General (Page 1,385)

മുംബൈ: ആര്യൻ ഖാന്റെ അറസ്റ്റ് ബോളിവുഡ് താരം ഷാരുഖ് ഖാനെ ലക്ഷ്യമിട്ടുള്ളതാണെന്ന റിപ്പോർട്ടുകൾക്ക് മറുപടിയുമായി നാർക്കോട്ടിക്സ് കൺട്രോൾ ബ്യൂറോ (എൻസിബി) സോണൽ ഡയറക്ടർ സമീർ വാങ്കഡെ. ആഡംബരക്കപ്പലിലെ ലഹരിപ്പാർട്ടി റെയ്ഡും തുടർന്നുണ്ടായ അറസ്റ്റും ഷാരൂഖ് ഖാനെ ലക്ഷ്യമിട്ടാണെന്നുള്ള റിപ്പോർട്ടുകൾ അദ്ദേഹം തള്ളി. തങ്ങൾ ആരെയും ലക്ഷ്യമിടുന്നില്ലെന്ന് അദ്ദേഹം വ്യക്തമാക്കി.

ഷാരൂഖ് ഖാനുമായി ഒരു വിരോധവുമില്ല. കഴിഞ്ഞ 10 മാസത്തിനിടെ 300 ലധികം പേരെ തങ്ങൾ അറസ്റ്റ് ചെയ്തു. അവരിൽ, പരമാവധി, ഏകദേശം 4 മുതൽ 5 വരെ അറിയപ്പെടുന്ന പ്രമുഖരായവർ ആയിരിക്കാമെന്നും അദ്ദേഹം വിശദീകരിച്ചു. ഇറ്റി ടൈംസിന് അനുവദിച്ച അഭിമുഖത്തിലായിരുന്നു അദ്ദേഹത്തിന്റെ പ്രതികരണം.തങ്ങൾ ആരെയെങ്കിലും ലക്ഷ്യമിടുന്നുവെന്ന് നിങ്ങൾക്ക് എങ്ങനെ പറയാൻ കഴിയുമെന്നും അദ്ദേഹം ചോദിച്ചു.

കഴിഞ്ഞ ഒരു വർഷത്തിനിടെ അറസ്റ്റിലായവരിൽ ഭൂരിഭാഗവും കടുത്ത മയക്കുമരുന്ന് സംബന്ധിയായ കുറ്റവാളികളാണ്. അറിയപ്പെടുന്ന ചില വ്യക്തികൾ പിടിക്കപ്പെടുമ്പോൾ മാത്രമാണ് മാദ്ധ്യമങ്ങൾ അതിനു അമിത പ്രധാന്യം നൽകുന്നത്. വർഷത്തിലുടനീളം നിരവധി റെയ്ഡുകളും അറസ്റ്റുകളും എൻസിബിയുടെ ഭാഗത്തു നിന്ന് ഉണ്ടായിട്ടുണ്ട്. ഇത്തവണയും അതുതന്നെയാണ് സംഭവിച്ചതെന്നും ആഡംബരക്കപ്പലിലെ റെയ്ഡും അത്തരത്തിൽ ഒന്നാണെന്നും അദ്ദേഹം പറഞ്ഞു. എൻസിബി റെയ്ഡ് നടക്കുമ്പോൾ ആര്യൻ ഖാൻ തെറ്റായ സമയത്ത് തെറ്റായ സ്ഥലത്തായിരുന്നുവെന്നും അതാണ് അറസ്റ്റിനു കാരണമായതെന്നും സമീർ കൂട്ടിച്ചേർത്തു.

ന്യൂഡൽഹി: ഏഷ്യയിലെ ഏറ്റവും വലിയ ഇരട്ടപ്പാതയുള്ള തുരങ്കം ജമ്മു കശ്മീരിൽ നിർമ്മാണം ആരംഭിച്ചു. സോജിലയിലാണ് തുരങ്കം നിർമ്മിക്കുന്നത്. കശ്മീരിലെ പാതകൾ എല്ലാ കാലാവസ്ഥയിലും ഉപയോഗപ്പെടുത്താനുള്ള പദ്ധതിയുടെ ഭാഗമായാണ് തുരങ്ക നിർമ്മാണം. സമുദ്രനിരപ്പിൽ നിന്ന് 11,578 അടി ഉയരത്തിലാണ് തുരങ്കം നിർമ്മിക്കുന്നത്. 14.15 കിലോമീറ്ററാണ് തുരങ്കത്തിന്റെ ദൈർഘ്യം. രാജ്യത്തിന്റെ സാമ്പത്തിക, സൈനിക മേഖലകളിൽ വലിയ പ്രാധാന്യമാണ് തുരങ്കത്തിനുള്ളത്.

ലേ, ലഡാക്ക് മേഖലകളെ ശ്രീനഗറുമായും രാജ്യത്തിന്റെ മറ്റു ഭാഗങ്ങളുമായും ബന്ധിപ്പിക്കുന്ന തുരങ്കമാണ് സോജില. പ്രതികൂല കാലാവസ്ഥയെ അതിജീവിച്ചും തുരങ്കത്തിന്റെ നിർമ്മാണം പുരോഗമിക്കുകയാണ്. ആധുനിക സാങ്കേതിക വിദ്യകൾ പൂർണമായും ഉപയോഗപ്പെടുത്തി, കടുത്ത കാലാവസ്ഥയെ വെല്ലുവിളിച്ച് നിർമിക്കുന്ന തുരങ്കം പൂർത്തിയായാൽ അത് എൻജിനീയറിങ് അദ്ഭുതങ്ങളിലൊന്നാകുമെന്നാണ് ദേശീയപാതാ അധികൃതർ പറയുന്നത്.

മഞ്ഞുകാലത്ത് ലഡാക്കിലേക്കും തലസ്ഥാനമായ ലേയിലേക്കും യാത്ര ദുഷ്‌കരമാണ്. വർഷത്തിൽ 7 മാസവും പാത അടച്ചിടുന്ന അവസ്ഥയ്ക്ക് ഈ തുരങ്കം വരുന്നതോടെ മാറ്റമുണ്ടാകും. കനത്ത മഞ്ഞുവീഴ്ച കാരണം ശ്രീനഗർ-ലഡാക്ക് ഹൈവേ നവംബർ പകുതിയേടെ അടച്ചിടുകയാണ് പതിവ്. പാത അടച്ചിടുന്ന സമയം വ്യാപാരരംഗത്തും സൈനിക രംഗത്തും പ്രതിസന്ധി ഉണ്ടാകാറുണ്ട്. ഇതിനെല്ലാം തുരങ്കം പരിഹാരമാകുമെന്നാണ് പ്രതീക്ഷ.

ന്യൂഡൽഹി: പാൻഡോര പേപ്പർ വെളിപ്പെടുത്തലുകളിൽ അന്വേഷണം പ്രഖ്യാപിച്ച് ഇന്ത്യ. കേന്ദ്ര പ്രത്യക്ഷ നികുതി ബോർഡ് ചെയർമാന്റെ നേതൃത്വത്തിലായിരിക്കും അന്വേഷണം നടത്തുക. റിസർവ് ബാങ്ക്, എൻഫോഴ്‌സ്‌മെന്റ് ഡയറക്ടറേറ്റ്, ഫിനാൻഷ്യൽ ഇന്റലിജൻസ് യൂണിറ്റ് പ്രതിനിധികൾ തുടങ്ങിയവർ അന്വേഷണ സംഘത്തിൽ ഉണ്ടാകും. ഇന്ത്യക്കാരായ മുന്നൂറിലധികം പേരുടെ നിക്ഷേപങ്ങളുടെ വിവരങ്ങൾ പാൻഡോര പേപ്പറിലുണ്ടെന്നാണ് വിവരം. വരും ദിവസങ്ങളിൽ കൂടുതൽ പ്രമുഖരുടെ നിക്ഷേപത്തെ കുറിച്ച് വെളിപ്പെടുത്തലുകൾ ഉണ്ടാകുമെന്നാണ് അന്താരാഷ്ട്ര മാദ്ധ്യമപ്രവർത്തക കൂട്ടായ്മ വ്യക്തമാക്കിയത്.

സച്ചിൻ തെണ്ടുൽക്കർ, അനിൽ അംബാനി, വിനോദ് അദാനി തുടങ്ങിയവർ ഉൾപ്പടെയുള്ളവരുടെ നിക്ഷേപങ്ങളെ കുറിച്ചും പാൻഡോര പേപ്പറിൽ പരാമർശിക്കുന്നുണ്ട്. മാദ്ധ്യമപ്രവർത്തകരുടെ അന്താരാഷ്ട്ര കൂട്ടായ്മ നടത്തിയ അന്വേഷണത്തിലാണ് ലോക നേതാക്കൾ ഉൾപ്പെട്ട കള്ളപ്പണ നിക്ഷേപത്തെ കുറിച്ചുള്ള വിവരങ്ങൾ പുറത്തു വന്നത്. ഇന്ത്യയുൾപ്പെടെ 91 രാജ്യങ്ങളിലെ പ്രമുഖരുടെ കള്ളപ്പണ നിക്ഷേപ വിവരങ്ങളാണ് പാൻഡോര വെളിപ്പെടുത്തലിലൂടെ പുറത്തു വന്നത്. സച്ചിൻ തെണ്ടുൽക്കർ, ഭാര്യ അഞ്ജലി, ഭാര്യാപിതാവ് ആനന്ദ് മേത്ത തുടങ്ങിയവർ ബ്രിട്ടീഷ് വിർജിൻ ഐലന്റിൽ നിക്ഷേപം നടത്തിയെന്നും പാൻഡോര പേപ്പർ പുറത്തുവിട്ടിരുന്നു. കള്ളപ്പണ നിക്ഷേപങ്ങളെ കുറിച്ച് മുൻപ് പനാമ പേപ്പർ വെളിപ്പെടുത്തലുണ്ടായപ്പോൾ സാസ് ഇന്റർനാഷണൽ ലിമിറ്റഡിൽ നിന്ന് സച്ചിൻ അടക്കമുള്ളവർ നിക്ഷേപം പിൻവലിച്ചതായും റിപ്പോർട്ടിൽ ആരോപിക്കുന്നു.

അതേസമയം സച്ചിന്റെ നിക്ഷേപമെല്ലാം നിയമപരമാണെന്നാണ് അദ്ദേഹത്തിന്റെ അഭിഭാഷകൻ വ്യക്തമാക്കുന്നത്. നീരവ് മോദി ഇന്ത്യ വിടുന്നതിന് മുൻപ് ഒരു മാസം മുൻപ് സഹോദരി പൂർവി മോദി ഒരു ട്രസ്റ്റ് രൂപികരിച്ച് കള്ളപ്പണം നിക്ഷേപിച്ചതായും ഗൗതം അദാനിയുടെ സഹോദരൻ വിനോദ് അദാനി 2018 ൽ ബ്രിട്ടീഷ് വിർജിൻ ഐലൻറിലെ കമ്പനിയുടെ ഡയറക്ടറും അൻപതിനായിരം ഓഹരികളുടെ ഉടമയുമാണെന്നും അനിൽ അംബാനിക്ക് കള്ളപ്പണം വെളുപ്പിക്കാനായി ഉണ്ടായിരുന്നത് 18 കമ്പനികളെന്നും പാൻഡോര പേപ്പറിൽ പറയുന്നുണ്ട്.