General (Page 1,407)

ന്യൂഡൽഹി: വിവിഐപികളുടെ സുരക്ഷയ്ക്കായി വനിതാ സുരക്ഷാ ഗാർഡുകളെ നിയമിക്കാനൊരുങ്ങി സിആർപിഎഫ്. ചരിത്രത്തിലാദ്യമായി സെൻട്രൽ റിസേർവ് പോലീസ് ഫോഴ്സ് ഇത്തരമൊരു തീരുമാനം നടപ്പിലാക്കാനൊരുങ്ങുന്നത്. 33 വനിതാ ഉദ്യോഗസ്ഥർ അടങ്ങുന്ന ആദ്യ ബാച്ചിന്റെ 10 ആഴ്ച നീണ്ടു നിൽക്കുന്ന പരിശീലനം ഉടൻ തന്നെ ആരംഭിക്കുമെന്നാണ് വിവരം.

കേന്ദ്ര ആഭ്യന്തര മന്ത്രാലയം ഇക്കാര്യത്തിൽ അനുമതി നൽകി ദിവസങ്ങൾക്കുള്ളിൽ സുരക്ഷാ ജീവനക്കാരുടെ തെരഞ്ഞെടുപ്പ് പൂർത്തിയാക്കിയിരിക്കുകയാണ് സിആർപിഎഫ്. വനിതാ ഉദ്യോഗസ്ഥരുടെ ശക്തി വർദ്ധിപ്പിക്കുന്നതിനായി ഒരു കർമ്മ പദ്ധതി സിആർപിഎഫ് സമർപ്പിച്ചിട്ടുണ്ടെന്നാണ് വിവരം. തുടക്കത്തിൽ 6 പ്ലാറ്റൂൺ വനിതാ ഉദ്യോഗസ്ഥർക്കാണ് പരിശീലനം നൽകുക. കേന്ദ്ര ആഭ്യന്തര മന്ത്രി അമിത് ഷാ, ഉയർന്ന കോൺഗ്രസ് നേതാക്കളായ രാഹുൽ ഗാന്ധി, സോണിയാ ഗാന്ധി, പ്രിയങ്ക ഗാന്ധി തുടങ്ങി ഉന്നത ശ്രേണിയിലുള്ള നിരവധി വ്യക്തികൾക്ക് സിആർപിഎഫാണ് സുരക്ഷ നൽകുന്നത്.

പശ്ചിമ ബംഗാൾ നിയമസഭാ തിരഞ്ഞെടുപ്പിനോട് അനുബന്ധിച്ച് ഉണ്ടായ ആക്രമണങ്ങൾ ഉണ്ടായ സാഹചര്യത്തിലാണ് ഉത്തർപ്രദേശ് തിരഞ്ഞെടുപ്പിന് മുൻപ് വിവിഐപികളെ സംരക്ഷിക്കുന്നതിന് വനിതകളെ ജോലിയ്ക്ക് പ്രവേശിപ്പിക്കുന്നതിന് മുൻഗണന നൽകിയിരുന്നതെന്നാണ് വിവരം. സിആർപിഎഫുമായി ചേർന്ന് നിലവിൽ, രാജ്യത്തെ ഉയർന്ന ശ്രേണിയിലുള്ള വ്യക്തികൾക്ക് സംരക്ഷണം നൽകാനുള്ള പദ്ധതി ആവിഷ്‌കരിച്ചതായാണ് ഉന്നത വൃത്തങ്ങൾ വ്യക്തമാക്കുന്നത്.

ന്യൂഡൽഹി: യൂട്യൂബ് വഴി തനിക്ക് ലഭിക്കുന്ന വരുമാനം വെളിപ്പെടുത്തി കേന്ദ്ര റോഡ്-ഗതാഗത വകുപ്പ് മന്ത്രി നിതിൻ ഗഡ്കരി. മാസം തോറും നാലു ലക്ഷം രൂപയാണ് അദ്ദേഹത്തിന് യൂട്യൂബ് വഴി റോയൽറ്റിയായി ലഭിക്കുന്നത്. കോവിഡ് മഹാമാരിക്ക് ശേഷം ആളുകളുടെ സോഷ്യൽ മീഡിയ ഉപയോഗം വർധിച്ചുവെന്നും ഈ സമയത്ത് താൻ ആരംഭിച്ച ലെക്ചർ വീഡിയോകൾക്ക് മികച്ച പ്രേക്ഷകരെ ലഭിച്ചുവെന്നും അദ്ദേഹം പറഞ്ഞു.

കോവിഡ് കാലത്ത് താൻ രണ്ട് കാര്യങ്ങളാണ് തുടങ്ങിയത്. ഒരു പാചകക്കാരനായി വീട്ടിൽ തന്നെ ഭക്ഷണം പാചകം ചെയ്യാൻ തുടങ്ങി. വീഡിയോ കോൺഫറൻസ് വഴി ആളുകൾക്ക് ക്ലാസുകൾ നൽകി. ഓൺലൈനായി 950 ലെക്ചറുകൾ എടുത്തു. രണ്ട് വിദേശ സർവകലാശാലകളിലെ കുട്ടികൾക്കും ക്ലാസെടുത്തു. അവയെല്ലാം യൂട്യൂബിൽ അപ്ലോഡ് ചെയ്തുവെന്നും അദ്ദേഹം വ്യക്തമാക്കി. യൂട്യൂബിലെ തന്റെ കാണികളുടെ എണ്ണം വർധിച്ചു. അതുകൊണ്ടുതന്നെ യൂട്യൂബ് ഇപ്പോൾ തനിക്ക് മാസം നാല് ലക്ഷം രൂപ റോയൽറ്റിയായി നൽകുന്നുണ്ടെന്ന് അദ്ദേഹം വിശദീകരിച്ചു.

ഡൽഹി – മുംബൈ എക്‌സ്പ്രസ് വേയുടെ പുരോഗതി വിലയിരുത്തിയ ശേഷം ബറുച്ചിൽ സംസാരിക്കവെയാണ് അദ്ദേഹം ഇക്കാര്യങ്ങൾ വെളിപ്പെടുത്തിയത്. രാജ്യത്ത് നല്ല കാര്യം ചെയ്യുന്നവർക്ക് മതിയായ പ്രോത്സാഹനം ലഭിക്കുന്നില്ലെന്നും അദ്ദേഹം കൂട്ടിച്ചേർത്തു.

ന്യൂഡൽഹി: സെമാറ്റോ, സ്വഗ്ഗി തുടങ്ങിയ ഭക്ഷ്യ വിതരണ ആപ്ലിക്കേഷനുകൾ ഇനി മുതൽ ജിഎസ്ടി അടയ്ക്കണം. ധനമന്ത്രി നിർമ്മലാ സീതാരാമനാണ് ഇക്കാര്യം അറിയിച്ചത്. ഓർഡർ എടുക്കുന്ന ഭക്ഷണശാലകൾക്ക് പകരം, ഇനിമുതൽ സൊമാറ്റോയും സ്വിഗ്ഗിയും പോലുള്ള ഭക്ഷ്യവിതരണ സ്ഥാപനങ്ങൾ ഉപഭോക്താക്കളിൽ നിന്ന് അഞ്ച് ശതമാനം ജിഎസ്ടി ഈടാക്കുമെന്ന് ധനമന്ത്രി വ്യക്തമാക്കി. വെള്ളിയാഴ്ച ജിഎസ്ടി കൗൺസിൽ യോഗത്തിന് ശേഷമാണ് മന്ത്രി ഇക്കാര്യം വിശദമാക്കിയത്.

2022 ജനുവരി 1 മുതൽ പുതിയ നികുതി പ്രാബല്യത്തിൽ വരും. ഭക്ഷണ വിതരണ ആപ്പുകളിൽനിന്ന് പുതിയ നികുതികൾ ഒന്നും ഈടാക്കുന്നില്ലെന്നും ജി.എസ്.ടി. ഈടാക്കുന്ന കേന്ദ്രം മാറുക മാത്രമേ ചെയ്യുന്നുള്ളുവെന്ന് റവന്യൂ സെക്രട്ടറി തരുൺ ബജാജ് അറിയിച്ചു. നിലവിൽ റസ്റ്റോറന്റുകളാണ് നികുതി നൽകുന്നത്. അത് മാറുക മാത്രമാണ് ചെയ്യുന്നതെന്ന് അദ്ദേഹം പറഞ്ഞു. ഇ-കൊമേഴ്സ് കമ്പനികൾക്ക് സോഫ്റ്റ്‌വെയർ മാറ്റത്തിന് വേണ്ടിയാണ് സമയം നീട്ടി നൽകുന്നത്.

അതേസമയം കാൻസർ ചികിത്സയ്ക്കുള്ള മരുന്നുകളുടെ നികുതി നിരക്കും ജിഎസ്ടി കൗൺസിൽ കുറച്ചു. 12 ശതമാനത്തിൽ നിന്ന് അഞ്ച് ശതമാനമായാണ് നികുതി നിരക്ക് കുറച്ചത്.

കോവിഡ് മരുന്നുകളുടെ നികുതി ഇളവുകൾ ജിഎസ്ടി കൗൺസിൽ ദീർഘിപ്പിച്ചുവെന്നും മസ്‌കുലർ അട്രോഫിക്കുള്ള മരുന്നുകളെ ജിഎസ്ടി പരിധിയിൽ നിന്ന് ഒഴിവാക്കിയെന്നും ധനമന്ത്രി വ്യക്തമാക്കി. ജീവൻ രക്ഷാ മരുന്നുകൾക്കുളള നികുതി ഇളവ്, പെട്രോളിയം ഉൽപ്പന്നങ്ങൾക്ക് ജിഎസ്ടി തുടങ്ങിയ വിഷയങ്ങളാണ് വെള്ളിയാഴ്ച്ച കൗൺസിലിന്റെ മുന്നിലെത്തിയത്. കൂടുതൽ മരുന്നുകൾക്ക് നികുതിയിളവ് നൽകുന്നതിനൊപ്പം നിരവധി മരുന്നുകളുടെ ജിഎസ്ടി നിരക്ക് 12 ശതമാനത്തിൽ നിന്ന് അഞ്ച് ശതമാനമാക്കി ചുരുക്കാനും യോഗം അനുമതി നൽകിയെന്നും മന്ത്രി വിശദീകരിച്ചു.

ഡിസംബർ 31 വരെയാകും മരുന്നുകൾക്ക് നികുതിയിളവ് ലഭിക്കുക. എണ്ണ കമ്പനികൾക്കുള്ള ബയോ ഡീസലിന്റെ നികുതിയും കുറച്ചു. ബയോ ഡീസലിന്റെ നികുതി 12 ശതമാനത്തിൽ നിന്നും അഞ്ച് ശതമാനമായാണ് കുറച്ചതെന്നും ധനമന്ത്രി കൂട്ടിച്ചേർത്തു.

ന്യൂഡൽഹി: ഇന്ത്യയിൽ സ്വാധീനം വർധിപ്പിക്കാൻ ഐ.എസ്. ശ്രമിക്കുന്നതായി ദേശീയ അന്വേഷണ ഏജൻസി. നിരന്തരമായ ഓൺലൈൻ പ്രചാരണങ്ങളിലൂടെ ഇന്ത്യയിൽ സ്വാധീനം വ്യാപിപ്പിക്കാനാണ് ഐ.എസിന്റെ ശ്രമമെന്നാണ് എൻഐഎ വ്യക്തമാക്കുന്നത്. ഐ.സുമായി ബന്ധപ്പെട്ട 37 ഭീകരാക്രമണ കേസുകൾ ഇതിനകം എൻ.ഐ.എ. അന്വേഷിച്ചിട്ടുണ്ടെന്നും ഏറ്റവും ഒടുവിലത്തെ കേസ് രജിസ്റ്റർ ചെയ്തത് 2021 ജൂണിലാണെന്നും എൻഐഎ അറിയിച്ചു.

രജിസ്റ്റർ ചെയ്ത 37 കേസുകളുമായി ബന്ധപ്പെട്ട് ഇതുവരെ 168 പേരെ അറസ്റ്റ് ചെയ്തു. 31 കേസുകളിൽ കുറ്റപത്രം സമർപ്പിച്ചു. 27 പ്രതികളെ വിചാരണയ്ക്ക് ശേഷം ശിക്ഷിച്ചുവെന്നും ദേശീയ അന്വേഷണ ഏജൻസി പ്രസ്താവനയിലൂടെ അറിയിച്ചു.

നിരന്തര ഓൺലൈൻ പ്രചാരണങ്ങളിലൂടെ ഇന്ത്യയിൽ തങ്ങളുടെ സ്വാധീനം വ്യാപിക്കാനാണ് ഐ.എസ്. ശ്രമിച്ചുകൊണ്ടിരിക്കുന്നതെന്ന് അന്വേഷണത്തിൽ വ്യക്തമായിട്ടുണ്ട്. ഫേയ്സ്ബുക്ക്, ട്വിറ്റർ, ഇൻസ്റ്റഗ്രാം പോലുള്ള സാമൂഹിക മാദ്ധ്യമങ്ങളിലൂടെ എളുപ്പം കബളിപ്പിക്കാവുന്ന യുവാക്കളെയാണ് ഐ.എസ് ലക്ഷ്യമിടുന്നത്. ഐ.എസിന്റെ ആശയങ്ങളോട് ഒരിക്കൽ അനുഭാവം കാണിക്കുന്ന യുവാക്കളെ ഓൺലൈൻ ഹാൻഡ്ലർമാരുമായി ആശയവിനിമയം നടത്താൻ പ്രലോഭിപ്പിക്കും. വിദേശത്തിരുന്ന് എൻക്രിപ്റ്റഡ് സോഷ്യൽ മീഡിയ പ്ലാറ്റ്ഫോമുകൾ ഉപയോഗിക്കുന്നവരാണ് ഈ ഓൺലൈൻ ഹാൻഡ്ലർമാറെന്നാണ് അന്വേഷണത്തിൽ കണ്ടെത്തിയിരിക്കുന്നത്.

എത്രത്തോളം വശംവദരാക്കാം എന്നതിനെ അടിസ്ഥാനമാക്കിയാണ് ഓൺലൈൻ ഹാൻഡ്ലർമാർ യുവാക്കളെ ഭീകര പ്രവർത്തനങ്ങൾക്കായി തെരഞ്ഞെടുക്കുന്നത്. ഡിജിറ്റൽ കണ്ടന്റ് അപ്ലോഡ് ചെയ്യൽ, ഐ.എസ്. പുസ്തകങ്ങൾ പ്രാദേശിക ഭാഷകളിലേക്ക് പരിഭാഷപ്പെടുത്തൽ, അത്യുഗ്ര ശഷിയുള്ള സ്‌ഫോടകവസ്തുക്കൾ (ഐ.ഇ.ഡി.) തയ്യാറാക്കൽ, ഭീകരവാദത്തിനുള്ള ഫണ്ടിങ്, ഭീകരാക്രമണം തുടങ്ങിയ പ്രവർത്തനങ്ങൾക്ക് യുവാക്കളെ ഐ.എസ് ഉപയോഗപ്പെടുത്തുന്നുണ്ടെന്നും ദേശീയ അന്വേഷണ ഏജൻസി വിശദീകരിക്കുന്നു.

ന്യൂഡൽഹി: കാൻസർ ചികിത്സയ്ക്കുള്ള മരുന്നുകളുടെ നികുതി നിരക്ക് കുറച്ച് ജിഎസ്ടി കൗൺസിൽ. 12 ശതമാനത്തിൽ നിന്ന് അഞ്ച് ശതമാനമായാണ് നികുതി നിരക്ക് കുറച്ചത്. ജിഎസ്ടി കൗൺസിലിന്റെ 45-ാമത് യോഗ തീരുമാനങ്ങൾ ധനമന്ത്രി നിർമ്മലാ സീതാരാമനാണ് വിശദീകരിച്ചത്.

കോവിഡ് മരുന്നുകളുടെ നികുതി ഇളവുകൾ ജിഎസ്ടി കൗൺസിൽ ദീർഘിപ്പിച്ചുവെന്നും മസ്‌കുലർ അട്രോഫിക്കുള്ള മരുന്നുകളെ ജിഎസ്ടി പരിധിയിൽ നിന്ന് ഒഴിവാക്കിയെന്നും ധനമന്ത്രി വ്യക്തമാക്കി. ജീവൻ രക്ഷാ മരുന്നുകൾക്കുളള നികുതി ഇളവ്, പെട്രോളിയം ഉൽപ്പന്നങ്ങൾക്ക് ജിഎസ്ടി തുടങ്ങിയ വിഷയങ്ങളാണ് വെള്ളിയാഴ്ച്ച കൗൺസിലിന്റെ മുന്നിലെത്തിയത്. കൂടുതൽ മരുന്നുകൾക്ക് നികുതിയിളവ് നൽകുന്നതിനൊപ്പം നിരവധി മരുന്നുകളുടെ ജിഎസ്ടി നിരക്ക് 12 ശതമാനത്തിൽ നിന്ന് അഞ്ച് ശതമാനമാക്കി ചുരുക്കാനും യോഗം അനുമതി നൽകിയെന്ന് നിർമ്മലാ സീതാരാമൻ പറഞ്ഞു.

ഡിസംബർ 31 വരെയാകും മരുന്നുകൾക്ക് നികുതിയിളവ് ലഭിക്കുക. എണ്ണ കമ്പനികൾക്കുള്ള ബയോ ഡീസലിന്റെ നികുതിയും കുറച്ചു. ബയോ ഡീസലിന്റെ നികുതി 12 ശതമാനത്തിൽ നിന്നും അഞ്ച് ശതമാനമായാണ് കുറച്ചതെന്നും ധനമന്ത്രി കൂട്ടിച്ചേർത്തു.