General (Page 1,386)

തിരുവനന്തപുരം: സംസ്ഥാനത്തെ കുറ്റകൃത്യ നിരക്ക് കുറയ്ക്കാൻ പ്രത്യേക ബോധവത്കരണ പരിപാടികൾ ആസൂത്രണം ചെയ്യുമെന്ന് വനിതാ കമ്മീഷൻ അധ്യക്ഷ അഡ്വക്കേറ്റ് പി സതീദേവി. സ്‌കൂൾ കുട്ടികൾക്ക് ലൈംഗിക വിദ്യാഭ്യാസം നൽകണമെന്നും സതീദേവി ആവശ്യപ്പെട്ടു. ഇക്കാര്യത്തിൽ സർക്കാരുമായി ചർച്ചകൾ നടത്തുമെന്നും സതീദേവി വ്യക്തമാക്കി. പാലാ സെന്റ് തോമസ് കോളജിൽ വച്ച് സഹപാഠി കുത്തിക്കൊലപ്പൊടുത്തിയ നിതിനാ മോളുടെ വീട് സന്ദർശിച്ചതിനു ശേഷം മാദ്ധ്യമങ്ങളോട് സംസാരിക്കവെയായിരുന്നു വനിതാ കമ്മീഷൻ അദ്ധ്യക്ഷയുടെ പ്രതികരണം.

ലൈംഗിക വിദ്യാഭ്യാസം എന്ന് കേൾക്കുമ്പോൾ പലരുടെയും നെറ്റി ചുളിയും എന്ന അവസ്ഥയാണ് കാലങ്ങളായി ഉണ്ടാകാറുള്ളത്. അതിനെക്കുറിച്ച് സംസാരിക്കുമ്പോഴൊക്കെ വലിയ വിമർശനങ്ങൾ ഉയർന്നു വരാറുണ്ട്. എന്നാൽ ലൈംഗിക വിദ്യാഭ്യാസം നടപ്പാക്കിയാൽ നിരവധി പ്രശ്‌നങ്ങൾ പരിഹരിക്കപ്പെടും. ലിംഗനീതിയുമായി ബന്ധപ്പെട്ട് കുട്ടികൾക്ക് ബോധവത്കരണം നൽകാനായി ഉന്നത വിദ്യാഭ്യാസ വകുപ്പ് തന്നെ അത്തരം പ്രൊജക്ടുകൾ കൊണ്ടുവരണമെന്നും സതീദേവി അഭിപ്രായപ്പെട്ടു.

വിദ്യാസമ്പന്നരായ ചെറുപ്പക്കാരിൽ ഇത്തരത്തിലുള്ള ഹീനമായ ക്രൂരകൃത്യം ചെയ്യാനുള്ള മാനസികാവസ്ഥ രൂപപ്പെടുന്നതെങ്ങനെയെന്ന് കണ്ടെത്താൻഗൗരവമേറിയ പഠനം വേണം. 10- 12 വയസുള്ള കുട്ടികൾ പോലും പ്രണയത്തിലകപ്പെടുകയാണ്. സമൂഹമാദ്ധ്യമങ്ങളിൽ ഉൾപ്പെടെ ഇടപെടുന്ന കൗമാരക്കാരിൽ പല അബദ്ധധാരണകളുമുണ്ടെന്നും വനിതാ കമ്മീഷൻ അദ്ധ്യക്ഷ കുറ്റപ്പെടുത്തി.

തിരുവനന്തപുരം: സാമ്പത്തിക തട്ടിപ്പ് കേസിൽ മോൻസൺ മാവുങ്കലിനെതിരെയുള്ള കേസന്വേഷണത്തിന് പ്രത്യേക അന്വേഷണ സംഘം. സംസ്ഥാന പോലീസ് മേധാവി അനിൽകാന്തിന്റെ നിർദ്ദേശ പ്രകാരമാണ് കേസ് അന്വേഷണത്തിനായി പ്രത്യേക അന്വേഷണ സംഘത്തിന് രൂപം നൽകിയത്. ക്രൈംബ്രാഞ്ച് തിരുവനന്തപുരം റേഞ്ച് ഐ.ജി. സ്പർജൻ കുമാറാണ് അന്വേഷണത്തിന് നേതൃത്വം നൽകുക.

ക്രൈം ബ്രാഞ്ച് മേധാവി എസ്. ശ്രീജിത്തിനാണ് അന്വേഷണത്തിന്റെ മേൽനോട്ടം. ക്രൈം ബ്രാഞ്ച് എറണാകുളം എസ്.പി എം.ജെ. സോജൻ, കോഴിക്കോട് വിജിലൻസ് എസ്.പി പി.സി. സജീവൻ, ഗുരുവായൂർ ഡിവൈ.എസ്.പി കെ.ജി.സുരേഷ്, പത്തനംതിട്ട സി – ബ്രാഞ്ച് ഡിവൈ.എസ്.പി ജെ. ഉമേഷ് കുമാർ, മുളന്തുരുത്തി ഇൻസ്‌പെക്ടർ പി എസ് ഷിജു, വടക്കേക്കര ഇൻസ്‌പെക്ടർ എം.കെ.മുരളി, എളമക്കര സബ് ഇൻസ്‌പെക്ടർ രാമു, തൊടുപുഴ സബ് ഇൻസ്‌പെക്ടർ ബൈജു പി ബാബു തുടങ്ങിയവരാണ് അന്വേഷണ സംഘത്തിലെ മറ്റ് അംഗങ്ങൾ.

തിരുവനന്തപുരം: ശബരിമല യുവതീപ്രവേശനവും മോൻസൺ മാവുങ്കലിന്റെ ചെമ്പോലയും തമ്മിൽ എങ്ങനെ ബന്ധപ്പെട്ടിരിക്കുന്നുവെന്ന് വിശദമാക്കി രാഷ്ട്രീയ നിരീക്ഷകൻ ശ്രീജിത്ത് പണിക്കർ. ഫേസ്ബുക്കിൽ പങ്കുവെച്ച കുറിപ്പിലൂടെയായിരുന്നു അദ്ദേഹം ഇക്കാര്യം അറിയിച്ചത്.

ശബരിമല പ്രശ്‌നം യുവതീപ്രവേശവുമായും മോൻസൺ മാവുങ്കലിന്റെ ചെമ്പോല അവിടത്തെ അവകാശങ്ങളുമായും ബന്ധപ്പെട്ടതാണ്. ഇവ രണ്ടും രണ്ടുകാര്യങ്ങൾ ആണ്. ഇവ തമ്മിൽ എന്താണ് ബന്ധം? അഥവാ അവകാശങ്ങളുമായി ബന്ധപ്പെട്ട ചെമ്പോല എങ്ങനെയാണ് യുവതീപ്രവേശന വിഷയത്തെ സ്വാധീനിക്കുക എന്നീ വിഷയങ്ങളിലാണ് ശ്രീജിത്ത് പണിക്കർ വിശദീകരണം നൽകിയിരിക്കുന്നത്.

പലരും ചോദിച്ച ചോദ്യങ്ങളാണിത്. ഉത്തരം വളരെ ലളിതമാണ്. ഹിന്ദുസമൂഹം ഒന്നായി നടത്തിയ പോരാട്ടത്തിൽ ജാതീയമായ വിഭാഗീയത ഉണ്ടായി എന്നത് ഒരു ചെറിയ ഭാഗം മാത്രമാണ്. പ്രധാന ബന്ധം മറ്റൊന്നാണ്. ഒന്നാമതായി മനസ്സിലാക്കേണ്ടത് ശബരിമലയിലെ പ്രധാന ആചാരങ്ങളുടെ പരമാധികാരം താഴ്മൺ തന്ത്രിമാർക്കാണ് എന്നതാണ്. യുവതീപ്രവേശവുമായി ബന്ധപ്പെട്ട് നട അടയ്ക്കാനുള്ള തീരുമാനം ആചാരപരമായി തന്ത്രിമാർ സ്വീകരിക്കുകയും അത് വിവാദമാവുകയും ചെയ്തത് ഓർക്കുന്നുണ്ടല്ലോ. മോൻസന്റെ ചെമ്പോലയിൽ എങ്ങുംതന്നെ ശബരിമലയുടെ അവകാശമോ പ്രധാന ആചാരങ്ങളിലെ പരമാധികാരമോ ചീരപ്പൻചിറയ്ക്കാണ് എന്നു പറയുന്നില്ലെന്ന് അദ്ദേഹം വ്യക്തമാക്കി.

അവിടെയുള്ള വെടിവഴിപാട്, നെയ് വിളക്ക്, വേലൻപാട്ട്, പുള്ളുവൻപാട്ട്, ദക്ഷിണ തുടങ്ങിയവയ്ക്കുള്ള അവകാശമാണ് മോൻസന്റെ ചെമ്പോല പ്രകാരം ചീരപ്പൻചിറയ്ക്ക് നൽകുന്നത്. സംശയകരമായ ഈ രേഖയെപ്പോലും തെറ്റായി വ്യാഖ്യാനിക്കുന്നതുവഴി ശബരിമലയുടെ അവകാശം താഴ്മൺ തന്ത്രിമാർക്കല്ല എന്നു സ്ഥാപിക്കാനാണ് ചിലർ ശ്രമിച്ചത്. അങ്ങനെ സ്ഥാപിച്ചാൽ ശബരിമല യുവതീപ്രവേശം ഉൾപ്പടെയുള്ള ആചാരങ്ങളെയാണ് അത് നേരിട്ടു ബാധിക്കുകയെന്ന് അദ്ദേഹം പറഞ്ഞു.

തന്ത്രികുടുംബത്തിന് ശബരിമലയിൽ അവകാശമില്ലെന്നു സ്ഥാപിച്ചാൽ ആചാരങ്ങളിലെ അവരുടെ പരമാധികാരവും നഷ്ടപ്പെടും. അതായത് ഒക്കെയും ഉപേക്ഷിച്ച് തന്ത്രിമാർ മലയിറങ്ങിയാൽ അവരോടൊപ്പം യുവതീപ്രവേശ വിലക്കും മലയിറങ്ങും. നമ്മൾ കണ്ടത് ശബരിമലയുടെയല്ല, മഞ്ഞുമലയുടെ മുകൾവശം മാത്രമാണെന്നും അദ്ദേഹം കൂട്ടിച്ചേർത്തു.