General (Page 1,422)

ബംഗളൂരു: മലയാളി വിദ്യാർഥികൾ പഠിച്ചിരുന്ന കോലാർ ഗോൾഡ് ഫീൽഡിലെ ഹൊറമാവിലുള്ള ക്രിസ്ത്യൻ നഴ്‌സിംഗ് കോളേജിലെ 34 വിദ്യാർത്ഥികൾക്ക് കോവിഡ്. വിദ്യാർത്ഥികൾക്ക് കോവിഡ് സ്ഥിരീകരിച്ച സാഹചര്യത്തിൽ കോളേജ് അടച്ചു പൂട്ടി. 300 വിദ്യാർത്ഥികളാണ് കോളേജിൽ ആകെയുള്ളത്. രോഗബാധിതരായ വിദ്യാർത്ഥികളെ ഐസൊലേഷൻ കേന്ദ്രങ്ങളിലേക്ക് മാറ്റിയിട്ടുണ്ട്.

34 പേർക്ക് രോഗം സ്ഥിരീകരിച്ചത് ആശങ്ക വർദ്ധിപ്പിക്കുന്നുണ്ടെന്ന് ആരോഗ്യ മന്ത്രി ഡോ. കെ. സുധാകർ വ്യക്തമാക്കി. എല്ലാ വിദ്യാഭ്യാസ കോളേജുകളും ജാഗ്രത പാലിക്കണമെന്ന് അദ്ദേഹം നിർദേശിച്ചു. എല്ലാ സ്‌കൂളുകളും കോളേജുകളും കോവിഡ് സുരക്ഷാ മാനദണ്ഡങ്ങൾ പാലിക്കേണ്ടത് നിർബന്ധമാണെന്നും അദ്ദേഹം അറിയിച്ചു. രാജ്യത്തുടനീളമുള്ള നിരവധി വിദ്യാർഥികൾ സംസ്ഥാനത്തെ വിവിധ കോളേജുകളിലായി പഠിക്കുന്നുണ്ട്. സംസ്ഥാനത്ത് 800 ഓളം നഴ്‌സിംഗ് കോളേജുകളുണ്ട്. ഇവിടങ്ങളിൽ നിലവിൽ രോഗം സ്ഥിരീകരിച്ച വിദ്യാർഥികളിൽ കൂടുതൽ പേരും കേരളത്തിൽ നിന്നും പശ്ചിമ ബംഗാളിൽ നിന്നുമുള്ളവരാണ്. ഇവരുടെ സാമ്പിളുകൾ ജീനോമിക് സീക്വൻസിംഗിനും അയയ്ക്കുമെന്ന് മന്ത്രി കൂട്ടിച്ചേർത്തു.

കോളേജ് അടുത്ത് എട്ട് ദിവസം വരെ അടച്ചിടും. വിദ്യാർഥികളിൽ വീണ്ടും പരിശോധന നടത്തിയ ശേഷം ക്ലാസുകൾ പുനരാരംഭിക്കൂ. കോളേജിനു ചുറ്റുമുള്ള പ്രദേശത്തെ മൈക്രോ കണ്ടെയ്ൻമെന്റ് സോണായി പ്രഖ്യാപിക്കുകയും ചെയ്തു. കോളേജിന് ചുറ്റുമുള്ള 700 മുതൽ 800 മീറ്ററിനുള്ളിൽ താമസിക്കുന്നവരെ കോവിഡ് പരിശോധനയ്ക്ക് വിധേയരാക്കാനാണ് സർക്കാരിന്റെ തീരുമാനം.

മുസാഫർനഗർ: കാർഷിക നിയമങ്ങൾക്ക് എതിരെ കർഷക സംഘടനകൾ പ്രഖ്യാപിച്ച ഭാരത് ബന്ദ് മാറ്റി വെച്ചു. ഈ മാസം 27 ലേക്കാണ് ഭാരത് ബന്ദ് മാറ്റിവെച്ചത്. 25 ന് ഭാരത് ബന്ദ് നടത്തുമെന്നാണ് നേരത്തെ കർഷക സംഘടനകൾ അറിയിച്ചിരുന്നത്. ഉത്തർപ്രദേശിലെ മുസാഫർനഗറിൽ ചേർന്ന മഹാപഞ്ചായത്തിലാണ് ഇതുസംബന്ധിച്ച തീരുമാനമായത്. സംയുക്ത കിസാൻ മോർച്ചയാണ് ബന്ദ് പ്രഖ്യാപിച്ചത്. ഇടത് സംഘടനകൾ ബന്ദിന് പിന്തുണ പ്രഖ്യാപിച്ചിട്ടുണ്ട്.

ഉത്തർപ്രദേശ്, ഉത്തരാഖണ്ഡ് തെരഞ്ഞെടുപ്പുകളിൽ ബിജെപിയെ അധികാരത്തിൽ നിന്ന് പുറത്താക്കുമെന്ന് മഹാപഞ്ചായത്തിൽ തീരുമാനിച്ചതായി സംയുക്ത കിസാൻ മോർച്ച കിസാൻ സഭ പ്രസിഡന്റ് അശോക് ധാവൽ അറിയിച്ചു.

പതിനായിരക്കണക്കിന് കർഷകരാണ് മുസാഫർനഗറിൽ നടന്ന മഹാപഞ്ചായത്തിൽ പങ്കെടുക്കാനെത്തിയത്. മുസാഫർനഗറിൽ മഹാപഞ്ചായത്തിൽ പങ്കെടുക്കാനെത്തിയ കർഷകരെ നാട്ടുകാർ മധുരം വിതരണം ചെയ്താണ് സ്വീകരിച്ചത്. മഹാപഞ്ചായത്ത് കണക്കിലെടുത്ത് 8,000 പൊലീസുകാരെയാണ് ഉത്തർപ്രദേശ് സർക്കാർ വിന്യസിച്ചത്.

ലക്‌നൗ: ബിജെപിക്കെതിരെ രാഷ്ട്രീയ പ്രഖ്യാപനവുമായി മുസഫർ നഗറിലെ കിസാൻ മഹാപഞ്ചായത്ത്. ഉത്തർപ്രദേശ് ഉൾപ്പെടെ അഞ്ച് സംസ്ഥാനങ്ങളിൽ നിയമസഭാ തെരഞ്ഞെടുപ്പ് അടുത്തിരിക്കെയാണ് കിസാൻ മഹാപഞ്ചായത്തിന്റെ നടപടി. ഉത്തർപ്രദേശിൽ നിന്നും ബിജെപിയെ കെട്ടുകെട്ടിക്കുമെന്ന് ബികെയു നേതാവ് രാകേഷ് ടിക്കായത്ത് അറിയിച്ചു.

വിവാദ നിയമങ്ങളുമായി മുന്നോട്ടു പോകുന്ന ബിജെപിയെ തോൽപ്പിക്കാൻ കിസാൻ മഹാപഞ്ചായത്തിൽ നേതാക്കൾ ആഹ്വാനം ചെയ്തു. അതേസമയം കാർഷിക നിയമങ്ങൾക്ക് എതിരെ കർഷക സംഘടനകൾ പ്രഖ്യാപിച്ച ഭാരത് ബന്ദ് ഈ മാസം 27 ലേക്ക് മാറ്റി വെച്ചു. 25 ന് ഭാരത് ബന്ദ് നടത്തുമെന്നാണ് നേരത്തെ കർഷക സംഘടനകൾ നേരത്തെ അറിയിച്ചിരുന്നത്. ഇടതു സംഘടനകൾ ബന്ദിന് പിന്തുണ പ്രഖ്യാപിച്ചിട്ടുണ്ട്.

കേരളം ഉൾപ്പെടെ പതിനഞ്ച് സംസ്ഥാനങ്ങളിലെ കർഷകരാണ് കാർഷിക നിയമങ്ങൾക്കും ബി ജെ പി സർക്കാരുകൾക്കുമെതിരെ പ്രതിഷേധവുമായി മുസഫർ നഗറിലേക്ക് എത്തിയത്. കലാപം നടന്ന മണ്ണിൽ കൂട്ടായ്മ നടത്തിയതിലുടെ ബിജെപിക്ക് നൽകുന്നത് ശക്തമായ സന്ദേമാണെന്ന് കർഷക സംഘടനകൾ പ്രതികരിച്ചു. നിയമസഭ തിരഞ്ഞെടുപ്പുകളിൽ ബിജെപിയെ തോൽപിക്കുക എന്ന ലക്ഷ്യത്തോടെ മിഷൻ യുപി, മിഷൻ പഞ്ചാബ്, മിഷൻ ഉത്തരാഖണ്ഡ് എന്നീ പദ്ധതികളും സംഘടന മഹാപഞ്ചായത്തിൽ പ്രഖ്യാപിച്ചു. ബികെയു നേതാക്കളായ രാകേഷ് ടിക്കായത്ത്, നരേഷ് ടിക്കായത്ത്, ദർശൻ പാൽ തുടങ്ങിയവർ ഉൾപ്പെടെയുള്ള നേതാക്കൾ മഹാ പഞ്ചായത്തിൽ പങ്കെടുക്കാൻ എത്തി. പതിനായിരക്കണക്കിന് കർഷകരാണ് മുസാഫർനഗറിൽ നടന്ന മഹാപഞ്ചായത്തിൽ പങ്കെടുക്കാനെത്തിയത്. മുസാഫർനഗറിൽ മഹാപഞ്ചായത്തിൽ പങ്കെടുക്കാനെത്തിയ കർഷകരെ നാട്ടുകാർ മധുരം വിതരണം ചെയ്താണ് സ്വീകരിച്ചത്. മഹാപഞ്ചായത്ത് കണക്കിലെടുത്ത് 8,000 പൊലീസുകാരെയാണ് ഉത്തർപ്രദേശ് സർക്കാർ വിന്യസിച്ചത്.

കർഷക സമരത്തെ പിന്തുണച്ച് ബിജെപി എംപി വരുൺ ഗാന്ധി രംഗത്തെത്തിയിട്ടുണ്ട്. കർഷകർ നമ്മുടെ ചോരയും മാംസവുമാണെന്ന് വരുൺ ഗാന്ധി പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം. അവരുടെ പ്രശ്‌നങ്ങൾ പരിഹരിക്കും വരെ ചർച്ചകൾ തുടരണമെന്നും വരുൺ ഗാന്ധി ആവശ്യപ്പെട്ടിരുന്നു. മഹാപഞ്ചായത്തിന്റെ ദൃശ്യങ്ങൾ പങ്കുവെച്ചുകൊണ്ടാണ് അദ്ദേഹം ഇക്കാര്യം വ്യക്തമാക്കിയിരിക്കുന്നത്.