General (Page 1,483)

തിരുവനന്തപുരം: സംസ്ഥാനത്ത് നാളെ മുതൽ കടകൾ തുറക്കും. വ്യാപാരി വ്യവസായി ഏകോപന സമിതി പ്രസിഡന്റ് ടി. നസിറുദ്ദീനാണ് ഇക്കാര്യം അറിയിച്ചത്. മുഖ്യമന്ത്രിയുടെ വിരട്ടൽ തങ്ങളോടു വേണ്ടെന്നും കൈകാര്യം ചെയ്യുമെന്ന് മുഖ്യമന്ത്രി പറഞ്ഞത് കാര്യമാക്കുന്നില്ലെന്നും അദ്ദേഹം വ്യക്തമാക്കി. വെള്ളിയാഴ്ച്ച വൈകുന്നേരം മൂന്നരയ്ക്കാണ് മുഖ്യമന്ത്രിയും വ്യപാരികളുമായുള്ള കൂടിക്കാഴ്ച.

മുഖ്യമന്ത്രിയുടെ ഭാഷ തങ്ങൾ അംഗീകരിക്കുന്നില്ല. തങ്ങളോടു വിരട്ടൽ വേണ്ടെന്നും അദ്ദേഹം പറഞ്ഞു. ശനി, ഞായർ ദിവസങ്ങളിൽ സംസ്ഥാനത്ത് സമ്പൂർണ ലോക്ക് ഡൗൺ ആണ്. എന്നാൽ അത് കാര്യമാക്കാതെ കടകൾ തുറന്നു പ്രവർത്തിക്കാനാണ് തീരുമാനമെന്ന് അദ്ദേഹം അറിയിച്ചു. എല്ലാ ദിവസവും കടകൾ തുറക്കാൻ സർക്കാർ അനുമതി നൽകണമെന്നും അതല്ലാതെയുള്ള ഒരു നിയന്ത്രണവും അംഗീകരിക്കാൻ കഴിയില്ലെന്നും അദ്ദേഹം വിശദമാക്കി.

പ്രദേശികമായി ടി.പി.ആർ. നോക്കി നടപ്പാക്കുന്ന നിയന്ത്രണങ്ങൾ അശാസ്ത്രീയമാണെന്നും ആഴ്ചയിൽ അഞ്ച് ദിവസം കടകൾ തുറക്കാൻ അനുവദിക്കണമെന്നുമാണ് വ്യാപാരികൾ ഉന്നയിക്കുന്ന ആവശ്യം. സംസ്ഥാനത്ത് ടെസ്റ്റ് പോസിറ്റിവിറ്റി നിരക്ക് കുറയാത്ത സാഹചര്യമാണ് നിലവിലുള്ളത്. അതിനാൽ തന്നെ വ്യാപാരികളുടെ ആവശ്യം സർക്കാർ അംഗീകരിക്കുമോയെന്ന കാര്യം സംശയമാണ്. ലോക്ക് ഡൗൺ നിയന്ത്രണങ്ങളുമായി ബന്ധപ്പെട്ട് സർക്കാരും വ്യാപാരികളും തമ്മിൽ തർക്കം രൂക്ഷമാണ്. കടകൾ തുറക്കാൻ അനുവദിച്ചില്ലെങ്കിൽ നിയന്ത്രണങ്ങൾ ലംഘിച്ച് കടകൾ തുറന്ന് പ്രവർത്തിക്കുമെന്നാണ് വ്യാപാരികളുടെ നിലപാട്.

ന്യൂഡൽഹി: കേന്ദ്ര ധനമന്ത്രി നിർമ്മലാ സീതാരാമനുമായി കൂടിക്കാഴ്ച്ച നടത്തി സംസ്ഥാന ധനമന്ത്രി കെ എൻ ബാലഗോപാൽ. സംസ്ഥാനത്തിന്റെ സാമ്പത്തിക പ്രതിസന്ധി കേന്ദ്രത്തെ അറിയിച്ചുവെന്ന് കെ എൻ ബാലഗോപാൽ വ്യക്തമാക്കി. കിട്ടാനുള്ള 4500 കോടി ജിഎസ്ടി വിഹിതത്തിൽ ഉടൻ തീരുമാനം എടുക്കാമെന്ന് നിർമ്മലാ സീതാരമൻ ഉറപ്പു നൽകിയെന്നും അദ്ദേഹം പറഞ്ഞു.

ജിഎസ്ടി നഷ്ടപരിഹാരം നൽകുന്നത് നീട്ടണമെന്ന് ബാലഗോപാൽ നിർമ്മലാ സീതാരാമനോട് ആവശ്യപ്പെട്ടു. കാലാവധി അഞ്ച് വർഷം കൂടി നീട്ടണമെന്നാണ് കേരളം ആവശ്യപ്പെട്ടിരിക്കുന്നത്. മറ്റ് സംസ്ഥാനങ്ങളുടെ പിന്തുണയോടെ വിഷയം ജി എസ്ടി കൗൺസിലിൽ ഉയർത്താൻ കേരളം തീരുമാനിച്ചതായും കെ എൻ ബാലഗോപാൽ അറിയിച്ചു.

കിറ്റക്‌സ് വിവാദത്തെ കുറിച്ചു ബാലഗോപാൽ പ്രതികരിച്ചു. കിറ്റെക്‌സിനെതിരായ നിലപാട് സർക്കാർ സ്വീകരിച്ചിട്ടില്ലെന്നും വിവാദം ഉണ്ടായപ്പോൾ കിറ്റക്‌സിന്റെ ഓഹരി ഉയരുന്നതാണ് കണ്ടതെന്നും മന്ത്രി വിശദമാക്കി. 5% കടമെടുക്കാൻ സംസ്ഥാനം കേന്ദ്രത്തോട് അനുമതി തേടിയിട്ടുണ്ട്. പരമ്പരാഗത വ്യവസായ മേഖലയിൽ പ്രത്യേക പാക്കേജ് എന്ന ആവശ്യവും കേരളം ഉന്നയിച്ചു. പ്ലാന്റേഷൻ മേഖലയിൽ പ്രത്യേക പരിഗണനയും ആവശ്യപ്പെട്ടു.

കോവളം: വിഴിഞ്ഞം ക്രൂ ചേഞ്ചിങ് സെന്ററിന് ഇന്ന് ഒരു വയസ്. കോവിഡിന്റെ ഒന്നാം തരംഗത്തിൽ പ്രവർത്തനം തുടങ്ങിയ ക്രൂ ചേഞ്ചിംഗ് സെന്റർ വൈറസ് വ്യാപനത്തിന്റെ രണ്ടാംതരംഗത്തിനെയും അതിജീവിച്ച് വിജയകുതിപ്പ് തുടരുകയാണ്. കഴിഞ്ഞ ഒരു വർഷത്തിനുള്ളിൽ വിഴിഞ്ഞത്ത് 346 കപ്പലുകൾ നങ്കൂരമിട്ടു. 5544 പേർ വിഴിഞ്ഞം വഴി വരുകയും പോവുകയും ചെയ്തപ്പോൾ നാലു കോടിയോളം രൂപയുടെ വരുമാനമാണ് ലഭിച്ചത്.

ലോകത്തിലെ മൈനർ പോർട്ടുകളിൽ കുറഞ്ഞ സമയം കൊണ്ട് കൂടുതൽ കപ്പലുകൾ ക്രൂ ചേഞ്ചിങ് നടത്തിയ റെക്കോർഡാണ് വിഴിഞ്ഞം സ്വന്തമാക്കിയത്. 2020 ജൂലൈ 15 ന് പുലർച്ചെ എവർഗ്രീൻ കമ്പനിയുടെ കപ്പൽ ഭീമനായ എവർഗ്ലോവാണ് ആദ്യമായി വിഴിഞ്ഞം പുറംകടലിൽ നങ്കൂരമിട്ടത്. കോവിഡിനെ തുടർന്ന് മറ്റ് തുറമുഖങ്ങളിലൊന്നും ഇറങ്ങാനാകാതെ കുടുങ്ങിക്കിടന്ന ജീവനക്കാരുമായി വിഴിഞ്ഞത്തേക്ക് പിന്നീട് ധാരാളം കപ്പലുകളെത്തി. അന്തർ ദേശീയ ജലപാതയോട് ഏറെ അടുത്തു കിടക്കുന്നതും ചുരുങ്ങിയ സമയം കൊണ്ട് ക്രൂ ചേഞ്ചിങ് നടത്തി മടങ്ങാനായതും വിഴിഞ്ഞത്തേക്ക് എത്തുന്ന കപ്പലുകളുടെ എണ്ണം വർധിപ്പിച്ചു. രാവിലെ 11 മണിക്കാണ് വിഴിഞ്ഞം ക്രൂ ചേഞ്ചിങ് ഒന്നാം വാർഷിക ചടങ്ങ് ആഘോഷിക്കുന്നത്. തുറമുഖ വകുപ്പ് മന്ത്രി അഹമ്മദ് ദേവർ കോവിൽ, ശശിതരൂർ എം.പി. വിൻസെന്റ് എം.എൽ.എ. എന്നിവർ ചടങ്ങിൽ പങ്കെടുക്കും. മാരിടൈം ബോർഡ് ചെയർമാന്റെ നേതൃത്വത്തിലാണ് ചടങ്ങുകൾ നടക്കുന്നത്.

ന്യൂഡൽഹി: നിയമസഭാ കയ്യാങ്കളി കേസുമായി ബന്ധപ്പെട്ട് സംസ്ഥാന സർക്കാരിനെതിരെ രൂക്ഷ വിമർശനവുമായി സുപ്രീം കോടതി. തോക്കുമായെത്തിയാലും സഭയ്ക്ക് പരമാധികാരമെന്ന് പറയാമോയെന്ന് സർക്കാരിനോട് കോടതി ചോദിച്ചു. ഇക്കാര്യത്തിൽ സർക്കാർ വിശദീകരണം നൽകണമെന്ന് സുപ്രീം കോടതി ജസ്റ്റിസ് ഡി വൈ ചന്ദ്രചൂഡ് ആവശ്യപ്പെട്ടു.

കോടതിയിലും രൂക്ഷമായ വാദപ്രതിവാദങ്ങൾ നടക്കാറുണ്ട്. എന്നുകരുതി കോടതിയിലെ സാമഗ്രികൾ നശിപ്പിക്കുമോയെന്നും ജസ്റ്റിസ് ചന്ദ്ചൂഡ് ചോദിച്ചു. ജനാധിപത്യത്തിൻറെ ശ്രീകോവിലാണ് നിയമനിർമ്മാണ് സഭകൾ. സഭയിൽ അഭിപ്രായ പ്രകടനത്തിന് സ്വാതന്ത്ര്യമുണ്ടെന്ന കാര്യത്തിൽ തർക്കമില്ല. എം എൽ എമാർ തന്നെ സാമഗ്രികൾ നശിപ്പിക്കാൻ ശ്രമിക്കുന്നതിന് പിന്നിൽ എന്ത് പൊതുതാത്പര്യമാണെന്ന് സർക്കാർ വ്യക്തമാക്കണം. സർക്കാരിനെതിരെ രാഷ്ട്രീയ പ്രതിഷേധങ്ങൾ ഉണ്ടാവുക എന്നത് സ്വാഭാവികമാണ്. സഭയ്ക്കകത്ത് പ്രതിഷേധം നടക്കുമ്പോൾ അംഗങ്ങൾക്ക് പരിരക്ഷയുണ്ടെന്നും കോടതി വിശദമാക്കി. കേസ് അവസാനിപ്പിക്കാൻ സർക്കാരിന് അധികാരമുണ്ടെന്നും സർക്കാർ അഭിഭാഷകന്റെ വാദത്തിന് എന്നാൽ നിയമത്തിന്റെ ഏത് വ്യവസ്ഥയിലാണ് സർക്കാരിന് കേസ് അവസാനിപ്പിക്കാൻ അധികാരമുളളതെന്ന് കോടതി മറുപടി നൽകി.

നിയമസഭാ കയ്യാങ്കളി കേസിൽ അഴിമതിക്കാരനായ മന്ത്രി എന്ന മുൻ പ്രയോഗം സംസ്ഥാന സർക്കാർ ഇന്ന് സുപ്രീം കോടതിയിൽ തിരുത്തിയിരുന്നു. സർക്കാരിനെതിരായ അഴിമതിയിലാണ് പ്രതിപക്ഷം സഭയിൽ പ്രതിഷേധിച്ചതെന്നാണ് സർക്കാർ ഇന്ന് കോടതിയെ അറിയിച്ചത്. സഭയിൽ വനിതാ അംഗങ്ങളെ അപമാനിക്കുന്ന നടപടിയുണ്ടായെന്നും സർക്കാർ കോടതിയിൽ വിശദീകരിച്ചു.

കൊച്ചി: സംസ്ഥാന സർക്കാരിനെതിരെ വിമർശനവുമായി ഹൈക്കോടതി. സംസ്ഥാനത്ത് ആൾക്കൂട്ട നിയന്ത്രണം ഫലപ്രദമായി നടപ്പാക്കുന്നില്ലെന്ന് ഹൈക്കോടതി വ്യക്തമാക്കി. കടകൾ തുറക്കുന്ന കാര്യത്തിൽ സർക്കാർ നയപരമായ തീരുമാനമെടുക്കേണ്ട സമയമായെന്നും കോടതി പറഞ്ഞു.

വസ്ത്ര വിൽപ്പനശാലകൾ തുറക്കാൻ അനുമതി നൽകണമെന്ന് ആവശ്യപ്പെട്ടുള്ള ഹർജി പരിഗണിക്കവെയാണ് ഹൈക്കോടതിയുടെ പരാമർശം. പൊതുസ്ഥലങ്ങളിൽ സാമൂഹിക അകലം പാലിക്കപ്പെടുന്നില്ലെന്ന് കോടതി വിമർശിച്ചു. ജനങ്ങൾ മാസ്‌ക് ധരിക്കുന്നുവെന്നത് മാത്രമാണ് ആകെ പാലിക്കപ്പെടുന്നതെന്നും കോടതി നിരീക്ഷിച്ചു.

വിദഗ്ധ സമിതിയുടെ ശുപാർശയുടെ അടിസ്ഥാനത്തിലാണ് തീരുമാനങ്ങളെടുക്കുന്നതെന്നാണ് സർക്കാർ കോടതിയെ അറിയിച്ചിരിക്കുന്നത്. ഹർജിയിൽ അടുത്ത വ്യാഴാഴ്ചക്കകം നിലപാടറിയിക്കണമെന്നാണ് കോടതി സർക്കാരിന് നൽകിയിരിക്കുന്ന നിർദ്ദേശം.

കൊച്ചി: വളർത്തു മൃഗങ്ങൾക്കും കന്നുകാലികൾക്കും ലൈസൻസ് എടുക്കണം. ഹൈക്കോടതിയാണ് ഇതുസംബന്ധിച്ച ഉത്തരവ് പുറപ്പെടുവിച്ചത്. ആറു മാസത്തിനകം തദ്ദേശ സ്ഥാപനങ്ങളിൽ രജിസ്റ്റർ ചെയ്ത് വളർത്തു മൃഗങ്ങൾക്ക് ലൈസൻസ് എടുക്കണമെന്നാണ് ഹൈക്കോടതിയുടെ ഉത്തരവ്. ലൈസൻസ് എടുക്കണമെന്ന് വ്യക്തമാക്കി പഞ്ചായത്തുകളും നഗരസഭകളും ഉടൻ നോട്ടീസിറക്കണമെന്നും കോടതി നിർദ്ദേശിച്ചു. ഇക്കാര്യത്തിൽ സർക്കാർ നിർദേശം നൽകണമെന്നും ഹൈക്കോടതി വ്യക്തമാക്കി.

തിരുവനന്തപുരം അടിമലത്തുറ ബീച്ചിൽ ബ്രൂണോ എന്ന വളർത്തുനായയെ അടിച്ചു കൊന്ന സംഭവത്തിൽ ഹൈക്കോടതി സ്വമേധയാ എടുത്ത ഹർജിയിലാണ് ഉത്തരവ് പുറപ്പെടുവിച്ചിരുന്നത്. സംസ്ഥാനത്തെ മൃഗക്ഷേമ ബോർഡ് പുനഃസംഘടിപ്പിക്കുമ്പോൾ ജംബോ സമിതി വേണ്ടെന്നും കോടതി നിർദ്ദേശിക്കുന്നു. ജസ്റ്റിസ് എ.കെ. ജയശങ്കരൻ നമ്പ്യാർ, ജസ്റ്റിസ് പി. ഗോപിനാഥ് എന്നിവരുൾപ്പെട്ട ബെഞ്ചാണ് ഹർജി പരിഗണിച്ചത്.