International (Page 191)

കാബൂൾ: അഫ്ഗാനിലേക്കുള്ള താലിബാന്റെ കടന്നുകയറ്റം പാകിസ്താന്റെ പൂർണ്ണ പിന്തുണയോടെയായിരുന്നുവെന്നത് അഫ്ഗാൻ പ്രസിഡന്റായിരുന്ന അഷ്‌റഫ് ഗനി യുഎസ് പ്രസിഡന്റ് ജോ ബൈഡനെ അറിയിച്ചിരുന്നുവെന്ന് റിപ്പോർട്ട്. ജൂലൈ മാസത്തിൽ ഇക്കാര്യം ഇരു രാജ്യങ്ങളുടെ നേതാക്കളും തമ്മിൽ ചർച്ച ചെയ്തിരുന്നതായാണ് വിവരം. വാർത്താ ഏജൻസി റോയിട്ടേഴ്സാണ് ഇക്കാര്യം റിപ്പോർട്ട് ചെയ്യുന്നത്.

താലിബാൻ കടന്നുകയറ്റത്തിന്റെ ഭാഗമായി പാകിസ്താൻ തീവ്രവാദികളുടെ വൻ തോതിലുള്ള സാന്നിധ്യം അഫ്ഗാനിസ്താനിൽ ഉള്ളതായി നേരത്തെ തന്നെ ഇരു നേതാക്കളും ചർച്ച ചെയ്തിരുന്നു. 10,000 മുതൽ 15,000 വരെ പാകിസ്താൻ തീവ്രവാദികൾ അഫ്ഗാനിൽ എത്തിയിട്ടുള്ളതായി കഴിഞ്ഞ ജൂലായ് 23-നാണ് അഷ്‌റഫ് ഗനി ജോ ബൈഡനെ അറിയിച്ചത്. ഈ സംഭാഷണം കഴിഞ്ഞ് ആഴ്ച്ചകൾക്കുള്ളിലാണ് താലിബാൻ കാബൂൾ പിടിച്ചെടുത്തത്.

പാകിസ്താന്റെ ആസൂത്രണത്തിലും ആയുധ ബലത്തിലുമാണ് താലിബാന് അഫ്ഗാൻ പിടിച്ചടക്കാൻ ശ്രമിക്കുന്നതെന്ന് അഷ്‌റഫ് ഗനി ബൈഡനോട് വെളിപ്പെടുത്തി. 14 മിനിറ്റ് നേരത്തോളം ഇരു നേതാക്കളും തമ്മിൽ ചർച്ച നടത്തിയെന്നാണ് റിപ്പോർട്ട്. താലിബാനെ ചെറുക്കുന്നതിന് അഫ്ഗാനിസ്താൻ ശ്രമംനടത്തുന്നുണ്ടെന്ന് ലോകത്തെ ബോധ്യപ്പെടുത്താനും അതിലൂടെ ജനങ്ങളുടെ കാഴ്ചപ്പാട് മാറ്റാനും ശ്രമിക്കണമെന്ന് ബൈഡൻ ഗനിയോട് ആവശ്യപ്പെട്ടുവെന്നും അത്തരമൊരു പദ്ധതി അഫ്ഗാനിസ്താനുണ്ടെങ്കിൽ അമേരിക്കയുടെ വ്യോമസഹായം നൽകാമെന്ന് അദ്ദേഹം ഉറപ്പു നൽകിയതായും റിപ്പോർട്ടുകളുണ്ട്.

കാബൂൾ: അഫ്ഗാനിൽ നിന്നും അമേരിക്കൻ സൈന്യം പൂർണ്ണമായി പിന്മാറി. അവസാനത്തെ അമേരിക്കൻ സൈനികനും അഫ്ഗാനിൽ നിന്നും മടങ്ങി. 20 വർഷങ്ങൾക്ക് ശേഷമാണ് അഫ്ഗാനിൽ നിന്നും യുഎസ് സൈന്യം മടങ്ങി പോകുന്നത്. 73 ഓളം യുദ്ധ വിമാനങ്ങളും 78 സായുധ വാഹനങ്ങളും കാബൂൾ വിമാനത്താവളത്തിൽ ഉപേക്ഷിച്ചാണ് അമേരിക്കൻ സൈന്യം അഫ്ഗാനിൽ നിന്നും മടങ്ങി പോയത്.

എന്നാൽ അമേരിക്കൻ സൈന്യം ഉപേക്ഷിച്ച യുദ്ധ വിമാനങ്ങളോ സായുധ വാഹനങ്ങളോ ഒന്നും തന്നെ താലിബാന് ഉപയോഗിക്കാൻ കഴിയില്ല. താലിബാൻ ഭീകരർക്ക് ഉപയോഗിക്കാൻ കഴിയാത്ത വിധം ഈ ഉപകരണങ്ങളെല്ലാം നിർവ്വീര്യമാക്കിയ ശേഷമാണ് അമേരിക്കൻ സൈന്യം മടങ്ങി പോയതെന്നാണ് വിവരം. ഈ യുദ്ധവിമാനങ്ങളും സായുധ വാഹനങ്ങളും താലിബാൻ ഉപയോഗിക്കാതിരിക്കാൻ വേണ്ടിയുള്ള നീക്കങ്ങളാണ് അമേരിക്കൻ സൈന്യം നടത്തിയത്. മറ്റൊരാൾക്ക് ഉപയോഗിക്കാൻ സാധിക്കാത്ത വിധം ഈ വിമാനങ്ങൾ യുഎസ് സേനാംഗങ്ങൾ ഉപയോഗ്യശൂന്യമാക്കുകയായിരുന്നു.

കാബൂളിലെ ഹമീദ് കർസായി വിമാനത്താവളത്തിൽ ഉണ്ടായിരുന്ന 73 വിമാനങ്ങൾ നിർവ്വീര്യമാക്കിയതായും ഈ വിമാനങ്ങൾ ഇനി ആർക്കും പറപ്പിക്കാനോ പ്രവർത്തിപ്പിക്കാനോ സാധിക്കില്ലെന്നും യുഎസിന്റെ സെൻട്രൽ കമാന്റ് മേധാവി ജനറൽ കെന്നത്ത് മക്ൻസി വ്യക്തമാക്കിയതായാണ് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്. യുഎസിലെ പേരുകേട്ട കവചിത മിലിറ്ററി ട്രക്കുകളായ ഹംവികളും നിർവീര്യമാക്കി. ഇനിയാർക്കും ഈ വാഹനങ്ങൾ ഉപയോഗിക്കാൻ കഴിയില്ല. കാബൂൾ വിമാനത്താവളത്തെ റോക്കറ്റ് ആക്രമണങ്ങളിൽ നിന്നും സംരക്ഷിക്കാൻ വേണ്ടി ഉയർത്തിയ സി-റാം സംവിധാനങ്ങളും നിർവീര്യമാക്കിയിട്ടുണ്ട്. തിരിച്ചടിക്കാനുള്ള റോക്കറ്റ്, ആർട്ടിലറി, മോർട്ടാറുകൾ എന്നിവ ഉൾപ്പെടുന്നതാണ് ഈ സംവിധാനം.

അമേരിക്കയുടെ ചരിത്രത്തിലെ ഏറ്റവും വലിയ ഒഴിപ്പിക്കൽ ദൗത്യങ്ങളിൽ ഒന്നായിരുന്നു അഫ്ഗാനിലേത്. 18 ദിവസം ഒഴിപ്പിക്കൽ ദൗത്യം നീണ്ടു നിന്നു. 123,000 പേരെ അഫ്ഗാനിസ്ഥാനിൽ നിന്നും തിരിച്ചെത്തിച്ചതായി പെന്റഗൺ അറിയിച്ചു.

കാബൂൾ: അഫ്ഗാന്റെ നിയന്ത്രണം കയ്യടക്കിയതിന് പിന്നാലെ കാടൻ നിയമങ്ങൾ നടപ്പിലാക്കി താലിബാൻ. അമേരിക്കൻ സൈന്യത്തിന് കഴിഞ്ഞ ഇരുപത് വർഷമായി വിവിധ സഹായങ്ങൾ ചെയ്തു എന്ന് സംശയിക്കുന്നവർക്കായി താലിബാൻ ഭീകരർ അന്വേഷണം ആരംഭിച്ചു. സംശയമുള്ളവരുടെ വീടിന് മുന്നിൽ സ്റ്റിക്കർ പതിക്കുകയാണ് താലിബാന്റെ ആദ്യ നടപടി.

നേരത്തെ സോവിയറ്റ് യൂണിയൻ അഫ്ഗാനിസ്താൻ വിട്ടപ്പോഴും ഈ രീതിയിലൂടെയാണ് എതിരാളികളെന്ന് കരുതുന്നവരോട് താലിബാൻ പ്രതികാരം ചെയ്തത്. ‘കീഴടങ്ങുകയോ മരിക്കുകയോ’ ചെയ്യണമെന്ന് വീടുകളിൽ പതിക്കുന്ന നോട്ടീസിൽ താലിബാൻ ആവശ്യപ്പെട്ടിരിക്കുന്നത്. താലിബാൻ വിളിച്ചു ചേർക്കുന്ന കോടതികളിൽ കത്തുമായി ഹാജരാകാനും ഇത്തരക്കാർക്ക് നിർദ്ദേശമുണ്ട്.

അഫ്ഗാനിസ്താനിലെ വിവിധ നഗരങ്ങളിലെയും ഗ്രാമങ്ങളിലെയും വീടുകളിൽ താലിബാൻ ഇത്തരത്തിൽ സ്റ്റിക്കറുകൾ പതിപ്പിച്ചിട്ടുണ്ട്. സ്റ്റിക്കറുകൾ കണ്ടതോടെ ആളുകൾ ആശങ്കയിലാണ്. ബ്രിട്ടീഷ് സൈന്യത്തിന് ക്യാമ്പുകൾ നിർമ്മിക്കാൻ സഹായിച്ചയാൾക്ക് കഴിഞ്ഞ ദിവസം ഇത്തരത്തിൽ നോട്ടീസ് ലഭിച്ചിരുന്നു. താലിബാൻ ഭീഷണി മുൻകൂട്ടി കണ്ട് ബ്രിട്ടനിലേക്ക് അഭയാർത്ഥിയായി കൊണ്ടുപോകാൻ ഇയാൾ അപേക്ഷ നൽകിയെങ്കിലും അത് നിരസിക്കപ്പെടുകയായിരുന്നു. കോടതിയിൽ ഹാജരായാൽ ഇത്തരക്കാർക്ക് കടുത്ത ശിക്ഷയായിരിക്കും ലഭിക്കുക.

ബെയ്ജിങ്: കുട്ടികൾ ഓൺലൈൻ ഗെയിം കളിക്കുന്നതിന് നിയന്ത്രണം ഏർപ്പെടുത്തി ചൈന. 18 വയസ്സിനു താഴെയുള്ള കുട്ടികൾ വെള്ളി, ശനി, ഞായർ ദിവസങ്ങളിലും മറ്റ് അവധി ദിവസങ്ങളിലും മാത്രമേ ഓൺലൈൻ ഗെയിം കളിക്കാൻ പാടുള്ളൂവെന്നാണ് ചൈന നൽകിയിരിക്കുന്ന പുതിയ നിർദ്ദേശം. ഇതിന് സമയ പരിധിയും ചൈന നിശ്ചയിച്ചിട്ടുണ്ട്. ഒരു മണിക്കൂർ നേരം മാത്രമെ കുട്ടികൾ ഓൺലൈൻ ഗെയിം കളിക്കാവൂവെന്നാണ് പുതിയ നിബന്ധന. ചൈനയിലെ നാഷനൽ പ്രസ് ആൻഡ് പബ്ലിക്കേഷൻ അഡ്മിനിസ്‌ട്രേഷനാണു പുതിയ നിയന്ത്രണം ഏർപ്പെടുത്തിയത്.

രാത്രി എട്ടു മണി മുതൽ ഒൻപതു വരെയാണ് കുട്ടികൾക്ക് ഓൺലൈൻ ഗെയിം കളിക്കാൻ അനുവദിച്ചിരിക്കുന്ന സമയം. ഈ നിശ്ചിത സമയത്തല്ലാതെ കുട്ടികൾ ഗെയിം കളിക്കുന്നതു തടയാൻ ഗെയിം കമ്പനികൾക്കും ചൈന നിർദേശം നൽകി. ഇതു പാലിക്കപ്പെടുന്നുണ്ടോ എന്നറിയാൻ പരിശോധനകൾ ശക്തമാക്കാനാണ് അധികൃതർക്ക് നൽകിയിരിക്കുന്ന നിർദേശം.

കുട്ടികൾ വീഡിയോ ഗെയിമുകൾക്ക് അടിമകളാകുന്നത് ചൈനയിൽ വലിയ ആശങ്ക സൃഷ്ടിക്കുന്നുവെന്ന റിപ്പോർട്ടുകൾ പുറത്തു വന്നിരുന്നു. ഇതോടെയാണ് പുതിയ നിയന്ത്രണങ്ങൾ ഏർപ്പെടുത്താൻ തീരുമാനിച്ചത്. നേരത്തേ കുട്ടികൾക്ക് ഗെയിം കളിക്കാനുള്ള സമയം ചൈന ദിവസം 90 മിനിറ്റായി കുറച്ചിരുന്നു. നേരത്തെ ഇത് മൂന്ന് മണിക്കൂറായിരുന്നു.