Highlights (Page 88)

On:

തിരുവനന്തപുരം: സംസ്ഥാനത്ത് സ്‌കൂള്‍ പഠന സമയക്രമത്തില്‍ മാറ്റം വേണമെന്ന് ശുപാര്‍ശ ചെയ്യുന്ന ഖാദര്‍ കമ്മിറ്റിയുടെ രണ്ടാം റിപ്പോര്‍ട്ട് സര്‍ക്കാരിന് സമര്‍പ്പിച്ചു.

സ്‌കൂള്‍ പഠന സമയം രാവിലെ 8 മുതല്‍ 1 മണി വരെ ആക്കണമെന്നാണ് ഖാദര്‍ കമ്മിറ്റി റിപ്പോര്‍ട്ടില്‍ പറയുന്നത്. പഠനത്തിന് ഏറ്റവും അനുയോജ്യമായ സമയം രാവിലെയാണെന്നും അതിന് ശേഷമുള്ള സമയം കായിക പഠനം അടക്കമുള്ള മറ്റുളള കാര്യങ്ങള്‍ക്ക് മാറ്റിവെക്കാമെന്നും റിപ്പോര്‍ട്ടിലുണ്ട്.

അതേസമയം, അധ്യാപക പഠനത്തിന് അഞ്ച് വര്‍ഷത്തെ കോഴ്സിനും കമ്മിറ്റി ശുപാര്‍ശ ചെയ്യുന്നുണ്ട്. പ്ലസ് ടുവിന് ശേഷം ടിടിസിക്കും ബിഎഡിനും പകരം അഞ്ച് വര്‍ഷത്തെ ഒറ്റ കോഴ്‌സെന്നതാണ് മുന്നോട്ട് വെക്കുന്ന നിര്‍ദ്ദേശം.

On:

തിരുവനന്തപുരം: പൗരത്വ ഭേദഗതി വിഷയത്തെ വീണ്ടും പൊടി തട്ടിയെടുക്കാനാണ് സംഘപരിവാറിന്റെ ശ്രമമെന്ന് മുഖ്യമന്ത്രി പിണറായി വിജയൻ. പൗരത്വ നിയമത്തെ എതിർക്കുന്ന കാര്യത്തിൽ കേരളം ഒറ്റക്കെട്ടാണെന്ന് അദ്ദേഹം പറഞ്ഞു. ഇടതുപക്ഷം ഇവിടുള്ളിടത്തോളം പൗരത്വ ഭേദഗതി നിയമം ഈ മണ്ണിൽ നടപ്പാവില്ലെന്നും അദ്ദേഹം വാർത്താ സമ്മേളനത്തിൽ അറിയിച്ചു.

ഇക്കഴിഞ്ഞ ഓഗസ്റ്റ് മാസത്തിലാണ് പശ്ചിമ ബംഗാളിലെ പ്രതിപക്ഷ നേതാവുകൂടിയായ ബിജെപി നേതാവ് കേന്ദ്ര ആഭ്യന്തര മന്ത്രിയെ കണ്ട് പൗരത്വ നിയമം എത്രയും പെട്ടെന്ന് നടപ്പാക്കണമെന്നാവശ്യപ്പെട്ടത്. മന്ത്രിയുമായുള്ള ചർച്ചയ്ക്കു ശേഷം മാധ്യമങ്ങളോട് പറഞ്ഞതാണിത്. കോവിഡ് ബൂസ്റ്റർ ഡോസ് പ്രക്രിയ പൂർത്തീകരിച്ചു കഴിഞ്ഞാൽ പൗരത്വ നിയമം നടപ്പാക്കുമെന്ന് കേന്ദ്ര ആഭ്യന്തര മന്ത്രി പറഞ്ഞതായും ദേശീയ മാധ്യമങ്ങൾ റിപ്പോർട്ട് ചെയ്തിരുന്നു. ആ പശ്ചാത്തലത്തിൽ, കണ്ണൂർ ചരിത്ര കോൺഗ്രസ് വിഷയം സാന്ദർഭികമായല്ലാതെ ഉദ്ധരിക്കുന്നത് നിഷ്‌കളങ്കമായി കാണാൻ കഴിയില്ല. ഈ വിഷയത്തിൽ ഒറ്റക്കാര്യമേ പറയാനുള്ളൂ. ന്യൂനപക്ഷങ്ങളെ രണ്ടാം തരം പൗരൻമാരായി കണക്കാക്കുന്ന ഈ നിയമം കേരളത്തിൽ നടപ്പാവില്ല. ഇത് നേരത്തെ പ്രഖ്യാപിച്ചിട്ടുള്ളതാണെന്നും അദ്ദേഹം വ്യക്തമാക്കുന്നു.

വൈദേശിക ആശയം എന്ന പ്രയോഗം അദ്ദേഹം ആവർത്തിക്കുന്നത് കേട്ടു. ഹോമോ സാപ്പിയൻസ് എന്ന നമ്മളൊക്കെ ഉൾപ്പെട്ട ആധുനിക മനുഷ്യഗണം ഭൂമിയിൽ ഉടലെടുക്കുന്നത് ഏകദേശം മൂന്നു ലക്ഷം വർഷങ്ങൾക്കു മുൻപ് ആഫ്രിക്കയിൽ ആണെന്നാണ് ശാസ്ത്രകാരന്മാരുടെ നിഗമനം. പിന്നീട് മറ്റു ഭൂഖണ്ഡങ്ങളിലേയ്ക്ക്കൂടി ചേക്കേറുകയും പതുക്കെ ലോകം മുഴുവൻ വ്യാപിക്കുകയും ആണത്രേ ചെയ്തത്. മനുഷ്യരുടെ ഒരിക്കലും അവസാനിക്കാത്ത യാത്രകളുടേയും ചേക്കേറലുകളുടേയും ചരിത്രമാണ് നമ്മളിന്നു കാണുന്ന ലോകത്തെ നിർമ്മിച്ചത്. ഭൂമിയിലെ ഓരോ ഭൂപ്രദേശത്തിന്റെയും ചരിത്രമതാണ്. അങ്ങനെയാണ് നമ്മളിന്നു ജീവിക്കുന്ന നമ്മുടെ രാജ്യവും നമ്മുടെ ഈ നാടുമൊക്കെ ഉണ്ടായത്. ഒരു രാജ്യവും ഒരു സംസ്‌കാരവും ഒരു സുപ്രഭാതത്തിൽ പൊട്ടി വീണതല്ലെന്നും മുഖ്യമന്ത്രി പറഞ്ഞു.

സഹസ്രാബ്ദങ്ങൾ നീണ്ട ആ ചരിത്രം നമുക്ക് മുൻപിലുണ്ട്. പല ഭൂഭാഗങ്ങളിൽ നിന്നു വിരുന്നുവന്ന് അറിവും സംസ്‌കാരവും കൊണ്ടും കൊടുത്തും പോയവരുണ്ട്. ഇവിടെ ചേക്കേറി പാർപ്പായവരുണ്ട്. നൂറ്റാണ്ടുകൾ നീണ്ട ദീർഘമായ ഈ കൊടുക്കൽ വാങ്ങലുകളുടെ സൃഷ്ടിയാണ് നമ്മുടെ ഭക്ഷണവും ഭാഷയും വസ്ത്രവും ജീവിത രീതിയും ജീവിത വീക്ഷണവുമെല്ലാം. ഈ സത്യമുൾക്കൊണ്ടാൽ തീരാവുന്നതേയുള്ളൂ വംശീയതയും ദേശീയതയും പ്രാദേശികതയും തുടങ്ങിയവയെ ചുറ്റിപ്പറ്റി ചിലരൊക്കെ പുലർത്തുന്ന അത്യന്തം സങ്കുചിതമായ ചിന്താഗതികൾ. ഈ വിദ്വേഷ ചിന്താഗതിയാണ് സംഘപരിവാറിനെപ്പോലെ ഒരു സംഘടനയുടെ പ്രത്യയശാസ്ത്ര അടിത്തറയെന്നും അദ്ദേഹം വിമർശിച്ചു.

On:

തിരുവനന്തപുരം: വിഴിഞ്ഞം തുറമുഖ നിർമാണത്തിനെതിരെ സമരം നടത്തുന്ന സമിതി നേതാക്കളുമായി കൂടിക്കാഴ്ച്ച നടത്തി ഗവർണർ ആരിഫ് മുഹമ്മദ് ഖാൻ. രാജ്ഭവനിൽ വെച്ചാണ് ചർച്ച നടന്നത്. ലത്തീൻ അതിരൂപതാ വികാരി ജനറൽ ഫാ. യൂജിൻ പെരേരെ അടക്കമുള്ളവർ ചർച്ചയിൽ പങ്കെടുത്തു.

വിഷയത്തിൽ സർക്കാർ പലതവണ ചർച്ച നടത്തിയെങ്കിലും സമരം അവസാനിപ്പിക്കാൻ കഴിഞ്ഞിരുന്നില്ല. മുഖ്യമന്ത്രി നേരിട്ട് ചർച്ച നടത്തിയിട്ടും ഫലം കണ്ടിരുന്നില്ല. ഇതിനിടെയാണ് വിഷയത്തിൽ ഗവർണർ ഇടപെടുന്നത്. ലത്തീൻ അതിരൂപത സർക്കാരിനെതിരെ പലതവണ വിമർശനം ഉന്നയിച്ചിരുന്നു. ഈ സാഹചര്യത്തിൽ കൂടിയാണ് ഗവർണറുടെ ഇടപെടൽ.

ചൊവ്വാഴ്ച ലത്തീൻ അതിരൂപതയുമായി ഗവർണർ ബന്ധപ്പെട്ടു. തനിക്ക് സമരവുമായി ബന്ധപ്പെട്ട വിവരങ്ങൾ അറിയണമെന്ന് ഗവർണർ ആവശ്യപ്പെട്ടു. തുടർന്നാണ് കൂടിക്കാഴ്ചയ്ക്ക് സമയം അനുവദിക്കുകയായിരുന്നു. ഫാ. യൂജിൻ പെരേര ഉൾപ്പെടെ മൂന്നുപേരാണ് കൂടിക്കാഴ്ചയ്ക്ക് എത്തിയത്. അതേസമയം, തുറമുഖ നിർമാണം നിർത്തിവെച്ച് പാരിസ്ഥിതിക പഠനം നടത്തണമെന്നാണ് ലത്തീൻ അതിരൂപതയുടെ ആവശ്യം.

On:

തെരുവുനായ്ക്കള്‍ മാത്രമല്ല, വീട്ടില്‍ വളര്‍ത്തുന്നതുള്‍പ്പെടെയുള്ള മറ്റു പല മൃഗങ്ങളും റാബിസ് വൈറസ് വാഹകരാണെന്ന് ആരോഗ്യവിദഗ്ധര്‍ പറയുന്നു. നായയ്ക്കു പുറമേ, പൂച്ച, കുറുക്കന്‍, കുരങ്ങ്, വവ്വാല്‍, കന്നുകാലികള്‍ തുടങ്ങിയവയില്‍ നിന്നാണ് പ്രധാനമായും റാബിസ് വൈറസ് മനുഷ്യരിലേക്ക് പകരുന്നത്. ഏത് മൃഗത്തില്‍ നിന്ന് കടിയേറ്റാലും മുറിവ് 15 മിനിറ്റോളം സോപ്പ് ഉപയോഗിച്ച് കഴുകുന്നതിലൂടെ പേവിഷബാധ ഉണ്ടാകാനുള്ള സാധ്യത 80% ഒഴിവാക്കാനാകും. കടിയേറ്റ മുറിവില്‍ ഓയിന്റ്‌മെന്റോ കുഴമ്പോ ഒന്നും പുരട്ടരുത്. മുറിവ് കെട്ടിവയ്ക്കണമെന്നുമില്ലെന്നും ആരോഗ്യവിദഗ്ധര്‍ വ്യക്തമാക്കുന്നു.

അതേസമയം, ശരീരത്തില്‍ എവിടെ വൈറസ് എത്തിയാലും തലച്ചോറിലേക്കെത്തും. അതുകൊണ്ടു തന്നെ വാക്‌സീന്‍ നിര്‍ബന്ധം. ഏത് അസുഖമുള്ളയാള്‍ക്കും റാബിസ് പ്രതിരോധ വാക്‌സീന്‍ എടുക്കാം. ഡോക്ടര്‍ നിര്‍ദേശിക്കുകയാണെങ്കില്‍ മുറിവിനു ചുറ്റുമെടുക്കുന്ന ഇമ്യൂണോ ഗ്ലോബുലിന്‍ വാക്‌സീന്‍ കൂടി എടുക്കണം. ആഴത്തിലുള്ള മുറിവോ ഒന്നിലേറെ ഭാഗങ്ങളില്‍ കടിക്കുകയോ തൊലി പോയിടത്ത് നക്കുകയോ ചെയ്താല്‍ ഇമ്യൂണോ ഗ്ലോബുലിന്‍ നിര്‍ബന്ധമായും സ്വീകരിക്കണം. മൃഗത്തില്‍ നിന്നു പരുക്കേറ്റ ദിവസം തന്നെ ആദ്യ ഡോസ് വാക്‌സീന്‍ എടുക്കണം. മൂന്നാം ദിവസം രണ്ടാമത്തേതും ഏഴാം ദിവസം മൂന്നാമത്തേതും 28-ാം ദിവസം നാലാമത്തേതും വാക്‌സീന്‍ എടുക്കണം. 10 ദിവസം കഴിഞ്ഞും ഉപദ്രവിച്ച മൃഗത്തിന് ലക്ഷണങ്ങള്‍ ഒന്നും കാണുന്നില്ലെങ്കില്‍ ഡോക്ടറുടെ നിര്‍ദേശ പ്രകാരം മൂന്ന് ഡോസ് കൊണ്ട് വാക്‌സീന്‍ നിര്‍ത്താം. മൃഗങ്ങളില്‍ നിന്ന് പരുക്കേറ്റാല്‍ ടെറ്റനസ് കുത്തിവയ്പ് എടുക്കാം.

എന്നാല്‍, സംസ്ഥാനത്ത് വാക്‌സീന്‍ സ്വീകരിച്ചിട്ടും പേവിഷബാധയേറ്റു മരിക്കുന്നവരുടെ എണ്ണം വര്‍ധിക്കുന്ന സാഹചര്യത്തില്‍ വൈറസിന്റെ ജനിതക മാറ്റം വന്നിട്ടുണ്ടോയെന്ന സംശയം ഉയര്‍ന്നിരുന്നു. തെരുവുനായ് കടിച്ചാല്‍ ആശുപത്രി ബില്ലുകള്‍, ഒപി ടിക്കറ്റ് തുടങ്ങിയവയ്‌ക്കൊപ്പം വെള്ളക്കടലാസില്‍ കാര്യങ്ങള്‍ വിശദമായി എഴുതി നഷ്ടപരിഹാരത്തിന് അപേക്ഷിക്കാം. വിലാസം – ജസ്റ്റിസ് സിരിജഗന്‍ കമ്മിറ്റി, കൊച്ചി കോര്‍പറേഷന്‍ ബില്‍ഡിങ്, പരമാര റോഡ്, കൊച്ചി. മൂഷിക വര്‍ഗം, ഉരഗങ്ങള്‍ തുടങ്ങിയവയെ റാബിസ് വൈറസ് വാഹകരായി കണ്ടെത്താത്തതിനാല്‍ എലി, അണ്ണാന്‍, മുയല്‍, ഗിനിപ്പന്നി, പാമ്പുകള്‍, ഉടുമ്പ് തുടങ്ങിയവ കടിച്ചാല്‍ റാബിസ് വൈറസ് പ്രതിരോധ കുത്തിവയ്പ് എടുക്കാറില്ല.

On:

ബംഗളുരു: കേരളത്തെയും കര്‍ണാടകയെയും തമ്മില്‍ ബന്ധിപ്പിക്കുന്ന നിര്‍ദിഷ്ട സെമി ഹൈ സ്പീഡ് റെയില്‍ പദ്ധതി മംഗളൂരു വരെ നീട്ടാന്‍ അനുവദിക്കണമെന്ന് കേരള മുഖ്യമന്ത്രി പിണറായി വിജയന്‍ കര്‍ണാടക മുഖ്യമന്ത്രി ബസവരാജ് ബൊമ്മെയോട് അഭ്യര്‍ഥിച്ചെങ്കിലും കര്‍ണാടക മുഖ്യമന്ത്രി ആവശ്യം നിരസിച്ചതായി റിപ്പോര്‍ട്ട്.

‘കാസര്‍ഗോഡ് മുതല്‍ ദക്ഷിണ കന്നഡ വരെയും തലശ്ശേരി മുതല്‍ മൈസൂര്‍ വരെയും ബന്ധിപ്പിക്കാന്‍ ലക്ഷ്യം വെക്കുന്ന പാത കടന്നുപോവുക പരിസ്ഥിതി ദുര്‍ബല പ്രദേശത്ത് കൂടിയാണ്. ഈ മേഖലയില്‍ ദേശീയ കടുവ സങ്കേതവും ആനകളുടെ ആവാസപ്രദേശങ്ങളുണ്ട്. ഈ പദ്ധതിയോട് ഒരുവിധത്തിലും സഹകരിക്കാന്‍ സാധിക്കില്ലെന്ന് കേരള മുഖ്യമന്ത്രിയോട് വ്യക്തമാക്കിയിട്ടുണ്ട്,’-കര്‍ണാടക മുഖ്യമന്ത്രി പറഞ്ഞു.

അതേസമയം, കേരളത്തിന്റെ മുഖഛായ തന്നെ മാറ്റാന്‍ ഈ പദ്ധതിക്ക് സാധിക്കുമെന്നാണ് ഇടത് സര്‍ക്കാരിന്റെ അവകാശ വാദം. 63941 കോടി രൂപ ചെലവ് കരുതുന്ന പദ്ധതി വടക്കന്‍ കേരളവും തെക്കന്‍ കേരളവും തമ്മിലുള്ള യാത്രാസമയം കുറയ്ക്കുമെന്ന് സര്‍ക്കാര്‍ പറയുന്നു. നിലവില്‍ 10 മുതല്‍ 12 മണിക്കൂര്‍ വരെ എടുക്കുന്നത് 4 മണിക്കൂറായി കുറയ്ക്കാന്‍ സാധിക്കുമെന്നാണ് പറയപ്പെടുന്നത്. എന്നാല്‍, ഗുരുതരമായ പാരിസ്ഥിതിക, സാമൂഹിക പ്രത്യാഘാതങ്ങള്‍ പദ്ധതി മൂലം ഉണ്ടാകുമെന്ന് ചൂണ്ടിക്കാട്ടി കേരളത്തിലെ പ്രതിപക്ഷ പാര്‍ട്ടികളെല്ലാം തന്നെ ഒറ്റക്കെട്ടായി പദ്ധതിയെ എതിര്‍ക്കുന്നുണ്ട്.

On:

കോവിഡ് കേസുകള്‍ കുറയുന്നുണ്ടെങ്കിലും മഹാമാരി തീര്‍ന്നെന്ന് കരുതേണ്ടെന്ന് ആരോഗ്യവിദഗ്ധര്‍ ചൂണ്ടിക്കാട്ടി. ഒമിക്രോണ്‍ ഉപവകഭേദമായ ബിഎ.2.75 ദക്ഷിണാഫ്രിക്കയില്‍ കണ്ടെത്തിയെങ്കിലും ഇത് ആശങ്ക പരത്തുന്ന വകഭേദമല്ലെന്നും ദക്ഷിണാഫ്രിക്കന്‍ ആരോഗ്യ വകുപ്പ് വക്താവ് ഫോസ്റ്റര്‍ മൊഹാലോ വ്യക്തമാക്കി. ബിഎ.4, ബിഎ.5 എന്നിവയാണ് നിലവില്‍ ദക്ഷിണാഫ്രിക്കയില്‍ ഏറ്റവും പ്രബലമായ കോവിഡ് വകഭേദങ്ങള്‍.

ഇന്ത്യയില്‍ ഉള്‍പ്പെടെ പല രാജ്യങ്ങളിലും ബിഎ. 2.75 നേരത്തെ റിപ്പോര്‍ട്ട് ചെയ്തിരുന്നു. ജൂണിലാണ് ഇന്ത്യയില്‍ ബിഎ.2.7 ആദ്യം കണ്ടെത്തിയത്. സെപ്റ്റംബര്‍ 18ലെ കണക്കനുസരിച്ച് 24 മണിക്കൂറില്‍ ഇന്ത്യയില്‍ റിപ്പോര്‍ട്ട് ചെയ്തത് പുതുതായി 5664 കേസുകളാണ്. പ്രതിദിന പോസിറ്റിവിറ്റി നിരക്ക് 1.96 ശതമാനവും പ്രതിവാര പോസിറ്റിവിറ്റി നിരക്ക് 1.79 ശതമാനവുമാണ്.

അതേസമയം, ദക്ഷിണകൊറിയയില്‍ പകര്‍ച്ചപ്പനി സാധ്യതയുണ്ടെന്ന് ഗവണ്‍മെന്റ് മുന്നറിയിപ്പ് നല്‍കി. ശിശുപരിചരണ സംവിധാനങ്ങള്‍, സ്‌കൂളുകള്‍, നഴ്‌സിങ് സംവിധാനങ്ങള്‍ തുടങ്ങിയവയോട് ഇന്‍ഫ്‌ളുവന്‍സ നിയന്ത്രണ നടപടികള്‍ ശക്തമാക്കാന്‍ കൊറിയ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍ ഏജന്‍സി ആവശ്യപ്പെട്ടു. കുട്ടികള്‍, ഗര്‍ഭിണികള്‍, മുതിര്‍ന്ന പൗരന്മാര്‍ തുടങ്ങി അപകടസാധ്യത കൂടിയ ജനവിഭാഗങ്ങള്‍ക്ക് സെപ്റ്റംബര്‍ 21 മുതല്‍ സീസണല്‍ ഫ്‌ളൂ ഷോട്ടുകള്‍ നല്‍കാനാണ് ഗവണ്‍മെന്റിന്റെ തീരുമാനം.

On:

ന്യൂഡൽഹി: ഇന്ത്യയുടെ പ്രതിരോധ രംഗം ആത്മനിർഭരമാക്കാനുള്ള പ്രവർത്തനം ആരംഭിക്കാൻ സൈന്യം. നിലവിൽ സൈന്യത്തിന് അടിയന്തിര ഘട്ടങ്ങളിൽ ആവശ്യമായി വരുന്ന എല്ലാ ഉപകരണങ്ങളും നിർമ്മിക്കാൻ സൈന്യം വ്യവസായ സ്ഥാപനങ്ങളെ ക്ഷണിച്ചു.

തോക്കുകൾ, മിസൈലുകൾ, ഡ്രോണുകൾ, വാർത്താവിനിമയ സംവിധാനങ്ങൾ, കവചിത വാഹനങ്ങൾ, സാങ്കേതിക ഉപകരണങ്ങൾ, യുദ്ധമേഖലയിൽ ഊർജ്ജോൽപ്പാദനത്തിനും വിതരണത്തിനുമുള്ള സംവിധാനങ്ങൾ എന്നിവ നിർമ്മിക്കാനാണ് സൈന്യം പദ്ധതിയിടുന്നത്. തദ്ദേശീയമായി പ്രതിരോധ ഉപകരണങ്ങൾ നിർമ്മിച്ച് ശീലമുള്ള എല്ലാ സ്ഥാപനങ്ങളോടും സൈന്യവുമായി ബന്ധപ്പെടണമെന്നാണ് അധികൃതർ നൽകിയിരിക്കുന്ന നിർദ്ദേശം.

വ്യവസായ ശാലകളെ സൈന്യം തെരഞ്ഞെടുക്കുന്നത് സുതാര്യമായ ടെണ്ടർ നടപടികളിലൂടെയായിരിക്കും.

On:

ലണ്ടൻ: ഇന്ത്യൻ രാഷ്ട്രപതി ദ്രൗപതി മുർമു ലണ്ടനിലെത്തി. എലിസബത്ത് രാജ്ഞിയുടെ സംസ്‌കാര ചടങ്ങിൽ പങ്കെടുക്കാനായാണ് രാഷ്ട്രപതി ദ്രൗപദി മുർമു ലണ്ടനിലെത്തിയത്. ഇന്ത്യൻ സർക്കാരിനെ പ്രതിനിധീകരിച്ച് ദ്രൗപതി മുർമു എലിസബത്ത് രാജ്ഞിയ്ക്ക് ആദരാജ്ഞലികൾ അർപ്പിക്കും.

മൂന്ന് ദിവസം രാഷ്ട്രപതി ലണ്ടനിൽ ചെലവഴിക്കും. സംസ്‌കാര ചടങ്ങുകളിലും ചാൾസ് മൂന്നാമന്റെ ക്ഷണപ്രകാരമുള്ള വിരുന്നിലും രാഷ്ട്രപതി പങ്കെടുക്കും.സെപ്തംബർ 8നാണ് എലിസബത്ത് രാജ്ഞി സ്‌കോട്ട്ലാന്റിലെ ബാൽമോറൽ കൊട്ടാരത്തിൽവെച്ച് അന്തരിച്ചത്. തിങ്കളാഴ്ചയാണ് രാജ്ഞിയുടെ സംസ്‌കാര ചടങ്ങുകൾ നടക്കുക.

സെപ്തംബർ 8 നാണ് എലിസബത്ത് രാജ്ഞി അന്തരിച്ചത്. ബാൽമോറലിലെ വസതിയിലായിരുന്നു ജൂലൈ മുതൽ എലിസബത്ത് രാജ്ഞി കഴിഞ്ഞിരുന്നത്. ഏറ്റവും കൂടുതൽ കാലം ബ്രിട്ടിഷ് രാജസിംഹാസനത്തിലിരുന്ന വ്യക്തിയെന്ന റെക്കോർഡ് എലിസബത്ത് രാജ്ഞിയ്ക്ക് സ്വന്തമാണ്.

1952 ഫെബ്രുവരി ആറിനാണ് എലിസബത്ത് രാജ്ഞി പദവിയിൽ എത്തിയത്. ബ്രിട്ടിഷ് രാജപദവിയിലെത്തിയ നാൽപതാമത്തെ വ്യക്തിയാണ് എലിസബത്ത്. അമേരിക്കൻ വനിതയെ വിവാഹം ചെയ്യാൻ, പിതൃസഹോദരൻ എഡ്വേഡ് എട്ടാമൻ സ്ഥാനത്യാഗം ചെയ്തതിനെത്തുടർന്നാണ് എലിസബത്തിന്റെ പിതാവ് ജോർജ് ആറാമൻ രാജാവായത്. അദ്ദേഹത്തിന്റെ മരണത്തോടെ അധികാരം എലിസബത്തിനു വന്നു ചേർന്നു. എലിസബത്ത് രാജ്ഞിയുടെ ഭരണകാലത്ത് വിൻസ്റ്റൺ ചർച്ചിൽ മുതൽ ലിസ് ട്രസ് വരെ 15 പേർ ബ്രിട്ടിഷ് പ്രധാനമന്ത്രിമാരായി. ലോകത്ത് ഏറ്റവും കൂടുതൽ കറൻസികളിൽ പടമുള്ള ഭരണാധികാരിയെന്ന നിലയിൽ രാജ്ഞി ഗിന്നസ് ബുക്കിൽ ഇടംനേടിയിട്ടുണ്ട്.

On:

ന്യൂഡല്‍ഹി: രാജ്യത്ത് ഡിജിറ്റല്‍ സാങ്കേതിക വിദ്യയടക്കം പ്രയോജനപ്പെടുത്തി ചരക്കുഗതാഗതം സുഗമമാക്കാന്‍ കേന്ദ്ര സര്‍ക്കാര്‍ തീരുമാനം. ചരക്ക് ഗതാഗതം 60 ശതമാനവും നിലവില്‍ റോഡ് മാര്‍ഗമാണ്. ഇതു പകുതിയാക്കി റെയില്‍വേ വഴിയുള്ള 28 ശതമാനം 40 ആക്കി ഉയര്‍ത്തുമെന്ന് വിജ്ഞാന്‍ഭവനില്‍ പ്രധാനമന്ത്രി നരേന്ദ്രമോദി പുറത്തിറക്കിയ പുതിയ ലോജിസ്റ്റിക് നയത്തില്‍ പറയുന്നുണ്ട്.

അതേസമയം, പുതിയ നയം പ്രാബല്യത്തില്‍ വന്നാല്‍ കടത്തുചെലവ് 13-14 ശതമാനം എന്നത് അഞ്ചുവര്‍ഷത്തിനുള്ളില്‍ പത്തുശതമാനത്തില്‍ താഴെയാക്കും. മികച്ച സമ്ബദ് വ്യവസ്ഥാ മാതൃകകളില്‍ റോഡുവഴി 25-30 ശതമാനം, റെയില്‍മാര്‍ഗം 50-55 ശതമാനം, കടല്‍മാര്‍ഗം 20-25 ശതമാനം എന്നിങ്ങനെയാണ് ചരക്കുകടത്തല്‍ നടക്കുന്നത്. ചരക്കുകടത്ത് കൂലി ഇന്ത്യയില്‍ കൂടുതലാണ്. ഇന്ത്യന്‍ ഉത്പന്നങ്ങളുടെ മത്സരക്ഷമത ഉറപ്പാക്കാന്‍ 2014-ല്‍തന്നെ രാജ്യം വ്യവസായ, വാണിജ്യ സൗഹൃദമാക്കാനുള്ള നപടികള്‍ സര്‍ക്കാര്‍ പ്രഖ്യാപിച്ചിരുന്നു. 20,000 കോടി ഡോളര്‍ മൂല്യമുള്ളതാണ് ഇന്ത്യയിലെ ചരക്കുകടത്തു മേഖല. 2020-ലെ ബജറ്റ് പ്രസംഗത്തില്‍ കേന്ദ്രധനമന്ത്രി നിര്‍മലാ സീതാരാമനാണ് ലോജിസ്റ്റിക് മേഖലയുമായി ബന്ധപ്പെട്ട പുതിയ നയമൊരുക്കുമെന്ന് പ്രഖ്യാപിച്ചത്.

ലോകത്തെ അഞ്ചാമത്തെ സമ്ബദ് വ്യവസ്ഥയാണ് ഇന്ത്യയെന്നും കയറ്റുമതിരംഗത്ത് പുതിയ ലക്ഷ്യങ്ങള്‍ ഉറപ്പാക്കുകയാണെന്നും പ്രധാനമന്ത്രി നരേന്ദ്രമോദി അറിയിച്ചു. ഡ്രോണ്‍ നയവും പ്രയോജനപ്പെടുത്തും. തുറമുഖങ്ങളുടെ ശേഷി വര്‍ധിപ്പിച്ചു. കപ്പലുകളുടെ കയറ്റിയിറക്ക് പൂര്‍ത്തിയാക്കല്‍ 44 മണിക്കൂറില്‍നിന്ന് 26 മണിക്കൂറാവും. കൂടുതല്‍ പരിസ്ഥിതിസൗഹൃദ ജലപാതകളും തയ്യാറാക്കി കഴിഞ്ഞതായും അദ്ദേഹം വ്യക്തമാക്കി.

On:

സമർഖണ്ഡ്: ഇത് യുദ്ധത്തിന്റെ കാലമല്ലെന്ന് റഷ്യൻ പ്രസിഡന്റ് വ്‌ളാഡിമിർ പുടിനെ ഓർമ്മപ്പെടുത്തി പ്രധാനമന്ത്രി നരേന്ദ്ര മോദി. ഷാംഗ്ഹായ് കോ ഓപ്പറേഷൻ ഓർഗനൈസേഷൻ ഉച്ചകോടിയുടെ ഭാഗമായി നടന്ന ഉഭയകക്ഷി ചർച്ചയിലായിരുന്നു മോദിയും പുടിനും തമ്മിൽ സംസാരിച്ചത്.

സമാധാനത്തിന്റെ പാതയിൽ എത്ര കാലം ഒരുമിച്ച് മുന്നോട്ട് പോകാം എന്നാണ് ഇപ്പോൾ ചിന്തിക്കേണ്ടത്. ദശാബ്ദങ്ങളായി ഒരുമിച്ചു നിൽക്കുന്ന രാജ്യങ്ങളാണ് ഇന്ത്യയും റഷ്യയുമെന്നും അദ്ദേഹം അഭിപ്രായപ്പെട്ടു. ഭക്ഷണം, ഇന്ധന സുരക്ഷ തുടങ്ങിയ വിഷയങ്ങൾക്കാണ് നാം പ്രാമുഖ്യം കൊടുക്കേണ്ടത്. യുദ്ധബാധിത മേഖലകളിൽ നിന്നും ഇന്ത്യൻ വിദ്യാർത്ഥികളെ നാട്ടിലെത്തിക്കാൻ സഹായം നൽകിയ റഷ്യക്കും യുക്രൈനും അദ്ദേഹം നന്ദി അറിയിക്കുകയും ചെയ്തു.

അതേസമയം, യുക്രൈൻ സംഘർഷത്തിൽ ഇന്ത്യയുടെ നിലപാട് മനസ്സിലാക്കുന്നുവെന്ന് റഷ്യൻ പ്രസിഡന്റ് വ്‌ളാഡിമിർ പുടിൻ വ്യക്തമാക്കി. സംഘർഷം എത്രയും വേഗം അവസാനിപ്പിക്കാൻ താൻ ആഗ്രഹിക്കുന്നതായും അദ്ദേഹം അറിയിച്ചു.

യുക്രൈൻ നേതൃത്വത്തിന് ചർച്ചകളിൽ താത്പര്യമില്ല. യുദ്ധഭൂമിയിൽ സൈനിക നടപടിയിലൂടെ പ്രശ്‌നം അവസാനിപ്പിക്കാനാണ് അവർ ആഗ്രഹിക്കുന്നത്. വിഷയത്തിൽ എല്ലാ കാര്യങ്ങളും ഇന്ത്യയുമായി ചർച്ച ചെയ്യാൻ തയ്യാറാണ്. ഇന്ത്യയും റഷ്യയും തമ്മിൽ അതിവേഗം വളരുന്ന നയതന്ത്ര ബന്ധമാണ് ഉള്ളത്. അന്താരാഷ്ട്ര വേദികളിൽ ഇരു രാജ്യങ്ങളും സജീവമായ ഇടപെടലുകൾ നടത്തുന്നുണ്ടെന്നും അദ്ദേഹം കൂട്ടിച്ചേർത്തു.