International (Page 166)

യാങ്കൂൺ: മ്യാൻമറിൽ സ്ത്രീകൾക്കും കുട്ടികൾക്കും നേരെ സൈന്യത്തിന്റെ ക്രൂരത. മ്യാൻമറിലെ കയായിൽ സ്ത്രീകളും കുട്ടികളുമടക്കം മുപ്പത് പേരെ സൈന്യം വെടിവച്ചുകൊന്നുവെന്നാണ് റിപ്പോർട്ട്. മൃതദേഹങ്ങൾ കത്തിച്ചുവെന്നും റിപ്പോർട്ടുകളുണ്ട്. പ്രൂസോ നഗരത്തിന് സമീപമുള്ള മോ സോ ഗ്രാമത്തിലാണ് സംഭവം. മനുഷ്യാവകാശങ്ങൾ ലംഘിക്കുന്ന ക്രൂരവും മനുഷ്യത്വരഹിതവുമായ കൊലപാതകത്തെ ശക്തമായി അപലപിക്കുന്നതായി കരേന്നി മനുഷ്യാവകാശ സംഘടന വ്യക്തമാക്കി. പട്ടാളത്തിന്റെ ആക്രമണത്തിൽ കൊലപ്പെട്ടവരുടെ കത്തിക്കരിഞ്ഞ മൃതദേഹങ്ങൾ കണ്ടെത്തിയതായും സംഘടന അറിയിച്ചു.

ഗ്രാമത്തിലെ പ്രതിപക്ഷ സായുധ സേനയിൽ നിന്നുമെത്തിയ ആയുധമേന്തിയ തീവ്രവാദികളെ കൊലപ്പെടുത്തുകയായിരുന്നുവെന്നാണ് മ്യാൻമർ സൈന്യത്തിന്റെ പ്രതികരണം. പട്ടാളം ആവശ്യപ്പെട്ടപ്പോൾ ഇവർ വാഹനം നിർത്തിയില്ലെന്നും ഇവർ പറയുന്നു. എന്നാൽ കൊല്ലപ്പെട്ടവർ തങ്ങളുടെ അംഗങ്ങൾ അല്ലെന്നും സംഘർഷത്തിൽ നിന്നും രക്ഷപ്പെടാൻ ശ്രമിച്ച സാധാരണ പൗരൻമാരായിരുന്നുവെന്നും പട്ടാളഭരണത്തെ എതിർക്കുന്ന പൗരസേനകളിൽ ഒന്നായ കരേന്നി നാഷണൽ ഡിഫൻസ് ഫോഴ്‌സ് വ്യക്തമാക്കി.

ധാക്ക: ബംഗ്ലാദേശിലെ തെക്കൻ മേഖലയിൽ ബോട്ടിന് തീപിടിച്ചു. ബോട്ടിലുണ്ടായിരുന്ന മുപ്പത്തിരണ്ട് പേർ മരിച്ചു. മൂന്ന് നിലകളുള്ള ‘ഒബിജാൻ’ എന്ന ബോട്ടിനാണ് തീപിടിച്ചത്. തലസ്ഥാനമായ ധാക്കയിൽ നിന്ന് 250 കിലോമീറ്റർ തെക്ക് സ്ഥിതി ചെയ്യുന്ന ജലോകതിയിൽ ഇന്ന് പുലർച്ചെയാണ് അപകടം ഉണ്ടായത്. ഏകദേശം അഞ്ഞൂറോളം ആളുകളാണ് ബോട്ടിലുണ്ടായത്.

എഞ്ചിൻ റൂമീലുണ്ടായ തീപിടിത്തം ബോട്ടിലേയ്ക്ക് വ്യാപിക്കുകയായിരുന്നെന്നാണ് പ്രാഥമിക നിഗമനം. നൂറോളം പേർക്ക് തീപിടുത്തത്തിൽ ഗുരുതരമായി പൊള്ളലേറ്റിട്ടുണ്ട്. ഇവരെ ബരിസൽ ആശുപത്രിയിലേക്ക് മാറ്റിയിട്ടുണ്ട്. ബോട്ടിന് തീപിടിച്ചപ്പോൾ രക്ഷപ്പെടാനായി ചിലർ വെള്ളത്തിലേക്ക് ചാടി. ഇവരിൽ പലരും വെള്ളത്തിൽ മുങ്ങി മരിക്കുകയും ചെയ്തു.

നേരത്തെയും ബംഗ്ലാദേശിൽസമാനരീതിയിൽ അപകടങ്ങൾ ഉണ്ടായിട്ടുണ്ട്. അറ്റകുറ്റപ്പണികൾ നടത്താത്തതും കപ്പൽശാലകളിൽ മതിയായ സുരക്ഷാ മാനദണ്ഡങ്ങൾ പാലിക്കാത്തതുമാണ് അപകടത്തിന് കാരണമാകുന്നതെന്നാണ് വിദഗ്ധർ പറയുന്നത്.

മോസ്‌കോ: 12 ദിവസത്തെ ബഹിരാകാശവാസം കഴിഞ്ഞ് സുരക്ഷിതരായി ഭൂമിയിലേക്ക് തിരിച്ചെത്തി സഞ്ചാരികൾ. ജപ്പാനീസ് ശതകോടീശ്വരനായ ഫാഷൻ മാഗ്‌നറ്റ് യുസാക്കു മെയ്‌സാവയും റഷ്യൻ ബഹിരാകാശ സഞ്ചാരിയായ അലക്‌സാണ്ടർ മിസർക്കിനും യോസോ ഹീരാനോയുമാണ് ബഹിരാകാശ പര്യടനം പൂർത്തിയാക്കി ഭൂമിയിലേക്ക് തിരിച്ചെത്തിയത്.

റഷ്യൻ പ്രാദേശിക സമയം 9.15 ഓടെ കസഖിസ്താനിൽ ഇവർ തിരിച്ചിറങ്ങി. നഗരത്തിന് 150 കിലോമീറ്റർ തെക്കു കിഴക്കു മാറിയാണ് റഷ്യൻ സോയൂസ് ക്യാപ്‌സൂളിറങ്ങിയത്. അന്താരാഷ്ട്ര ബഹിരാകാശ നിലയത്തിലായിരുന്നു സഞ്ചാരികളുടെ താമസം സജ്ജീകരിച്ചിരുന്നത്.

കരസേനയെ അയച്ചാണ് ബഹിരാകാശയാത്രികരുടെ പേടകം ഇറങ്ങിയ സ്ഥലം കണ്ടെത്തിയത്. സഞ്ചാരികളെ അന്വേഷിക്കാനായി അയച്ച രക്ഷാ ഹെലികോപ്റ്ററുകളുടെ പ്രവർത്തനങ്ങൾക്ക് താഴ്ന്നു നിന്നിരുന്ന മേഘങ്ങൾ തടസമായതോടെയാണ് തെരച്ചിലിനായി കരസേനയെ അയച്ചത്.

മനില: ഫിലിപ്പീൻസിൽ ചുഴലിക്കാറ്റ്. 375 പേരാണ് ഫിലിപ്പീൻസിൽ അനുഭവപ്പെട്ട കനത്ത ചുഴലിക്കാറ്റിൽ മരണപ്പെട്ടത്. അഞ്ഞൂറിലേറെ പേർക്ക് പരിക്കേൽക്കുകയും ചെയ്തിട്ടുണ്ട്. 56 പേരെ കാണാതാകുകയും ചെയ്തു. വലിയ നാശനഷ്ടങ്ങളാണ് ഫിലിപ്പീൻസിൽ ഉണ്ടായിരിക്കുന്നത്.

ചുഴലിക്കാറ്റിനെ തുടർന്ന് നിരവധി വീടുകൾ തകർന്നടിഞ്ഞു. പലയിടത്തും വെള്ളപ്പൊക്കമുണ്ടായി. നിരവധി മേഖലകളിൽ വൈദ്യുതിബന്ധം തടസപ്പെട്ടു. പതിനായിരക്കണക്കിന് പേർക്കാണ് കിടപ്പാടം നഷ്ടമായത്. ഈ വർഷം ഫിലിപ്പീൻസിൽ 15 ചുഴലിക്കാറ്റുകളാണ് അനുഭവപ്പെട്ടത്. ഇതിൽ ഏറ്റവും ശക്തമായ കാറ്റാണ് ഇപ്പോൾ രാജ്യത്ത് വീശിയടിച്ചത്. ചുഴലിക്കാറ്റ് നാശം വിതച്ച ഇടങ്ങളിൽ സഹായം എത്തിക്കുന്നതിനായി സൈനിക ഹെലികോപ്റ്ററുകളെ നിയോഗിച്ചിട്ടുണ്ട്.

വൈദ്യുതി ബന്ധവും വാർത്താവിതരണ ബന്ധവും തടസപ്പെട്ട സാഹചര്യമായതിനാൽ ചുഴലിക്കാറ്റ് ബാധിച്ച പല സ്ഥലങ്ങളിലേക്കും രക്ഷാപ്രവർത്തനത്തിനായി ഇതുവരെ എത്തിച്ചേരാൻ കഴിഞ്ഞിട്ടില്ല. മരണസംഖ്യ ഇനിയും വർധിക്കുമെന്നാണ് വിലയിരുത്തപ്പെടുന്നത്.