General (Page 1,332)

കൊല്ലം: വളർത്തു മൃഗങ്ങൾക്ക് യജമാനനോടുള്ള അടുപ്പം എത്രത്തോളമാണെന്ന് പലപ്പോഴും പറഞ്ഞറിയിക്കാൻ കഴിയാറില്ല. അത്തരത്തിലൊരു കഥയാണ് കൊല്ലത്ത് നിന്നും റിപ്പോർട്ട് ചെയ്യുന്നത്. കൊല്ലം സ്വദേശി ദിവാകരനും അദ്ദേഹത്തിന്റെ അർജു എന്ന നായയും തമ്മിലുള്ള സ്‌നേഹബന്ധത്തെ കുറിച്ചാണ് റിപ്പോർട്ട്. മരിച്ചു പോയ യജമാനനെ കാത്ത് ചിതയൊരുക്കിയ സ്ഥലത്തിരിക്കുന്ന അർജു കണ്ടു നിൽക്കുന്നവരുടെയെല്ലാം കണ്ണു നിറയ്ക്കുകയാണ്. ദിവാകരന്റെ വിയോഗം ഇതുവരെ അർജുവിന് ഉൾക്കൊള്ളാൻ കഴിഞ്ഞിട്ടില്ല.

കുഴിമാടത്തിൽ നട്ട തെങ്ങിൻതൈയുടെ അരികിൽ ദിവാകരന്റെ തിരിച്ചു വരവിനായി കാത്തിരിക്കുകയാണ് അവൻ ഇപ്പോഴും. ദിവാകരന്റെ സംസ്‌കാരം കഴിഞ്ഞ് ദിവസങ്ങളായിട്ടും ചിതയൊരുക്കിയ സ്ഥലത്ത് തന്നെയാണ് അർജു കഴിയുന്നത്. കാൻസർ രോഗബാധയെ തുടർന്ന് ചികിത്സയിലായിരുന്ന മൈനാഗപ്പള്ളി സ്വദേശി ദിവാകരൻ ഈ മാസം ഒന്നാം തിയതിയാണ് മരിച്ചത്. ഏതു നേരവും ദിവാകരന്റെ കൂടെ തന്നെയായിരുന്നു അർജു.

ദിവാകരന്റെ കുടുംബത്തിൽ ഒരാളെ പോലെ തന്നെയായിരുന്നു അർജുവും. ആരെയും അവൻ ഉപദ്രവിക്കാറുമില്ല. പകൽ സമയത്ത് അഴിച്ചു വിടുമ്പോൾ അർജ നേരെ പോകുന്നത് ദിവാകരന് ചിതയൊരുക്കിയ സ്ഥലത്തേക്കാണ്. അവിടെ അവൻ മണ്ണോട് ചേർന്ന് കിടക്കും. ദിവകാരന്റെ മരണശേഷം കുറച്ച് ദിവസത്തേയ്ക്ക് അർജു ആഹാരം പോലും കഴിച്ചിരുന്നില്ല. പിന്നീട് മുറികളിലൊക്കെ കയറി ഇറങ്ങി നടക്കും. ഇപ്പോൾ ദിവസങ്ങളായി കുഴിമാടത്തിന് അരികിൽ നിന്ന് മാറാതെ കിടക്കകയാണെന്നും വീട്ടുകാർ പറയുന്നു.

തിരുവനന്തപുരം: സംസ്ഥാനത്ത് കനത്ത മഴ അനുഭവപ്പെടുന്ന സാഹചര്യത്തിൽ ആലപ്പുഴ, കൊല്ലം, പത്തനംതിട്ട, കാസർകോട്, കോട്ടയം, എറണാകുളം ജില്ലകളിലെ വിദ്യാഭ്യാസ സ്ഥാപനങ്ങൾക്ക് തിങ്കളാഴ്ച്ച അവധി പ്രഖ്യാപിച്ചു. ജില്ലാ കളക്ടർമാരാണ് അവധി പ്രഖ്യാപിച്ചത്. മഹാത്മാ ഗാന്ധി സർവ്വകലാശാലയും കേരളാ സർവകലാശാലയും തിങ്കളാഴ്ച്ച നടത്തേണ്ടിയിരുന്ന പരീക്ഷകളും മാറ്റിവെച്ചു. കൊല്ലം ജില്ലയിലെ പ്രൊഫഷണൽ കോളേജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും തിങ്കളാഴ്ച്ച അവധിയായിരിക്കുമെന്നാണ് കളക്ടർ അറിയിച്ചിരിക്കുന്നത്.

പത്തനംതിട്ട ജില്ലയിലെ പ്രൊഫഷണൽ കോളേജുകൾ ഉൾപ്പടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും നവംബർ 15 ന് അവധിയായിരിക്കുമെന്നും ജില്ലാ കളക്ടർ അറിയിച്ചു. എന്നാൽ സർക്കാർ ശമ്പളം നൽകുന്ന എല്ലാ സ്ഥാപനങ്ങളിലെയും അധ്യാപക, അനധ്യാപക ജീവനക്കാരുടെ സേവനം ജില്ലാ ദുരന്തനിവാരണ അതോറിറ്റി/ അതോറിറ്റി ചുമതലപ്പെടുത്തുന്ന ഉദ്യോഗസ്ഥർ ആവശ്യപ്പെടുന്ന പക്ഷം അതാതിടങ്ങളിൽ ലഭ്യമാക്കേതാണെന്നാണ് നിർദ്ദേശം. കാസർകോട് ജില്ലയിൽ വിദ്യാലയങ്ങൾക്ക് അവധിയാണെങ്കിലും കോളേജുകൾക്ക് അവധി ബാധകമല്ല.

കനത്ത മഴ തുടരുന്ന സാഹചര്യത്തിൽ എറണാകുളം ജില്ലയിൽ തിങ്കളാഴ്ച്ച സ്‌കൂളുകൾ പ്രവർത്തിക്കില്ലെന്ന് ജില്ലാ കളക്ടർവ്യക്തമാക്കി. എന്നാൽ പ്രൊഫഷണൽ കോളേജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങളിലും ഓൺലൈൻ ക്ലാസുകൾ മാത്രമാണ് തിങ്കളാഴ്ച്ച ഉണ്ടായിരിരിക്കുക. സിബിഎസ്ഇ, ഐസിഎസ്ഇ സ്‌കൂളുകൾക്കും കേന്ദ്രീയ വിദ്യാലയങ്ങൾക്കും ഉത്തരവ് ബാധകമാണ്. വിദ്യാർത്ഥികളുടെ യാത്രയും ബുദ്ധിമുട്ടുകളും ഒഴിവാക്കുന്നതിനാണ് ഇത്തരത്തിൽ ക്രമീകരണം ഏർപ്പെടുത്തിയിരിക്കുന്നത്.

തിരുവനന്തപുരം: കെഎസ്ആർടിസി ജീവനക്കാർക്കുള്ള ശമ്പള വിതരണത്തിനായി പണം അനുവദിച്ച് സർക്കാർ. 60 കോടി രൂപയാണ് സർക്കാർ അനുവദിച്ചത്. ചൊവ്വാഴ്ച മുതൽ കെഎസ്ആർടിസി ജിവനക്കാർക്ക് ശമ്പളം വിതരണം ചെയ്യും.

ഇന്ധന ചിലവിൽ 10 കോടിയോളം രൂപയുടെ ലാഭം വരുമെന്ന സാഹചര്യത്തിലാണ് സർക്കാർ 80 കോടി രൂപയിൽ നിന്നും 60 കോടി കെഎസ്ആർടിസിക്ക് നൽകിയത്. 24 കോടി രൂപ കെഎസ്ആർടിസിയുടെ ഫണ്ടിൽ നിന്നു കൂടി ചേർത്ത് 84 കോടി രൂപ ശമ്പളമായി ചൊവ്വാഴ്ച മുതൽ കെഎസ്ആർടിസി ജീവനക്കാർക്ക് വിതരണം ചെയ്യും.

കോവിഡ് കാലത്ത് ജീവനക്കാരുടെ ശമ്പളത്തിൽ നിന്നും സർക്കാർ പിടിച്ചിരുന്ന തുകയുടെ അവസാന ഗഡുവായ 7.20 കോടി രൂപ ഈ മാസം തന്നെ കെഎസ്ആർടിസിയുടെ ഫണ്ടിൽ നിന്നും നൽകിയിരുന്നു. കെഎസ്ആർടിസിയുടെ തനത് ഫണ്ടിൽ നിന്ന് ശമ്പളത്തിന് വേണ്ടി 31.20 കോടി രൂപയാണ് ഈ മാസം ചെലവഴിച്ചത്.

ഇടുക്കി: ചെറുതോണി അണക്കെട്ടിന്റെ ഷട്ടർ തുറക്കുന്നു. അണക്കെട്ടിന്റെ ഒരു ഷട്ടർ ഞായറാഴ്ച ഉച്ചയ്ക്ക് രണ്ട് മണിക്ക് തുറക്കും. 40 സെന്റിമീറ്ററാണ് ഉയർത്തുന്നത്. സെക്കൻഡിൽ 40,000 ലിറ്റർ വെള്ളമാണ് ഇതിലൂടെ ഒഴുക്കിവിടുക. നിലവിൽ 2398.8 അടിയാണ് ഇടുക്കി ഡാമിലെ ജലനിരപ്പ്. ഓറഞ്ച് അലർട്ടാണ് ഇടുക്കി ഡാമിൽ നിലനിൽക്കുന്നത്. 2399.03 അടി ആയാൽ മാത്രമാണ് റെഡ് അലർട്ട് പ്രഖ്യാപിക്കുക. നിലവിൽ ആശങ്കപ്പെടേണ്ട യാതൊരു സാഹചര്യവുമില്ലെന്നും മുല്ലപ്പെരിയാറിൽ ജലനിരപ്പ് ഉയരുന്ന പശ്ചാത്തലത്തിൽ മാത്രമാണ് ഇടുക്കി ഡാം തുറക്കാൻ തീരുമാനിച്ചതെന്നും അധികൃതർ വ്യക്തമാക്കി.

മുല്ലപ്പെരിയാർ ഡാമിന്റെ സ്പിൽവേ ഷട്ടറുകൾ തുറക്കുകയാണെങ്കിൽ അവിടെ നിന്ന് ഒഴുകിയെത്തുന്ന ജലം കൂടി ക്രമീകരിക്കുന്നതിന്റെ ഭാഗമായാണ് ഇടുക്കിയിലെ നടപടി. ആശങ്കയ്ക്ക് അടിസ്ഥാനമില്ലെങ്കിലും പെരിയാറിന്റെ തീരത്ത് താമസിക്കുന്നവർ ജാഗ്രത പുലർത്തണമെന്നും ജില്ലാ ഭരണകൂടം അറിയിച്ചു.

അതേസമയം മുല്ലപ്പെരിയാർ അണക്കെട്ടിൽ ജലനിരപ്പ് ഉയർന്നു. 140 അടിയായാണ് നിലവിൽ ഡാമിലെ ജലനിരപ്പ്. പെരിയാറിന്റെ ഇരുകരകളിലും താമസിക്കുന്നവർ ജാഗ്രത പാലിക്കണമെന്നാണ് അധികൃതർ നൽകിയിരിക്കുന്ന നിർദ്ദേശം. കഴിഞ്ഞ ദിവസം മുതൽ അണക്കെട്ടിന്റെ വൃഷ്ടിപ്രദേശത്ത് മഴ ശക്തമാണ്. നാലായിരം ഘനയടിയിലധികം ജലമാണ് ഓരോ മണിക്കൂറിലും അണക്കെട്ടിലേക്ക് ഒഴുകിയെത്തിയതെന്നാണ് കണക്കുകൾ വ്യക്തമാക്കുന്നത്.