General (Page 1,331)

ന്യൂഡൽഹി: രാജ്യത്ത് അനിയന്ത്രിതമായ ക്രിപ്റ്റോ കറൻസി ഇടപാടുകൾ നിയന്ത്രിക്കണമെന്ന ആവശ്യവുമായി കേന്ദ്ര സർക്കാർ. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ചേർന്ന യോഗത്തിലാണ് ഇക്കാര്യം സംബന്ധിച്ച ചർച്ച നടത്തിയത്. അമിതവാഗ്ദാനങ്ങൾ നൽകിയും സുതാര്യമല്ലാത്തതുമായ ക്രിപ്റ്റോ കറൻസി ഇടപാടുകളിലൂടെയും യുവജനങ്ങളെ വഴിതെറ്റിക്കാനുള്ള ശ്രമങ്ങൾക്ക് അവസാനമുണ്ടാക്കണമെന്നായിരുന്നു യോഗത്തിൽ ഉയർന്നു വന്ന ആവശ്യം. കള്ളപ്പണം വെളുപ്പിക്കുന്നതിനും തീവ്രവാദത്തിനുള്ള സാമ്പത്തിക സ്രോതസായും ക്രിപ്റ്റോ കറൻസി ഉപയോഗിക്കുന്നതിനെ കുറിച്ചും യോഗത്തിൽ ചർച്ച നടന്നുവെന്നാണ് റിപ്പോർട്ടുകൾ.

വികസിച്ച് കൊണ്ടിരിക്കുന്ന ഒരു സാങ്കേതിക വിദ്യ എന്ന നിലയിൽ ക്രിപ്റ്റോ കറൻസിക്ക് മേൽ ശക്തമായ നിരീക്ഷണം നടത്തുകയും നടപടികൾ സ്വീകരിക്കുകയും ചെയ്യുമെന്നുമാണ് കേന്ദ്രം അറിയിച്ചിരിക്കുന്നത്. വിഷയവുമായി ബന്ധപ്പെട്ട് ആർ.ബി.ഐയും, ധനമന്ത്രാലയവും, ആഭ്യന്തര മന്ത്രാലയവും രാജ്യത്തിനകത്തും പുറത്തുമുള്ള വിദഗ്ദരുമായി കൂടിക്കാഴ്ച്ച നടത്തിയിരുന്നു. തുടർന്നാണ് ക്രിപ്റ്റോ കറൻസിയും അനുബന്ധ പ്രശ്നങ്ങളും ചർച്ച ചെയ്യാൻ മോദിയുടെ നേതൃത്വത്തിൽ യോഗം ചേർന്നത്.

അതേസമയം രാജ്യാതിർത്തികൾക്കും അപ്പുറം വ്യാപിക്കുന്ന ഒരു പ്രശ്നമായതിനാൽ വിദഗ്ദരും മറ്റ് ഓഹരി ഉടമകളുമായും സർക്കാർ നിരന്തരം ചർച്ചകൾ നടത്തുമെന്നാണ് വിവരം. അതിനായി അഗോള പങ്കാളിത്തവും കൂട്ടായി രൂപീകരിച്ച തന്ത്രങ്ങളും വേണമെന്ന അഭിപ്രായവുപം യോഗത്തിൽ ഉയർന്നു വന്നു. ആർ.ബി.ഐയും ക്രിപ്റ്റോ കറൻസിക്കെതിരെ രംഗത്തെത്തിയിട്ടുണ്ട്. ക്രിപ്റ്റോ കറൻസിയിലെ നിക്ഷേപകരുടെ എണ്ണത്തിലും അവർ അവകാശപ്പെടുന്ന വിപണി മൂല്യത്തിലും ആർ.ബി.ഐ സംശയം ഉന്നയിക്കുന്നു. ഒരു കേന്ദീകൃതബാങ്കിന്റേയും നിയന്ത്രണത്തിലല്ലാത്ത ക്രിപ്റ്റോ കറൻസി ഏത് സാമ്ബത്തിക വ്യവസ്ഥക്കായാലും ഭീഷണിയാണെന്നും ആർബിഐ അഭിപ്രായപ്പെട്ടു.

ന്യൂഡൽഹി: തീർത്ഥാടന കേന്ദ്രങ്ങളിലേക്കുള്ള തീവണ്ടികളിലെ യാത്ര ‘സസ്യഭക്ഷണ സൗഹൃദ’മാക്കാനൊരുങ്ങി ഐആർസിടിസി. തീർത്ഥാടന കേന്ദ്രങ്ങളിലേക്ക് സർവീസ് നടത്തുന്ന തീവണ്ടികളിൽ ‘സാത്വിക് സർട്ടിഫൈഡ്’ ഭക്ഷണം ലഭ്യമാക്കാനാണ് തീരുമാനം. സാത്വിക് കൗൺസിൽ ഓഫ് ഇന്ത്യ പ്രസ്താവനയിലൂടെയാണ് ഇക്കാര്യം അറിയിച്ചത്. സസ്യഭക്ഷണത്തിന് നിലവാര സർട്ടിഫിക്കറ്റ് നൽകുന്ന സംവിധാനമാണ് സാത്വിക് കൗൺസിൽ ഓഫ് ഇന്ത്യ. മാംസം, മത്സ്യം, മുട്ട, ആൽക്കഹോൾ, നിക്കോട്ടിൻ തുടങ്ങിയവയൊന്നും ഇല്ലാത്ത പൂർണ സസ്യഭക്ഷണ ഉൽപന്നങ്ങൾക്കാണ് സാത്വിക് സർട്ടിഫിക്കറ്റ് നൽകുന്നത്. സസ്യഭക്ഷണം പ്രോത്സാഹിപ്പിക്കുക എന്ന ലക്ഷ്യത്തോടെയാണ് സാത്വിക് പ്രവർത്തിക്കുന്നത്.

തീർത്ഥാടന കേന്ദ്രങ്ങളിലേക്ക് യാത്ര നടത്തുന്ന തീവണ്ടികളിൽ സസ്യഭക്ഷണം ഉറപ്പുവരുത്തുന്നതിനായി ഐആർസിടിസിയുമായി ചേർന്ന് പ്രവർത്തിക്കുമെന്നാണ് സാത്വിക് അറിയിച്ചിരിക്കുന്നത്. നവംബർ 15 മുതൽ സാത്വിക് സർട്ടിഫിക്കേഷൻ പദ്ധതി നടപ്പാക്കാനാണ് തീരുമാനം. ട്രെയിൻ സർവ്വീസുകളിലെ സസ്യഭക്ഷണ വിഭവങ്ങളുടെ കൈപ്പുസ്തകവും തയ്യാറാക്കും. ഐആർസിടിസി ഡൽഹിയിൽ നിന്ന് കത്രയിലേക്ക് സർവീസ് നടത്തുന്ന വന്ദേ ഭാരത് എക്സ്പ്രസിൽ സാത്വിക് സർട്ടിഫൈഡ് ഭക്ഷണം ലഭ്യമാക്കും.

18 തീവണ്ടികളിൽ പദ്ധതി നടപ്പിലാക്കും. ഐആർസിടിസിയുടെ പാചകശാലകൾ കൂടാതെ, എക്സിക്യൂട്ടീവ് ലോഞ്ചുകൾ, ബഡ്ജറ്റ് ഹോട്ടലുകൾ, ഫുഡ് പ്ലാസകൾ, ട്രാവൽ-ടൂർ പാക്കേജുകൾ, റെയിൽനീർ പ്ലാന്റുകൾ എന്നിവയ്ക്കും സാത്വിക് സർട്ടിഫിക്കറ്റ് നൽകും.

ലക്‌നൗ: ഗ്രീക്ക് ഭരണാധിപനായ അലക്സാണ്ടറിനെ മഹാനെന്ന് വാഴ്ത്തുന്നതിനെതിരെ വിമർശനവുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. അലക്‌സാണ്ടറെ പരാജയപ്പെടുത്തിയ ഇന്ത്യൻ ഭരണാധികാരി ചന്ദ്രഗുപ്ത മൗര്യയെ മഹാനായി വാഴ്ത്തുന്നില്ലെന്ന് അദ്ദേഹം പറഞ്ഞു. ലക്‌നൗവിൽ നടന്ന സാമാജിക് പ്രതിനിധി സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

ചരിത്രകാരൻമാർ ഇക്കാര്യത്തിൽ മൗനം പാലിച്ചുവെന്നും അദ്ദേഹം വ്യക്തമാക്കി. അലക്‌സാണ്ടറിന്റെ മരണശേഷം, ഗ്രീക്ക് ചക്രവർത്തി ഭരിച്ചിരുന്ന പ്രദേശങ്ങൾ ചന്ദ്രഗുപ്ത മൗര്യൻ ഏറ്റെടുത്തതായും അദ്ദേഹം ചൂണ്ടിക്കാട്ടി.

അഫ്ഗാനിസ്ഥാനിലെ ബാമിയാനിലെ 2500 വർഷം പഴക്കമുള്ള ബുദ്ധന്റെ പ്രതിമ താലിബാൻ തകർത്തതിനെ കുറിച്ചും യോഗി ആദിത്യനാഥ് സംസാരിച്ചു. 20 വർഷങ്ങൾക്ക് മുൻപാണ് താലിബാൻ ബുദ്ധന്റെ പ്രതിമ തകർത്തത്. ബുദ്ധൻ ഒരിക്കലും ലോകത്തിന്മേൽ യുദ്ധം അടിച്ചേൽപ്പിച്ചിട്ടില്ലെന്നും എല്ലായ്‌പ്പോഴും മാനവികതയ്ക്ക് പ്രചോദനവും ഭക്തിയുടെ കേന്ദ്രവുമായിരുന്നു അദ്ദേഹമെന്നും യോഗി പറഞ്ഞു. ലോകസമാധാനത്തിനായി നിലകൊള്ളുന്നയാരും ബുദ്ധപ്രതിമ തകർത്ത താലിബാൻ പ്രവൃത്തി മറക്കരുതെന്നും അദ്ദേഹം അഭിപ്രായപ്പെട്ടു.