ചെന്നൈ: കേരളത്തിലെ കോവിഡ് വ്യാപനത്തിൽ കുറവു വന്ന സാഹചര്യത്തിൽ കൂടുതൽ ഇളവുകൾ നൽകി തമിഴ്നാട്. കേരളത്തിൽ നിന്ന് തമിഴ്നാട്ടിലേക്കും തിരിച്ചും തമിഴ്നാട് പൊതുഗതാഗതം അനുവദിച്ചു.
എല്ലാ മാസവും തമിഴ്നാട് സർക്കാർ കോവിഡ് അവലോകനം നടത്താറുണ്ട്. ചൊവ്വാഴ്ച നടത്തിയ അവലോകന യോഗത്തിലാണ് ഇതുസംബന്ധിച്ച തീരുമാനം ഉണ്ടായത്. തമിഴ്നാട്ടിൽ ലോക്ക് ഡൗൺ ഡിസംബർ 15 വരെ നീട്ടാനും തീരുമാനമായി.
കോയമ്പത്തൂരിൽ നിന്നും കന്യാകുമാരിയിൽ നിന്നും മറ്റുമുള്ള ആളുകളാണ് കേരളത്തിലേക്ക് നിത്യേന ബസിൽ പോയി വരുന്നത്. ഇവർക്കെല്ലാം പുതിയ നടപടി ആശ്വാസകരമാണ്. കേരളത്തിൽ കോവിഡ് വ്യാപനം അതിരൂക്ഷമായതോടെയാണ് കേരളത്തിലേക്കും തിരിച്ചുള്ളതുമായ ബസ് സർവീസുകൾ തമിഴ്നാട് തൽക്കാലികമായി നിർത്തിവെച്ചത്.
അതേസമയം കേരളത്തിലേക്കുള്ള ബസ് സർവീസ് പുനഃരാരംഭിക്കാൻ തമിഴ്നാട് സർക്കാർ അനുമതി നൽകിയതിനെ തുടർന്ന് കെഎസ്ആർടിസി ബുധനാഴ്ച (ഡിസംബർ 1 ) മുതൽ തമിഴ്നാട്ടിലേക്ക് സർവ്വീസ് ആരംഭിക്കുമെന്ന് ഗതാഗതമന്ത്രി ആന്റണി രാജു വ്യക്തമാക്കി. ശബരിമല തീർഥാടനത്തോടനുബന്ധിച്ചും സാധാരണക്കാരുടെ യാത്രാ ബുദ്ധിമുട്ടുകൾ പരിഗണിച്ചും ബസ് സർവ്വീസുകൾ പുനരാരംഭിക്കാനുള്ള സാഹചര്യം ഒരുക്കണമെന്ന കേരളത്തിന്റെ ആവശ്യം പരിഗണിച്ചാണ് ബസ് സർവീസുകൾക്ക് ഏർപ്പെടുത്തിയിരുന്ന നിയന്ത്രണം തമിഴ്നാട് പിൻവലിച്ചത്.