General (Page 1,310)

തിരുവനന്തപുരം: കേരളവർമ്മ പഴശ്ശിരാജയുടെ ജന്മദിനത്തിൽ അനുസ്മരണ പോസ്റ്റിട്ട മുൻമന്ത്രി കെ കെ ശൈലജ ടീച്ചർക്കെതിരെ സൈബർ ആക്രമണം. ടിപ്പുവിനെ ഇകഴ്ത്തി പരാമർശം നടത്തി എന്ന പേരിലാണ് സൈബർ ആക്രമണം ഉണ്ടായത്. പഴശ്ശിരാജയെ പരിഹസിച്ചുള്ള കമന്റുകളും പോസ്റ്റിന് താഴെ ചിലർ രേഖപ്പെടുത്തുന്നുണ്ട്. ടിപ്പുവിന്റെ നേതൃത്വത്തിൽ മലബാറിനെതിരെ കടുത്ത ആക്രമണം നടക്കുകയും ഇതിനെ പഴശ്ശിരാജ ചെറുക്കുകയും ചെയ്തുവെന്നാണ് ശൈലജ ടീച്ചർ പോസ്റ്റിൽ വിശദമാക്കുന്നത്.

പഴശ്ശിയുടെ സൈനിക നീക്കം 1792 ൽ ടിപ്പുവിനെ മൂന്നാം മൈസൂർ യുദ്ധത്തിൽ പരാജയപ്പെടുത്തിയെന്നും ചരിത്രത്തെ ഉദ്ദരിച്ച് ശൈലജ ടീച്ചർ പോസ്റ്റിൽ പറയുന്നു. എന്നാൽ ശൈലജ ടീച്ചർ ചരിത്രം വളച്ചൊടിക്കുകയാണെന്നും ടിപ്പു യഥാർത്ഥ പോരാളി ആണെന്നുമാണ് ചില പ്രത്യേക വിഭാഗക്കാര്‍ പറയുന്നത്.കമന്റുകൾ വഴിയുള്ള ആക്ഷേപം വർദ്ധിച്ചതോടെ പോസ്റ്റിനു താഴെ കമന്റ് ബോക്സ് ഓപ്ഷനും ലോക്ക് ചെയ്ത നിലയിലാണ്.

കെ കെ ശൈലജയുടെ ഫേസ്ബുക്ക് കുറിപ്പിന്റെ പൂർണ്ണരൂപം:

ഇന്ന് വീര പഴശിയുടെ 217ാമത് രക്തസാക്ഷിത്വ ദിനമാണ്. 216 വർഷങ്ങൾക്ക് മുമ്പ് 1805 നവംബർ 30നാണ് വീര കേരള വർമ പഴശ്ശി രാജാവ് ബ്രിട്ടീഷ് സാമ്രാജ്യത്വ പടയാളികളോട് ഏറ്റുമുട്ടി രക്തസാക്ഷിത്വം വരിച്ചത്. വയനാട്ടിലെ പുൽപ്പള്ളി കാടുകൾക്കടുത്ത് കങ്കാറാ പുഴയുടെ കരയിൽവച്ചാണ് പഴശ്ശി വെടിയേറ്റ് കൊല്ലപ്പെടുന്നത്. 1795 മുതൽ 1805 വരെ പത്തുവർഷക്കാലം നീണ്ടുനിന്ന പഴശ്ശിരാജാവിന്റെ നേതൃത്വത്തിലുള്ള കോളനി വിരുദ്ധ പോരാട്ടങ്ങൾക്ക് ഇതോടെ അന്ത്യം കുറിക്കപ്പെട്ടു.

പഴശ്ശിയുടെ പോരാട്ടത്തിൽ പഴയ കോട്ടയം രാജ്യത്തിലെ നാനതരത്തിലുള്ള ജാതി മത വിഭാഗത്തിലുള്ള ജനങ്ങൾ അണിനിരന്നു. കേരള വർമ പഴശ്ശി നാടിന്റെ ചരിത്രത്തിലേക്ക് വരുന്നത് ടിപ്പുവിനെതിരെ നടത്തിയ പോരാട്ടത്തിലൂടെയാണ്. ടിപ്പുവിന്റെ പിതാവ് മൈസൂർ സുൽത്താനായിരുന്ന ഹൈദരാലി 1766 ൽ മലബാറിനെ ആക്രമിച്ചു. ആ സമയത്ത് മലബാറിലെ രാജാക്കൻമാരും നായർ പ്രഭുക്കൻമാരുമെല്ലാം കാടുകളിലേക്കും മലബാറിലേക്കും പലായനം ചെയ്തു. 1782 ൽ പിതാവിന്റെ മരണത്തിന് ശേഷം ടിപ്പു മൈസൂർ സുൽത്താനായി. ടിപ്പുവിന്റെ നേതൃത്വത്തിൽ മലബാറിൽ മുമ്പത്തേതിലും കടുത്ത ആക്രമണം നടന്നു. ഇത് മലബാറിലെ ജനങ്ങളെ ഭയചകിതരാക്കി. കോട്ടയത്തെ മൂത്തതമ്പുരാനും രാജാവുമായിരുന്ന രവി വർമ നാടുവിട്ട് തിരുവിതാംകൂറിലേക്ക് പലായനം ചെയ്തു.

ടിപ്പുവിന്റെ ആക്രമണത്തെ ചെറുക്കാൻ ആരും തയ്യാറാവാത്ത ഘട്ടത്തിലാണ് കോട്ടയം രാജവംശത്തിലെ ഇളമുറ തമ്പുരാനായ, രാജവംശത്തിലെ താവഴികളിലൊന്നായ പഴശ്ശി പടിഞ്ഞാറെ കോവിലകത്തെ ഇളമുറ തമ്പുരാനായ കേരളവർമ തന്റെ 21ാം വയസിൽ ടിപ്പുവിനെതിരെ പോരാട്ടം നയിക്കാൻ മുന്നിട്ടിറങ്ങുന്നത്. ദക്ഷിണേന്ത്യയെയും ബ്രിട്ടീഷ് ഈസ്റ്റ് ഇന്ത്യാ കമ്പനിയെയും ഞെട്ടിവിറപ്പിച്ച പോരാളിയെ നേരിടാൻ തനിക്ക് ഒറ്റയ്ക്ക് കഴിയില്ലെന്ന് പഴശ്ശിക്ക് വ്യക്തമായിരുന്നു. ടിപ്പുവിനെ തോൽപ്പിക്കാനായി പഴശ്ശി ഈസ്റ്റ് ഇന്ത്യാ കമ്പനിയുടെ സഹായം തേടുന്നത് ഇങ്ങനെയാണ്. ടിപ്പുവിനെ തോൽപ്പിക്കേണ്ടത് കമ്പനിയുടെയും ആവശ്യമായിരുന്നു. അങ്ങനെയാണ് പഴശ്ശി കേരള വർമയും ഈസ്റ്റ് ഇന്ത്യാ കമ്പനിയും തമ്മിൽ സഖ്യമുണ്ടാവുന്നത്. ഇവരുടെ സൈനിക നീക്കം 1792 ൽ ടിപ്പുവിനെ മൂന്നാം മൈസൂർ യുദ്ധത്തിൽ പരാജയപ്പെടുത്തി.

എന്നാൽ ഇതോടെ കമ്പനിയുടെ അധികാര പരിധിയിലായി കോട്ടയം ഭരണം. എന്നാൽ ഇതിൽ പഴശ്ശിക്ക് താൽപര്യമില്ലായിരുന്നു. തുടക്കത്തിൽ കമ്പനിയുമായി സഹകരിച്ച് പോവൻ തയ്യാറായെങ്കിലും കോട്ടയം രാജ്യത്ത് നിന്നും ദത്ത് പോയ തന്റെ അമ്മാവൻ കൂടിയായ വീരവർമ രാജാവിന് കോട്ടയം രാജ്യത്തിന്റെ നികുതി പിരിച്ച് നൽകാൻ കരാർ ഒപ്പിട്ടതോടെ പഴശ്ശി കമ്പനിക്കെതിരെ യുദ്ധം പ്രഖ്യാപിച്ചു.

കൈതേരി അമ്പു, പള്ളൂരെമ്മൻ, കണ്ണവത്ത് നമ്പ്യാർ, എടച്ചേന കുങ്കൻ, തലക്കൽ ചന്തു തുടങ്ങി വയനാട്ടിലും കോട്ടയത്തുമെല്ലാമുള്ള നാട്ടുപ്രമാണികളുടെ നേതൃത്വത്തിൽ ജനങ്ങൾ കമ്പനിക്കെതിരെ തിരിഞ്ഞു. ഈ സമയത്ത് പഴശ്ശിയെ കീഴ്പ്പെടുത്താനായി കമ്പനിസൈന്യം തലശേരിയിൽ നിന്നും പഴശ്ശിയിലേക്ക് മാർച്ച് ചെയ്തു. കൊട്ടാരം തകർത്ത് സ്വർണവും പണവും സമ്പത്തും കവർന്നെങ്കിലും പഴശ്ശിയെ പിടികൂടാനായില്ല.
തുടർന്ന് കുറിച്യ പടയാളികളെ സംഘടിപ്പിച്ച് പഴശ്ശി വയനാട്ടിൽ നിന്നും കമ്പനിക്കെതിരെ ഒളിപ്പോർ യുദ്ധം നയിച്ചു. പത്ത് വർഷക്കാലം നീണ്ടുനിന്ന ഈ പോരാട്ടത്തിലാണ് കമ്പനിക്ക് എറ്റവും കൂടുതൽ ആളും, അർഥവും, ആയുധങ്ങളും നഷ്ടപ്പെടുന്നത്. യുദ്ധത്തിന്റെ ഒരുഘട്ടത്തിൽ കേണൽ ആർതർ വെല്ലസ്ലിയെ പഴശ്ശിയെ കീഴ്പ്പെടുത്താനായി കമ്പനി നിയോഗിക്കുന്നു. തുടർന്നുള്ള യുദ്ധത്തിലാണ് 1805 നവംബർ 30 ന് ബ്രിട്ടീഷ് സൈന്യം പഴശ്ശിയെ കൊലപ്പെടുത്തുന്നത്.

ബ്രിട്ടീഷ് കോളനി വാഴ്ചയ്ക്കും വൈദേശികാധിപത്യത്തിനുമെതിരെ പഴശ്ശി നയിച്ച പോരാട്ടം ചരിത്രത്തിന്റെ ഏടുകളിൽ തങ്കലിപികളാൽ കുറിക്കപ്പെടേണ്ടവയാണ്. പലകാരണങ്ങൾ കൊണ്ടും പഴശ്ശിയുടെ പോരാട്ടവും, ചരിത്രവും വിശദമായ ചരിത്ര വിശകലനത്തിന് പാത്രമായിട്ടില്ല. വീരകേരള വർമ പഴശ്ശി രാജാവിന്റെ 217ാമത് രക്തസാക്ഷിത്വ ദിനത്തിൽ ആ പോരാട്ടങ്ങളെ സ്മരിച്ചുകൊണ്ട്. കൂടുതൽ വിശദമായ ചരിത്രവായനകൾക്ക് പഴശ്ശിയേയും അദ്ദേഹത്തിന്റെ പോരാട്ടങ്ങളെയും നമുക്ക് ചേർത്ത് നിർത്താം.

തിരുവനന്തപുരം: സംസ്ഥാനത്തെ പച്ചക്കറി വിലയിൽ വീണ്ടും വർധനവ്. തക്കാളിക്ക് ഉൾപ്പെടെ വലിയ വില വർധനവാണ് രേഖപ്പെടുത്തിയിരിക്കുന്നത്. അറുപതു രൂപയിലേക്ക് താഴ്ന്ന ഒരു കിലോ തക്കാളിയ്ക്ക് ഇപ്പോൾ നൂറു രൂപയിലധികമാണ് വില. അയൽ സംസ്ഥാനങ്ങളിലെ മഴക്കെടുതിയാണ് വിലക്കയറ്റത്തിന്റെ കാരണമെന്നാണ് വ്യാപാരികൾ പറയുന്നത്.

നേരത്തെ സർക്കാർ ഇടപെട്ട് ഇതര സംസ്ഥാനങ്ങളിൽ നിന്നും പച്ചക്കറി നേരിട്ടെത്തിച്ചതോടെ വിലയിൽ കുറവ് രേഖപ്പെടുത്തിയിരുന്നു. മറ്റ് സംസ്ഥാനങ്ങളിൽ നിന്നും ഹോർട്ടികോർപ്പ് നേരിട്ട് പച്ചക്കറി വാങ്ങി വിൽപ്പന ആരംഭിച്ചതിന് പിന്നാലെയാണ് വില കുറയാൻ തുടങ്ങിയത്. എന്നാൽ തിരുവനന്തപുരത്ത് ഉൾപ്പെടെ ഇന്ന് തക്കാളി വില നൂറു രൂപ കടക്കുകയായിരുന്നു. തിരുവനന്തപുരം പാളയം മാർക്കറ്റിൽ മുരിങ്ങക്കയ്ക്ക് 200 രൂപയും വെണ്ടയ്ക്കക്ക് 60 രൂപയും പാവയ്ക്കയ്ക്ക് 80 രൂപയുമാണ് വില.

അതേസമയം കോഴിക്കോട് ജില്ലയിലും പച്ചക്കറി വില ഉയരുകയാണ്. വില കുത്തനെ കൂടിയെങ്കിലും പിടിച്ചുനിർത്താനുള്ള ശ്രമം ഹോർട്ടികോർപ്പ് തുടരുന്നുണ്ട്. കഴിഞ്ഞ തിങ്കളാള്ച മുതൽ ശരാശരി 80 ടൺ പച്ചക്കറി തമിഴ്‌നാട്ടിൽ നിന്നും കർണാടകത്തിൽ നിന്നുമായി ഹോർട്ടികോർപ്പ് കേരളത്തിലെത്തിക്കുന്നുണ്ട്. തക്കാളിക്ക് 56 രൂപയും, മുരിങ്ങയ്ക്കിക്ക് 89 രൂപയും വെണ്ടക്കയ്ക്ക് 31 രൂപയുമാണ് തിരുവനന്തപുരത്തെ ഇന്നത്തെ ഹോർട്ടികോർപ്പ് വില. ഇതേ നിരക്കിൽ വിൽപ്പന തുടരാനും കൂടുതൽ ലോഡ് എത്തിക്കാനുമാണ് ഹോർട്ടികോർപ്പിന്റെ പദ്ധതി.

കോഴിക്കോട്: തെരുവുനായക്കുഞ്ഞുങ്ങളെ ദത്തെടുക്കാൻ സൗകര്യമൊരുക്കി കോഴിക്കോട് കോർപ്പറേഷൻ. ടാഗോർ ഹാളിൽ ദത്തെടുക്കൽ ക്യാമ്പ് സംഘടിപ്പിച്ചിരിക്കുകയാണ് കോഴിക്കോട് കോർപ്പറേഷൻ.

‘ബൗ..ബൗ..ഫെസ്റ്റ്’ എന്ന പേരിലാണ് കോഴിക്കോട് കോർപ്പറേഷൻ ക്യാമ്പ് നടത്തിയത്. ക്യാമ്പിൽ വെച്ച് അമ്പതോളം തെരുവുനായക്കുഞ്ഞുങ്ങളെ കോർപ്പറേഷൻ ആവശ്യക്കാർക്കു കൈമാറി. പേവിഷബാധയ്‌ക്കെതിരായ പ്രതിരോധ കുത്തിവെപ്പെടുത്ത നായക്കുട്ടികളെയാണ് ആവശ്യക്കാർക്ക് കൈമാറിയത്. താത്പര്യമുള്ളവർക്ക് രജിസ്‌ട്രേഷനുള്ള സൗകര്യം മുൻകൂട്ടി ഒരുക്കിയിരുന്നു. ഇഷ്ടപ്പെട്ട നായക്കുട്ടികളെ തെരഞ്ഞെടുത്ത ശേഷം ഡോക്ടർമാർ ഇവയെ പരിശോധിച്ച് നിർദേശങ്ങൾ നൽകി. വാക്‌സിൻ സ്വീകരിക്കാൻ പ്രായമായ എല്ലാ നായക്കുട്ടികൾക്ക് കുത്തിവയ്പ്പ് നൽകുകയും ചെയ്തു.

നായക്കുട്ടികളെ കൈപ്പറ്റുന്നവർ ലൈസൻസ് ഉൾപ്പെടെ നിയമപരായ എല്ലാ നിബന്ധനകളും പാലിക്കണമെന്നാണ് അധികൃതർ നൽകുന്ന നിർദ്ദേശം. ഇവയുടെ പരിപാലനവും വളർച്ചയും നിശ്ചിത ഇടവേളകളിൽ അധികൃതർ പരിശോധിച്ച് വിലയിരുത്തുന്നതായിരിക്കും. തെരുവ് നായ്ക്കളുടെ വന്ധ്യംകരണത്തിനായി കോർപറേഷന്റെ നേതൃത്വത്തിൽ പൂളക്കടവിൽ രണ്ടു വർഷമായി ആനിമൽ ബർത്ത് കൺട്രോൾ (എ.ബി.സി) ആശുപത്രി പ്രവർത്തിക്കുന്നുണ്ട്.

അതേസമയം തെരുവുനായ ശല്യം ഒഴിവാക്കാൻ സാധിക്കുന്നതെല്ലാം ചെയ്യുമെന്ന് മേയർ ബീന ഫിലിപ്പ് ഉറപ്പു നൽകിയിരുന്നു. ഇതിന്റെ ആദ്യപടി ആയാണ് ബൗ ബൗ ഫെസ്റ്റ് സംഘടിപ്പിച്ചത്. മൃഗസംരക്ഷണ രംഗത്തെ വിവിധ സന്നദ്ധ സംഘടനകളുടെ സഹകരണത്തോടെയാണ് ക്യാമ്പ് സജ്ജമാക്കിയത്.