General (Page 1,489)

കോഴിക്കോട്: കോഴിക്കോട് കെ.എസ്.ആർ.ടി.സി ബസ് ടെർമിനൽ കോംപ്ലക്സ് വ്യാപാരാവശ്യങ്ങൾക്ക് തുറന്നു നൽകുന്നു. നിർമ്മാണം പൂർത്തിയാക്കി അഞ്ചുവർഷം കഴിഞ്ഞിട്ടാണ് കോഴിക്കോട് ബസ് ടെർമിനൽ കോംപ്ലക്‌സ് വ്യാപാരാവശ്യങ്ങൾക്കായി തുറന്നു നൽകുന്നത്. ഓഗസ്റ്റ് 26 ന് എം.ഒ.യു ഒപ്പുവച്ച് കോംപ്ലക്‌സ് തുറന്നു നൽകുമെന്ന് ഗതാഗത മന്ത്രി ആന്റണി രാജു അറിയിച്ചു.

സംസ്ഥാന സർക്കാരിന്റെ 100 ദിന കർമ്മ പരിപാടിയിൽ ഉൾപ്പെടുത്തിയാണ് നടപടി. 3.22 ഏക്കർ സ്ഥലത്താണ് നാലു ലക്ഷം ചതുരശ്ര അടി വിസ്തീർണ്ണമുള്ള ബസ് ടെർമിനൽ കോംപ്ലക്സ് സ്ഥിതി ചെയ്യുന്നത്. 74.63 കോടി രൂപയാണ് ടെർമിനലിന്റെ നിർമ്മാണ ചെലവ്. 11 ലിഫ്റ്റുകളും 2 എസ്‌കലേറ്ററുകളും ഇവിടെയുണ്ട്. നിക്ഷേപമായി 17 കോടി രൂപയും പ്രതിമാസം 43.20 ലക്ഷം രൂപ വാടകയും ലഭിക്കുന്നതു മൂലം കെ.റ്റി ഡി.എഫ്.സിക്ക് 30 വർഷം കൊണ്ട് ഏകദേശം 257 കോടിയോളം രൂപ വരുമാനം ലഭിക്കുമെന്നാണ് കണക്കുകൂട്ടുന്നത്.

ഗതാഗത വകുപ്പുമന്ത്രി ആന്റണി രാജുവും പൊതുമരാമത്തു വകുപ്പുമന്ത്രി പി. എ. മുഹമ്മദ് റിയാസും മുൻകൈയ്യെടുത്ത് നടത്തിയ ചർച്ചകൾക്കൊടുവിലാണ് പ്രശ്‌നങ്ങൾ പരിഹരിച്ചതും ബസ് ടെർമിനൽ കോംപ്ലക്‌സ് തുറക്കാൻ ധാരണാ പത്രത്തിൽ ഒപ്പുവെയ്ക്കാൻ തീരുമാനിച്ചതും.

കോഴിക്കോടിന്റെ വ്യാപാര വാണിജ്യ മേഖലകൾക്ക് ഇത് മുതൽക്കൂട്ടാകുമെന്നാണ് പ്രതീക്ഷിക്കപ്പെടുന്നത്. 250 കാറുകളും 600 ഇരു ചക്രവാഹനങ്ങളും 40 ബസുകളും പാർക്ക് ചെയ്യാനുള്ള സൗകര്യം ഇവിടെയുണ്ട്.

തിരുവനന്തപുരം: സ്ത്രീധന നിരോധന നിയമം ഭേദഗതി ചെയ്യുന്നത് സംബന്ധിച്ച നിർദ്ദേശങ്ങൾ സർക്കാരിന് സമർപ്പിച്ച് കേരള വനിതാ കമ്മീഷൻ. 1961-ലെ സ്ത്രീധന നിരോധന ആക്ട് വകുപ്പ് മൂന്ന് ഉപവകുപ്പ് രണ്ടിൽ വിവാഹ സമയത്ത് വധൂവരന്മാർക്ക് നൽകുന്ന സമ്മാനം സ്ത്രീധനമായി കരുതപ്പെടുന്നതല്ലെന്ന് പറയുന്നു. സമ്മാനം നൽകുന്നു എന്ന വ്യാജേന കേരളത്തിലെ വിവാഹങ്ങളിൽ പരോക്ഷമായ സ്ത്രീധനക്കൈമാറ്റമാണ് നടക്കുന്നതെന്ന് കമ്മീഷൻ പറയുന്നു. അപ്രകാരം വിവാഹം നടന്നാൽ സ്ത്രീധന നിരോധന ആക്ട് പ്രകാരമുള്ള കുറ്റം ചുമത്തി കേസ് ചാർജ് ചെയ്യുന്നില്ലെന്നും എന്നാൽ വിവാഹിതയായ സ്ത്രീയ്ക്ക് ജീവഹാനി സംഭവിച്ചതിനു ശേഷം മാത്രമാണ് ഈ വകുപ്പ് ചുമത്തുന്നതെന്നും കമ്മിീഷൻ വ്യക്തമാക്കി.

1985 ലെ സ്ത്രീധന നിരോധനം (വധുവിനും വരനും ലഭിക്കുന്ന സമ്മാനങ്ങൾ അടങ്ങിയ പട്ടിക പരിപാലിക്കുന്ന ചട്ടങ്ങൾ) ചട്ടം 5 ആയി ‘വിവാഹത്തിന് സമ്മാനം കിട്ടിയവയുടെ ലിസ്റ്റ് തയാറാക്കി വരന്റെയും വധുവിന്റെയും കൂടാതെ അവരുടെ രക്ഷാകർത്താക്കളുടെയും കൈയ്യൊപ്പോടെ ഒരു നോട്ടറിയുടെ മുമ്പാകെ സാക്ഷ്യപ്പെടുത്തി വിവാഹം രജിസ്റ്റർ ചെയ്യുതിനുള്ള അപേക്ഷയോടൊപ്പം ഹാജരാക്കണമെന്നാണ് വനിതാ കമ്മീഷന്റെ നിർദ്ദേശം. ഇതുസംബന്ധിച്ച സത്യവാങ്മൂലം വധുവിന്റെ മാതാപിതാക്കൾ/രക്ഷാകർത്താക്കൾ ബന്ധപ്പെട്ട സ്ത്രീധന നിരോധന ഓഫീസർക്ക് കൈമാറാവുന്നതാണ് എന്ന് ചേർക്കണമെന്നും കമ്മീഷൻ സർക്കാരിന് നൽകിയ ശുപാർശയിൽ വ്യക്തമാക്കുന്നു.

വകുപ്പ് നാല് എ പ്രകാരം സ്ത്രീധനം പ്രോത്സാഹിപ്പിക്കുന്ന പരസ്യങ്ങൾ നിരോധിച്ചിട്ടുണ്ടെങ്കിലും വിവാഹവുമായി ബന്ധപ്പെട്ട് സ്വർണാഭരണങ്ങൾ, സ്വർണക്കടകൾ എന്നിവയുടെ പരസ്യങ്ങൾ പത്ര-ദൃശ്യ മാദ്ധ്യമങ്ങളിൽ വ്യാപകമാണെന്ന് കമ്മീഷൻ നിരീക്ഷിക്കുന്നു. നിയമത്തിലെ വ്യവസ്ഥകൾ പ്രകാരമുള്ള നടപടികൾ ഇവർ കൃത്യമായി സ്വീകരിക്കുന്നില്ല. വകുപ്പ് എട്ട് ബി പ്രകാരം സ്ത്രീധന നിരോധന ഓഫീസർമാർ, ഉപദേശക സമിതി എന്നിവയുടെ പ്രവർത്തനങ്ങൾ ശക്തിപ്പെടുത്തുതിനുള്ള നടപടികൾ സ്വീകരിക്കണമെന്നും കമ്മീഷൻ നിർദ്ദേശിക്കുന്നു.

സ്ത്രീധനത്തിന്റെ പേരിൽ വിവാഹിതരായ സ്ത്രീകൾക്ക് നേരെ കുടുംബങ്ങളിൽ നടക്കുന്ന അതിക്രമങ്ങൾക്കെതിരെ പ്രചാരണം നടത്താനും വനിതാ കമ്മീഷൻ തീരുമാനിച്ചു. സാമൂഹ്യമാദ്ധ്യമങ്ങൾ, പത്രങ്ങൾ, എഫ്എം റേഡിയോ തുടങ്ങിയവയിലൂടെയുള്ള സമഗ്രമായ ദൃശ്യ-ശ്രാവ്യ പ്രചാരണം നടത്താനാണ് കമ്മീഷൻ പദ്ധതിയിടുന്നത്.

കൊച്ചി: രാജ്യദ്രോഹ കേസുമായി ബന്ധപ്പെട്ട് ചലച്ചിത്ര പ്രവർത്തക ഐഷാ സുൽത്താനയുടെ ചോദ്യം ചെയ്യൽ പൂർത്തിയായി. കവരത്തി എസ്.ഐയുടെ നേതൃത്വത്തിലുള്ള സംഘമാണ് ഐഷാ സുൽത്താനയെ ചോദ്യം ചെയ്തത്. കൊച്ചി കാക്കനാടുള്ള ഐഷയുടെ ഫ്‌ളാറ്റിലെത്തിയായിരുന്നു ചോദ്യം ചെയ്യൽ.

രണ്ടു മണിക്കൂറോളം നേരം ഐഷയെ പോലീസ് ചോദ്യം ചെയ്തു. പിന്നീട് ഇവരുടെ ലാപ്‌ടോപും പോലീസ് കസ്റ്റഡിയിലെടുത്തു. അതേസമയം പോലീസ് പിടിച്ചെടുത്തത് തന്റെ സഹോദരന്റെ ലാപ്‌ടോപ് ആണെന്നാണ് ഐഷാ സുൽത്താന പറയുന്നത്. ഐഷയുടെ ബാങ്ക് ഇടപാട് രേഖകളും പോലീസ് പരിശോധിച്ചു.

പോലീസിൻറെ നടപടി മറ്റ് ചിലരുടെ അജണ്ടയുടെ ഭാഗമാണെന്നാണ് ഐഷാ സുൽത്താനയുടെ ആരോപണം. നേരത്തെ ഇവരുടെ അമ്മയുടെ മൊബൈൽ ഫോൺ പൊലീസ് പിടിച്ചെടുത്തിരുന്നു. ഈ മൊബൈൽ ഫോണിൽ നിന്നും ലഭിച്ച വിവരത്തിന്റെ അടിസ്ഥാനത്തിലായിരുന്നു ഐഷയെ വീണ്ടും ചോദ്യം ചെയ്യാൻ പോലീസ് തീരുമാനിച്ചത്.

വ്യാഴാഴ്ച്ച രാവിലെയാണ് കവരത്തി എസ്.ഐയുടെ നേതൃത്വത്തിലുള്ള അഞ്ചംഗ സംഘം കൊച്ചിയിലെത്തിയത്. മുൻകൂട്ടി അറിയിക്കാതെയാണ് പൊലീസ് ചോദ്യം ചെയ്യലിന് എത്തിയതെന്ന് ഐഷാ സുൽത്താന വ്യക്തമാക്കി. പൊലീസിന്റെ ഇത്തരത്തിലുള്ള നടപടികൾ തനിക്കും കുടുംബത്തിനും ബുദ്ധിമുട്ടുണ്ടാക്കുന്നു എന്നും ഐഷ വിശദമാക്കി.

ചാനൽ ചർച്ചയ്ക്കിടെ നടത്തിയ ബയോവെപ്പൺ പരാമർശത്തെ തുടർന്നാണ് ഐഷാ സുൽത്താനയ്‌ക്കെതിരെ രാജ്യദ്രോഹക്കുറ്റം ചുമത്തി കേസെടുത്തത്. ലക്ഷദ്വീപ് ബിജെപി അദ്ധ്യക്ഷൻ നൽകിയ പരാതിയുടെ അടിസ്ഥാനത്തിലായിരുന്നു നടപടി. കേസുമായി ബന്ധപ്പെട്ട് ലക്ഷദ്വീപിൽ വെച്ച് നേരത്തെ രണ്ടു തവണ ഐഷയെ പോലീസ് ചോദ്യം ചെയ്തിരുന്നു.

തിരുവനന്തപുരം: കേരള കാർഷിക സർവ്വകലാശാല വൈസ് ചാൻസലറായ ഡോ.ആർ. ചന്ദ്രബാബുവിന്റെ നിയമനവുമായി ബന്ധപ്പെട്ട് സെലക്ഷൻ കമ്മിറ്റി പ്രതിരോധത്തിൽ. ചന്ദ്രബാബുവിന്റെ നിയമനത്തിൽ അനാവശ്യ തിടുക്കം കാണിച്ച സെലക്ഷൻ കമ്മിറ്റിയും ഇപ്പോൾ സംശയത്തിന്റെ നിഴലിലായിരിക്കുകയാണ്. അപേക്ഷ സ്വീകരിച്ച് രണ്ടു ദിവസത്തിനുള്ളിൽ വൈസ് ചാൻസലറായി ഡോ.ചന്ദ്രബാബുവിനെ നിയമിക്കാൻ സെലക്ഷൻ കമ്മിറ്റി ഗവർണർക്ക് കത്തുനൽകുകയായിരുന്നു. ഇരുപതോളം പേർ നൽകിയ അപേക്ഷകൾ കൃത്യമായി പരിശോധിക്കാതെയായിരുന്നു സെലക്ഷൻ കമ്മിറ്റിയുടെ തീരുമാനം.

2017 ഡിസംബർ 21 നായിരുന്നു വി.സി നിയമനത്തിനുള്ള അപേക്ഷ സ്വീകരിക്കുന്ന അവസാന തീയതി. 23 ന് രാവിലെ 11 ന് സെലക്ഷൻ കമ്മിറ്റി അപേക്ഷകൾ പരിശോധിച്ചു. ചീഫ് സെക്രട്ടറി ഡോ.കെ.എം. എബ്രഹാം, ഐ.സി.എ.ആർ ഡയറക്ടർ ജനറൽ ത്രിലോചൻ മൊഹാപത്ര, കേരള കാർഷിക സർവകലാശാല ജനറൽ കൗൺസിൽ അംഗം ഡോ. കെ. രവിരാമൻ എന്നിവരായിരുന്നു കമ്മിറ്റിയിലെ അംഗങ്ങൾ.

വിദേശ സർവകലാശാലകളിൽ പ്രൊഫസറായിരുന്നു എന്നതടക്കം ബയോഡാറ്റയിൽ അവകാശപ്പെടുന്ന അധിക യോഗ്യതകളുടെ വിശ്വാസ്യത തെളിയിക്കുന്ന രേഖകളോ അറ്റസ്റ്റ് ചെയ്ത പകർപ്പുകളോ ഒന്നു തന്നെ ഡോ.ചന്ദ്രബാബു സമർപ്പിച്ചിരുന്നില്ല. ഇതെല്ലാം കൃത്യമായി പരിശോധിക്കാതെയായിരുന്നു സെലക്ഷൻ കമ്മിറ്റി വൈസ് ചാൻസലറായി ചന്ദ്രബാബുവിന്റെ പേര് നിർദ്ദേശിക്കുന്നത്. ശുപാർശ ലഭിച്ച ദിവസം വൈകിട്ട് ഗവർണർ വൈസ് ചാൻസലറായി ചന്ദ്രബാബുവിനെ നിയമിച്ചു കൊണ്ടുള്ള ഉത്തരവിറക്കി. ചന്ദ്രബാബുവിന്റെ ജനനത്തീയതി പരിശോധിക്കാതെ ഇറക്കിയ ഉത്തരവിൽ വി.സിയുടെ കാലാവധി അഞ്ചുവർഷമെന്നാണ് രേഖപ്പെടുത്തിയത്. ഇതിൽ ന്യൂനത കണ്ടതിനെ തുടർന്ന് 29 -ാം തീയതി തിരുത്തൽ ഉത്തരവും പുറപ്പെടുവിച്ചു.

കാലാവധി ‘അഞ്ചുവർഷമോ അല്ലെങ്കിൽ 65 വയസ് തികയുന്നതുവരെയോ എന്ന് എഴുതിച്ചേർത്താണ് തിരുത്തൽ ഉത്തരവ് ഇറക്കിയത്. അപേക്ഷ സ്വീകരിക്കുന്ന അവസാന തീയതി ഡിസംബർ 21 ന് അവസാനിച്ചതിനാൽ ക്രിസ്മസ് അവധി കഴിഞ്ഞ ശേഷമേ തുടർനടപടികൾ ഉണ്ടാകൂവെന്നാണ് മറ്റുള്ള അപേക്ഷകർ ധരിച്ചിരുന്നത്. ഡിസംബർ 24 മുതൽ ക്രിസ്മസ് അവധി തുടങ്ങുന്നതിനാൽ 23 നു തന്നെ സെലക്ഷൻ കമ്മിറ്റി യോഗം ചേർന്ന് വൈസ് ചാൻസലറെ തീരുമാനിക്കുകയായിരുന്നു. ക്രിസ്മസ് അവധി കഴിഞ്ഞുള്ള ആദ്യ പ്രവൃത്തി ദിവസം ഡോ.ചന്ദ്രബാബു വൈസ് ചാൻസലറായി ചുമതലയേറ്റു. അതിനാൽ തന്നെ മറ്റുള്ളവർക്ക് പരാതി നൽകാനുള്ള അവസരവും ലഭിച്ചില്ല.

തിരുവനന്തപുരം: സംസ്ഥാന തെരഞ്ഞെടുപ്പ് കമ്മീഷനിലും ഐഎഎസ് തലപ്പത്തും അഴിച്ചുപണി. മുഖ്യ തിരഞ്ഞെടുപ്പ് ഓഫിസർ സ്ഥാനത്ത് നിന്ന് ടിക്കാറാം മീണയെ മാറ്റി. പ്ലാനിങ് ആൻഡ് ഇക്കണോമിക് അഫയേഴ്‌സ് അഡീഷണൽ സെക്രട്ടറിയായാണ് ടിക്കാറാം മീണയെ നിയമിച്ചിരിക്കുന്നത്. കേന്ദ്ര തെരഞ്ഞെടുപ്പു കമ്മിഷന്റെ നിർദേശം കൂടി പരിഗണിച്ചാണ് ടിക്കാറാം മീണയെ മാറ്റാൻ തീരുമാനിച്ചിരിക്കുന്നത്. മുഖ്യ തിരഞ്ഞെടുപ്പ് ഓഫിസറുടെ പുതിയ ചുമതല നൽകിയിരിക്കുന്നത് സഞ്ജയ് എം. കൗളിനാണ്.

വലിയ മാറ്റങ്ങളാണ് ഐഎഎസ് തലപ്പത്തും നടക്കുന്നത്. ജാഫർ മാലിക് എറണാകുളം കലക്ടറാകും. നിലവിലെ എറണാകുളം കലക്ടറായ എസ്. സുഹാസിനെ റോഡ്‌സ് ആൻഡ് ബ്രിഡ്ജസ് ഡെവലപ്‌മെന്റ് കോർപറേഷൻ എംഡിയാകും. തൃശൂർ കലക്ടർ ഷാനവാസ് മഹാത്മാ ഗാന്ധി ദേശീയ ഗ്രാമീണ തൊഴിലുറപ്പു മിഷൻ ഡയറക്ടറാകും. ഹരിത വി. കുമാറായിരിക്കും തൃശൂർ കലക്ടറാകുക.

കോട്ടയം ജില്ലാ കലക്ടറായ എം. അഞ്ജന ജനറൽ അഡ്മിനിസ്‌ട്രേഷൻ വിഭാഗം ജോയിന്റ് സെക്രട്ടറിയാകും. പഞ്ചായത്ത് വിഭാഗം ഡയറക്ടർ ഡോ. പി.കെ. ജയശ്രീയാണ് കോട്ടയം കലക്ടറാകുക. കാസർകോട് കലക്ടർ ഡോ. ഡി. സജിത് ബാബു സിവിൽ സപ്ലൈസ് വിഭാഗം ഡയറക്ടറും ഭണ്ഡാരി സ്വാഗത് രൺവീർചന്ദ് കാസർകോട് കലക്ടറുമാകും. കോഴിക്കോട് കലക്ടർ സീറാം സാംബശിവ റാവു സർവേ ആൻഡ് ലാൻഡ് റെക്കോഡ്‌സ് വിഭാഗം ഡയറക്ടറാകും. പത്തനംതിട്ട കലക്ടർ ഡോ. നരസിംഹുഗാരി റെഡ്ഡി കോഴിക്കോട് കലക്ടറാകും. ഡോ. ദിവ്യ എസ്. അയ്യർ പത്തനംതിട്ട കലക്ടറും ഷീബ ജോർജ് ഇടുക്കി കലക്ടറുമാകും.

കൊച്ചി: കോവിഡ് വൈറസ് വ്യാപനത്തിനിടയിൽ മദ്യശാലകൾക്ക് മുന്നിലെ തിരക്ക് സംബന്ധിച്ച് സർക്കാരിനോട് വിശദീകരണം ആവശ്യപ്പെട്ട് ഹൈക്കോടതി. വിഷയത്തിൽ ഒരാഴ്ചയ്ക്കകം വിശദീകരണം നൽകണമെന്നാണ് കോടതി ആവശ്യപ്പെട്ടിരിക്കുന്നത്. കോവിഡ് സമയത്ത് മദ്യശാലകൾക്ക് മുന്നിലെ ആൾക്കൂട്ടം കണ്ടില്ലെന്ന് നടിക്കാനാകില്ലെന്ന് കോടതി നിരീക്ഷിച്ചു.

മദ്യശാലകൾക്ക് മുന്നിലെ തിരക്ക് കുറയ്ക്കുന്നതിനായി നടപടികൾ സ്വീകരിക്കണമെന്നാവശ്യപ്പെട്ട് സമർപ്പിച്ച ഹർജിയിലാണ് കോടതിയുടെ നടപടി. അടുത്ത ചൊവ്വാഴ്ചയ്ക്കകം ഇതുസംബന്ധിച്ച് സംസ്ഥാന സർക്കാർ വിശദീകരണം നൽകണം എന്നാണ് ആവശ്യപ്പെട്ടിരിക്കുന്നത്. എക്സൈസ് കമ്മിഷണർ കോടതിയ്ക്ക് മുൻപാകെ ഹാജരാകണമെന്നും നിർദ്ദേശം നൽകിയിട്ടുണ്ട്.

കോവിഡ് പ്രോട്ടോകോളുകളുടെ ലംഘനമാണ് മദ്യശാലകൾക്ക് മുന്നിൽ നടക്കുന്നതെന്നാണ് ഹർജിയിൽ ആരോപിച്ചിരുന്നത്. മദ്യശാലകൾക്ക് മുന്നിൽ കോവിഡ് പ്രോട്ടോക്കോൾ പാലിക്കപ്പെടുന്നില്ലെന്ന വാദം കോടതി ശരിവെച്ചു. ഇതുമായി ബന്ധപ്പെട്ട ഫോട്ടോകളും വീഡിയോകളും കോടതി പരിഗണിക്കുകയും ചെയ്തു. സംസ്ഥാനത്ത് കർശന നിയന്ത്രണങ്ങൾ നിലനിൽക്കേ മദ്യശാലകൾക്ക് മുന്നിൽ ഇത്തരം അയവ് പാടില്ലെന്ന നിലപാടാണ് കോടതിയുടേത്.