General (Page 1,488)

തിരുവനന്തപുരം: ജയിലിൽ ഭീഷണിയും സമ്മർദ്ദവും നേരിടേണ്ടി വരുന്നുവെന്ന പരാതിയുമായി തിരുവനന്തപുരം സ്വർണക്കടത്ത് കേസിലെ മുഖ്യപ്രതി സരിത്ത്. കേസിൽ കോൺഗ്രസിന്റെയും ബിജെപിയുടെയും ചില നേതാക്കളുടെ പേര് പറയാൻ സമ്മർദ്ദമുണ്ടെന്ന് ചൂണ്ടിക്കാട്ടിയാണ് സരിത്ത് എൻഐഎ കോടതിയിൽ പരാതി നൽകിയിരിക്കുന്നത്. ഇക്കാര്യം വ്യക്തമാക്കി സരിത്തിന്റെ അമ്മ കസ്റ്റംസിനും പരാതി നൽകി.

സ്വർണക്കടത്ത് കേസിലെ പ്രധാന പ്രതികളിൽ ഒരാളാണ് സരിത്ത്. ജയിലിനുള്ളിൽ തനിക്ക് സമ്മർദ്ദവും ഭീഷണിയുമുണ്ടെന്നാണ് സരിത്തിന്റെ ആരോപണം. വി മുരളീധരൻ, രമേശ് ചെന്നിത്തല എന്നിവരുടെ പേര് പറയാനാണ് സമ്മർദ്ദം ഉണ്ടാകുന്നതെന്നാണ് സരിത്ത് ആരോപിക്കുന്നത്.

റിമാൻഡ് പുതുക്കുന്നതിനായി എൻഐഎ കോടതിയിൽ ഓൺലൈനായി ഹാജരാക്കിയപ്പോഴായിരുന്നു സരിത്ത് പരാതി ഉന്നയിച്ചത്. തുടർന്ന് കോടതി സരിത്തിനോട് പരാതി എഴുതി നൽകാൻ ആവശ്യപ്പെട്ടു.

സരിത്തിന് ജയിലിൽ ഭീഷണി ഉള്ളതായി നേരത്തെയും റിപ്പോർട്ടുകൾ പുറത്തുവന്നിരുന്നു. പിന്നാലെയാണ് കോടതിയിൽ ഇക്കാര്യം സരിത്ത് വെളിപ്പെടുത്തിയിരിക്കുന്നത്. അടുത്ത തവണ ഹാജരാക്കുമ്പോൾ ഇക്കാര്യം വിശദമായി പറയാമെന്നും സരിത്ത് കോടതിയിൽ വ്യക്തമാക്കിയിട്ടുണ്ട്.

കൊച്ചി: 84 മെഗാവാട്ടിന്റെ പുരപ്പുറ സൗരോർജ്ജ പദ്ധതിയുടെ എംപാനൽമെന്റ് കരാർ ടാറ്റ പവറിന് നൽകി കെഎസ്ഇബി. ആഭ്യന്തര ഉപയോക്താക്കൾക്കായി നടപ്പാക്കുന്ന നാനൂറ് കോടി രൂപ മതിപ്പു വരുന്ന 84 മെഗാവാട്ടിന്റെ പദ്ധതിയുടെ കരാറാണ് കെഎസ്ഇബി ടാറ്റാ പവറിന് നൽകിയത്.

കെഎസ്ഇബിയുമായി ചേർന്ന് വ്യക്തിഗത വീടുകൾക്കായി ടാറ്റാ പവർ 84 മെഗാവാട്ട് പദ്ധതി നടപ്പാക്കും. മൂന്ന് മുതൽ 10 കിലോവാട്ട് വരെ കപ്പാസിറ്റിയുള്ള സോളാർ പദ്ധതികളാവും ഇത്. റസിഡൽഷ്യൽ, ഹൗസിംഗ് സൊസൈറ്റികൾക്കായി, 11 മുതൽ 100 കിലോവാട്ട് വരെ കപ്പാസിറ്റിയുള്ള സോളാർ പദ്ധതികളിൽ നിന്ന് 20 മെഗാവാട്ട് സൗരോർജ്ജം ഉത്പാദിപ്പിക്കാനുള്ള പദ്ധതിയും നടപ്പാക്കും.

കേന്ദ്ര ന്യൂ & റിന്യൂവബിൾ എനർജി മന്ത്രാലയത്തിന്റെ രണ്ടാം ഘട്ട സബ്സിഡി സൗര സബ്സിഡി സ്‌കീം ഇൻ ഡൊമസ്റ്റിക് സെക്ടർ അനുസരിച്ചാണ് കമ്പനി കരാർ സ്വന്തമാക്കിയത്. വ്യക്തിഗത വീട്ടുടമകളിൽനിന്ന് ഓർഡർ ലഭിച്ചുകഴിഞ്ഞാൽ മൂന്നു മാസത്തിനകം പദ്ധതി കമ്മീഷൻ ചെയ്യണം. 110 മെഗാവാട്ട് പുരപ്പുറ സൗരോർജ്ജ പദ്ധതി നടപ്പാക്കാൻ കമ്പനിയ്ക്ക് ജനുവരി ആറിന് കെഎസ്ഇബിയിൽ നിന്നും അനുമതിപത്രം ലഭിച്ചത്. 274 എംയു ഊർജ്ജമാണ് ഓരോ വർഷവും ഈ പദ്ധതിയിലൂടെ ഉത്പാദിപ്പിക്കാൻ ലക്ഷ്യമിടുന്നത്.

84 മെഗാവാട്ട് പുരപ്പുറ സൗരോർജ്ജ പദ്ധതി നടപ്പാക്കുമ്പോൾ ഓരോ വർഷവും 120 എംയു ഊർജ്ജമാണ് ഉത്പാദിപ്പിക്കാൻ ലക്ഷ്യമിടുന്നത്. പ്രതിവർഷം ഏതാണ്ട് 100 ദശലക്ഷം കിലോഗ്രാം കാർബൺ ഡയോക്സൈഡ് ഒഴിവാക്കാൻ ഇതുവഴി സാധിക്കുമെന്നാണ് പ്രതീക്ഷിക്കപ്പെടുന്നത്.

പുരപ്പുറ സൗരോർജ്ജ പദ്ധതി സ്വന്തമാക്കിയതിൽ സന്തോഷമുണ്ടെന്ന് ടാറ്റ പവർ സിഇഒയും മാനേജിംഗ് ഡയറക്ടറുമായ ഡോ. പ്രവീർ സിൻഹ അറിയിച്ചു. പുരപ്പുറ സൗരോർജ്ജ ഉത്പാദനത്തിലൂടെ ഇന്ത്യയെ ക്ലീൻ പവർ രംഗത്തേയ്ക്ക് നയിക്കുന്നതിലുള്ള ടാറ്റ പവറിന്റെ പ്രതിബദ്ധതയിലുള്ള കെഎസ്ഇബിയുടെ വിശ്വാസ്യതയാണ് ഇതിലൂടെ വ്യക്തമാകുന്നതെന്നും അദ്ദേഹം കൂട്ടിച്ചേർത്തു.

കൂത്തുപറമ്പ്: വനിതാ സിവിൽ പോലീസ് ഓഫീസർ റാങ്ക് പട്ടികയിലുള്ളവർ ആശങ്കയിൽ. കാലാവധി തീരാൻ 26 ദിവസം മാത്രം ശേഷിക്കെ 1400 പേരാണ് നിയമന ഉത്തരവ് കാത്തിരിക്കുന്നത്. ഓഗസ്റ്റ് നാലു വരെയാണു പട്ടികയുടെ കാലാവധി. 2017-ലെ പി.എസ്.സി. വിജ്ഞാപന പ്രകാരം 2018-ലാണ് എഴുത്തുപരീക്ഷ നടത്തിയത്. 2019 നവംബറിൽ കായികക്ഷമതാ പരിശോധന നടത്തുകയും കഴിഞ്ഞ ഓഗസ്റ്റ് മൂന്നിന് 2050 പേരടങ്ങുന്ന റാങ്ക് പട്ടിക പ്രസിദ്ധീകരിക്കുകയും ചെയ്തിരുന്നു.

ഗർഭിണികളായ ഉദ്യോഗാർഥികൾ കായികക്ഷമതാ പരിശോധന അനുവദിക്കണമെന്നാവശ്യപ്പെട്ട് കോടതിയിൽ നിന്ന് അനുകൂല വിധി നേടിയതോടെ കഴിഞ്ഞ ഒക്ടോബറിൽ നിയമനനടപടി ആരംഭിച്ചു. റാങ്ക് പട്ടികയിൽ നിന്നും ഇതുവരെ 671 പേർക്കാണ് നിയമന ശുപാർശ ലഭിച്ചത്. കഴിഞ്ഞ റാങ്ക് പട്ടികയിൽ നിന്നും 1200 ഓളം പേർക്കാണ് ജോലി ലഭിച്ചത്. നിലവിൽ നിയമന ശുപാർശ ലഭിച്ചവരിൽ 360 പേർ മാത്രമാണ് ജോലിക്കു ചേർന്നത്. നോൺ ജോയിനിങ് (എൻ.ജെ.ഡി) ഒഴിവുകളാണു കൂടുതൽ. കഴിഞ്ഞ ജനുവരിയിൽ റിപ്പോർട്ട് ചെയ്ത 100 ഒഴിവിൽ 46 എണ്ണവും നോൺ ജോയിനിംഗ് ഒഴിവുകളായിരുന്നു. ഏപ്രിൽ 27-നും 29-നും എൻ.ജെ.ഡി. ഒഴിവുകളിലേക്ക് നിയമന ശുപാർശ അയച്ചിട്ടുണ്ട്.

കോവിഡ് പ്രതിസന്ധിയേത്തുടർന്ന് റാങ്ക് പട്ടികകളുടെ കാലാവധി നീട്ടിയപ്പോൾ വനിതാ പോലീസ് പട്ടികയ്ക്ക് ഒരു ദിവസമാണ് അധികമായി ലഭിച്ചത്. പ്ലസ്ടു പ്രാഥമികതലപരീക്ഷയിൽനിന്നാണ് പുതിയ റാങ്ക് പട്ടികയിലേക്കു ഉദ്യോഗാർഥികളെ തെരഞ്ഞെടുക്കുന്നത്. പുതിയ പട്ടികയ്ക്കു കാലതാമസമുണ്ടാമെന്നതിനാൽ നിലവിലെ പട്ടിക ആറുമാസമെങ്കിലും നീട്ടണമെന്നാണ് ഉദ്യോഗാർഥികൾ ആവശ്യപ്പെടുന്നത്. നിലവിലുള്ള പട്ടികയിലെ ഭൂരിപക്ഷം പേരും പ്രായപരിധി കഴിഞ്ഞവരായതിനാൽ ഇനിയൊരു പരീക്ഷ എഴുതാനാവില്ല.

കൊച്ചി: സംസ്ഥാന സർക്കാരിനെതിരെ വിമർശനവുമായി ഹൈക്കോടതി. സംസ്ഥാനത്ത് സ്ത്രീധന നിരോധന നിയമം കർശനമായി നടപ്പാക്കാത്ത സർക്കാർ നിലപാടിനെതിരെയാണ് കോടതി വിമർശനം ഉന്നയിച്ചത്. സ്ത്രീധന നിരോധന നിയമം സർക്കാർ എന്തുകൊണ്ടാണ് നടപ്പാക്കാത്തതെന്ന് കോടതി ചോദിച്ചു. സർക്കാർ ജീവനക്കാർ സ്ത്രീധനം വാങ്ങിയിട്ടില്ലെന്ന സത്യവാങ്മൂലം നൽകണമെന്ന വ്യവസ്ഥയിൽ സർക്കാരിന്റെ നിലപാട് അറിയിക്കണമെന്നും കോടതി ആവശ്യപ്പെട്ടു.

സ്ത്രീധന നിരോധന നിയമത്തിൽ ഭേദഗതി ആവശ്യപ്പെട്ട് പെരുമ്പാവൂർ സ്വദേശി ഡോ. ഇന്ദിര രാജു നൽകിയ ഹർജി പരിഗണിക്കവെയായിരുന്നു കോടതിയുടെ പരാമർശം. ഡൗറി പ്രൊഹിബിഷൻ ഓഫീസേഴ്‌സ് നിയമം നടപ്പിലാക്കാത്ത നിലപാടിനെതിരെ കോടതി രൂക്ഷ വിമർശനം ഉന്നയിച്ചു.

സ്ത്രീധനത്തിന്റെ പേരിൽ ഇരയാക്കപ്പെടുന്നവരുടെ ആശ്രിതർക്ക് നഷ്ടപരിഹാരം നൽകാൻ നടപടി സ്വീകരിക്കണമെന്നാവശ്യപ്പെട്ടാണ് ഹർജി സമർപ്പിച്ചിരിക്കുന്നത്. സംസ്ഥാനത്ത് സത്രീധന ഹാർഹിക പീഡനങ്ങൾ വർധിക്കുന്ന സാഹചര്യത്തിലാണ് പൊതുതാത്പര്യ ഹർജി സമർപ്പിച്ചിരിക്കുന്നത്. വിവാഹ സമയത്തോ അനുബന്ധമായോ നൽകുന്ന സമ്മാനങ്ങൾ കണക്കാക്കി മാത്രമേ വിവാഹം രജിസ്റ്റർ ചെയ്യാൻ പാടുള്ളൂവെന്ന് രജിസ്ട്രാർമാർക്ക് നിർദ്ദേശം നൽകണമെന്നും ഹർജിയിൽ പറയുന്നു.

തിരുവനന്തപുരം: പട്ടികജാതി വിദ്യാർഥികൾക്കു പഠനസഹായത്തിനായി സർക്കാർ കഴിഞ്ഞ അഞ്ചു വർഷത്തിനിടെ ചെലവിട്ടത് 754.82 കോടി രൂപ. ഇത്രയധികം പണം ചെലവഴിച്ചിട്ടും സംസ്ഥാനത്ത് ഓൺലൈൻ പഠന സൗകര്യമില്ലാതെ രണ്ടുലക്ഷത്തോളം ആദിവാസി, ദളിത് വിദ്യാർഥികളുണ്ടെന്നാണ് റിപ്പോർട്ടുകൾ. പ്രമുഖ മലയാള മാദ്ധ്യമം പ്രസിദ്ധീകരിച്ച റിപ്പോർട്ടിലാണ് ഇക്കാര്യം വ്യക്തമാക്കിയിരിക്കുന്നത്.

ഡിജിറ്റൽ-ഓൺലൈൻ പഠനസൗകര്യം ഏർപ്പെടുത്തണമെന്ന സർക്കാർ നിർദേശം ഒന്നരമാസമായിട്ടും വിവിധ വകുപ്പുകൾ അവഗണിക്കുന്നുവെന്നാണ് റിപ്പോർട്ടിൽ പറയുന്നത്. നിർധന വിദ്യാർഥികൾക്ക് ഓൺലൈൻ പഠനം അസാധ്യമായിരിക്കുന്ന സാഹചര്യത്തിലും 1.20 ലക്ഷം ലാപ്ടോപ്പുകളും കമ്പ്യൂട്ടറുകളും വിദ്യാഭ്യാസവകുപ്പിൽ ഉപയോഗിക്കാതെ കെട്ടിക്കിടക്കുകയാണ്.

ഈ വർഷത്തെ ഓൺലൈൻ ക്ലാസുകൾ ആരംഭിച്ചപ്പോൾ വിദ്യാർത്ഥികൾക്ക് ഡിജിറ്റൽ പഠനം ലഭ്യമല്ലാത്തത് സംബന്ധിച്ച് പരാതികൾ ഉയർന്നിരുന്നു. വിവിധ വകുപ്പുകൾ ഇക്കാര്യത്തിൽ അടിയന്തരമായി ഇടപെടണമെന്ന് മുഖ്യമന്ത്രി പിണറായി വിജയൻ നിർദ്ദേശം നൽകുകയും ചെയ്തിരുന്നു. മുഴുവൻ പട്ടികവർഗ വിദ്യാർഥികൾക്കും സാമൂഹിക പഠനമുറികൾ, സ്‌കൂളുകൾ എന്നിവയ്ക്കു പുറമേ അംഗൻവാടികൾ, ഊരുവിദ്യാകേന്ദ്രങ്ങൾ, എം.ജി.എൽ.സികൾ എന്നിവിടങ്ങളിൽ ഡിജിറ്റൽ-ഓൺലൈൻ സൗകര്യങ്ങളേർപ്പെടുത്താനാണ് പട്ടികവർഗ വികസന വകുപ്പിന് നൽകിയിരുന്ന നിർദേശം. ഇവ ലഭ്യമല്ലാത്ത പ്രദേശങ്ങളിലെ കോളനികളിൽ വിക്ടേഴ്സ് ചാനൽ ക്ലാസുകൾ റെക്കോഡ് ചെയ്ത് എത്തിക്കാനും നിർദേശം നൽകിയിരുന്നു. എന്നാൽ ഇവയൊന്നും കൃത്യമായി നടപ്പായില്ല. വിദ്യാഭ്യാസ, തദ്ദേശ, പട്ടികജാതി/വർഗവകുപ്പുകൾ തമ്മിലുള്ള ഏകോപനമില്ലായ്മയാണ് പഠന സൗകര്യങ്ങൾ ഏർപ്പെടുത്താൻ തടസമായത്.

സംസ്ഥാനത്താകെ 40 ലക്ഷത്തോളം വിദ്യാർഥികളാണുള്ളത്. അതിൽ 12% ആദിവാസി, ദളിത്, നിർധന വിദ്യാർഥികളാണ്. വനത്തിനുള്ളിൽ കഴിയുന്ന 70,117 ആദിവാസി വിദ്യാർഥികളുണ്ടെന്നാണു സർക്കാർ രേഖകളിൽ വ്യക്തമാക്കുന്നത്. ഇതിൽ 2,046 പേർക്ക് മാത്രമാണ് ഡിജിറ്റൽ പഠന സൗകര്യം ലഭിക്കാത്തതെന്നാണ് സർക്കാർ വൃത്തങ്ങൾ നൽകുന്ന വിവരം. അതേസമയം ഈ കണക്ക് തെറ്റാണെന്നാണ് ആദിവാസി, മനുഷ്യാവകാശസംഘടനകൾ പറയുന്നത്. സ്‌കൂളുകളുടെ നേതൃത്വത്തിൽ കണക്കെടുത്ത്, തദ്ദേശാടിസ്ഥാനത്തിൽ ക്രോഡീകരിച്ചശേഷം 21-നകം വിദ്യാഭ്യാസ വകുപ്പിനു കൈമാറാനാണ് സർക്കാർ ആവശ്യപ്പെട്ടിരിക്കുന്നത്.

അതേസമയം വിദ്യാഭ്യാസ വകുപ്പിൽ 1.20 ലക്ഷം കമ്പ്യൂട്ടറുകൾ കെട്ടിക്കിടക്കുന്നതായാണ് സന്നദ്ധ സംഘടനകൾ ആരോപിക്കുന്നത്. സർക്കാർ സ്‌കൂളുകൾ ഹൈടെക് ആക്കാൻ വാങ്ങിക്കൂട്ടിയതാണിവയെല്ലാം. ഈ കമ്പ്യൂട്ടറുകൾ ഏകാധ്യാപകവിദ്യാലയങ്ങൾക്കും ആദിവാസി മേഖലകളിലെ ബാലവിഭവകേന്ദ്രങ്ങൾക്കും മെന്റർ ടീച്ചർമാർക്കും കൈമാറിയാൽ ഡിജിറ്റൽ പഠന സൗകര്യങ്ങളില്ലെന്ന പ്രശ്‌നത്തിന് ഒരു പരിധി വരെ പരിഹാരം കാണാനാകുമെന്നും ഇവർ അഭിപ്രായപ്പെടുന്നു.

2016-17 കാലഘട്ടത്തിൽ 132.59 കോടി രൂപയും 2017-18 കാലഘട്ടത്തിൽ 238.33 കോടി രൂപയും 2018-19 കാലഘട്ടത്തിൽ 252.09 കോടി രൂപയും 2019-20 കാലഘട്ടത്തിൽ 131.81 കോടി രൂപയുമാണ് പട്ടികജാതി വകുപ്പ് ചെലവിട്ടത്.

തിരുവനന്തപുരം: നിയന്ത്രണങ്ങൾക്ക് വിധേയമായി ജുമുഅ നമസ്‌കാരത്തിന് അനുമതി നൽകണമെന്നാവശ്യപ്പെട്ട് സമസ്ത. ഇക്കാര്യം ആവശ്യപ്പെട്ട് സമസ്ത കോഡിനേഷൻ കമ്മിറ്റി മലപ്പുറത്ത് സായാഹ്ന ധർണ സംഘടിപ്പിച്ചു. ആരാധനാലയങ്ങൾക്ക് കൂടി ഇളവുകൾ നൽകണമെന്ന് കോവിഡ് നിയന്ത്രണ ഇളവുകൾ പ്രഖ്യാപിച്ചപ്പോൾ തന്നെ സമസ്ത ഉൾപ്പെടെയുള്ള മുസ്ലിം മത സംഘടനകൾ ആവശ്യപ്പെട്ടിരുന്നു. സമസ്ത ഇക്കാര്യം ആവശ്യപ്പെട്ട് മുഖ്യമന്ത്രിയ്ക്ക് നേരിട്ട് കത്തയക്കുകയും ചെയ്തിരുന്നു.

എന്നാൽ ലോക്ക്ഡൗണിൽ ഇളവുകൾ അനുവദിച്ചപ്പോൾ ആരാധനാലയങ്ങളിൽ ഇളവ് അനുവദിച്ചിരുന്നില്ല. ഇതോടെയാണ് സമസ്ത പുതിയ നടപടികളുമായി മുന്നോട്ട് പോകുന്നത്.

‘ജുമുഅ നമസ്‌കാരം വിശ്വാസികളെ സംബന്ധിച്ച് ഏറ്റവും പ്രധാനപ്പെട്ടതാണ്. പാവപ്പെട്ടവരുടെ ഹജ്ജ് എന്നെല്ലാം ജുമുഅ നമസ്‌കാരത്തെ വിശേഷിപ്പിക്കാം. പക്ഷേ ആളുകൾ സംഘടിച്ച് നമസ്‌കരിക്കുന്നത് അല്ല ജുമുഅ നമസ്‌കാരം. 40 പേർ പങ്കെടുക്കണം എന്നാണ് ചട്ടം. നിലവിലെ സാഹചര്യത്തിൽ അത് സാധ്യമല്ല. ഇളവ് നൽകിയ മറ്റെല്ലാ മേഖലയിലും ഇതിലേറെ ആളുകൾ സംഘടിക്കുന്നുണ്ട്. പക്ഷേ പള്ളിയുടെ കാര്യത്തിൽ, ആരാധനയുടെ കാര്യത്തിൽ വരുമ്പോൾ കഴിയില്ല എന്ന നിലപാട് എന്ത് കൊണ്ടാണെന്ന്’ സമസ്ത കേരള ഇസ്ലാം മത വിദ്യാഭ്യാസ ബോർഡ് ജനറൽ സെക്രട്ടറി എം.ടി.അബ്ദുല്ല മുസ്ലിയാർ ചോദിച്ചു. മുഖ്യമന്ത്രിയും സർക്കാരും ഇക്കാര്യത്തിൽ അനുകൂല നിലപാട് സ്വീകരിക്കുമെന്നാണ് പ്രതീക്ഷിക്കുന്നതെന്നും അദ്ദേഹം വ്യക്തമാക്കി.

കോവിഡ് മാനദണ്ഡങ്ങൾ പാലിച്ചു ആരാധനാലയങ്ങൾക്ക് പ്രവർത്തിക്കാനാകുമെന്നുമാണ് സമസ്ത നേതാക്കൾ പറയിുന്നത്. ടെസ്റ്റ് പോസിറ്റിവിറ്റി നിരക്കിന്റെ അടിസ്ഥാനത്തിൽ എ, ബി ഗണത്തിൽ പെടുന്ന ഇടങ്ങളിൽ ജുമുഅ നമസ്‌കാരത്തിന് അനുമതി നൽകണമെന്നാണ് ഇവർ പറയുന്നത്. പള്ളിയുടെ വിസ്തൃതി, പ്രദേശത്തെ സാഹചര്യം ഇവ എല്ലാം കണക്കിലെടുത്ത് അനുമതി നൽകണം എന്നാണ് ആവശ്യം. ആരാധനയ്ക്ക് വേണ്ടി നടത്തുന്ന പ്രതിഷേധ സമരങ്ങളിൽ പോലീസുകാർ ഫോട്ടോ എടുക്കുകയാണെന്നും ബീവറേജ് കോർപ്പറേഷന് മുൻപിൽ തടിച്ചുകൂടിയ ആളുകളുടെ ഫോട്ടോ എടുക്കാൻ ഒരു പൊലീസുകാരനെയും കാണുന്നില്ലെന്നും പി ഉബൈദുള്ള എം എൽ എ പറഞ്ഞു. ഇത് കടുത്ത വിവേചനമാണെന്നും മദ്യശാലകളിൽ ഇല്ലാത്ത കോവിഡ് എങ്ങനെയാണ് ആരാധനാലയങ്ങളിൽ എത്തുകയെന്നും അദ്ദേഹം പറയുന്നു.