General (Page 1,340)

ന്യൂഡൽഹി: മുല്ലപ്പെരിയാർ ഡാമിൽ മരംമുറിക്കാൻ സുപ്രീം കോടതി നിർദ്ദേശിച്ചിട്ടില്ല. ഡാം ശക്തിപ്പെടുത്തുന്നതിന് മരങ്ങൾ മുറിക്കാൻ 2017 ൽ തമിഴ്നാട് നൽകിയ അപേക്ഷയിൽ സുപ്രീം കോടതിയിൽ ഇതുവരെയും കേരളത്തിന് ഒരു നിർദേശവും നൽകിയിട്ടില്ല. ബേബി അണക്കെട്ട് ശക്തിപ്പെടുത്തുന്നതിന് മരങ്ങൾ മുറിക്കുന്നതിനുള്ള അനുമതി നൽകാൻ മേൽനോട്ടസമിതി കേരളത്തിന് നിർദ്ദേശം നൽകിയത്.

2006 ൽ സുപ്രീം കോടതി പുറപ്പെടുവിച്ച ഉത്തരവിലാണ് മുല്ലപ്പെരിയാർ അണക്കെട്ട് ബലപ്പെടുത്തുന്നതിനുള്ള നടപടികൾ സ്വീകരിക്കാൻ നിർദേശിച്ചിരുന്നത്. 2014 മെയ് ഏഴിന് സുപ്രീം കോടതിയുടെ അഞ്ചംഗ ഭരണഘടനാ ബെഞ്ച് ഈ നിലപാട് തന്നെ ഉന്നയിച്ചു. ഡാം ശക്തിപ്പെടുത്തിയതിന് ശേഷം ജലനിരപ്പ് 152 അടിവരെയായി ഉയർത്താമെന്ന 2006 ലെ ഉത്തരവിലെ നിലപാടാണ് ഭരണഘടനാ ബെഞ്ച് പുറപ്പെടുവിച്ചത്. ഈ രണ്ട് വിധികളുടെയും അടിസ്ഥാനത്തിൽ ഡാം ശക്തിപ്പെടുത്തുന്നതിനുള്ള നടപടികൾ തടസ്സപ്പെടുത്താൻ കേരളത്തിന് കഴിയില്ലെന്നാണ് തമിഴ്‌നാട് സർക്കാരിന്റെ വാദം.

അതേസമയം മുല്ലപ്പെരിയാർ അണക്കെട്ട് ശക്തമാക്കാൻ മരങ്ങൾ മുറിക്കണം എന്ന തമിഴ്നാട് സർക്കാരിന്റെ ആവശ്യത്തോട് 2015 ൽ കേന്ദ്ര ജല കമ്മിഷൻ യോജിച്ചിരുന്നു. 2020 ജനുവരി 28 ന് ചേർന്ന മുല്ലപ്പെരിയാർ മേൽനോട്ട സമിതിയുടെ 13-ാമത് യോഗത്തിൽ മരം മുറിക്കുന്നതിനുള്ള അനുമതി നൽകണമെന്ന് കേരളത്തിന് ചെയർമാൻ നിർദ്ദേശം നൽകിയിരുന്നു. 2021 ഫെബ്രുവരിയിൽ ചേർന്ന മേൽനോട്ട സമിതി യോഗത്തിൽ എത്ര മരങ്ങൾ മുറിക്കണമെന്നതിന്റെ മാനദണ്ഡം കണക്കാക്കുന്നതിൽ സംസ്ഥാന വനം വകുപ്പിന് ആശയക്കുഴപ്പം ഉണ്ടെന്ന് കേരളത്തെ പ്രതിനിധീകരിച്ച ഉദ്യോഗസ്ഥർ അറിയിച്ചു. തുടർന്ന് അവ്യക്തത നീക്കാൻ കേരളത്തിലെയും തമിഴ്നാട്ടിലെയും വനംവകുപ്പ് ഉദ്യോഗസ്ഥരുടെ സംയുക്ത പരിശോധന നടത്താൻ മേൽനോട്ട സമിതി നിർദേശം നൽകി.

ന്യൂഡൽഹി: ആഢംബര കപ്പലിലെ ലഹരി പാർട്ടി കേസുമായി ബന്ധപ്പെട്ട് നടൻ ഷാരൂഖ് ഖാന്റെ മകൻ ആര്യൻ ഖാനെ വീണ്ടും ചോദ്യം ചെയ്യും. ഡൽഹിയിൽ നിന്നെത്തിയ പ്രത്യേക അന്വേഷണസംഘം ഇക്കാര്യം ചൂണ്ടിക്കാട്ടി ആര്യൻ ഖാന് സമൻസ് അയച്ചു. കൂട്ടുപ്രതികളായ അബ്ബാസ് മെർച്ചന്റ്, ആച്ചിത് കുമാർ എന്നിവരെയും ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം.

കേസിൽ ജാമ്യം ലഭിച്ച ആര്യൻ ഖാൻ ഒക്ടോബർ 30 നാണ് ജയിൽ മോചിതനായത്. ഉപാധികളോടെയാണ് ആര്യന് ബോബെ ഹൈക്കോടതി ജാമ്യം അനുവദിച്ചത്. എല്ലാ വെള്ളിയാഴ്ചയും എൻസിബി ഓഫീസിലെത്തി ഒപ്പിടണമെന്നതടക്കം 14 വ്യവസ്ഥകളാണ് കോടതി മുന്നോട്ട് വെച്ചിരിക്കുന്നത്. അതേസമയം ലഹരി മരുന്ന് കേസിൽ ആര്യൻ ഖാനെ കുടുക്കിയതാണെന്ന വെളിപ്പെടുത്തലുമായി മറ്റൊരു സാക്ഷികൂടി രംഗത്തെത്തിയിട്ടുണ്ട്. കിരൺ ഗോസാവി, മനീഷ് ബനുശാലി, സുനിൽ പാട്ടീൽ എന്നിവർ ചേർന്ന് ഷാരൂഖ് ഖാനെ ഭീഷണിപ്പെടുത്തി പണം തട്ടാൻ പദ്ധതിയിട്ടതെന്നാണ് വിജയ് പഗാരെയുടെ വെളിപ്പെടുത്തൽ.

ആറുമാസമായി സുനിൽ പാട്ടീലിനൊപ്പം ജോലി ചെയ്യുകയാണ് വിജയ് പഗാരെ. ആര്യൻ അറസ്റ്റിലാവുന്നതിന് ദിവസങ്ങൾക്ക് മുൻപ് കിരൺ ഗോസാവി, മനീഷ് ബനുശാലി, സുനിൽ പാട്ടീൽ എന്നിവർ മുംബൈയിൽ ഹോട്ടലിൽ തങ്ങി പദ്ധതി തയ്യാറാക്കിയെന്നാണ് വിജയ് പഗാരെയുടെ ആരോപണം.

ചെന്നൈ: ചെന്നൈയിൽ കനത്ത മഴ. താഴ്ന്ന പ്രദേശങ്ങളിൽ വെള്ളം കയറിത്തുടങ്ങി. ജലനിരപ്പ് ഉയർന്നതോടെ നഗരത്തിന് സമീപത്തെ മൂന്ന് ജലസംഭരണികൾ തുറന്നു. മറ്റൊരു പ്രളയമാണോ വരുന്നതെന്നാണ് ചെന്നൈയുടെ നിവാസികളുടെ ആശങ്ക. വെള്ളക്കെട്ട് രൂപപ്പെട്ട സ്ഥലങ്ങളിൽ മുഖ്യമന്ത്രി എം.കെ സ്റ്റാലിൻ സന്ദർശനം നടത്തി.

താഴ്ന്ന ചില പ്രദേശങ്ങളിലെ വീടുകളിൽ വെള്ളം കയറി തുടങ്ങിയിട്ടുണ്ട്. വെള്ളക്കെട്ടുണ്ടാകാൻ സാധ്യതയുള്ള സ്ഥലങ്ങളിൽ നിന്നും നൂറോളം പേരെയാണ് ഇതുവരെ മാറ്റിപ്പാർപ്പിച്ചത്. അവശ്യഘട്ടത്തിൽ നഗരത്തിലെ സ്‌കൂളുകൾ ദുരിതാശ്വാസ ക്യാമ്പുകളാക്കി മാറ്റാനുള്ള നടപടികളും സർക്കാർ നടത്തുന്നുണ്ട്. ചെമ്പരാമ്പാക്കം, പൂണ്ടി, പുഴൽ ജലസംഭരണികളിൽ നിന്നും വെള്ളം തുറന്നു വിട്ടിരിക്കുകയാണ്.

അടുത്ത രണ്ടുദിവസം തമിഴ്നാട്ടിലെ വടക്ക് ഭാഗത്തെ തീരദേശ ജില്ലകളിൽ മഴ കനക്കുമെന്നാണ് കാലാവസ്ഥാ നിരീക്ഷണ കേന്ദ്രം നൽകുന്ന മുന്നറിയിപ്പ്. അതേസമയം തിങ്കൾ, ചൊവ്വ ദിവസങ്ങളിൽ ചെന്നൈ, ചെങ്കൽപ്പേട്ട്, തിരുവള്ളൂർ, കാഞ്ചീപുരം ജില്ലകളിലെ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു.

മുംബൈ: ഇനി സ്വന്തം വണ്ടിയിലിരുന്ന് തന്നെ സിനിമ ആസ്വദിക്കാം. രാജ്യത്തെ ആദ്യത്തെ ‘റൂഫ് ടോപ് ഓപ്പൺ എയർ ഡ്രൈവ് ഇൻ തിയേറ്റർ’ മുംബൈയിൽ തുറന്നു. പകർച്ചവ്യാധികളെ ഭയക്കാതെ സ്വന്തം വാഹനത്തിനുള്ളിലിരുന്ന് വലിയ സ്‌ക്രീനിൽ സിനിമ കാണാനുള്ള സൗകര്യമാണ് ഇവിടെ ഒരുക്കിയിരിക്കുന്നത്. അക്ഷയ് കുമാർ നായകനായ സൂര്യവംശിയാണ് തിയേറ്ററിലെ ഉദ്ഘാടന ചിത്രം.

ബാന്ദ്ര കുർള കോംപ്ലക്‌സിൽ 17.5 ഏക്കർ സ്ഥലത്ത് വ്യാപിച്ചുകിടക്കുന്ന റിലയൻസിന്റെ ജിയോ വേൾഡ് ഡ്രൈവിന്റെ മുകൾത്തട്ടിലാണ് ഡ്രൈവ് ഇൻ തിയേറ്റർ തയ്യാറാക്കിയിരിക്കുന്നത്. തിയേറ്ററിന്റെ നടത്തിപ്പു ചമതല പി.വി.ആർ. ലിമിറ്റഡിനാണ്. ഓപ്പൺ എയർ തിയേറ്ററിലെ സ്‌ക്രീനിന് 24 മീറ്റർ നീളവും 10 മീറ്റർ വീതിയുമാണുള്ളത്. ഒരു സമയം 290 വാഹനങ്ങൾ നിർത്തിയിടാൻ സൗകര്യവും ഇവിടെയുണ്ട്. കാറിലെ എഫ്.എം. സംവിധാനം വഴിയാണ് ശബ്ദം കേൾക്കുന്നത്. ഒരു കാറിന് 1,200 രൂപയാണ് ടിക്കറ്റ് നിരക്ക്. കോവിഡ് പ്രതിരോധത്തിനുള്ള രണ്ടു ഡോസ് വാക്സിൻ എടുത്തവർക്കു മാത്രമാണ് പ്രവേശനം. ഒരു വാഹനത്തിൽ നാലുപേരെയേ അനുവദിക്കൂവെന്നും അധികൃതർ അറിയിച്ചിട്ടുണ്ട്.

ചണ്ഡിഗഢ്: പഞ്ചാബിൽ പെട്രോൾ വില കുറച്ച് സംസ്ഥാന സർക്കാർ. പെട്രോളിന് ലിറ്ററിന് 10 രൂപയും ഡീസലിന് 5 രൂപയും കുറച്ചു. 70 വർഷത്തിനിടെ ആദ്യമായാണ് ഇത്തരത്തിൽ വിലകുറയ്ക്കുന്നതെന്ന് മുഖ്യമന്ത്രി ചരൺജിത്ത് സിംഗ് ചന്നി അറിയിച്ചു. വിലയിൽ വൻ കുറവുവരുത്തിയതോടെ നിലവിൽ രാജ്യത്ത് ഏറ്റവും കുറഞ്ഞ നിരക്കിൽ പെട്രോൾ കിട്ടുക പഞ്ചാബിലാണെന്നും അദ്ദേഹം വ്യക്തമാക്കി.

പഞ്ചാബിൽ നിയമസഭാ തെരഞ്ഞെടുപ്പ് അടുത്തിരിക്കെയാണ് സർക്കാരിന്റെ നീക്കം. നേരത്തെ കേന്ദ്ര സർക്കാർ എക്‌സൈസ് തീരുവ കുറച്ചതുവഴി പെട്രോൾ ലിറ്ററിന് അഞ്ച് രൂപയും ഡീസൽ ലിറ്ററിന് പത്ത് രൂപയും കുറഞ്ഞിരുന്നു. ഇതിന്റെ ചുവടുപിടിച്ച് നിരവധി സംസ്ഥാന സർക്കാരുകൾ പെട്രോളിന്റെയും ഡീസലിന്റെയും വാറ്റ് നികുതി കുറച്ചിരുന്നു.

അതേസമയം കേന്ദ്രനിർദേശം പോലെ ഇനിയും വില കുറയ്ക്കാനാവില്ലെന്നാണ് കേരളത്തിന്റെ നിലപാട്. സംസ്ഥാനത്തിന്റെ നിലപാടിനെതിരെ കോൺഗ്രസും, ബി ജെ പിയും ശക്തമായ സമരത്തിന് തയ്യാറെടുക്കുകയാണ്.