International (Page 158)

അങ്കാറ: കോവിഡ് ബാധിച്ച് 14 മാസമായിട്ടും രോഗമുക്തി നേടാതെ 58 കാരൻ. തുർക്കി സ്വദേശിയായ മുസാഫർ കായസനാണ് ഇതുവരെ കോവിഡിൽ നിന്നും രോഗമുക്തി നേടാതെ കഴിയുന്നത്. കഴിഞ്ഞ 14 മാസത്തിനിടെ 78 തവണയാണ് ഇദ്ദേഹം കോവിഡ് പരിശോധന നടത്തിയത്. എന്നാൽ ഇതുവരെ കോവിഡ് നെഗറ്റീവായിട്ടില്ല. 2020 ലാണ് ഇദ്ദേഹം രോഗബാധിതനാകുന്നത്. ഗുരുതര നിലയിലായ അദ്ദേഹത്തിന്റെ ജീവൻ രക്ഷിക്കാൻ കഴിയില്ലെന്നായിരുന്നു ആദ്യം ഡോക്ടർമാർ പറഞ്ഞിരുന്നത്. എന്നാൽ ചികിത്സയെ തുടർന്ന് അന്ന് രോഗം കൊണ്ടുണ്ടായ ബുദ്ധിമുട്ടുകളെ അദ്ദേഹം അതിജീവിക്കുകയായിരുന്നു.

നിലവിൽ അദ്ദേഹത്തിന് മറ്റ് ആരോഗ്യ ബുദ്ധിമുട്ടുകളൊന്നും അനുഭവപ്പെടുന്നില്ല. ഇതുവരെ കോവിഡ് നെഗറ്റീവ് ആയില്ലെന്നതാണ് ആകെയുള്ള പ്രശ്‌നം. കോവിഡ് ബാധിച്ച ശേഷം ഒമ്പത് മാസത്തോളം ആശുപത്രിയിലും അഞ്ച് മാസം ഇസ്താംബൂളിലെ വീട്ടിലുമാണ് ഇദ്ദേഹം കഴിഞ്ഞത്. എല്ലാ മാസവും ഇദ്ദേഹം ആശുപത്രിയിലെത്തി പരിശോധന നടത്തുമെങ്കിലും നെഗറ്റീവാകുന്നില്ല. ഇതുവരെ കോവിഡ് നെഗറ്റീവാകുന്നില്ലെന്നതിനാൽ കുടുംബാംഗങ്ങളുടെ അടുത്തേക്ക് പോകാൻ കഴിയുന്നില്ലെന്നാണ് അദ്ദേഹത്തിന്റെ പരാതി.

അസ്വസ്ഥതകൾ വിട്ടുമാറിയെങ്കിലും വൈറസിന് ശരീരത്തിൽ നിന്ന് വിട്ടു പോകാനാകില്ലെന്നാണ് മുസാഫർ പറയുന്നത്. തുർക്കിയിൽ മാത്രമല്ല, ലോകത്തിൽ തന്നെ ഇത്തരം മറ്റൊരു കേസ് ഉണ്ടാകില്ലെന്നും ഏറ്റവും കൂടുതൽ കാലം വൈറസ് ബാധിച്ച വ്യക്തിയ മുസാഫറായിരിക്കുമെന്നാണ് ഡോക്ടർമാരുടെ അവകാശവാദം.

കോവിഡ് ബാധിച്ച് രോഗമുക്തി നേടി മൂന്ന് മാസത്തിന് ശേഷമെ വാക്‌സിൻ സ്വീകരിക്കാവൂ എന്നതിനാൽ അദ്ദേഹത്തിന് ഇപ്പോഴും വാക്‌സിൻ സ്വീകരിക്കാനും കഴിഞ്ഞിട്ടില്ല.

വാഷിംഗ്ടൺ: അമേരിക്ക നേരിടുന്നത് 1200 വർഷത്തിനിടയിലെ ഏറ്റവും ഭയാനകമായ വരൾച്ച. യുഎസിന്റെ തെക്ക് പടിഞ്ഞാറൻ മേഖലയിലും മെക്‌സിക്കോയുടെ വടക്കൻ മേഖലകളിലും വലിയ വരൾച്ച പിടി മുറുക്കുകയാണെന്നാണ് റിപ്പോർട്ട്. രണ്ട് പതിറ്റാണ്ടിലേറെയായി മേഖലയിൽ പിടിമുറുക്കിക്കൊണ്ടിരിക്കുന്ന ഭീതിദമായ കാലാവസ്ഥാ മാറ്റമാണിതെന്നുള്ളതാണ് കാലാവസ്ഥാ വിദഗ്ധരെ ആശങ്കയിലാക്കിയിട്ടുള്ളത്. മനുഷ്യരുടെ ഇടപെടലാണ് കാലാവസ്ഥാ മാറ്റത്തിന് കാരണം. മെഗാ ഡ്രോട്ട് എന്നാണ് ഈ കാലാവസ്ഥാ മാറ്റത്തിന് ഗവേഷകർ നൽകിയിരിക്കുന്ന പേര്.

കഴിഞ്ഞ ഒരു പതിറ്റാണ്ടിനിടെ തന്നെ കാലിഫോർണിയയും മറ്റ് പടിഞ്ഞാറൻ സർവകലാശാലകളും വലിയ തോതിലുള്ള ജലക്ഷാമം നേരിടുന്നുണ്ട്. പല ജനവാസകേന്ദ്രങ്ങളിലും ഇപ്പോൾ കുടിവെള്ളം ബോട്ടിലുകളിലാക്കി പുറത്തു നിന്ന് ഇറക്കുമതി ചെയ്താണ് ഉപയോഗിക്കുന്നത്. ഇടയ്ക്ക് വല്ലപ്പോഴും മാത്രമാണ് ഈ മേഖലയിൽ മഴ അനുഭവപ്പെടുന്നത്. പടിഞ്ഞാറൻ യുഎസിന്റെ 11 ശതമാനത്തോളം പ്രദേശം കൊടും വരൾച്ചയുടെ പിടിയിലാണെന്നാണ് കണക്കുകൾ വ്യക്തമാക്കുന്നത്.

കഴിഞ്ഞ വേനൽക്കാലത്ത് വടക്കേ അമേരിക്കയിലെ തന്നെ ഏറ്റവും വലിയ ജലസംഭരണികളായ മീഡ്, പവൽ എന്നീ തടാകങ്ങൾ ഒരു നൂറ്റാണ്ടിനിടയിലെ ഏറ്റവും കുറഞ്ഞ ജലനിരപ്പിലെത്തിയിരുന്നു. അതായത് ഇവയുടെ ആഴം അളക്കാൻ തുടങ്ങിയ ശേഷമുള്ള ഏറ്റവും കുറഞ്ഞ ജലനിരപ്പിലേക്കാണ് ഈ തടാകങ്ങൾ എത്തിയത്. വരും വർഷങ്ങളിലും വലിയ വരൾച്ച അമേരിക്കയിൽ ഉണ്ടാകുമെന്നും വിദഗ്ധർ പ്രവചിക്കുന്നു. ഈ നൂറ്റാണ്ടിൻറെ അവസാനം വരെയെങ്കിലും കൊടും വരൾച്ച നീണ്ടു നിൽക്കുമെന്നാണെന്നാണ് വിദഗ്ധർ പറയുന്നത്. എണ്ണൂറാം ആണ്ട് മുതൽ 1600 വരെയുള്ള കാലയളവിൽ നിരന്തരമായി ഇത്തരം വരൾച്ചകൾ മെക്‌സിക്കൻ മേഖലയിൽ ഉണ്ടായതായും പഠനങ്ങളിൽ പറയുന്നുണ്ട്.

മോസ്‌കോ: ഉക്രെയിൻ അതിർത്തിയിൽ നിന്ന് സൈനിക വിന്യാസം ഭാഗികമായി പിൻവലിക്കാൻ തീരുമാനിച്ച് റഷ്യ. ഉക്രെയിനുമായി യുദ്ധം ആഗ്രഹിക്കുന്നില്ലെന്ന് റഷ്യൻ പ്രസിഡന്റ് വ്ളാഡിമിർ പുടിൻ അറയിച്ചു. ജർമൻ ചാൻസലർ ഒലാഫ് ഷോൾസുമായി നടത്തിയ ചർച്ചയ്ക്ക് ശേഷമാണ് പുടിൻ ഇക്കാര്യം അറിയിച്ചത്. ഉക്രൈനുമായി ഒന്നിച്ച് പ്രവർത്തിക്കാൻ തയ്യാറാണെന്നും ചർച്ചകൾക്ക് സന്നദ്ധമാണെന്നും അദ്ദേഹം വിശദമാക്കി.

റഷ്യ യുദ്ധം ആഗ്രഹിക്കുന്നില്ല. എന്നാൽ റഷ്യയുടെ അവിഭാജ്യ ഘടകമായ സുരക്ഷയിൽ വാഷിങ്ടണും നാറ്റോയും എങ്ങനെ സ്വതന്ത്രമായി ഇടപെടുന്നു എന്നതിൽ കണ്ണടക്കാൻ കഴിയില്ലെന്ന് അദ്ദേഹം മുന്നറിയിപ്പ് നൽകുന്നു. ഒരു രാജ്യവും മറ്റുള്ളവരുടെ ചെലവിൽ അതിന്റെ സുരക്ഷ ശക്തിപ്പെടുത്തരുതെന്നും അദ്ദേഹം അഭിപ്രായപ്പെട്ടു. റഷ്യയുടെ ആവശ്യങ്ങൾ നാറ്റോ അംഗീകരിക്കാൻ മടിക്കുകയാണെന്നും പുടിൻ ആരോപിച്ചു. അതേസമയം പാശ്ചാത്യരാജ്യങ്ങളുടെ യുദ്ധ പ്രചാരണം പൊളിഞ്ഞ ദിവസമായി ഫെബ്രുവരി 15 ചരിത്രത്തിൽ ഇടംപിടിക്കുമെന്ന് റഷ്യൻ വിദേശകാര്യവക്താവ് മരിയ സഖറോവ പ്രതികരിച്ചു. ഒരു വെടി പോലും വയ്ക്കാതെ പാശ്ചാത്യ ശക്തികളെ നാണംകെടുത്തുകയും തകർക്കുകയും ചെയ്തുവെന്നും സഖറോവ പറഞ്ഞു.

തെക്ക്-പടിഞ്ഞാറൻ സൈനിക ജില്ലകളിലെ യൂണിറ്റുകൾ ദൗത്യം പൂർത്തിയാക്കിയെന്നും അവർ സൈനിക പാളയത്തിലേക്ക് മടങ്ങുക ആണെന്നും റഷ്യൻ സൈന്യത്തിന്റെ മുഖ്യ വക്താവ് ഇഹോർ കോണാഷെൻകോവ് നേരത്തെ അറിയിച്ചിരുന്നു. ഉക്രെയ്ൻ അതിർത്തിയിൽ ഒരുലക്ഷത്തിലേറെ സൈനികരെയാണ് റഷ്യ വിന്യസിച്ചിരിക്കുന്നത്. റഷ്യൻ അധിനിവേശം ഭയന്ന് നിരന്തരം നയതന്ത്ര ഇടപെടലുകൾ നടന്നുകൊണ്ടിരിക്കുകയാണ്. റഷ്യ ഉക്രെയ്‌നെ ആക്രമിക്കാൻ പദ്ധതിയിടുന്നുവെന്ന പാശ്ചാത്യ രാജ്യങ്ങളുടെ ആരോപണങ്ങളെ റഷ്യ നിഷേധിക്കുകയാണ്.

വാഷിംഗ്ടൺ: പൈലറ്റില്ലാ ബ്ലാക്ക് ഹോക്ക് ഹെലികോപ്റ്റർ പറത്തി അമേരിക്ക. ഉക്രൈന് മേൽ റഷ്യ യുദ്ധ ഭീതിയുമായി നിൽക്കുന്നതിനിടെയാണ് അമേരിക്ക പൈലറ്റില്ലാ ബ്ലാക്ക് ഹോക്ക് ഹെലികോപ്റ്റർ പറത്തിയത്. യുദ്ധം പോലുള്ള അതിദുർഘട സമയങ്ങളിൽ മനുഷ്യന്റെ നിയന്ത്രണമില്ലാതെ പറക്കാൻ കഴിയുന്ന യുദ്ധോപയോഗ ഹെലികോപ്റ്ററാണ് ബ്ലാക്ക് ഹോക്ക്. ആദ്യമായാണ് പൂർണമായും സ്വയം നിയന്ത്രണാധികാരമുള്ള ബ്ലാക്ക് ഹോക്ക് ഹെലികോപ്റ്റർ മനുഷ്യ പൈലറ്റില്ലാതെ പറത്തുന്നത്. ലോക്ക്ഹീഡ് മാർട്ടിൻ സിക്കോർസ്‌കിയുടെയും ഡിഫൻസ് ആംഡ് റിസർച്ച് പ്രോജക്ട് ഏജൻസിയുടെയും (DARPA) പങ്കാളിത്തത്തോടെയാണ് കെന്റക്കിയിലെ ഫോർട്ട് കാംപ്‌ബെല്ലിൽ നിന്നും ഫെബ്രുവരി 5 നാണ് ബ്ലാക്ക് ഹോക്ക് ഹെലികോപ്റ്റർ പറത്തിയത്.

ഒരു ഓൺബോർഡ് കമ്പ്യൂട്ടർ തലച്ചോറിനെയാണ് മനുഷ്യനിയന്ത്രിതമല്ലാതെ പറന്നുയരുന്ന ബ്ലാക്ക് ഹോക്കിനെ നിയന്ത്രിക്കാൻ സജ്ജമാക്കിയിരുന്നത്. ഹെലിക്കോപ്റ്റർ ഉയരുമ്പോഴും താഴുമ്പോഴുമുണ്ടാകുന്ന പ്രതിബന്ധങ്ങളെ ഒഴിവാക്കാനായി അത്തരം സമയങ്ങളിൽ ഉണ്ടാകാൻ സാധ്യതയുള്ള നിരവധി പ്രതിസന്ധികളുടെ പ്രോഗ്രാമുകൾ ഹെലികോപ്റ്റിലെ കൃതിമ ബുദ്ധിയിൽ ഫീഡ് ചെയ്യുന്നുണ്ട്. ഇങ്ങനെയാണ് പ്രശ്‌നങ്ങളെയെല്ലാം മറികടന്ന് പറക്കാൻ ഈ ഹെലികോപ്ടറിന് കഴിയുന്നത്. അപകടകരമായ യുദ്ധമേഖലകളിലേക്ക് സാധനങ്ങൾ എത്തിക്കുന്നതിനോ അപകടത്തിൽപ്പെട്ട സൈനികരെ വീണ്ടെടുക്കുന്നതിനോ ഈ ഹെലികോപ്റ്ററുകൾ ഉപയോഗിക്കാം.

ഹ്യൂമൻ മോഡിലേക്ക് മാറ്റിയാൽ ഈ ഹെലികോപ്റ്ററിനെ മനുഷ്യനും നിയന്ത്രിക്കാം. ഒരു മനുഷ്യ പൈലറ്റിന്റെ ആവശ്യമില്ലാതെ, ടേക്ക് ഓഫ് മുതൽ ലാൻഡിംഗ് വരെയുള്ള മുഴുവൻ ദൗത്യത്തെയും ഏറ്റെടുത്ത് നടത്താൻ ഇത്തരം പൈലറ്റില്ലാ ഹെലികോപ്റ്ററുകൾക്ക് കഴിയുമെന്നതിലൂടെ അടിയന്തര സാഹചര്യങ്ങൾ കൈകാര്യം ചെയ്യാൻ ഇവയ്ക്ക് സാധിക്കും.

വാഷിംഗ്ടൺ: അമേരിക്കൻ പ്രസിഡന്റ് സ്ഥാനത്ത് നിന്നും ഒഴിഞ്ഞിട്ടും ഒരു നേതാവുമായി ഡൊണാൾഡ് ട്രംപ് വളരെ അടുത്ത ബന്ധം പുലർത്തുന്നുണ്ട്. യുഎസിന്റെ മുഖ്യശത്രുവായ ഉത്തര കൊറിയൻ സർവാധിപതി കിം ജോം ഉന്നുമായാണ് അദ്ദേഹം അടുത്ത ബന്ധം പുലർത്തുന്നത്. അധികാരത്തിൽ നിന്നൊഴിഞ്ഞ ശേഷം ട്രംപ് ബന്ധം പുലർത്തുന്ന ഒരൊറ്റ നേതാവും കിം ജോം ഉൻ ആണ്. കിം ജോം ഉന്നുമായുള്ള ബന്ധം അദ്ദേഹം പലതവണ തന്റെ വിശ്വസ്തരോട് അദ്ദേഹം വെളിപ്പെടുത്തുകയും ചെയ്തിട്ടുണ്ട്.

ട്രംപിനെക്കുറിച്ച് മാദ്ധ്യമപ്രവർത്തക മാഗി ഹെബർമാൻ എഴുതുന്ന ‘ദ് കോൺഫിഡൻസ് മാൻ’ എന്ന പുസ്തകത്തിൽ ഇതിനെ കുറിച്ച് വിശദമാക്കുന്നുണ്ട്. ട്രംപ് ഇക്കാര്യം പല വട്ടം ഉറപ്പിച്ചു പറഞ്ഞതായി പുസ്തകം മാഗി ഹെബർമാൻ സി എൻ എന്നിന് നൽകിയ അഭിമുഖത്തിൽ വ്യക്തമാക്കിയിരുന്നു. എന്നാൽ ട്രംപോ അദ്ദേഹവുമായി ബന്ധപ്പെട്ടവരോ ഇക്കാര്യത്തിൽ പ്രതികരണം നടത്തിയിട്ടില്ല. യു എസ് വിദേശകാര്യ മന്ത്രാലയമോ വൈറ്റ് ഹൗസോ പ്രസിഡന്റിന്റെ ഓഫീസോ ഈ വിഷയത്തിൽ പ്രതികരണം നടത്തിയിട്ടില്ലെന്നതും ശ്രദ്ധേയമാണ്. 1799-ലെ അമേരിക്കൻ നിയമ പ്രകാരം സ്വകാര്യ വ്യക്തികൾ അനുമതിയില്ലാതെ മറ്റ് രാജ്യങ്ങളുടെ ഭരണാധികാരികളുമായി ചർച്ച നടത്തുന്നത് കുറ്റകരമാണ്. ഈ സാഹചര്യത്തിൽ മാഗിയുടെ വെളിപ്പെടുത്തലുകൾ വലിയ ചർച്ചകൾക്ക് വഴി വെച്ചിരിക്കുകയാണ്.

താനും കിമ്മും തമ്മിൽ പ്രണയത്തിലാണ് എന്നായിരുന്നു 2018-ൽ ട്രംപ് പറഞ്ഞിരുന്നത്. ഇരുവരും തമ്മിൽ കത്തിടപാടുകൾ ഉണ്ടെന്നും ട്രംപ് നേരത്തെ പറഞ്ഞിരുന്നു. അതേസമയം ട്രംപിന്റെ കാലത്ത് ഉത്തരകൊറിയൻ വിഷയത്തിൽ ഒരു പുരോഗതിയും ഉണ്ടായിട്ടില്ല എന്നതാണ് സത്യാവസ്ഥ. മൂന്ന് തവണ കിമ്മുമായി കൂടിക്കാഴ്ച നടത്തിയിട്ടുണ്ടെങ്കിലും ആണവായുധ നിർമാണം, ബാലിസ്റ്റിക് മിസൈൽ പരീക്ഷണങ്ങൾ എന്നിവയെക്കുറിച്ച് കിമ്മിന്റെ കൈയിൽനിന്നും ഒരുറപ്പും വാങ്ങാൻ ട്രംപിനു കഴിഞ്ഞിരുന്നില്ല.