General (Page 1,244)

On:

ന്യൂഡൽഹി: റിപ്പബ്ലിക് ദിനാഘോഷത്തിൽ താരമായി വിരാട് എന്ന കുതിര. റിപ്പബ്ലിക് ദിനാഘോഷത്തിന് ശേഷം പ്രധാനമന്ത്രി നരേന്ദ്ര മോദി നേരിട്ടെത്തി വിരാടിനെ തലോടിയിരുന്നു. ഇതിന്റെ ചിത്രങ്ങൾ സാമൂഹ്യ മാദ്ധ്യമങ്ങളിൽ വൈറലായിരിക്കുകയാണ്. അത്ര നിസാരക്കാരനൊന്നുമല്ല ഈ കുതിര. രാഷ്ട്രപതിയുടെ അംഗരക്ഷക കുടുംബത്തിലെ പ്രധാനിയാണ് വിരാട്. 2003 മുതൽ രാഷ്ട്രപതിയുടെ അംഗരക്ഷക സംഘത്തിൽ സേവനമനുഷ്ഠിച്ചു വരികയായിരുന്ന വിരാട് പത്തൊൻപത് വർഷത്തെ സേവനം പൂർത്തിയാക്കി വിരമിച്ചത് ഇന്നത്തെ റിപ്പബ്ലിക് ദിനാഘോഷ ചടങ്ങുകളിൽ പങ്കെടുത്തുകൊണ്ടാണ്.

റിപ്പബ്ലിക് ദിനാഘോഷങ്ങൾക്കു ശേഷം രാഷ്ട്രപതി രാം നാഥ് കോവിന്ദിനെ തിരികെ രാഷ്ട്രപതി ഭവനിലേക്ക് ആനയിച്ച ശേഷമായിരുന്നു വിരാടിന്റെ വിരമിക്കൽ അധികൃതർ പ്രഖ്യാപിച്ചത്. രാംനാഥ് കോവിന്ദും കുതിരയെ തലോടിയിരുന്നു. ജനുവരി 15-ന് കരസേനാ ദിനത്തിന്റെ ഭാഗമായി വിരാടിന് ചീഫ് ഓഫ് ആർമി സ്റ്റാഫ് കമൻഡേഷൻ എന്ന ബഹുമതി നൽകിയിരുന്നു. ഹോണോവേറിയൻ ഇനത്തിൽപ്പെട്ട കുതിരയാണിത്.

പരേഡിൽ ഏറ്റവും വിശ്വസ്തനായ കുതിരയായിട്ടായിരുന്നു വിരാടിനെ കണക്കാക്കിയിരുന്നത്. പതിമൂന്ന് തവണ രാഷ്ട്രപതിയുടെ അംഗരക്ഷക സംഘത്തിലെ പ്രധാന കുതിരയായി റിപ്പബ്ലിക്ക് ദിനത്തിൽ പങ്കെടുത്തുവെന്ന ബഹുമതിയും വിരാടിനുണ്ട്. 2003 ൽ ഹെംപൂരിലെ റിമൗണ്ട് ട്രെയിനിങ് സ്‌കൂളിൽ നിന്നാണ് വിരാട് രാഷ്ട്രപതിയുടെ അംഗരക്ഷക കുടുംബത്തിൽ ചേർന്നത്. ജനുവരി 15-ന് വിരാടിന് സേന കമൻഡേഷൻ നൽകി ആദരിച്ചിരുന്നു. ഇത്തരത്തിൽ സേനയുടെ കമൻഡേഷൻ ലഭിക്കുന്ന ആദ്യത്തെ കുതിര കൂടിയാണ് വിരാട്. ചാർജർ എന്ന പേരിലായിരുന്നു രാഷ്ട്രപതിയുടെ അംഗരക്ഷാ സേനയിൽ വിരാട് അറിയപ്പെട്ടിരുന്നത്.

On:

ന്യൂഡൽഹി: പത്മഭൂഷൻ ലഭിച്ച ഗുലാം നബി ആസാദിനെ അഭിനന്ദിച്ച് മുതിർന്ന കോൺഗ്രസ് നേതാവ് കബിൽ സിബൽ. ഗുലാം നബി ആസാദിന് അഭിനന്ദനം അറിയിക്കുന്നതായി അദ്ദേഹം പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം. ഗുലാം നബി ആസാദിന്റെ പൊതുരംഗത്തെ സംഭാവനകൾ രാജ്യം തിരിച്ചറിയുമ്പോൾ കോൺഗ്രസിന് അദ്ദേഹത്തിന്റെ സേവനം ആവശ്യമില്ലെന്നത് വിരോധാഭാസമാണെന്നും കബിൽ സിബൽ ട്വിറ്ററിൽ കുറിച്ചു.

കോൺഗ്രസ് നേതൃത്വത്തെയും സംഘടനാ സംവിധാനത്തെയും ചോദ്യം ചെയ്ത് കോൺഗ്രസ് അധ്യക്ഷ സോണിയ ഗാന്ധിക്ക് ജി 23 കോൺഗ്രസ് നേതാക്കളിൽ ഉൾപ്പെട്ടവരാണ് കബിൽ സിബലും ഗുലാം നബി ആസാദും. ജി 23 അംഗങ്ങളിൽ ഉൾപ്പെട്ട നേതാവ് ശശി തരൂരും ഗുലാം നബി ആസാദിനെ അഭിനന്ദിച്ചു. എതിർ ചേരിയിലുളള ഒരു സർക്കാർ അധികാരത്തിൽ ഇരിക്കുമ്പോൾ പൊതുസേവനത്തിന് ഒരാൾ അംഗീകരിക്കപ്പെടുക എന്നു പറയുന്നത് വളരെയധികം അഭിനന്ദനമർഹിക്കുന്നതാണെന്ന് അദ്ദേഹം അറിയിച്ചു.

അതേസമയം ഗുലാം നബി ആസാദ് പത്മഭൂഷൻ സ്വീകരിച്ചതിനെ പരിഹസിച്ച് മുതിർന്ന കോൺഗ്രസ് നേതാവ് ജയ്‌റാം രമേശ് രംഗത്തെത്തി. പത്മഭൂഷൺ നിരസിച്ച സിപിഎം നേതാവ് ബുദ്ധദേവ് ഭട്ടാചാര്യയെ അഭിനന്ദിച്ചുകൊണ്ടുള്ള ട്വീറ്റിലൂടെയായിരുന്നു അദ്ദേഹത്തിന്റെ പരാമർശം. ബുദ്ധദേവ് ചെയ്തത് ശരിയായ കാര്യമാണെന്നും ആസാദ് (സ്വതന്ത്രൻ) ആകാനാണ് അദ്ദേഹം ആഗ്രഹിക്കുന്നത് ഗുലാം (സേവകൻ) ആകാനല്ലെന്നുമായിരുന്നു അദ്ദേഹം അഭിപ്രായപ്പെട്ടത്.

On:

പാലക്കാട്: മകന്റെ കൊലപാതകത്തിൽ നീതി തേടി ഹൈക്കോടതിയെ സമീപിക്കാനൊരുങ്ങി മധുവിന്റെ അമ്മ. അട്ടപ്പാടിയിലെ ആദിവാസി യുവാവ് മധുവിനെ ആൾക്കൂട്ടം തല്ലിക്കൊന്ന കേസിൽ സിബിഐ അന്വേഷണം ആവശ്യപ്പെട്ട് ഹൈക്കോടതിയെ സമീപിക്കാനാണ് മധുവിന്റെ കുടുബത്തിന്റെ തീരുമാനം. കേസിൽ കൂടുതൽ പ്രതികൾ ഉണ്ടെന്നാണ് മധുവിന്റെ കുടുംബം പറയുന്നത്. സർക്കാരും സ്‌പെഷ്യൽ പബ്ലിക് പ്രോസിക്യൂട്ടറും കേസ് സംബന്ധിച്ച് യാതൊരു വിവരവും ഇതുവരെ കുടുംബത്തെ അറിയിച്ചിട്ടില്ലെന്ന ആരോപണവും ഉയരുന്നുണ്ട്.

2018 ഫെബ്രുവരി 22 നാണ് ആൾക്കൂട്ടം ആദിവാസി യുവാവ് മധവിനെ കൊലപ്പെടുത്തിയത്. അട്ടപ്പാടിയിലെ മുക്കാലിയിൽലായിരുന്നു സംഭവം. മോഷണക്കുറ്റമാരോപിച്ചാണ് ആൾക്കൂട്ടം മധുവിനെ കൊലപ്പെടുത്തിയത്. മെയ് 22 ന് കേസിൽ 16 പേരെ പ്രതിയാക്കി പോലീസ് കുറ്റപത്രം നൽകുകയും ചെയ്തു.

എന്നാൽ നാലാം കൊല്ലവും വിചാരണ തുടങ്ങാനാവാത്ത സാഹചര്യത്തിൽ മണ്ണാർക്കാട് എസ്.സി എസ്.ടി കോടതി പബ്ലിക് പ്രോസിക്യൂട്ടർ എവിടെ എന്ന ചോദ്യമുയർത്തയർത്തിയിരുന്നു. സർക്കാർ ചുമതലയേൽപ്പിച്ച വി.ടി.രഘുനാഥ് ആരോഗ്യ കാരണം ചൂണ്ടിക്കാട്ടി സ്ഥാനം ഒഴിയാൻ സന്നദ്ധത അറിയിച്ചതോടെയാണ് മധു കൊലക്കേസ് വിചാരണ പ്രതിസന്ധിയിലായത്. കേസിൽ നിന്നും ഒഴിവാക്കണമെന്നാവശ്യപ്പെട്ട് ഒരാഴ്ച മുമ്പ് വിടി രഘുനാഥ് ഡിജിപിക്ക് കത്ത് നൽകിയെങ്കിലും പകരം സംവിധാനമൊരുക്കിയിട്ടില്ല.

On:

ന്യൂഡൽഹി: പ്രശസ്ത ഗായിക സന്ധ്യ മുഖർജി പത്മശ്രീ അവാർഡ് നിരസിച്ചു. ഡൽഹിയിലെ മുതിർന്ന ഉദ്യോഗസ്ഥനോട് സന്ധ്യ മുഖർജിയുടെ മകൾ സൗമി സെൻഗുപ്തയാണ് പത്മശ്രീ പുരസ്‌കാരം നിരസിക്കുന്നു എന്ന വിവരം അറിയിച്ചത്. സന്ധ്യ മുഖർജിയെ കേന്ദ്ര സർക്കാരിന്റെ ഉദ്യോഗസ്ഥൻ ടെലിഫോണിൽ ബന്ധപ്പെട്ടപ്പോഴാണ് അവാർഡ് നിരസിച്ചതെന്ന് സൗമി സെൻഗുപ്ത വ്യക്തമാക്കി. 90-ാം വയസിൽ പത്മശ്രീ പുരസ്‌കാരത്തിന് തെരഞ്ഞെടുക്കപ്പെടുന്നത് എട്ട് പതിറ്റാണ്ട് നീണ്ട ആലാപന ജീവിതത്തെയും മുഖർജിയെയും അപമാനിക്കുന്നതാണെന്നാണ് സൗമി ഉദ്യോഗസ്ഥരെ അറിയിച്ചത്.

പത്മശ്രീ പുരസ്‌കാരം കൂടുതൽ അർഹിക്കുന്നത് ജൂനിയർ ആർട്ടിസ്റ്റിനാണ് അല്ലാതെ സന്ധ്യ മുഖർജിയ്ക്കല്ല. ഇതിനു പിന്നിൽ രാഷ്ട്രീയപരമായ പ്രശ്‌നങ്ങളൊന്നുമില്ലെന്നും സൗമി പറഞ്ഞു. സന്ധ്യ മുഖർജിയുടെ തീരുമാനത്തെ നിരവധി പേർ പിന്തുണച്ചു. ബംഗാളിലെ പ്രശസ്ത ഗായികയാണ് സന്ധ്യ മുഖർജി. എസ് ഡി ബർമൻ, അനിൽ ബിശ്വാസ്, മദൻ മോഹൻ, റോഷൻ, സലിൽ ചൗധരി തുടങ്ങി നിരവധി പ്രശസ്ത സംഗീത സംവിധായകർക്കു വേണ്ടി സന്ധ്യ ഗാനം ആലപിച്ചിട്ടുണ്ട്. മികച്ച പിന്നണി ഗായികയ്ക്കുള്ള ദേശീയ ചലച്ചിത്ര അവാർഡും, `ബംഗ ബിഭൂഷൺ’ അവാർഡും നേരത്തെ സന്ധ്യ മുഖർജിയ്ക്ക് ലഭിച്ചിട്ടുണ്ട്.

On:

ന്യൂഡൽഹി: 73 -ാം റിപ്പബ്ലിക് ദിനം ആഘോഷിച്ച് രാജ്യം. ഡൽഹിയിലെ രാജ്പഥിൽ പ്രധാനമന്ത്രി നരേന്ദ്ര മോദിയുടെയും രാഷ്ട്രപതി രാംനാഥ് കോവിന്ദിന്റെയും സാന്നിദ്ധ്യത്തിൽ റിപ്പബ്ലിക്ക് ദിന പരേഡ് നടന്നു. റിപ്പബ്ലിക് ദിനാഘോഷങ്ങളുടെ ഭാഗമായി രാഷ്ട്രപതി രാം നാഥ് കോവിന്ദ് സേനാ അംഗങ്ങളുടെ സല്യൂട്ട് സ്വീകരിച്ചു. സൈനിക അഭ്യാസ പ്രകടനങ്ങൾക്കും രാജ്യം സാക്ഷ്യം വഹിച്ചു. ഇന്ത്യയുടെ പ്രതിരോധ രംഗത്തെ കരുത്ത് തെളിയിച്ചു കൊണ്ട് ആയുധങ്ങൾ വഹിച്ചുള്ള ടാങ്കറുകളും പരേഡിൽ പങ്കെടുത്തു.

കോവിഡ് പ്രോട്ടോകോളുകൾ പാലിച്ചാണ് ആഘോഷ ചടങ്ങുകൾ നടന്നത്. കോവിഡ് വ്യാപനത്തിന്റെ പശ്ചാത്തലത്തിൽ ഇത്തവണ റിപ്പബ്ലിക് ദിനാഘോഷത്തിൽ വിശിഷ്ടാതിഥി ഉണ്ടായിരുന്നില്ല. 21 നിശ്ചലദൃശങ്ങളാണ് പരേഡിലുണ്ടായിരുന്നത്. പ്രതിരോധ മന്ത്രി രാജ്നാഥ് സിംഗും സേനാ മേധാവികളും ചടങ്ങിൽ പങ്കെടുത്തു. പത്തരയോടെയാണ് രാജ് പഥിൽ പരേഡ് ആരംഭിച്ചത്. 75 ആകാശയാനങ്ങൾ പങ്കെടുക്കുന്ന ‘ഇന്ത്യൻ എയർഫോഴ്‌സ് ഷോ ഡൗൺ’, രാജ്യത്തിന്റെ വിവിധ ഭാഗങ്ങളിൽ നിന്നായി മത്സരങ്ങൾ നടത്തി തെരഞ്ഞെടുത്ത 480 -ൽ പരം നർത്തകീ നർത്തകന്മാരെ പങ്കെടുപ്പിച്ചു കൊണ്ടുള്ള ‘വന്ദേഭാരതം’ നൃത്തപരിപാടി, എഴുപത്തഞ്ചടി നീളവും പതിനഞ്ചടി വീതിയുമുള്ള ഭീമൻ സ്‌ക്രോളുകൾ അണിനിരക്കുന്ന ‘കലാ കുംഭ്’, എഴുപത്തഞ്ചു വർഷത്തെ സ്വതന്ത്ര ഇന്ത്യയുടെ ചരിത്രം വിശദീകരിക്കുന്ന പ്രൊജക്ഷൻ മാപ്പിംഗ്, സ്‌കൂൾ കുട്ടികളെക്കൊണ്ട് രക്തസാക്ഷികളുടെ കഥ പറയിക്കുന്ന ‘വീർ ഗാഥ’ പരിപാടി, കാണികളുടെ സൗകര്യം കണക്കിലെടുത്തുകൊണ്ട് സ്ഥാപിക്കപ്പെടുന്ന പത്ത് വമ്പൻ LED സ്‌ക്രീനുകൾ, ബീറ്റിങ് റിട്രീറ്റ് ചടങ്ങിൽ പങ്കെടുക്കാൻ അണിനിരക്കുന്ന ആയിരത്തിലധികം ഡ്രോണുകൾ തുടങ്ങിയവയും ചടങ്ങിലുണ്ടായിരുന്നു.

അതേസമയം ഡൽഹിയിൽ അടുത്തിടെ സ്‌ഫോടകവസ്തു കണ്ടെത്തിയ സാഹചര്യത്തിൽ പോലീസ് അതീവ ജാഗ്രത പുലർത്തുന്നുണ്ട്.

On:

ന്യൂഡൽഹി: പത്മശ്രീ പുരസ്‌കാര പട്ടികയിൽ തിളങ്ങി മലയാളികൾ. പി. നാരായണക്കുറുപ്പ് (സാഹിത്യം – വിദ്യാഭ്യാസം), ശങ്കരനാരായണൻ മേനോൻ ചുണ്ടയിൽ (കായികം), ശോശാമ്മ ഐപ്പ് (മൃഗ സംരക്ഷണം), കെ.വി. റാബിയ (സാമൂഹ്യസേവനം) തുടങ്ങിയവരാണ് പത്മശ്രീ പുരസ്‌കാരം ലഭിച്ച മലയാളികൾ. വെച്ചൂർ പശുക്കളുടെ സംരക്ഷണവുമായി ബന്ധപ്പെട്ട പ്രവർത്തനങ്ങൾക്ക് നേതൃത്വം നൽകിയതിനാണ് ഡോ. ശോശാമ്മ ഐപ്പിന് പത്മശ്രീ ലഭിച്ചത്. വെച്ചൂർ പശുക്കളുടെ സംരക്ഷണത്തിനും അവയെപ്പറ്റി കേരളത്തിനകത്തും പുറത്തും ശാസ്ത്രീയമായ അവബോധം വളർത്താനും നേതൃത്വം വഹിച്ച ശാസ്ത്രജ്ഞയാണ് ഡോ. ശോശാമ്മ ഐപ്പ്.

കേരള കാർഷിക സർവ്വകലാശാലയിൽ വിദ്യാർത്ഥി ആയിരിക്കുമ്പോൾ തന്നെ ശോശാമ്മ ഐപ്പ് വെച്ചൂർ പശുക്കളും സംരക്ഷണത്തിനായി പ്രവർത്തിച്ചു തുടങ്ങിയിരുന്നു. കാസർകോഡിന്റെ തനതു ജനുസായ കാസർകോഡ് പശുവിനെയും കോട്ടയത്തെ ചെറുവള്ളി പ്രദേശത്തുള്ള ചെറുവള്ളിപ്പശുവിനെയും സംരക്ഷിക്കാൻ വേണ്ടിയും അവർ പ്രവർത്തിച്ചിരുന്നു. ഔദ്യോഗിക ജീവിതത്തിൽ നിന്ന് വിരമിച്ചെങ്കിലും ഇപ്പോഴും വെച്ചൂർ പശു കൺസർവേഷൻ ട്രസ്റ്റിൽ സജീവമാണ് ശോശാമ്മ.

അംഗവൈകല്യത്തിന്റെ പരിമിതികളെ മറികടന്ന് പൊതുരംഗത്ത് ശ്രദ്ധിക്കപ്പെട്ട വ്യക്തിയാണ് കെ വി റാബിയ. 1990 ൽ കേരള സാക്ഷരതാ മിഷന്റെ പ്രവർത്തനരംഗത്ത് റാബിയയുടെ പങ്ക് വളരെ നിർണായകമാണ്. കോളേജ് വിദ്യാഭ്യാസ കാലത്ത് പോളിയോ പിടിപെട്ടാണ് റാബിയയ്ക്ക് അംഗവൈകല്യം സംഭവിച്ചത്. അംഗവൈകല്യമുള്ള വിദ്യാർത്ഥികൾക്കായി ഇപ്പോൾ റാബിയ വിദ്യാഭ്യാസ സ്ഥാപനം നടത്തുകയാണ്. റാബിയയുടെ ഈ ശ്രമങ്ങൾക്കാണ് രാജ്യം പത്മശ്രീ നൽകി ആദരിച്ചത്. നിശാഗന്ധി, അസ്ത്രമാല്യം, ഹംസധ്വനി, അപൂർണതയുടെ സൗന്ദര്യം, നാറാണത്തു കവിത, കുറുംകവിത എന്നിവ ഉൾപ്പടെ നിരവധി കവിതാസമാഹാരങ്ങൾ അദ്ദേഹം രചിച്ചിട്ടുണ്ട്. 1986 ലും 1990 ലും കേരള സാഹിത്യ അക്കാദമി പുരസ്‌ക്കാരവും 1991ൽ ഓടക്കുഴൽ പുരസ്‌ക്കാരവും 2014ലെ വള്ളത്തോൾ പുരസ്‌ക്കാരവും അദ്ദേഹം നേടിയിട്ടുണ്ട്.

On:

തിരുവനന്തപുരം: ജനങ്ങൾക്ക് റിപ്പബ്ലിക് ദിനാശംസകൾ നേർന്ന് മുഖ്യമന്ത്രി പിണറായി വിജയൻ. ഇന്ത്യയെന്ന ലോകത്തേറ്റവും വലിയ ജനാധിപത്യ രാജ്യത്തിന്റെ സത്ത കുടികൊള്ളുന്ന നമ്മുടെ ഭരണഘടന നിലവിൽ വന്നിട്ട് ഇന്നേക്ക് 73 വർഷം തികയുകയാണെന്ന് മുഖ്യമന്ത്രി പറഞ്ഞു. ഡോ. ബി.ആർ അംബേദ്കർ അഭിപ്രായപ്പെട്ടതു പോലെ ‘ഭരണഘടന കേവലം ഒരു നിയമ പുസ്തകമല്ല. ജീവിതത്തിന്റെ ചാലകശക്തിയാണെന്ന് അദ്ദേഹം വ്യക്തമാക്കി. അതിൽ തുടിക്കുന്നത് ഒരു കാലഘട്ടത്തിന്റെ ആത്മാവാണ്’. മറ്റൊരു രാജ്യത്തും കാണാനാകാത്ത വിധം വിപുലമായ സാംസ്‌കാരിക വൈവിധ്യമുണ്ടായിട്ടും ഇന്ത്യയെന്ന ആശയത്തെ മൂർത്തവൽക്കരിക്കുന്നത് ഭരണഘടനയാണെന്നും അദ്ദേഹം അറിയിച്ചു.

അതിവിശാലമായ ഈ ഭൂപ്രദേശത്തിലെ അന്തേവാസികളെ ഒരു മാലയിലെന്നപോൽ കോർത്തിട്ട പട്ടുനൂലാണ് ഭരണഘടന. അതിന്റെ അന്തഃസത്തയെ തകർക്കാൻ ശക്തമായ ശ്രമങ്ങളാണ് വിഭാഗീയതയിൽ വേരുകളാഴ്ത്തി വളരുന്ന വർഗീയ രാഷ്ട്രീയം ഇന്നു നടത്തിവരുന്നത്. ഫെഡറലിസത്തെ ദുർബലപ്പെടുത്തി സംസ്ഥാനങ്ങളുടെ അധികാരം കവരാൻ നോക്കുകയാണ്. മതേതരത്വത്തിൽ അധിഷ്ഠിതമായ രാഷ്ട്രസങ്കല്പത്തെ തകർത്ത്, അതിനെ ഭൂരിപക്ഷമതത്തിൽ ചേർത്തു വയ്ക്കുകയാണ്. ജനാധിപത്യത്തിന്റെ അർത്ഥം തന്നെ പതുക്കെ ചോർത്തുകയാണ്. ഈ വിപത്തുകൾക്കെതിരെ ഒത്തൊരുമിച്ചുള്ള പോരാട്ടം ജനാധിപത്യവിശ്വാസികളിൽ നിന്നും കരുത്തോടെ ഉയർന്നു വരേണ്ടതുണ്ട്. ഭരണഘടനയുടെ അന്ത:സത്ത നഷ്ടപ്പെട്ടു പോകാതെ കാത്തുസൂക്ഷിക്കുമെന്ന് ഈ റിപ്പബ്ളിക് ദിനത്തിൽ നമുക്ക് പ്രതിജ്ഞ ചെയ്യാമെന്ന് അദ്ദേഹം പറഞ്ഞു.

കോവിഡ് മഹാമാരിയേൽപ്പിച്ച ആഘാതങ്ങളിൽ നിന്നും മുക്തി നേടി നമ്മുടെ സംസ്ഥാനം പുരോഗതിയുടെ പാതയിൽ കൂടുതൽ വേഗത്തിൽ കുതിക്കേണ്ട ഈ ഘട്ടത്തിൽ അത്തരത്തിലുള്ള ഐക്യമനോഭാവം കൂടുതൽ പ്രസക്തമാവുകയാണ്. നാടിന്റെ പുരോഗതിക്കായി കൈകോർത്തു നിൽക്കേണ്ട സമയമാണിത്. ആ ഐക്യത്തിനും പുരോഗതിയുടെ പാതയ്ക്കും തുരങ്കം വയ്ക്കുന്ന വിധ്വംസക ശക്തികളെ തിരിച്ചറിയാനും പരാജയപ്പെടുത്താനും കേരള ജനത ഒറ്റക്കെട്ടായി നിൽക്കുമെന്ന് പൂർണ്ണവിശ്വാസമുണ്ട്. എല്ലാ കുപ്രചാരണങ്ങളെയും തള്ളിക്കളയാനും വ്യാജ പ്രചാരകർക്കും സങ്കുചിത താൽപര്യക്കാർക്കും അർഹിക്കുന്ന മറുപടി നൽകാനുമുള്ള ആർജവം കേരളത്തിലെ ജനങ്ങൾക്കുണ്ട്. വികസനത്തിന്റെ ഗുണഫലങ്ങൾ എല്ലാവരിലും എത്തുമെന്നുറപ്പാക്കേണ്ടതുണ്ട്. അതിനാൽ സാമൂഹിക ഉച്ചനീചത്വങ്ങൾക്ക് അന്ത്യം കുറിക്കാൻ പറ്റാത്ത കാലത്തോളം രാജ്യത്തിന്റെ ഭരണഘടന അതിന്റെ പൂർണ്ണ അർഥത്തിൽ പ്രായോഗികവൽക്കരിക്കപ്പെടുകയില്ല എന്ന യാഥാർഥ്യം മനസ്സിലാക്കി സ്വാതന്ത്ര്യവും സാഹോദര്യവും സമത്വവും കളിയാടുന്ന ഇന്ത്യയ്ക്കായി കൈകോർത്തു മുന്നേറാം. ഏവർക്കും ഹൃദയപൂർവ്വം റിപ്പബ്ലിക് ദിന ആശംസകൾ നേരുന്നുവെന്നും അദ്ദേഹം കൂട്ടിച്ചേർത്തു.

On:

തിരുവനന്തപുരം: സംസ്ഥാനത്തെ റേഷൻ കടകളുടെ പ്രവർത്തന സമയത്തിൽ ഏർപ്പെടുത്തിയിരുന്ന ക്രമീകരണം പിൻവലിച്ചു. ജനുവരി 27 മുതൽ സംസ്ഥാനത്തെ എല്ലാ റേഷൻ കടകളും രാവിലെ 8.30 മുതൽ 12.30 വരെയും വൈകിട്ടു മൂന്നു മുതൽ 6.30 വരെയും പ്രവർത്തിക്കുമെന്നു ഭക്ഷ്യ – സിവിൽ സപ്ലൈസ് മന്ത്രി ജി ആർ അനിൽ അറിയിച്ചു.

റേഷൻ കടകളുടെ പ്രവർത്തന സമയം പകുതി ജില്ലകൾ വീതം ക്രമീകരിച്ചിരുന്നെങ്കിലും റേഷൻ വിതരണത്തെ ഇത് ഒരു തരത്തിലും ബാധിച്ചില്ലെന്നു മന്ത്രി ചൂണ്ടിക്കാട്ടി. ഈ മാസം ജനുവരി 25 വരെ 50,62,323 പേർ (55.13 ശതമാനം) റേഷൻ കൈപ്പറ്റി. ഇന്നലെ മാത്രം വൈകിട്ട് 6.30 വരെ 4,46,440 പേർ റേഷൻ വാങ്ങി. കഴിഞ്ഞ മാസം 25 വരെ 52 ശതമാനം കാർഡ് ഉടമകളാണു റേഷൻ കൈപ്പറ്റിയിരുന്നതെന്ന് മന്ത്രി വ്യക്തമാക്കി.

റേഷൻ സമയം പുനഃസ്ഥാപിക്കുന്നതുമായി ബന്ധപ്പെട്ടു മന്ത്രിയുടെ അധ്യക്ഷതയിൽ ഭക്ഷ്യ – സിവിൽ സപ്ലൈസ് വകുപ്പിലെ ഉന്നത ഉദ്യോഗസ്ഥരുടേയും സാങ്കേതിക വിദഗ്ധരുടേയും യോഗം ഓൺലൈനായി ചേർന്നു. റേഷൻ വിതരണവുമായി ബന്ധപ്പെട്ട സാങ്കേതിക സംവിധാനങ്ങൾക്കു നിലവിൽ യാതൊരു തകരാറുകളും ഇല്ലെന്നും റേഷൻ വിതരണത്തിന് ഏർപ്പെടുത്തിയിരുന്ന സമയ ക്രമീകരണം തുടരേണ്ടതില്ലെന്നും യോഗത്തിൽ സാങ്കേതിക വിദഗ്ധർ അഭിപ്രായപ്പെട്ടു.

ഭക്ഷ്യ-സിവിൽ സപ്ലൈസ് വകുപ്പ് അഡിഷണൽ ഡയറക്ടർ ടിക്കാറാം മീണ, സിവിൽ സപ്ലൈസ് ഡയറക്ടർ ഡോ. ഡി. സജിത് ബാബു, ഐ.ടി. മിഷൻ ഡയറക്ടർ സ്‌നേഹിൽ കുമാർ സിങ്, എൻ.ഐ.സി. ഹൈദരാബാദിന്റെ പ്രതിനിധികൾ തുടങ്ങിയവർ യോഗത്തിൽ പങ്കെടുത്തു.

On:

ന്യൂഡൽഹി: മൊബൈൽ ഫോൺ ഓപ്പറേറ്റിങ് സിസ്റ്റം മേഖലയിൽ വലിയ മാറ്റങ്ങൾക്ക് തയ്യാറെടുത്ത് രാജ്യം. ഇന്ത്യയിൽ തദ്ദേശീയ ഓപ്പറേറ്റിംഗ് സിസ്റ്റം സൃഷ്ടിക്കുന്നതിന് വ്യവസായത്തിന് ഒരു ഇക്കോസിസ്റ്റം സുഗമമാക്കുന്ന നയം കൊണ്ടുവരാനാണ് കേന്ദ്ര സർക്കാരിന്റെ നീക്കം. കേന്ദ്ര ഇലക്ട്രോണിക്‌സ്, ഐടി സഹമന്ത്രി രാജീവ് ചന്ദ്രശേഖറാണ് ഇക്കാര്യം അറിയിച്ചത്. ഗൂഗിളിന്റെ ആൻഡ്രോയിഡിനും ആപ്പിളിന്റെ ഐഒഎസിനും ബദലായി ഇന്ത്യയിൽ തദ്ദേശീയമായി സൃഷ്ടിക്കുന്ന ഓപ്പറേറ്റിംഗ് സിസ്റ്റം ആവിഷ്‌ക്കരിക്കാനാണ് കേന്ദ്രം പദ്ധതിയിടുന്നത്. ആപ്പിൾ, ലാവ, ഫോക്‌സ്‌കോൺ, ഡിക്‌സൺ തുടങ്ങിയവ ഉൾപ്പെടുന്ന വ്യവസായ സ്ഥാപനമായ ഐസിഇഎ തയ്യാറാക്കിയ ഇലക്ട്രോണിക്‌സ് മാനുഫാക്ചറിംഗ് സംബന്ധിച്ച വിഷൻ ഡോക്യുമെന്റിന്റെ രണ്ടാം വാല്യം പ്രകാശനം ചെയ്ത് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ഐടി മന്ത്രി അശ്വിനി വൈഷ്ണവും ചടങ്ങിൽ പങ്കെടുത്തു.

ലോകത്തിലെ മൊബൈൽ മേഖലയെ നിയന്ത്രിക്കുന്നത് ഗൂഗിളിന്റെ ആൻഡ്രോയിഡും ആപ്പിളിന്റെ ഐഒഎസുമാണ്. മൂന്നാമതൊരു മൊബൈൽ ഹാൻഡ്‌സെറ്റ് ഓപ്പറേറ്റിംഗ് സിസ്റ്റം സൃഷ്ടിക്കന്നതിന് കേന്ദ്ര സർക്കാരിന് താത്പര്യമുണ്ടെന്ന് അദ്ദേഹം പറഞ്ഞു. അതിനു കഴിവുള്ള സ്ഥാപനങ്ങളുമായി സർക്കാർ ചർച്ചകളും നടത്തുന്നുണ്ട്. തദ്ദേശീയ ഓപ്പറേറ്റിംഗ് സിസ്റ്റം (ഒഎസ്) വികസിപ്പിക്കുന്നതിന് സ്റ്റാർട്ടപ്പുകളേയും സഹകരിപ്പിക്കാനാണ് കേന്ദ്ര സർക്കാരിന്റെ തീരുമാനം. മൊബൈൽ ഓപ്പറേറ്റിങ് സിസ്റ്റത്തിൻ ഒരു ഇന്ത്യൻ ബ്രാൻഡിന് വളരാൻ കഴിയുമെന്നും അദ്ദേഹം വ്യക്തമാക്കി.

വ്യക്തമായ ലക്ഷ്യങ്ങൾ ഉണ്ടായിരിക്കുക എന്നതാണ് പ്രധാനം. നമുക്ക് വ്യക്തമായ ലക്ഷ്യങ്ങൾ ഉണ്ടെങ്കിൽ നമ്മൾ എന്താണ് നേടേണ്ടത് അപ്പോൾ എല്ലാ നയങ്ങളും പ്രവർത്തനങ്ങളും അതിനോട് പൊരുത്തപ്പെടുമെന്നും അദ്ദേഹം കൂട്ടിച്ചേർത്തു.

On:

ന്യൂഡൽഹി: ഈ വർഷത്തെ പത്മപുരസ്‌കാരങ്ങൾ പ്രഖ്യാപിച്ച് കേന്ദ്ര സർക്കാർ. കുനൂർ ഹെലികോപ്റ്റർ അപകടത്തിൽ കൊല്ലപ്പെട്ട സംയുക്ത സൈനിക മേധാവി ജനറൽ ബിപിൻ റാവത്തടക്കം നാല് പേർക്ക് ഇത്തവണത്തെ പദ്മവിഭൂഷൺ പുരസ്‌കാരം. മുതിർന്ന കോൺഗ്രസ് നേതാവ് ഗുലാം നബി ആസാദിനും മുതിർന്ന സിപിഎം നേതാവ് ബുദ്ധദേബ് ഭട്ടാചാര്യക്കും അടക്കം 17 പേർക്ക് പദ്മഭൂഷൺ പുരസ്‌കാരങ്ങൾ ലഭിക്കും.

പദ്മശ്രീ പുരസ്‌കാരങ്ങളും കേന്ദ്രം പ്രഖ്യാപിച്ചു. 128 പുരസ്‌കാര ജേതാക്കളുടെ പേരുകളാണ് കേന്ദ്ര സർക്കാർ പ്രസിദ്ധീകരിച്ചത്. ബിപിൻ റാവത്തിന് പുറമെ രാധേശ്യാം ഖേംക, കല്യാൺ സിങ്, പ്രഭാ ആത്രെ തുടങ്ങിയവർക്കും പത്മവിഭൂഷൻ ലഭിച്ചു.

107 പർക്കാണ് പത്മശ്രീ പുരസ്‌കാരം ലഭിച്ചിരിക്കുന്നത്. കേരളത്തിൽ നിന്നും നാലു പേർക്ക് പത്മശ്രീ പുരസ്‌കാരം ലഭിച്ചു. കവി പി.നാരായണകുറുപ്പ്, കളരിയാശാൻ ശങ്കരനാരായണ മേനോൻ ചുണ്ടിയിൽ, വെച്ചൂർ പശുക്കളെ സംരക്ഷിക്കുന്ന ശോശാമ്മ ഐപ്പ്, സാമൂഹിക പ്രവർത്തക കെ.വി.റാബിയ എന്നിവർക്കാണ് കേരളത്തിൽ നിന്ന് പത്മശ്രീ പുരസ്‌കാരം ലഭിച്ചത്. ടോക്കിയോ ഒളിമ്പിക്‌സിൽ ഇന്ത്യയ്ക്കു വേണ്ടി ജാവലിൻ ത്രോയിൽ സ്വർണം നേടിയ നീരജ് ചോപ്രയ്ക്കും പത്മശ്രീ നൽകി ആദരിക്കും.