General (Page 1,260)

ആലപ്പുഴ: കെപിഎസിയുടെ മുദ്ര ആലേഖനം ചെയ്ത സ്തൂപം പൊളിച്ചു മാറ്റി. ദേശീയപാതാ വികസനത്തിന്റെ ഭാഗമായാണ് സ്തൂപം പൊളിച്ചുമാറ്റിയത്. 42 വർഷങ്ങൾക്ക് മുൻപാണ് കായംകുളത്ത് കെപിഎസി ആസ്ഥാനത്തിനു മുൻവശത്തായി സ്തൂപം സ്ഥാപിച്ചത്. ദേശീയപാതയിലൂടെ കടന്നുപോകുന്നവർക്കു കാണാവുന്ന രീതിയിലാണ് സ്തൂപം സ്ഥാപിച്ചിരുന്നത്. കെപിഎസി ആസ്ഥാനത്തിനു മുന്നിൽ ഈ സ്തൂപം മാത്രമാണ് ഉണ്ടായിരുന്നത്.

മലയാറ്റൂർ രാമകൃഷ്ണനാണ് മുദ്ര രൂപകൽപ്പന ചെയ്തത്. കേശവൻകുട്ടി എന്ന ശില്പിയാണ് മുദ്ര ആലേഖനം ചെയ്തു സ്തൂപം നിർമിച്ചത് കോൺക്രീറ്റ് സ്തൂപത്തിൽ പ്രത്യേക കൂട്ടുചേർത്താണ് മുദ്ര ആലേഖനം ചെയ്തത്.

30 സെന്റ് സ്ഥലമാണ് കെപിഎസിക്കുള്ളത്. ഇതിൽ 10 സെന്റ് സ്ഥലമാണ് ദേശീയപാതാ വികസനത്തിനായി ഏറ്റെടുക്കുന്നത്. പ്രധാന കെട്ടിടത്തിന്റെ ഒരു ഭാഗവും ഓഡിറ്റോറിയത്തിന്റെ മുൻഭാഗവും പുതിയ കെട്ടിടവും പൊളിച്ചുമാറ്റും. ദേശീയപാത വികസനത്തിനായി ഗതകാല സ്മരണകൾ ഉണർത്തി നിലകൊണ്ടിരുന്ന കെ.പി.എസിയുടെ പ്രധാന സ്തൂപം പൊളിച്ചു മാറ്റിയത് വൈകാരിക നിമിഷമായിരുന്നുവെന്നാണ് കെ.പി.എ.സി സെക്രട്ടറി അഡ്വക്കറ്റ് ഷാജഹാൻ പ്രതികരിച്ചത്. എന്നാൽ അനിവാര്യമായ ദേശീയപാതാ വികസനത്തിന് ഇത് പൊളിച്ചു മാറ്റേണ്ടത് ഏറ്റവും ആവശ്യകത ആണെന്നും അദ്ദേഹം വ്യക്തമാക്കി.

തിരുവനന്തപുരം: യൂത്ത് കോൺഗ്രസ് നേതാവ് കൊലപ്പെടുത്തിയ എസ്.എഫ്.ഐ പ്രവർത്തകൻ ധീരജിന് വീടിനോട് ചേർന്ന് അന്ത്യവിശ്രമം ഒരുക്കാൻ സിപിഎം. ധീരജിന്റെ വീടിനടുത്തുള്ള എട്ട് സെന്റ് സ്ഥലം ഇതിനായി സിപിഎം വില കൊടുത്തു വാങ്ങി. ധീരജിന്റെ മൃതദേഹം സംസ്‌കരിക്കുന്നത് ഈ വസ്തുവിലായിരിക്കും. ഇവിടെ ധീരജിന്റെ സ്മാരകം നിർമ്മിക്കണമെന്നാണ് പാർട്ടി പദ്ധതിയിടുന്നത്.

ധീരജിന്റെ കൊലപാതകത്തിൽ പ്രതിഷേധിച്ച് ചൊവ്വാഴ്ച്ച നാല് മണിക്ക് ശേഷം തളിപ്പറമ്പിൽ സി.പി.എം ഹർത്താൽ പ്രഖ്യാപിച്ചു. ധീരജിന്റെ കൊലപാതകത്തിൽ പ്രതിയായ യൂത്ത് കോൺഗ്രസ് നേതാവ് നിഖിൽ പൈലി പോലീസിനോട് കുറ്റം സമ്മതിച്ചു. ധീരജിനെ കൊന്നത് താൻ തന്നെയാണെന്ന് നിഖിൽ പോലീസിന്റെ ചോദ്യം ചെയ്യലിൽ കുറ്റസമ്മതം നടത്തി. കേസിൽ കോളേജിലെ കെഎസ്‌യു പ്രവർത്തകരായ ആറു പേരെയാണ് പോലീസ് കസ്റ്റഡിയിലെടുത്തത്.

ഇടുക്കി എഞ്ചിനിയറിംഗ് കോളേജിലെ അവസാന വർഷ വിദ്യാർത്ഥിയും, എസ്.എഫ്.ഐ യൂണിറ്റ് കമ്മിറ്റി അംഗവുമാണ് ധീരജ്. തിങ്കളാഴ്ച്ച കോളേജിൽ യൂണിയൻ തിരഞ്ഞെടുപ്പ് നടക്കുന്നതിനിടെയാണ് ധീരജിന് കുത്തേറ്റത്. ആക്രമണത്തിൽ മൂന്നു പേർക്ക് പരിക്കേൽക്കുകയും ചെയ്തിട്ടുണ്ട്. സംഭവത്തിൽ പ്രതിഷേധിച്ച് ചൊവ്വാഴ്ച്ച എസ്എഫ്‌ഐ സംസ്ഥാന വ്യാപക പണിമുടക്കിന് ആഹ്വാനം ചെയ്തിട്ടുണ്ട്.

തിരുവനന്തപുരം: എസ്എഫ്‌ഐ പ്രവർത്തകൻ ധീരജ് രാജേന്ദ്രന്റെ കൊലപാതകം അത്യന്തം വേദനാജനകമാണെന്ന് മന്ത്രി എം വി ഗോവിന്ദൻ മാസ്റ്റർ. കേരളത്തിന്റെ കലാലയ മുറ്റത്ത് ഒരു എസ്എഫ്‌ഐ പ്രവർത്തകന് കൂടി ജീവൻ നഷ്ടമായിരിക്കുന്നുവെന്ന് അദ്ദേഹം പറഞ്ഞു. ഫേസ്ബുക്കിൽ പങ്കുവെച്ച കുറിപ്പിലൂടെയായിരുന്നു അദ്ദേഹത്തിന്റെ പ്രതികരണം.

പഠിക്കാനും പോരാടാനുമുള്ള മനുഷ്യപക്ഷ രാഷ്ട്രീയം തെരഞ്ഞെടുത്തവരെ കപട സമാധാനത്തിന്റെ വാഗ്‌ധോരണികൾക്ക് ജയിക്കാനാവില്ലെന്ന വേവലാതിയിൽ നിന്നാണ് കൈയിൽ എക്കാലവും അവർ ഒളിച്ചുകൊണ്ടുനടന്ന കഠാരമുന ഒരിക്കൽക്കൂടി പുറത്തെടുത്തതെന്ന് അദ്ദേഹം വ്യക്തമാക്കി.

എസ്എഫ്‌ഐയുടെ സർഗാത്മക രാഷ്ട്രീയത്തെ എതിരിടാൻ ശേഷിയില്ലാതെ, ആയുധം കൊണ്ട് നേരിടാൻ തുനിയുന്ന കെഎസ്യു – യൂത്ത് കോൺഗ്രസ് കാടത്തമാണിത്. ചോരക്കൊതിയുടെ ഈ കഠാര രാഷ്ട്രീയം പുരോഗമന സമൂഹത്തിന് യോജിച്ചതല്ല. ഇവരെ സമൂഹം ഒറ്റപ്പെടുത്തും. കുറ്റവാളികളെ ഉടൻ നിയമത്തിന് മുന്നിൽ കൊണ്ടുവരുന്നതിനുള്ള കർശന നടപടികൾ സ്വീകരിക്കുമെന്നും അദ്ദേഹം അറിയിച്ചു. ധീര രക്തസാക്ഷിക്ക് അന്ത്യാഭിവാദ്യങ്ങൾ അർപ്പിക്കുന്നുവെന്നും അദ്ദേഹം കൂട്ടിച്ചേർത്തു.

ഫേസ്ബുക്ക് കുറിപ്പിന്റെ പൂർണ്ണരൂപം:

കേരളത്തിന്റെ കലാലയ മുറ്റത്ത് ഒരു എസ്എഫ്‌ഐ പ്രവർത്തകന് കൂടി ജീവൻ നഷ്ടമായിരിക്കുന്നു. പഠിക്കാനും പോരാടാനുമുള്ള മനുഷ്യപക്ഷ രാഷ്ട്രീയം തെരഞ്ഞെടുത്തവരെ കപട സമാധാനത്തിന്റെ വാഗ്‌ധോരണികൾക്ക് ജയിക്കാനാവില്ലെന്ന വേവലാതിയിൽ നിന്നാണ് കൈയിൽ എക്കാലവും അവർ ഒളിച്ചുകൊണ്ടുനടന്ന കഠാരമുന ഒരിക്കൽക്കൂടി പുറത്തെടുത്തത്.

അത്യന്തം വേദനാജനകവും പ്രതിഷേധാർഹവുമായ നിമിഷമാണിത്. ഇടുക്കി എഞ്ചിനീയറിംഗ് കോളേജിലെ എസ്എഫ്‌ഐ പ്രവർത്തകനായ സഖാവ് ധീരജിനെയാണ് കെഎസ്യു – യൂത്ത് കോൺഗ്രസ് ക്രിമിനലുകൾ കൊലപ്പെടുത്തിയത്. ധീരജ് തളിപ്പറമ്പ് പാലക്കുളങ്ങര സ്വദേശിയാണ്.
എസ്എഫ്‌ഐയുടെ സർഗാത്മക രാഷ്ട്രീയത്തെ എതിരിടാൻ ശേഷിയില്ലാതെ, ആയുധം കൊണ്ട് നേരിടാൻ തുനിയുന്ന കെഎസ്യു – യൂത്ത് കോൺഗ്രസ് കാടത്തമാണിത്.

ചോരക്കൊതിയുടെ ഈ കഠാര രാഷ്ട്രീയം പുരോഗമന സമൂഹത്തിന് യോജിച്ചതല്ല. ഇവരെ സമൂഹം ഒറ്റപ്പെടുത്തും. കുറ്റവാളികളെ ഉടൻ നിയമത്തിന് മുന്നിൽ കൊണ്ടുവരുന്നതിനുള്ള കർശന നടപടികൾ സ്വീകരിക്കും.

ധീര രക്തസാക്ഷിക്ക് അന്ത്യാഭിവാദ്യങ്ങൾ.

മലപ്പുറം: കോണിപ്പടിയില്ലാതെ സ്‌കൂൾ കെട്ടിടത്തിൽ ഒന്നാംനില നിർമ്മിച്ചത് വിവാദമായതിന് പിന്നാലെ പ്രത്യേക ഫണ്ട് അനുവദിച്ച് പഞ്ചായത്ത്. ചോക്കാട് പഞ്ചായത്താണ് സ്‌കൂളിനായി പ്രത്യേക ഫണ്ട് അനുവദിച്ചത്. മാളിയേക്കൽ ജിയുപി സ്‌കൂളിലാണ് കോണിപ്പടിയില്ലാതെ ഒന്നാംനില നിർമിച്ചത്. ഇത് വലിയ വിവാദങ്ങൾക്കും വിമർശനങ്ങൾക്കും ഇടയാക്കിയിരുന്നു.

ക്ലാസ് മുറികളുടെ അപര്യാപ്തത പരിഹരിക്കാൻ നാട്ടുകാർ ഫുട്‌ബോൾ ടൂർണമെന്റ് സംഘടിപ്പിച്ചും പിരിവെടുത്തും സ്വരൂപിച്ച പണമാണ് കെട്ടിട നിർമ്മാണത്തിനായി പഞ്ചായത്തിന് നൽകിയത്. നാലു ലക്ഷം രൂപയാണ് നാട്ടുകാർ പഞ്ചായത്തിനു കൈമാറുകയത്. നിർമാണം പൂർത്തിയായ ക്ലാസ് മുറികളിലേക്ക് കയറിപ്പറ്റാൻ കഴിയാത്ത അവസ്ഥയിൽ പ്ലാനും എസ്റ്റിമേറ്റും തയ്യാറാക്കിയത് കാരണമാണ് കോണിപ്പടിയില്ലാതെ സ്‌കൂൾ കെട്ടിടത്തിൽ ഒന്നാം നില നിർമ്മിച്ചത്. എസ്റ്റിമേറ്റ് പ്രകാരമുള്ള പണിയാണ് കരാറുകാരൻ പൂർത്തിയാക്കിയത്. പഞ്ചായത്ത് ഫണ്ട് അഞ്ചു ലക്ഷം രൂപ ഉൾപ്പെടെ ഒൻപതു ലക്ഷത്തോളം രൂപ മുടക്കിയാണ് രണ്ടു ക്ലാസ് മുറികളോടെ ഒന്നാം നിലയുടെ നിർമ്മാണം പൂർത്തിയായത്. എന്നാൽ നിർമ്മാണം പൂർത്തിയായപ്പോഴാണ് ഒന്നാംനിലയിലേക്ക് പോകാൻ കോണിപ്പടിയില്ലെന്ന കാര്യം ശ്രദ്ധിച്ചത്. സംഭവം മാദ്ധ്യമങ്ങളിലും സോഷ്യൽ മീഡിയയിലും ചർച്ചാ വിഷയമായി.

സർക്കാരിനെതിരെയും പഞ്ചായത്തിനെതിരെയും രൂക്ഷ വിമർശനമാണ് ഉയർന്നത്. ലഭ്യമായ ഫണ്ട് ഉപയോഗിച്ചാണ് എഞ്ചിനീയർ എസ്റ്റിമേറ്റ് തയ്യാറാക്കിയത്. ഒരു വർഷത്തിലേറെയായി ഒന്നാം നിലയുടെ നിർമ്മാണം പൂർത്തിയാക്കിയിട്ട്. എന്നാൽ കോവിഡ് കാരണമാണ് കോണിപ്പടിക്ക് വേണ്ടി പ്രത്യേക പദ്ധതി അനുവദിക്കാൻ വൈകിയതെന്ന് അധികൃതർ അറിയിച്ചു. മുൻ ഭരണസമിതിയുടെ കാലത്താണ് ലഭ്യമായ ഫണ്ട് ഉപയോഗിച്ച് എഞ്ചിനീയർ കെട്ടിടം നിർമിക്കാൻ അനുമതി നൽകിയത്. സ്‌കൂൾ കെട്ടിടത്തിൽ കോണിപ്പടി നിർമിക്കുന്നതിന് ഒരു ലക്ഷം രൂപ വകയിരുത്തിയിട്ടുണ്ടെന്നും ടെൻഡർ നടപടികൾ നടന്നുവരികയാണെന്നും പഞ്ചായത്ത് പ്രസിഡന്റ് ചൂരപ്പിലാൻ ഷൗക്കത്ത് അറിയിച്ചു.

കൊച്ചി: സഭാതർക്കം പരിഹരിക്കുന്നതിന് നിയമനിർമാണം നടത്തണമെന്ന ശുപാർശയിൽ തീരുമാനമെടുത്തിട്ടില്ലെന്ന് ഹൈക്കോടതിയെ അറിയിച്ച് സർക്കാർ. ചീഫ് സെക്രട്ടറിയാണ് ഇക്കാര്യം ഹൈക്കോടതിയെ അറിയിച്ചത്. ജസ്റ്റീസ് കെ.ടി തോമസ് കമ്മീഷന്റെ ശുപാർശ മാദ്ധ്യമ വാർത്തകളിൽ കണ്ടെന്നും നിയമം നിർമ്മിക്കുന്നുണ്ടോ എന്നും അറിയിക്കണമെന്നും കോടതി സർക്കാരിനോട് ആവശ്യപ്പെട്ടിരുന്നു. തുടർന്നാണ് ചീഫ് സെക്രട്ടറി കോടതിയിൽ ഇക്കാര്യം വ്യക്തമാക്കിയത്.

ശുപാർശ വിശദമായി പരിശോധിക്കേണ്ടതുണ്ടെന്നാണ് സർക്കാരിന്റെ നിലപാട്. അന്തിമ തീരുമാനമെടുക്കുന്നതിന് വിവിധ തലങ്ങളിൽ വിശദമായ ചർച്ചകൾ ആവശ്യമുണ്ടെന്നും കൂടുതൽ സമയം വേണമെന്നും സർക്കാർ കോടതിയെ അറിയിച്ചു.

അടുത്ത ദിവസം കോടതി സർക്കാർ നൽകി സത്യവാങ്മൂലം പരിശോധിക്കും. കോതമംഗലം ചെറിയപള്ളി സി ആർ പി എഫിന്റെ സഹായത്തോടെ സർക്കാർ ഏറ്റെടുക്കണമെന്ന സിംഗിൾ ബഞ്ചുത്തരവിനെതിരെ സർക്കാരും യാക്കോബായ വിഭാഗം പള്ളി വികാരിയും ഏതാനും ഇടവകാംഗങ്ങളും സമർപ്പിച്ച അപ്പീലുകളാണ് കോടതി പരിഗണിക്കുന്നത്.

ഇടുക്കി: ചൊവ്വാഴ്ച്ച സംസ്ഥാന വ്യാപകമായി എസ്എഫ്‌ഐ പഠിപ്പുമുടക്കും. എസ് എഫ് ഐ പ്രവർത്തകൻ ധീരജിനെ കൊലപ്പെടുത്തിയ സംഭവത്തിൽ പ്രതിഷേധിച്ചാണ് എസ് എഫ് ഐ ചൊവ്വാഴ്ച്ച പഠിപ്പ് മുടക്ക് ആഹ്വാനം ചെയ്തിരിക്കുന്നത്. ഇടുക്കി പൈനാവ് ഗവൺമെന്റ് എൻജിനീയറിംഗ് കോളേജിൽ നടന്ന തിരഞ്ഞെടുപ്പിനെ തുടർന്ന് എസ് എഫ് ഐ – കെ എസ് യു പ്രവർത്തകർ തമ്മിലുണ്ടായ സംഘർഷത്തിലാണ് ധീരജിന് കുത്തേറ്റത്.

ഇടുക്കി എഞ്ചിനിയറിംഗ് കോളേജിലെ അവസാന വർഷ വിദ്യാർത്ഥിയും, എസ്.എഫ്.ഐ യൂണിറ്റ് കമ്മിറ്റി അംഗവുമാണ് ധീരജ്. കണ്ണൂർ പാലകുളങ്ങര സ്വദേശിയായ ധീരജിനെ വാഴത്തോപ്പ് യൂത്ത് കോൺഗ്രസ് മണ്ഡലം പ്രസിഡന്റ് നിഖിൽ പൈലിയാണ് കുത്തിയത്.

സംഭവത്തിന് പിന്നാലെ ഒളിവിൽ പോയ ഇയാളെ പോലീസ് അറസ്റ്റ് ചെയ്തു. തിങ്കളാഴ്ച്ച കോളേജിൽ യൂണിയൻ തിരഞ്ഞെടുപ്പ് നടക്കുന്നതിനിടെയാണ് സംഭവം നടന്നത്. ആക്രമണത്തിൽ മൂന്നു പേർക്ക് പരിക്കേൽക്കുകയും ചെയ്തിട്ടുണ്ട്.