General (Page 1,384)

കൊച്ചി: സാമ്പത്തിക തട്ടിപ്പ് കേസിൽ അറസ്റ്റിലായ മോൻസന്റെ കൈയ്യിലുണ്ടായിരുന്നു ചെമ്പോല സംബന്ധിച്ച് നിർണായക വെളിപ്പെടുത്തലുകളുമായി തൃശൂർ സ്വദേശിയായ പുരാവസ്തു കച്ചവടക്കാരൻ. മോൻസന്റെ കൈയിലുണ്ടായിരുന്ന ശബരിമല ചെമ്പോല താനാണ് മോൻസന് കൈമാറിയതെന്ന് സൂചിപ്പിച്ച് പുരാവസ്തു കച്ചവടക്കാരനായ ഗോപാലകൃഷ്ണൻ രംഗത്തെത്തി. മോൻസന്റെ സുഹൃത്തായ സന്തോഷിന് താനാണ് ചെമ്പോല കൈമാറിയതെന്നും പരിശോധനയിൽ 300 വർഷം പഴക്കമുണ്ടെന്ന് ഉറപ്പ് വരുത്തിയിരുന്നുവെന്നുമാണ് ഗോപാലകൃഷ്ണൻ പറയുന്നത്.

തൃശൂരിലെ ഫിലാറ്റലിക് ക്ലബിലെ ഒരാളിൽ നിന്നും പണംകൊടുത്താണ് താൻ ചെമ്പോല വാങ്ങിയതെന്നും പിന്നീട് പണം വാങ്ങി ചെമ്പോല സന്തോഷിന് വിറ്റുവെന്നും ഗോപാലകൃഷ്ണൻ വ്യക്തമാക്കി. ഫിലാറ്റലിക് ക്‌ളബിലെ ഒരംഗം ചെമ്പോല പരിശോധിച്ച് പഴക്കം ഉറപ്പുവരുത്തിയെന്നും ഇദ്ദേഹം പുരാവസ്തു വിദഗ്ദ്ധനാണെന്നും ഗോപാലകൃഷ്ണൻ പറയുന്നു. ശബരിമലയിൽ വെടിവഴിപാടോ നാളികേര വഴിപാടോ ഒരു പ്രത്യേക വ്യക്തിയെ ഏൽപ്പിച്ചു എന്നതാണ് ചെമ്പോലയിലെ ഉളളടക്കമെന്നും ഗോപാലകൃഷ്ണൻ വെളിപ്പെടുത്തി.

അതേസമയം മോൻസനെ നേരിട്ട് പരിചയമില്ലെന്നും രണ്ട് കൊല്ലം മുൻപ് സന്തോഷിനാണ് ചെമ്പോല നൽകിയതെന്നും ഗോപാലകൃഷ്ണൻ പറഞ്ഞു. സിനിമയിലെ ആവശ്യത്തിനാണെന്ന് പറഞ്ഞാണ് സന്തോഷ് തന്റെ കൈയിൽ നിന്നും ചെമ്പോല വാങ്ങിയത്. മോൻസൺ ഒരിക്കൽ നേരിൽ വിളിച്ചിട്ടുണ്ട്. മോൻസണെ നേരിൽ പരിചയപ്പെടാത്തത് നന്നായെന്നും ഗോപാലകൃഷ്ണൻ കൂട്ടിച്ചേർത്തു.

തൃശൂർ: കോട്ടും തൊപ്പിയുമില്ലാതെ കേരളീയ വേഷത്തിൽ മെഡിക്കൽ ബിരുദദാരികളുടെ ബിരുദദാന ചടങ്ങ്. കേരള ആരോഗ്യ സർവകലാശാലയുടെ പതിനാലാമത് ബിരുദദാന ചടങ്ങിലാണ് കേരളീയ വേഷം അണിഞ്ഞ് വിദ്യാർത്ഥികൾ എത്തിയത്. ബിരുദദാനത്തിനെത്തിയ ഗവർണർ ആരിഫ് മുഹമ്മദ് ഖാൻ മുണ്ടും ജുബ്ബയുമാണ് ധരിച്ചത്. സർവകലാശാല അധികൃതരും കേരളീയ വേഷം തന്നെയായിരുന്നു ധരിച്ചത്.

ബിരുദം നേടി പുറത്തിറങ്ങുന്ന ആൺകുട്ടികൾ വെള്ള അല്ലെങ്കിൽ ഇളം മഞ്ഞ മുണ്ടും ജുബയും കസവുവേഷ്ടിയുമാണ് ധരിച്ചത്. പെൺകുട്ടികൾ സെറ്റ് സാരിയും ജാക്കറ്റുമാണ് ധരിച്ചു. കോവിഡ് മാനദണ്ഡങ്ങൾ നിലനിൽക്കുന്നതിനാൽ റാങ്ക് ജേതാക്കൾ മാത്രമാണ് നേരിട്ടെത്തി ബിരുദം ഏറ്റുവാങ്ങിയത്. 14,229 വിദ്യാർത്ഥികളാണ് ബിരുദം പൂർത്തിയാക്കി ആരോഗ്യ സേവനത്തിനായി കർമരംഗത്തേക്കിറങ്ങിയത്.

ബിരുദദാന ചടങ്ങുകൾക്ക് കേരളീയ വേഷം ധരിക്കുമ്പോൾ കേരളത്തിലെ കൈത്തറി വ്യവസായത്തിന് സഹായകമാകുമെന്നാണ് വിലയിരുത്തുന്നത്.

കൊച്ചി: ഓർത്തഡോക്‌സ് – യാക്കോബായ സഭാതർക്കത്തിൽ സുപ്രീം കോടതി വിധി നടപ്പാക്കണമെന്നാവശ്യപ്പെട്ട് ഹൈക്കോടതി. ആരാധനാലയങ്ങൾ യുദ്ധക്കളമല്ലെന്നും ദൈവത്തിന്റെ ആലയമാണെന്നും ഇരുപക്ഷവും ഓർക്കണമെന്ന് കോടതി വ്യക്തമാക്കി. ബലപ്രയോഗത്തിലൂടെ വിധി നടപ്പാക്കിയാൽ അനിഷ്ട സംഭവങ്ങളുണ്ടാകാനുള്ള സാദ്ധ്യത തള്ളിക്കളയാനാകില്ലെന്നും കോടതി ചൂണ്ടിക്കാട്ടി. സമാധാനം നിലനിർത്തുകയെന്നതിനാകണം പ്രഥമ പരിഗണനയെന്നും കോടതി പറഞ്ഞു.

1934 ലെ ഭരണഘടന പ്രകാരം തന്നെ പള്ളികൾ ഭരിക്കപ്പെടണം. 2017 ലെ സുപ്രീം കോടതി വിധിയോടെ സഭയിൽ രണ്ട് പക്ഷങ്ങൾ ഇല്ലാതായി. ഭരണഘടന അനുസരിക്കുന്ന ഏത് വിശ്വാസിക്കും പള്ളി ഭരണത്തിൽ പങ്കാളിയാകാമെന്നും കോടതി വിശദമാക്കി. പോലീസിനെ ഉപയോഗിച്ച് കോടതി വിധി നടപ്പാക്കുന്നത് അവസാന മാർഗം മാത്രമായിരിക്കണമെന്നും ഹൈക്കോടതി നിർദ്ദേശം നൽകി. അതേസമയം നിർദേശങ്ങൾ ചർച്ച ചെയ്ത് മറുപടി നൽകാൻ സമയം വേണമെന്നാണ് യാക്കോബായ വിഭാഗം ആവശ്യപ്പെടുന്നത്.

തൃശൂർ: പാല ബിഷപ്പിന്റെ നാർകോട്ടിക് ജിഹാദ് പരാമർശം തീവ്രവാദ കെണികൾക്കെതിരെ ജാഗ്രത പുലർത്താനുള്ള ശ്രമമെന്ന് തൃശൂർ അതിരൂപത മുഖപത്രം. വിവേക പൂർവ്വമായ അന്വേഷണത്തിന് പകരം പാലാ ബിഷപ്പിന്റെ വാക്കുകളെ വിവാദത്തിലേക്ക് വലിച്ചിഴക്കുകയായിരുന്നുവെന്നും തൃശൂർ അതിരൂപത മുഖപത്രം വ്യക്തമാക്കുന്നു. മുഖപത്രത്തിൽ പ്രസിദ്ധീകരിച്ച കത്തോലിക്കാ സഭ പ്രസിദ്ധീകരിച്ച ‘വിവാദമോ വിവേകമോ’ എന്ന ലേഖനത്തിൽ പറയുന്നു.

ഇടതുപക്ഷ സർക്കാരിനെതിരെയും ലേഖനം വിമർശനം ഉന്നയിക്കുന്നുണ്ട്. ബിഷപ്പിന്റെ പരാമർശത്തിനെതിരെ പല സംഘടനകളും ഒറ്റക്കെട്ടായി രംഗത്തുവന്നത് തീവ്രവാദികൾക്കെതിരെ ഉയർന്ന പൊതുജനശ്രദ്ധ തിരിച്ചുവിടുന്നതിനാണെന്ന സംശയം ബലപ്പെടുന്നുവെന്ന് ലേഖനത്തിൽ ചൂണ്ടിക്കാട്ടിയിട്ടുണ്ട്.

ബിഷപ്പിന്റെ പരാമർശം മതസ്പർധ ഉണ്ടാക്കാനായിരുന്നില്ല. എന്നിട്ടും അതിനെ അത്തരത്തിൽ വിമർശിച്ചു. അതേ സമയം മയക്കമരുന്നുകൾ വ്യാപാരം ചെയ്യുന്നതിനെയോ അതുപയോഗിച്ച് മതതീവ്രവാദികൾ നടപ്പാക്കുന്ന ഹിഡൻ അജണ്ടകളെയോ ആരും തള്ളപ്പറയുന്നില്ല. ബിഷപ്പിനെതിരെ നടപടിയെടുക്കണമെന്നാവശ്യപ്പെട്ട് ചില കേന്ദ്രങ്ങൾ പടനയിക്കുന്നത് നാർക്കോട്ടിക് ജിഹാദിനെ പരോക്ഷമായി ശരിവെക്കുന്നതും പിന്തുണക്കുന്നതുമാണെന്നും മുഖപത്രത്തിൽ കുറ്റപ്പെടുത്തുന്നു.