General (Page 1,309)

ന്യൂഡൽഹി: ക്രിപ്‌റ്റോ കറൻസിയിൽ നിക്ഷേപിച്ചവർക്ക് പുതിയ പ്രതീക്ഷകൾ നൽകി ധനമന്ത്രി നിർമ്മലാ സീതാരാമൻ. സ്വകാര്യ ക്രിപ്‌റ്റോ കറൻസി നിരോധിച്ചേക്കുമെന്ന പ്രചാരണത്തിനിടെയാണ് ധനമന്ത്രി ക്രിപ്‌റ്റോ നിക്ഷേപകർക്ക് ആശ്വാസം നൽകുന്ന പ്രതികരണം നടത്തിയിരിക്കുന്നത്. പഴയ ബില്ലിൽ ഒരുപാട് മാറ്റങ്ങൾ വരുത്തേണ്ടതായി വന്നുവെന്നും ഇപ്പോൾ ഒരു പുതിയ ബിൽ പ്രകാരം പ്രവർത്തിക്കാൻ ശ്രമിക്കുകയാണെന്നും കേന്ദ്രമന്ത്രി വ്യക്തമാക്കി.

തീർത്തും പുതിയ ക്രിപ്‌റ്റോ കറൻസി ബില്ലാണ് പാർലമെന്റിൽ അവതരിപ്പിക്കുകയെന്നും മന്ത്രിസഭായോഗം ഈ ബിൽ അംഗീകരിച്ചാൽ ഉടൻ പാർലമെന്റിൽ അവതരിപ്പിക്കുമെന്നും നിർമ്മലാ സീതാരാമൻ പറഞ്ഞു. ഇതുവരെ ക്രിപ്‌റ്റോബില്ലിനെക്കുറിച്ച് പ്രചരിച്ചതൊന്നുമായിരിക്കില്ല പുതിയ ബില്ലിൽ ഉണ്ടായിരിക്കുകയെന്നാണ് നിക്ഷേപകരുടെ പ്രതീക്ഷ.

അതേ സമയം തെറ്റായ കൈകകളിൽ ക്രിപ്‌റ്റോ കറൻസി എത്തരുതെന്നതാണ് സർക്കാരിന്റെ ആഗ്രഹം. മറ്റൊന്ന് ക്രിപ്‌റ്റോ കറൻസിയിലെ വിലയിൽ വരുന്ന പ്രവചനാതീതമായ വലിയ ചാഞ്ചാട്ടങ്ങളും കേന്ദ്ര സർക്കാരിനെ ആശങ്കയിലാക്കുന്നുണ്ട്. ക്രിപ്‌റ്റോ കറൻസി കള്ളപ്പണക്കാരും തീവ്രവാദസംഘടനകളും ദുരുപയോഗം ചെയ്‌തേക്കുമെന്നാണ് സർക്കാരിന്റെ ആശങ്ക.

ഡിജിറ്റൽ കറൻസികളെ കുറിച്ചുള്ള പരസ്യം നിർത്താൻ തീരുമാനിച്ചിട്ടില്ലെന്നും മന്ത്രി അഭിപ്രായപ്പെട്ടു. ക്രിപ്‌റ്റോകറൻസികളുടെ നിയന്ത്രണ ശേഷിയെക്കുറിച്ച് വിപുലമായ ചർച്ചകൾ നടക്കുന്നുണ്ടെന്നും ബില്ല് പാസാകുന്നതിനായി കാത്തിരിക്കാമെന്നും ധനമന്ത്രി കൂട്ടിച്ചേർത്തു.

ന്യൂഡൽഹി: കർഷക പ്രക്ഷോഭത്തിനിടെ മരണപ്പെട്ട കർഷകർക്ക് ധനസഹായം നൽകുന്ന വിഷയത്തിൽ നിലപാട് വ്യക്തമാക്കി കേന്ദ്ര സർക്കാർ. കർഷകർക്ക് നഷ്ടപരിഹാരം നൽകാനാകില്ലെന്ന് കേന്ദ്ര സർക്കാർ അറിയിച്ചു. കർഷക നിയമങ്ങൾക്കെതിരെ കഴിഞ്ഞ ഒരു വർഷമായി നടന്ന പ്രതിഷേധത്തിനിടെ കർഷകർ ആരും മരിച്ചതായി അറിയില്ലെന്നാണ് കേന്ദ്ര സർക്കാർ പറയുന്നത്.

ഇത്തരം മരണങ്ങൾ സംബന്ധിച്ച രേഖകളൊന്നും സർക്കാരിന്റെ പക്കലില്ലെന്നും അതുകൊണ്ടുതന്നെ കർഷകരുടെ കുടുംബത്തിന് ധനസഹായം നൽകുന്ന വിഷയം നിലനിൽക്കുന്നില്ലെന്നും കൃഷിമന്ത്രി നരേന്ദ്ര തോമർ വ്യക്തമാക്കി. പാർലമെന്റിലാണ് അദ്ദേഹം ഇക്കാര്യം അറിയിച്ചത്.

നവംബർ 19-ന് ആണ് പ്രധാനമന്ത്രി നരേന്ദ്ര മോദി വിവാദമായ മൂന്ന് കാർഷിക നിയമങ്ങൾ പിൻവലിക്കാൻ തീരുമാനിച്ചതായുള്ള പ്രഖ്യാപനം നടത്തിയത്. ഇതിന്റെ നടപടിക്രമങ്ങളും സർക്കാർ പൂർത്തിയാക്കിയിരുന്നു. ഒരു വർഷം നീണ്ടുനിന്ന കർഷക പ്രക്ഷോഭത്തിനിടെ മരിച്ചവരുടെ കുടുംബങ്ങൾക്ക് സർക്കാർ ധനസഹായം നൽകണമെന്നായിരുന്നു കർഷരുടെ ആവശ്യം. ഇതുമായി ബന്ധപ്പെട്ട് പ്രതിപക്ഷം പാർലമെന്റിൽ ഉന്നയിച്ച ചോദ്യങ്ങൾക്കാണ് കൃഷിമന്ത്രിയുടെ മറുപടി.

ന്യൂഡൽഹി: ചൈനയ്‌ക്കെതിരെ അപ്രതീക്ഷിത നീക്കവുമായി ഇന്ത്യ. ചൈനീസ് സൈന്യത്തിന്റെ ലഡാക്കിലെ നീക്കങ്ങൾ നിരീക്ഷിക്കാൻ ഇസ്രയേലിന്റെ അത്യാധുനിക ഹെറോൺ ഡ്രോണുകൾ വിന്യസിച്ചിരിക്കുകയാണ് ഇന്ത്യ. നാല് ഹെറോൺ ഡ്രോണുകളാണ് ഇസ്രയേൽ ഇന്ത്യയ്ക്ക് നൽകുന്നത്. കോവിഡ് വ്യാപനത്തെ തുടർന്നാണ് ഇസ്രായേൽ ഹെറോൺ ഡ്രോണുകൾ വിതരണം ചെയ്യാൻ വൈകിയത്.

പ്രതിരോധ മന്ത്രാലയത്തിന് അടിയന്തിര ധനകാര്യ അധികാരം പ്രധാനമന്ത്രി നൽകിയതിന്റെ അടിസ്ഥാനത്തിലാണ് നാല് ഡ്രോണുകൾ വാങ്ങിയത്. ചൈനയുമായുള്ള സംഘർഷത്തിൽ ഇന്ത്യയുടെ പ്രതിരോധ ശേഷി വർധിപ്പിക്കാനുള്ള ആയുധങ്ങൾ വാങ്ങാൻ 500 കോടി രൂപ വരെ അനുവദിക്കുന്നതായിരുന്നു പ്രത്യേക അനുമതി.

ഇന്ത്യയും ചൈനയും തമ്മിൽ സംഘർഷം നിലനിൽക്കുന്ന ലഡാക്കിലാണ് ഹെറോൺ ഡ്രോണുകൾ വിന്യസിക്കുക. നിലവിൽ ഇന്ത്യയുടെ കയ്യിലുള്ള പഴയ തലമുറയിൽപ്പെട്ട ഹെറോണിനേക്കാൾ മികച്ചതാണ് പുതിയ ഹെറോണുകൾ. ശത്രുവിനെ നിരീക്ഷിക്കാനും രഹസ്യവിവരങ്ങൾ ശേഖരിക്കാനും ശത്രുസങ്കേതങ്ങളിൽ കയറി നിരീക്ഷണം നടത്താനും വരെ കഴിവുള്ളവയാണ് പുതിയ ഹെറോണുകൾ. ഒരിക്കലും ശത്രുക്കൾക്ക് പ്രവർത്തനരഹിതമാക്കാൻ കഴിയാത്ത ശേഷിയുള്ളവയാണ് ഇവയെന്നതാണ് മറ്റൊരു സവിശേഷത.

ന്യൂഡൽഹി: കഴിഞ്ഞ മൂന്ന് വർഷത്തിനിടെ രാജ്യത്ത് ആത്മഹത്യ ചെയ്തത് 17,299 കർഷകർ. കേന്ദ്ര കൃഷിമന്ത്രി നരേന്ദ്ര സിങ് തോമർ പാർലമെന്റിലാണ് ഇക്കാര്യം അറിയിച്ചത്. 2020 ൽ മാത്രം 5,579 കർഷകരാണ് രാജ്യത്ത് ആത്മഹത്യ ചെയ്തതെന്നും കേരളത്തിൽ മാത്രം 104 കർഷകരാണ് ആത്മഹത്യ ചെയ്തതെന്നും കണക്കുകൾ വ്യക്തമാക്കുന്നു.

2018, 2019 വർഷങ്ങളെ അപേക്ഷിച്ച് 2020 ൽ കേരളത്തിലെ കർഷക ആത്മഹത്യയുടെ എണ്ണം ഇരട്ടിയായി വർധിച്ചിട്ടുണ്ട്. കേരളത്തിൽ 2018 ൽ 25 പേരും 2019 ൽ 22 പേരുമാണ് ആത്മഹത്യ ചെയ്തത്. എന്നാൽ 2020 ൽ 57 കർഷക ആത്മഹത്യകൾ റിപ്പോർട്ട് ചെയ്തു. മഹാരാഷ്ട്രയിലാണ് രാജ്യത്ത് ഏറ്റവും കൂടുതൽ കർഷക ആത്മഹത്യ നടന്നിരിക്കുന്നത്. 2020 ലെ കർഷക ആത്മഹത്യകളിൽ 2,567 കേസുകൾ റിപ്പോർട്ട് ചെയ്തിരിക്കുന്നത് മഹാരാഷ്ട്രയിൽ നിന്നാണ്. 1,072 കേസുകൾ കർണ്ണാടകയിൽ റിപ്പോർട്ട് ചെയ്തിട്ടുണ്ട്. ആന്ധ്രാ പ്രദേശ് (564), തെലങ്കാന(466), മധ്യപ്രദേശ് (235), ചത്തീഡ്ഗഡ് (227), ഉത്തർപ്രദേശ് (87) എന്നിങ്ങനെയാണ് മറ്റ് സംസ്ഥാനങ്ങളിലെ കർഷക ആത്മഹത്യകൾ.

കുടുംബ പ്രശ്‌നങ്ങൾ, മയക്കുമരുന്നിന്റെ ദുരുപയോഗം, വിവാഹസംബന്ധമായ പ്രശ്‌നങ്ങൾ, പ്രണയ നൈരാശ്യം, കടബാധ്യത, പരീക്ഷയിലെ പരാജയം, തൊഴിലില്ലായ്മ, സ്വത്ത് തർക്കം എന്നിവയാണ് കർഷക ആത്മഹത്യക്കു പിന്നിലുള്ള കാരണങ്ങളെന്ന് മന്ത്രി വ്യക്തമാക്കി. അതേസമയം ഡൽഹി അതിർത്തിയിൽ കാർഷിക നിയമങ്ങൾക്കെതിരെയുള്ള സമരത്തിനിടെ മരണപ്പെട്ട കർഷകരുടെ എണ്ണം റിപ്പോർട്ടിൽ പരാമർശിച്ചിട്ടില്ലെന്ന് മന്ത്രി അറിയിച്ചു.