General (Page 1,484)

തിരുവനന്തപുരം: സ്ത്രീധനത്തിനെതിരെ ഉപവാസ സമരം നടത്തി ഗവർണർ ആരിഫ് മുഹമ്മദ് ഖാൻ. ബുധനാഴ്ച്ച രാവിലെ എട്ടുമണിക്ക് രാജ്ഭവനിൽ ആരംഭിച്ച ഉപവാസ സമരം വൈകിട്ട് ആറു മണിക്ക് തൈക്കാട് ഗാന്ധിഭവനിൽ നാരങ്ങാ നീര് കുടിച്ചാണ് ഗവർണർ അവസാനിപ്പിച്ചത്. ഒന്നരമണിക്കൂറിലേറെ ന്രെ ഗാന്ധിഭവനിലും ഗവർണർ സത്യാഗ്രഹം തുടർന്നു. സ്ത്രീധനത്തിനെതിരെയുള്ള സമരത്തിനു പിന്നിൽ രാഷ്ട്രീയമില്ലെന്ന് ഗവർണർ അറിയിച്ചു. ഉപവാസ സമരത്തിന്റെ സമാപന ചടങ്ങിലാണ് അദ്ദേഹം ഇക്കാര്യം വ്യക്തമാക്കിയത്.

സത്യാഗ്രഹത്തിന്റെ കാര്യം മുഖ്യമന്ത്രിയോട് നേരത്തെ പറഞ്ഞിരുന്നു. പ്രതിപക്ഷത്തെ പ്രധാന നേതാക്കളും പിന്തുണ അറിയിച്ചിട്ടുണ്ട്. രാഷ്ട്രീയഭേദമെന്യേ എല്ലാവരും ഒറ്റക്കെട്ടായി പോരാടേണ്ട വിഷയമാണിത്. മുഖ്യമന്ത്രിയോട് ഇതേക്കുറിച്ച് സംസാരിച്ചപ്പോൾ നല്ല പിന്തുണയാണ് ലഭിച്ചത്. ഇത്തരം കാര്യങ്ങൾ പ്രോത്സാഹിപ്പിക്കണമെന്ന് അദ്ദേഹം പറഞ്ഞു. മന്ത്രി മുഹമ്മദ് റിയാസും മുൻ മുഖ്യമന്ത്രി ഉമ്മൻ ചാണ്ടിയും ഫോണിൽ ബന്ധപ്പെട്ട് പിന്തുണ അറിയിച്ചെന്നും അദ്ദേഹം പറഞ്ഞു.

സ്ത്രീധനം വാങ്ങുന്നവരുടെ വിദ്യാഭ്യാസ സർട്ടിഫിക്കറ്റുകൾ തിരിച്ചെടുക്കണമെന്ന് സർവകലാശാലാ ചാൻസലർമാരോട് ഗവർണർ ആവശ്യപ്പെട്ടു. സ്ത്രീധന വിവാഹങ്ങളിൽ പങ്കെടുക്കാതിരിക്കാനുള്ള ധൈര്യം ജനപ്രതിനിധികൾ കാട്ടണം. വിദ്യാഭ്യാസപരമായും സാമൂഹികമായും സാംസ്‌കാരികമായും മുൻപന്തിയിൽ നിൽക്കുന്ന കേരള സമൂഹത്തിന് വർധിച്ചുവരുന്ന സ്ത്രീപീഡനങ്ങൾ ഭൂഷണമല്ലെന്നും അദ്ദേഹം വ്യക്തമാക്കി.

സാംസ്‌കാരികമായും ഭരണഘടനാപരമായും നിയമപരമായും സ്ത്രീധനം വാങ്ങുന്നത് തെറ്റാണ്. മൂല്യങ്ങളുടെ അധഃപതനത്തെയാണ് ഇത് സൂചിപ്പിക്കുന്നത്. കേരളത്തിലെ സർവകലാശാലകളിൽ വിദ്യാഭ്യാസ സർട്ടിഫിക്കറ്റുകൾ നൽകുന്ന വേളയിൽ തന്നെ വിദ്യാർഥികളിൽ നിന്ന് തങ്ങൾ സ്ത്രീധനം വാങ്ങുകയോ കൊടുക്കുകയോ ചെയ്യില്ലെന്ന സത്യവാങ്മൂലം വാങ്ങണം. ഇത് പാലിക്കാത്തവരുടെ സർട്ടിഫിക്കറ്റുകൾ റദ്ദാക്കണം. ഇക്കാര്യം ആവശ്യപ്പെട്ട് സർവകലാശാല വൈസ് ചാൻസലർമാർക്ക് കത്തയക്കുമെന്നും ഗവർണർ വിശദമാക്കി. വിദ്യകൊണ്ട് നേടേണ്ടത് വിദ്യാഭ്യാസമാണ്. യോഗ്യതാ സർട്ടിഫിക്കറ്റുകൾ വിവാഹ കമ്പോളത്തിൽ മൂല്യം ഉയർത്താനല്ല ഉപയോഗിക്കേണ്ടതെന്നും ഗവർണർ അദ്ദേഹം ചൂണ്ടിക്കാട്ടി.

തങ്ങളെ വിവാഹത്തിന് ക്ഷണിക്കുമ്പോൾ ആ വിവാഹത്തിൽ സ്ത്രീധനം വാങ്ങുന്നുണ്ടോ എന്ന് ജനപ്രതിനിധികൾ പരിശോധിക്കണം. അങ്ങനെ ചെയ്യുന്നുണ്ടെന്നു കണ്ടാൽ അവർ അത് പൊതുസമൂഹത്തിന്റെ ശ്രദ്ധയിൽ കൊണ്ടുവരികയും അത്തരം വിവാഹങ്ങളിൽ നിന്ന് ഒഴിഞ്ഞുനിൽക്കുകയും വേണം. അതിനുള്ള ധൈര്യം ജനപ്രതിനിധികൾ കാട്ടണമെന്ന് അദ്ദേഹം ആവശ്യപ്പെട്ടു.

പെൺകുട്ടികൾ സ്ത്രീധനത്തിനെതിരെ ശക്തമായി മുന്നോട്ടുവരണം. സ്ത്രീധനം ആവശ്യപ്പടുന്ന വിവാഹം വേണ്ടെന്നു പറയാൻ പെൺകുട്ടികൾ തയാറാകണം. അമ്മമാർ മക്കളെ സ്ത്രീധനം വാങ്ങുന്നതിൽ നിന്നും പിന്തിരിപ്പിക്കണം. സമൂഹത്തിൽ ബോധവത്കരണമുണ്ടാകണം. അതിനായി ജനങ്ങൾ തന്നെ മുന്നോട്ട് വരണമെന്നും അദ്ദേഹം കൂട്ടിച്ചേർത്തു.

കൊച്ചി: കേരള ഹൈക്കോടതി ഇന്ന് ഒരു അത്യപൂർവ്വ വാദത്തിന് സാക്ഷ്യം വഹിക്കുകയാണ്. ഹൈക്കോടതിയുടെ ചരിത്രത്തിൽ ആദ്യമായി ഒരു കന്യാസ്ത്രീ സ്വന്തം കേസ് വാദിക്കാനൊരുങ്ങുകയാണ്. സിസ്റ്റർ ലൂസി കളപ്പുരയാണ് ഹൈക്കോടതിയിൽ നൽകിയ ഹർജിയിൽ സ്വയം വാദം നടത്തുന്നത്. കോൺവന്റിൽ നിന്നും പുറത്താക്കുന്നതിനെതിരെ പൊലീസ് സംരക്ഷണം നൽകി കീഴ്‌ക്കോടതി നൽകിയ വിധി നടപ്പാക്കുന്നില്ലെന്ന് ചൂണ്ടിക്കാട്ടിയാണ് ലൂസി കളപ്പുര ഹർജി സമർപ്പിച്ചിരിക്കുന്നത്.

കേസിൽ ഹാജരാകേണ്ടിയിരുന്ന സീനിയർ അഭിഭാഷകൻ വക്കാലത്ത് ഒഴിഞ്ഞതോടെയാണ് സ്വയം വാദിക്കാൻ സിസ്റ്റർ ലൂസി കളപ്പുര തീരുമാനിച്ചത്. സാമ്പത്തിക ബാധ്യതയും ഇത്തരമൊരു തീരുമാനമെടുക്കാൻ കാരണമായെന്ന് ലൂസി കളപ്പുര വ്യക്തമാക്കി. നിസഹായരായി സ്ത്രീകൾ തെരുവിലേക്ക് വലിച്ചെറിയപ്പെടുന്ന അവസ്ഥയാണുള്ളതെന്നും ലൂസി കളപ്പുര പറഞ്ഞു. തന്റെ കേസടക്കം അതിന് ഉദാഹരണമാണെന്നും ലൂസി കളപ്പുര പറയുന്നു.

കന്യാസ്ത്രീ എന്ന സംരക്ഷണത്തിൽ നിന്നാണ് സഭാ നേതൃത്വം തന്നെ പുറത്തേക്ക് തള്ളുന്നത്. ഈ വ്യവസ്ഥിതിക്കെതിരെ അതിന്റെ ഇര തന്നെ വാദിക്കുകയും കോടതിയിൽ തന്റെ നിലപാട് പറയുകയും ചെയ്യുകയാണ്. തന്റെ വക്കാലത്ത് ഏറ്റെടുക്കാൻ അഭിഭാഷകർ തയ്യാറാവാത്ത ഒരു സാഹചര്യം തന്നെയുണ്ടായെന്നും ലൂസി കളപ്പുര ആരോപിച്ചു.

കോഴിക്കോട്: വ്യാപാരികളുമായി ചർച്ച നടത്തി സർക്കാർ. വ്യാപാരികളോടുള്ള സർക്കാർ നിലപാടിൽ പ്രതിഷേധം കനത്തതോടെയാണ് സർക്കാർ ചർച്ച നടത്താൻ തീരുമാനിച്ചത്. കോഴിക്കോട് കളക്ടറേറ്റിൽ വെച്ചായിരുന്നു ചർച്ച.

കോഴിക്കോട് ജില്ലാ കളക്ടർ, വ്യാപാര സംഘടനാ പ്രതിനിധികൾ തുടങ്ങിയവർ ചർച്ചയിൽ പങ്കെടുത്തു. കടകൾ തുറക്കണമെന്നാവശ്യപ്പെട്ട് സിപിഎം അനുകൂല സംഘടനയായ വ്യാപാരി വ്യവസായി സമിതിയടക്കം സമരത്തിനിറങ്ങിയ സാഹചര്യം കൂടി കണക്കിലെടുത്താണ് സർക്കാർ ചർച്ചയ്ക്ക് തയ്യാറായതെന്നാണ് വിവരം. മുൻ എംഎൽഎയും വ്യാപാരി വ്യവസായി സമിതി പ്രസിഡന്റുമായ വി.കെ.സി.മമ്മദ് കോയയുടെ നേതൃത്വത്തിൽ കളക്ടറേറ്റിന് മുന്നിൽ സമരം നടന്നുവരികയാണ്.

സംസ്ഥാനത്തെ കോവിഡ് നിയന്ത്രണം അശാസ്ത്രീയമാണെന്ന് വി കെ സി മമ്മദ് കോയ വ്യക്തമാക്കി. വ്യാപാരികളുടെ പ്രശ്‌നങ്ങൾ ആരും കണക്കിലെടുക്കുന്നില്ലെന്നും കച്ചവടക്കാരുടെ പ്രശ്‌നങ്ങൾ കേൾക്കാൻ സർക്കാർ തയ്യാറാവണമെന്നും അദ്ദേഹം ആവശ്യപ്പെട്ടു. എല്ലാം അടച്ചിടാനുള്ള വിദഗ്ദ്ധ സമിതി തീരുമാനത്തിൽ പ്രായോഗികമായ പ്രശ്‌നങ്ങളുണ്ട്. കച്ചവടക്കാർ വർഷങ്ങളായി പ്രതിസന്ധി നേരിടുകയാണ്. രോഗം പടരാതിരിക്കാൻ വേണ്ടി ഇതുവരെ അവർ സഹകരിച്ചു. ഇനിയും ഈ നിലയിൽ മുന്നോട്ട് പോകാനാവില്ലെന്നും അദ്ദേഹം കൂട്ടിച്ചേർത്തു.

ന്യൂഡൽഹി: വ്യാഴാഴ്ച്ച കടകൾ തുറക്കുമെന്ന വ്യാപാരികളുടെ തീരുമാനത്തിനെതിരെ മുഖ്യമന്ത്രി പിണറായി വിജയൻ. കടകൾ തുറക്കണം എന്നുതന്നെയാണ് എല്ലാവരുടെയും ആഗ്രഹമെന്നും പക്ഷേ, സാഹചര്യം അതിന് അനുവദിക്കുന്നില്ലെന്നതാണ് വസ്തുതയെന്നും മുഖ്യമന്ത്രി പറഞ്ഞു. പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ച്ചയ്ക്ക് ശേഷം ഡൽഹിയിൽ മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.

വ്യാപാരികളുടെ വികാരം മനസ്സിലാക്കുകയും സർക്കാർ അവരുടെ ഒപ്പം നിൽക്കുകയും ചെയ്യുന്നു. എന്നാൽ വ്യാപാരികൾ മറ്റൊരു രീതിയിലേക്ക് പോകരുതെന്ന് അദ്ദേഹം അഭ്യർത്ഥിച്ചു. അങ്ങനെയൊരു നിലയുണ്ടായാൽ നേരിടേണ്ട രീതിയിൽ നേരിടുമെന്നാണ് മുഖ്യമന്ത്രി മുന്നറിയിപ്പ് നൽകുന്നത്. സർക്കാർ പ്രഖ്യാപിക്കുന്ന ഇളവിന് കാത്തുനിൽക്കില്ലെന്നും വ്യാഴാഴ്ച കടകൾ തുറക്കുമെന്ന വ്യാപാരികളുടെ നിലപാടിനെതിരെയായിരുന്നു അദ്ദേഹത്തിന്റെ പ്രതികരണം.

എല്ലാ ദിവസവും കടകൾ തുറക്കാൻ അനുവദിക്കില്ല. സാഹചര്യത്തിനനുസരിച്ച് പരമാവധി ഇളവുകൾ സർക്കാർ നൽകുന്നുണ്ട്. നിയന്ത്രണങ്ങൾ മനുഷ്യ ജീവൻ സംരക്ഷിക്കുന്നതിന് വേണ്ടിയാണ്. എ, ബി, സി വിഭാഗങ്ങളിലുള്ള, നിലവിൽ പ്രവർത്തിക്കാൻ അനുമതിയുള്ള കടകൾക്ക് എട്ട് മണി വരെ പ്രവർത്തനാനുമതി നൽകുമെന്നും ഇലക്ട്രോണിക്‌സ് കടകൾ കൂടുതൽ ദിവസങ്ങളിൽ തുറക്കാൻ അനുവദിക്കുമെന്നും അദ്ദേഹം പറഞ്ഞു. സംസ്ഥാനത്ത് തിങ്കൾ മുതൽ വെള്ളി വരെ ബാങ്കുകളിൽ പൊതുജനങ്ങൾക്ക് പ്രവേശനം അനുവദിക്കും. നിയന്ത്രണം ഏർപ്പെടുത്തേണ്ട സ്ഥലങ്ങളിൽ മൈക്രോ കണ്ടെയ്ൻമെന്റ് സോണുകൾ പ്രഖ്യാപിക്കാൻ കളക്ടർമാർക്ക് അനുമതി നൽകാൻ തീരുമാനിച്ചുവെന്നും മുഖ്യമന്ത്രി വ്യക്തമാക്കി.

സംസ്ഥാനത്ത് വ്യാഴം, വെള്ളി ദിവസങ്ങളിൽ പരിശോധന വർധിപ്പിക്കാനും സർക്കാർ തീരുമാനിച്ചു. രണ്ടരലക്ഷം സാമ്പിൾ വരെ പരിശോധിക്കാനാണ് തീരുമാനം. സംസ്ഥാനത്ത് ടിപിആർ അനുസരിച്ചുള്ള നിയന്ത്രണങ്ങൾ തുടരുമെന്നും പൊതുജനം സഹകരിക്കണമെന്നും അദ്ദേഹം അഭ്യർത്ഥിച്ചു.