വരാണസി: കാശി വിശ്വനാഥ് ധാം ജീവനക്കാർക്ക് പാദരക്ഷകൾ സമ്മാനമായി നൽകി പ്രധാനമന്ത്രി നരേന്ദ്ര മോദി. 100 ജോഡി പാദരക്ഷകളാണ് ജീവനക്കാർക്ക് വേണ്ടി പ്രധാനമന്ത്രി അയച്ചു നൽകിയത്. ചണം കൊണ്ട് നിർമ്മിച്ച പാദരക്ഷകളാണ് പ്രധാനമന്ത്രി ജീവനക്കാർക്ക് സമ്മാനിച്ചത്.
കാശി വിശ്വനാഥ് ധാം ക്ഷേത്രപരിസരത്ത് തുകൽ അല്ലെങ്കിൽ റബ്ബർ ഉപയോഗിച്ച് നിർമ്മിച്ച പാദരക്ഷകൾ ധരിക്കുന്നതിന് വിലക്ക് ഏർപ്പെടുത്തിയിട്ടുണ്ട്. അതുകൊണ്ട് കാശി വിശ്വനാഥ് ധാമിൽ ജോലി ചെയ്യുന്ന ഭൂരിഭാഗം പേരും ചെരുപ്പില്ലാതെയാണ് തങ്ങളുടെ ജോലി ചെയ്യുന്നത്. ഇക്കാര്യം ശ്രദ്ധയിൽപെട്ടതിന്റെ അടിസ്ഥാനത്തിലാണ് പ്രധാനമന്ത്രി ജീവനക്കാർക്ക് വേണ്ടി ചണം കൊണ്ട് നിർമ്മിച്ച പാദരക്ഷകൾ സമ്മാനമായി നൽകിയത്. പുരോഹിതർ, ജീവനക്കാർ, സുരക്ഷാ ഗാർഡുകൾ, ശുചീകരണ തൊഴിലാളികൾ തുടങ്ങിയവർക്കെല്ലാമായിട്ടാണ് പ്രധാനമന്ത്രി പാദരക്ഷകൾ അയച്ചത്.
കഠിനമായ തണുപ്പിൽ ചെരുപ്പില്ലാതെ ജോലി ചെയ്യേണ്ടതില്ലെന്ന് പ്രധാനമന്ത്രി അറിയിച്ചു. പ്രധാനമന്ത്രിയുടെ സമ്മാനത്തിന് നന്ദി അറിയിച്ച് കാശി വിശ്വനാഥ് ധാമിലെ ജീവനക്കാർ രംഗത്തെത്തിയിട്ടുണ്ട്.