാടുള്ളുവെന്നായിരുന്നു ഉത്തരവിൽ നിർദ്ദേശിച്ചിരുന്നത്. എന്നാൽ ഇതോടൊപ്പം ചില കാര്യങ്ങൾ പുതിയ ഉത്തരവിൽ കൂട്ടി ചേർക്കുകയായിരുന്നുവെന്നും ഇതെങ്ങനെ സംഭവിച്ചു എന്ന് അന്വേഷിക്കുമെന്നും അദ്ദേഹം അറിയിച്ചു.

സംഭവവുമായി ബന്ധപ്പെട്ട് പിഡബ്ല്യുഡി അഡ്മിനിസ്‌ട്രേറ്റീവ് ചീഫ് എഞ്ചിനീയറോട് വിശദീകരണം ആവശ്യപ്പെട്ടു. അതേസമയം പൊതുമരാമത്ത് റോഡുകളുടെ പരിപാലനം ഉറപ്പുവരുത്താനുളള പദ്ധതിയുടെ സംസ്ഥാന തല ഉദ്ഘാടനം ശനിയാഴ്ച തിരുവനന്തപുരത്ത് നടക്കുമെന്നും മന്ത്രി വ്യക്തമാക്കി. ചലച്ചിത്ര താരം ജയസൂര്യയാണ് പദ്ധതിയുടെ ഉദ്ഘാടനം നിർവ്വഹിക്കുന്നത്. ഓരോ റോഡിന്റേയും പരിപാലന കാലാവധി, കരാറുകാരന്റേയും ഉദ്യോഗസ്ഥന്റേയും പേര്, ഫോൺ നമ്പർ എന്നിവ റോഡരികിലെ ബോർഡിൽ പ്രസിദ്ധീകരിക്കുന്നതാണെന്ന് മന്ത്രി പറഞ്ഞു. റോഡിൽ തകരാറ് ശ്രദ്ധയിൽപെട്ടാൽ ഫോണിലൂടെ അറിയിക്കാമെന്നും അദ്ദേഹം കൂട്ടിച്ചേർത്തു.

തിരുവനന്തപുരം: അട്ടപ്പാടിയിലെ ആദിവാസി ജനത അഭിമുഖീകരിക്കുന്ന പ്രശ്നങ്ങൾക്ക് പരിഹാരമുണ്ടാക്കാൻ നടപടികളുമായി സർക്കാർ. അടിയന്തര പ്രശ്‌ന പരിഹാരത്തിനായി മന്ത്രിമാർ ഉന്നതതല യോഗം ചേരും. ബുധനാഴ്ച രാവിലെ മന്ത്രിസഭാ യോഗത്തിനു ശേഷമായിരിക്കും മന്ത്രിമാർ ഉന്നതല യോഗം ചേരുന്നത്.

പട്ടിക വിഭാഗ ക്ഷേമ മന്ത്രി കെ രാധാകൃഷ്ണൻ മുൻകൈയെടുത്ത് വിളിച്ചു ചേർക്കുന്ന യോഗത്തിൽ തദ്ദേശ സ്വയം ഭരണ -എക്‌സൈസ് മന്ത്രി എം വി ഗോവിന്ദൻ, ധനമന്ത്രി കെ എൻ ബാലഗോപാൽ, ആരോഗ്യ മന്ത്രി വീണാ ജോർജ്, ഭക്ഷ്യ മന്ത്രി ജി ആർ അനിൽ തുടങ്ങിയവരും ഉന്നത ഉദ്യോഗസ്ഥരും പങ്കെടുക്കുമെന്നാണ് വിവരം.

അട്ടപ്പാടിയിൽ സന്ദർശനം നടത്തിയ ശേഷം മന്ത്രി കെ രാധാകൃഷ്ണൻ മുഖ്യമന്ത്രി പിണറായി വിജയന് വിശദമായ റിപ്പോർട്ട് സമർപ്പിച്ചിരുന്നു. ഇതിന് പിന്നാലെയാണ് ഉന്നതതല യോഗം ചേരുന്നത്.