Highlights (Page 89)

On:

ന്യൂഡല്‍ഹി: നമീബിയയില്‍ നിന്നും ഇന്നലെ പുറപ്പെട്ട 8 ചീറ്റപ്പുലികളുമായുള്ള പ്രത്യേക വിമാനം ഗ്വാളിയാര്‍ വിമാനത്താവളത്തിലെത്തി. മധ്യപ്രദേശിലെ കുനോ നാഷണല്‍ പാര്‍ക്കിലേക്ക് കൊണ്ടുവരുന്ന ചീറ്റപ്പുലികളെ പ്രധാനമന്ത്രി നരേന്ദ്രമോദിയാണ് തുറന്നു വിട്ടത്. 70 വര്‍ഷത്തിന് ശേഷമാണ് ചീറ്റപുലികള്‍ ഇന്ത്യയിലെത്തുന്നത്.

ടെറ ഏവിയ എന്ന മൊള്‍ഡോവന്‍ എയര്‍ലൈന്‍സിന്റെ പ്രത്യേകം സജ്ജമാക്കിയ ബോയിംഗ് 747 വിമാനത്തിലാണ് അഞ്ച് പെണ്‍ ചീറ്റപ്പുലികളും മൂന്ന് ആണ്‍ ചീറ്റപ്പുലികളം ഗ്വാളിയോര്‍ എയര്‍പ്പോര്‍ട്ടില്‍ വിമാനമിറങ്ങിയത്. അവിടെ നിന്ന് ഇവയെ വ്യോമസേനയുടെ പ്രത്യേക ഹെലികോപ്റ്ററകളില്‍ കൂനോ നാഷണല്‍ പാര്‍ക്കിലേക്ക് എത്തിക്കും. ക്വാറന്റീന്‍ ഏരിയയിലാണ് ആദ്യം ചീറ്റകളെ തുറന്ന് വിടുക. മുപ്പത് ദിവസം ഈ പ്രത്യേക സംവിധാനത്തില്‍ കഴിഞ്ഞ ശേഷമാണ് കൂനോയിലെ പുല്‍മേടുകളിലേക്ക് വിടുക. എട്ട് പേരെയും ആവശ്യമായ കുത്തിവയ്പ്പുകളും പരിശോധനയും കഴിഞ്ഞ ശേഷം മയക്കി കിടത്തിയാണ് വിമാനത്തില്‍ കൊണ്ടുവന്നത്. തുടര്‍ന്നുള്ള നിരീക്ഷണത്തിനായി പ്രത്യേക ട്രാക്കിംഗ് ഉപകരണങ്ങളും ശരീരത്തില്‍ ഘടിപ്പിച്ചിട്ടുണ്ട്.

ചീറ്റകള്‍ക്കായി 600ഹെക്ടര്‍ പ്രദേശമാണ് പ്രത്യേകം സജ്ജമാക്കിയിരിക്കുന്നത്. രാജ്യത്തെ വിവിധ നാഷണല്‍ പാര്‍ക്കുകളിലായി 50 ചീറ്റകളെ എത്തിക്കാനുള്ള സര്‍ക്കാര്‍ പദ്ധതിയുടെ തുടക്കമാണ് കൂനൂവിലേക്കുള്ള വരവ്. ദക്ഷിണാഫ്രിക്കയില്‍ നിന്നും നമീബിയയില്‍ നിന്നുമാണ് ചീറ്റകളെ എത്തിക്കുന്നത്. രണ്ട് വയസ് മുതല്‍ ആറ് വയസ് വരെ പ്രായമുള്ള ചീറ്റകളാണ് ആഫ്രിക്കന്‍ പുല്‍മേടുകളെ വിട്ട് ഇന്ത്യയിലേക്ക് എത്തിയിരിക്കുന്നത്.

On:

2014 മുതല്‍ 2022 വരെയുള്ള ഭരണകാലത്തിനിടയ്ക്ക് നിരവധി പദ്ധതികളാണ് പ്രധാനമന്ത്രി നരേന്ദ്രമോദി രാജ്യത്ത് ആവിഷ്‌ക്കരിച്ചത്. ജന്‍ ധന്‍, ആധാര്‍, സ്വച്ഛ് ഭാരത്, മേക്ക് ഇന്‍ ഇന്ത്യ, ആയുഷ്മാന്‍ ഭാരത്, മന്‍ കി ബാത്ത്, ആത്മ നിര്‍ഭര്‍ ഭാരത്, ഡിജിറ്റല്‍ ഇന്ത്യ, ബേട്ടി ബച്ചാവോ, ബേട്ടി പഠാവോ, നമാമി ഗംഗേ എന്നിവ പ്രധാനപ്പെട്ട ചില പദ്ധതികളാണ്. 2014 ല്‍ നരേന്ദ്രമോദി സര്‍ക്കാര്‍ ആസൂത്രണ കമ്മീഷന്‍ നിര്‍ത്തലാക്കുകയും പകരം നീതി ആയോഗ് കൊണ്ടുവരികയുമായിരുന്നു. തുടര്‍ന്ന് ഇന്ത്യയില്‍ പഞ്ചവത്സര പദ്ധതികള്‍ക്ക് അവസാനമായി.

നരേന്ദ്രമോദി ആവിഷ്‌കരിച്ച പ്രധാന പദ്ധതികളെ അറിയാം

ആധാര്‍ കാര്‍ഡ്

രാജ്യത്തെ പൗരന്മാര്‍ക്കായി കൊണ്ടുവന്ന 12 അക്ക അദ്വിതീയ ഐഡന്റിറ്റി നമ്പറാണ് ആധാര്‍ എന്നറിയപ്പെട്ടത്. യുപിഎ സര്‍ക്കാരിന് പിന്നാലെ വന്ന എന്‍ഡിഎ സര്‍ക്കാര്‍ പൗരന്മാരുടെ വിവരങ്ങള്‍ സൂക്ഷിക്കേണ്ടത് അവശ്യമാണെന്ന നയമാണ് മുന്നോട്ട് വച്ചത്. ഇതോടെ രാജ്യമെമ്പാടും ആധാര്‍ നിര്‍ബന്ധമായി. ലോകത്തിലെ ഏറ്റവും വലിയ ബയോമെട്രിക് ഐഡി സംവിധാനമാണ് ഇന്ന് ആധാര്‍. എന്നാല്‍, ആധാര്‍ പൗരത്വത്തിന്റെ തെളിവല്ലെന്ന് സുപ്രീംകോടതി തന്നെ നിരീക്ഷിച്ചു. ഇത് രാജ്യത്ത് താമസിക്കുന്നതിന്റെ തെളിവായി കണക്കാക്കപ്പെടുന്നു. എന്നാല്‍, ആധാര്‍ കാര്‍ഡ് ഇന്ത്യയില്‍ താമസിക്കാനുള്ള അവകാശം നല്‍കുന്നില്ല.

പ്രധാനമന്ത്രി ജന്‍ ധന്‍ യോജന (പ്രധാനമന്ത്രിയുടെ പൊതു ധനകാര്യ പദ്ധതി)

ഇന്ത്യന്‍ പൗരന്മാരുടെ ബാങ്കിങ്ങ് സേവനങ്ങള്‍ വര്‍ദ്ധിപ്പിക്കുന്നതിനായി രാജ്യത്തെ പൗരന്മാര്‍ക്കായി കൂടുതല്‍ ബാങ്കിങ്ങ് അക്കൗണ്ട് ആരംഭിക്കുന്നതായിരുന്നു പദ്ധതി. ലോകത്ത് ഒറ്റ ദിവസം കൊണ്ട് തന്നെ ഏറ്റവും കൂടുതല്‍ ബാങ്ക് അക്കൗണ്ടുകള്‍ക്ക് തുടക്കമിട്ട പദ്ധതിയെന്ന ഗിന്നസ് ബുക്ക് ഓഫ് വേള്‍ഡ് റെക്കോര്‍ഡ്‌സ് പ്രധാനമന്ത്രി ജന്‍ ധന്‍ യോജനയ്ക്ക് ലഭിച്ചു. 15 ദശലക്ഷം ബാങ്ക് അക്കൗണ്ടുകളാണ് ഉദ്ഘാടന ദിവസം തന്നെ തുറന്നത്.

മേക്ക് ഇന്‍ ഇന്ത്യ

ഉത്പന്നങ്ങള്‍ നിര്‍മ്മിക്കുന്നതിനും വികസിപ്പിക്കുന്നതിനുമായി കമ്പനികളെ പ്രോത്സാഹിപ്പിക്കുന്നതിനും സമര്‍പ്പിത നിക്ഷേപങ്ങളെ പ്രോത്സാഹിപ്പിക്കുന്നതിനുമായി രാജ്യത്ത ആരംഭിച്ച പദ്ധതിയാണ് മേക്ക് ഇന്‍ ഇന്ത്യ പദ്ധതി. നിക്ഷേപങ്ങള്‍ക്ക് അനുകൂലമായ അന്തരീക്ഷം സൃഷ്ടിക്കുക, ആധുനികവും കാര്യക്ഷമവുമായ അടിസ്ഥാന സൗകര്യങ്ങള്‍ വികസിപ്പിക്കുക, വിദേശ മൂലധനത്തിനായി പുതിയ മേഖലകള്‍ തുറക്കുക എന്നിവയായിരുന്നു നയ സമീപനം. ‘ഇന്ത്യയെ ഒരു ആഗോള രൂപകല്‍പന, ഉല്‍പ്പാദന കയറ്റുമതി കേന്ദ്രമാക്കി മാറ്റുക’ എന്ന ലക്ഷ്യത്തോടെയായിരുന്നു പദ്ധതി ആരംഭിച്ചത്. ഐഎന്‍എസ് വിക്രാന്ത് പോലുള്ള വിമാനവാഹിനി കപ്പലുകള്‍ ഇന്ത്യയില്‍ തന്നെ നിര്‍മ്മിക്കുകയും ചെയ്തു.

സ്വച്ഛ് ഭാരത് അഭിയാന്‍ (ക്ലീന്‍ ഇന്ത്യ മിഷന്‍)

പൊതുജനങ്ങള്‍ തുറസായ സ്ഥലത്ത് മലമൂത്ര വിസര്‍ജനം നടത്തുന്നതിന് തടയിടുക എന്ന ആശയത്തില്‍ നിന്നാണ് പ്രധാനമന്ത്രി സ്വച്ഛ ഭാരത് പദ്ധതി പ്രഖ്യാപിക്കുന്നത്. സ്വച്ഛ് ഭാരത് അഭിയാന്‍ അല്ലെങ്കില്‍ ക്ലീന്‍ ഇന്ത്യ മിഷന്‍ എന്നായിരുന്നു പദ്ധതി അറിയപ്പെട്ടിരുന്നത്. 2009-ല്‍ കോണ്‍ഗ്രസ് സര്‍ക്കാര്‍ ആരംഭിച്ച നിര്‍മ്മല്‍ ഭാരത് അഭിയാന്റെ പുതിയ രൂപമായിരുന്നു സ്വച്ഛ ഭാരത് അഭിയാന്‍. ഉദ്ദേശിച്ച ലക്ഷ്യങ്ങള്‍ കൈവരിക്കുന്നതില്‍ നിര്‍മ്മല്‍ ഭാരത് അഭിയാന്‍ പരാജയപ്പെടുകയായിരുന്നു.

മന്‍ കി ബാത്ത്

പ്രധാനമന്ത്രി നരേന്ദ്ര മോദി നേരിട്ട് രാജ്യത്തെ ജനങ്ങളുമായി സംവദിക്കുന്നതിനായി ആരംഭിച്ച ഒരു ഇന്ത്യന്‍ റേഡിയോ പരിപാടിയാണ് മന്‍ കി ബാത്ത്. അതില്‍ അദ്ദേഹം ഓള്‍ ഇന്ത്യ റേഡിയോ, ഡിഡി നാഷണല്‍, ഡിഡി ന്യൂസ് എന്നിവയിലൂടെ രാജ്യത്തെ ജനങ്ങളെ അഭിസംബോധന ചെയ്തു. 2014 ഒക്ടോബര്‍ 3 ലാണ് ഈ പദ്ധതിയിലെ ആദ്യത്തെ പരിപാടി തുടങ്ങിയത്. ഇതുവരെയായി 92 എപ്പിസോഡുകള്‍ കഴിഞ്ഞു. 92-ാം എപ്പിസോഡ് 2022 ഓഗസ്റ്റ് 28-നാണ് സംപ്രേക്ഷണം ചെയ്തത്. 2021 ജൂലൈയില്‍ രാജ്യസഭയില്‍ ഇന്‍ഫര്‍മേഷന്‍ ആന്റ് ബ്രോഡ്കാസ്റ്റിംഗ് മന്ത്രിയുടെ പ്രസ്താവന പ്രകാരം, ‘ദൈനംദിന ഭരണത്തിന്റെ വിഷയങ്ങളില്‍ പൗരന്മാരുമായി ഒരു സംവാദം സ്ഥാപിക്കുക’ എന്നതാണ് പരിപാടിയുടെ പ്രധാന ലക്ഷ്യം.

ആയുഷ്മാന്‍ ഭാരത് (പ്രധാനമന്ത്രിയുടെ ജനകീയ ആരോഗ്യ പദ്ധതി)

രാജ്യത്തെ താഴ്ന്ന വരുമാനക്കാര്‍ക്ക് ആരോഗ്യ ഇന്‍ഷുറന്‍സ് പരിരക്ഷ സൗജന്യമായി ലഭ്യമാക്കുക എന്നതായിരുന്നു ഈ പദ്ധതിയുടെ ലക്ഷ്യം. രാജ്യത്തെ ഏറ്റവും താഴെയുള്ള ഏകദേശം 50 % ആളുകള്‍ ഈ സ്‌കീമിന് യോഗ്യരാണ്. പദ്ധതിയില്‍ ഉള്‍പ്പെട്ടിട്ടുള്ള ആളുകള്‍ക്ക് ഒരു ഫാമിലി ഡോക്ടറില്‍ നിന്ന് അവരുടെ പ്രാഥമിക പരിചരണ സേവനങ്ങള്‍ ലഭിക്കും. ആര്‍ക്കെങ്കിലും കൂടുതല്‍ പരിചരണം ആവശ്യമായി വരുമ്പോള്‍, PM-JAY യും വിദഗ്ധ ചികിത്സ ആവശ്യമുള്ളവര്‍ക്ക് സൗജന്യ ദ്വിതീയ ആരോഗ്യ പരിരക്ഷയും ആശുപത്രിയില്‍ പ്രവേശിപ്പിക്കേണ്ടവര്‍ക്ക് തൃതീയ ആരോഗ്യ പരിരക്ഷയും നല്‍കുന്നു.

ഡിജിറ്റല്‍ ഇന്ത്യ

സാങ്കേതിക വിദ്യാമേഖലയില്‍ രാജ്യത്തെ ഡിജിറ്റലായി ശാക്തീകരിക്കുന്നതിലൂടെയും ഗവണ്‍മെന്റിന്റെ സേവനങ്ങള്‍ ഇലക്ട്രോണിക് സംവിധാനത്തിലൂടെ പൗരന്മാര്‍ക്ക് ലഭ്യമാകുന്നുവെന്ന് ഉറപ്പാക്കുന്നതിനായി എന്‍ഡിഎ സര്‍ക്കാര്‍ ആരംഭിച്ച ഒരു കാമ്പെയ്നാണ് ഡിജിറ്റല്‍ ഇന്ത്യ. ഗ്രാമപ്രദേശങ്ങളെ അതിവേഗ ഇന്റര്‍നെറ്റ് നെറ്റ്വര്‍ക്കുകളുമായി ബന്ധിപ്പിക്കുന്നതിനുള്ള പദ്ധതികള്‍ ഈ സംരംഭത്തില്‍ ഉള്‍പ്പെടുന്നു. സുരക്ഷിതവും സുസ്ഥിരവുമായ ഡിജിറ്റല്‍ ഇന്‍ഫ്രാസ്ട്രക്ചറിന്റെ വികസനം, സര്‍ക്കാര്‍ സേവനങ്ങള്‍ ഡിജിറ്റലായി വിതരണം ചെയ്യുക, സാര്‍വത്രിക ഡിജിറ്റല്‍ സാക്ഷരത എന്നിവ ഈ പദ്ധതിയുടെ ലക്ഷ്യങ്ങളാണ്.

നമാമി ഗംഗേ

2014 ജൂണില്‍ 20,000 കോടി രൂപയുടെ ബജറ്റ് വിഹിതത്തോടെ എന്‍ഡിഎ സര്‍ക്കാര്‍ ‘ഫ്‌ലാഗ്ഷിപ്പ് പ്രോഗ്രാം’ ആയി അംഗീകരിച്ച ഒരു സംയോജിത നദീ സംരക്ഷണ ദൗത്യമാണ് നമാമി ഗംഗേ പദ്ധതി. ദേശീയ നദിയായ ഗംഗയുടെ മലിനീകരണം നിയന്ത്രിക്കല്‍, സംരക്ഷണം, പുനരുജ്ജീവനം എന്നിവ ഈ പരിപാടിയുടെ ലക്ഷ്യങ്ങളാണ്. ശാസ്ത്രജ്ഞര്‍, സാങ്കേതിക കമ്പനികള്‍, നിക്ഷേപകര്‍, കമ്മ്യൂണിറ്റി അംഗങ്ങള്‍ എന്നിവയുള്‍പ്പെടെ വിവിധ താല്‍പ്പര്യ ഗ്രൂപ്പുകളെ ബന്ധിപ്പിക്കുന്ന യുകെ കമ്മ്യൂണിറ്റിയുമായി ഇടപഴകാന്‍ ഇത് ലക്ഷ്യമിടുന്നു. നാഷണല്‍ മിഷന്‍ ഫോര്‍ ക്ലീന്‍ ഗംഗയുടെ (എന്‍എംസിജി) റിപ്പോര്‍ട്ട് അനുസരിച്ച് 341 പദ്ധതികളില്‍ 147 (അല്ലെങ്കില്‍ 43 ശതമാനം) പൂര്‍ത്തിയായി. അതില്‍ ഭൂരിഭാഗം പദ്ധതികളും മലിനജല അടിസ്ഥാന സൗകര്യങ്ങളുമായി ബന്ധപ്പെട്ടിരിക്കുന്നുവെന്നും 157 മലിനജല പദ്ധതികളില്‍ 61 എണ്ണം (39 ശതമാനം) പൂര്‍ത്തീകരിച്ചുവെന്നും റിപ്പോര്‍ട്ട് അവകാശപ്പെട്ടുന്നു.

ആത്മനിര്‍ഭര്‍ ഭാരത് (സ്വാശ്രയ ഇന്ത്യ)

ലോക സമ്പദ്വ്യവസ്ഥയില്‍ ഇന്ത്യ ഒരു വലിയ പങ്ക് വഹിക്കുന്നതിനും കൂടുതല്‍ കാര്യക്ഷമവും മത്സരപരവും പ്രതിരോധശേഷിയും കൈവരിക്കുന്നതിനുള്ള എന്‍ഡിഎ സര്‍ക്കാറിന്റെ പദ്ധതിയാണിത്. 2020-ല്‍ കൊവിഡ് 19 മായി ബന്ധപ്പെട്ട സാമ്പത്തിക പാക്കേജിന്റെ പ്രഖ്യാപന വേളയിലാണ് നരേന്ദ്ര മോദി ആദ്യമായി ആത്മനിര്‍ഭര്‍ ഭാരത് അഭിയാന്‍ (സ്വാശ്രയ ഇന്ത്യ മിഷന്‍) എന്ന പദപ്രയോഗം ഉപയോഗിക്കുന്നത്.

ബേട്ടി ബച്ചാവോ / ബേട്ടി പഠാവോ

പ്രധാനമായും ഉത്തര്‍പ്രദേശ്, ഹരിയാന, ഉത്തരാഖണ്ഡ്, പഞ്ചാബ്, ബീഹാര്‍, ഡല്‍ഹി എന്നീ ഉത്തരേന്ത്യന്‍ സംസ്ഥാനങ്ങളിലെ പിന്നോക്കം നില്‍ക്കുന്ന പെണ്‍കുട്ടികളെയാണ് ലക്ഷ്യം വയ്ക്കുന്നത്. 2014-ലെ അന്താരാഷ്ട്ര പെണ്‍കുട്ടികളുടെ ദിനത്തില്‍, ഇന്ത്യയിലെ പെണ്‍കുട്ടികള്‍ക്കെതിരായ ലിംഗവിവേചനം അവസാനിപ്പിക്കണമെന്ന് നരേന്ദ്ര മോദി അഭ്യര്‍ത്ഥിച്ചു. SelfieWithDaughter എന്ന ഹാഷ്ടാഗില്‍ 2015 ജൂണില്‍ സാമൂഹിക മാധ്യമം വഴിയാണ് പദ്ധതി പ്രചരിപ്പിക്കപ്പെട്ടത്.

On:

ജനീവ: കൊവിഡിന്റെ അവസാനമടുത്തെന്നും, എന്നാല്‍ രാജ്യങ്ങള്‍ കൊവിഡ് പ്രതിരോധ പ്രവര്‍ത്തനങ്ങള്‍ അവസാനിപ്പിക്കാറായിട്ടില്ലെന്നും ലോകാരോഗ്യ സംഘടന ഡയറക്ടര്‍ ജനറല്‍ ടെഡ്രോസ് അദാനോം പറഞ്ഞു. ‘നമ്മള്‍ വിജയം കാണാനാകുന്ന സ്ഥിതിയിലാണ്. ഇതാണ് കൂടുതല്‍ കഠിനമായി ഓടേണ്ട സമയം. വിജയസ്ഥാനത്തെത്താന്‍ ഒരുമിച്ച് പരിശ്രമിക്കാം’- അദ്ദേഹം വ്യക്തമാക്കി. എന്നാല്‍, നിലവിലെ കൊവിഡ് നിയന്ത്രണങ്ങളില്‍ ഇളവ് വരുത്തുന്നത് കൂടുതല്‍ വകഭേദങ്ങള്‍ക്ക് വഴിയൊരുക്കുമെന്നും ഡയറക്ടര്‍ ജനറല്‍ മുന്നറിയിപ്പ് നല്‍കി.

അതേസമയം, കൊവിഡ് വ്യാപനത്തെ തുടര്‍ന്ന് 2020 ജനുവരിയിലാണ് അന്താരാഷ്ട്ര ആരോഗ്യ അടിയന്തരാവസ്ഥ പ്രഖ്യാപിച്ചത്. ലോകത്ത് ഇതുവരെ അറുപത് ലക്ഷം ജീവനാണ് കൊവിഡില്‍ പൊലിഞ്ഞത്. 606 ദശലക്ഷം പേര്‍ക്ക് ലോകത്താകെ കൊവിഡ് ബാധിച്ചു. 2020 മാര്‍ച്ചിന് ശേഷം കഴിഞ്ഞയാഴ്ച കൊവിഡ് മരണനിരക്ക് ഏറ്റവും താഴ്ന്ന നിലയിലായിരുന്നു. ഇതേ തുടര്‍ന്നാണ് ലോകാരോഗ്യ സംഘടനാ തലവന്റെ പ്രതികരണം.

കഴിഞ്ഞ 24 മണിക്കൂറിനുള്ളില്‍ 6,422 പേര്‍ക്ക് രാജ്യത്ത് കൊവിഡ് സ്ഥിരീകരിച്ചത്. ഇതോടെ രാജ്യത്ത് ഇതുവരെ കൊവിഡ് ബന്ധിച്ചവരുടെ എണ്ണം 4,45,16,479 ആയി. ടെസ്റ്റ് പോസിറ്റിവിറ്റി നിരക്ക് 2.04 ആണ്. 34 പേര്‍ കൊവിഡ് ബാധിച്ച് മരിച്ചതോടെ രാജ്യത്തെ ആകെ കൊവിഡ് മരണം 528250 ആയി. രാജ്യത്ത് നിലവില്‍ 46,389 പേരാണ് കൊവിഡ് ബാധിച്ച് ചികിത്സയിലുള്ളത്.

On:

കൊച്ചി: മത്സ്യത്തൊഴിലാളിക്ക് ഫോര്‍ട്ടുകൊച്ചിയില്‍ വെച്ച് വെടിയേറ്റ സംഭവത്തില്‍ നാവിക സേനയുടെ അഞ്ച് തോക്കുകള്‍ കസ്റ്റഡിയിലെടുത്ത് പോലീസ്. ശാസ്ത്രീയ പരിശോധനയിലൂടെ വെടിയേറ്റ സംഭവത്തില്‍ വ്യക്തത ലഭിക്കാനാണ് നീക്കം. തോക്കുകള്‍ ബാലിസ്റ്റിക് പരിശോധനക്ക് അയക്കും. മട്ടാഞ്ചേരി എഎസ് പി നേരിട്ടെത്തിയാണ് പരിശോധനാ നടപടികളും കസ്റ്റഡി നടപടികളും പൂര്‍ത്തിയാക്കിയത്.

അതേസമയം, നാവികസേനയെ കേന്ദ്രീകരിച്ചു തന്നെയാണ് പൊലീസ് അന്വേഷണം നിലവില്‍ തുടരുന്നത്. നാവിക സേന ഉപയോഗിക്കുന്ന തരത്തിലുളള ഇന്‍സാസ് റൈഫിളുകളിലെ ബുളളറ്റാണ് ബോട്ടില്‍ നിന്ന് കിട്ടിയതെന്നാണ് ബാലിസ്റ്റിക് വിദഗ്ധയും പൊലീസിനെ അറിയിച്ചിരിക്കുന്നത്. എന്നാല്‍, ബുളളറ്റ് കണ്ടെത്തിയ ബോട്ടിന്റെ സംഭവദിവസത്തെ ജി പി എസ് വിവരങ്ങള്‍ നാവികസേന പൊലീസിനോട് തേടിയിട്ടുണ്ട്.

ഐ എന്‍ എസ് ദ്രോണാചാര്യയില്‍ പരിശീലനം നടത്തുമ്പോള്‍ ബുളളറ്റ് പുറത്തേക്ക് തെറിച്ചാലും ഒന്നരകിലോമീറ്റര്‍ അകലേക്ക് എത്തില്ലെന്നാണ് സേനയുടെ വിലയിരുത്തല്‍. കൂടാതെ ഇന്‍സാസ് പോലുളള റൈഫിളുകള്‍ ഉപയോഗിച്ച് നിലത്ത് കിടന്നാണ് പരിശീലനം നടത്തുന്നത്. ബുളളറ്റുകള്‍ ഇവിടെയുളള ഭിത്തിയില്‍ തട്ടിത്തെറിക്കും വിധമാണ് പരിശീലനം ക്രമീകരിച്ചിരിക്കുന്നത്. അതിനാല്‍ തന്നെ നാവിക സേനാ പരിശീലന കേന്ദ്രത്തില്‍ നിന്നുളള വെടിയേറ്റല്ല മത്സ്യത്തൊഴിലാളിക്ക് പരിക്കേറ്റതെന്നാണ് ഇവര്‍ പൊലീസിനോട് വ്യക്തമാക്കുന്നത്.

On:

കൊച്ചി: തെരുവുനായ ശല്യം നിയന്ത്രിക്കാൻ എറണാകുളം ജില്ലയിൽ ഊർജിത കർമ്മ പദ്ധതി നടപ്പാക്കാൻ ഇന്ന് കളക്ടറേറ്റിൽ ചേർന്ന യോഗം തീരുമാനിച്ചു. കളക്ടർ രേണുരാജ്, ജില്ലാ പഞ്ചായത്ത് പ്രസിഡന്റ് ശ്രീ. ഉല്ലാസ് തോമസ്, ബ്‌ളോക്ക്, ഗ്രാമ പഞ്ചായത്ത് പ്രസിഡന്റുമാർ, ബന്ധപ്പെട്ട വകുപ്പുകളിലെ ഉദ്യോഗസ്ഥർ തുടങ്ങിയവർ പങ്കെടുത്തു.

ആദ്യഘട്ടത്തിൽ നായ്ക്കളുടെ വന്ധ്യംകരണത്തിനുള്ള എബിസി പദ്ധതി (അനിമൽ ബർത്ത് കൺട്രോൾ) വടവുകോട്, മുളന്തുരുത്തി ബ്ലോക്കുകളിൽ ഉടൻ ആരംഭിക്കും. എബിസി പദ്ധതിക്കായുള്ള അടിസ്ഥാന സൗകര്യങ്ങൾ നിലവിലുള്ളതിനാലാണ് പൈലറ്റ് പദ്ധതി ഈ ബ്ലോക്കുകളിൽ നടപ്പാക്കുന്നത്. കോവിഡിനെതിരായ പ്രതിരോധ പ്രവർത്തനങ്ങൾ നടപ്പാക്കിയതിനു സമാനമായ രീതിയിൽ പ്രവർത്തനങ്ങൾക്ക് രൂപം നൽകും. ജില്ലയിൽ എബിസി പദ്ധതിക്കുള്ള സൗകര്യം ഏർപ്പെടുത്തുന്നതിന് അടിയന്തര നടപടി സ്വീകരിക്കും. നിലവിലുള്ള കെട്ടിടങ്ങൾ വാടകയ്ക്ക് എടുത്തായിരിക്കും ഇത്തരം കേന്ദ്രങ്ങൾ പ്രവർത്തിപ്പിക്കുക.

പദ്ധതിക്കു തുടക്കം കുറിക്കുന്ന വടവുകോട്, മുളന്തുരുത്തി ബ്ലോക്കുകളുടെ മാതൃകയിൽ മറ്റ് ബ്ലോക്കുകളിലേക്കും പദ്ധതി വ്യാപിപ്പിക്കും. വാക്‌സിനേഷൻ അടക്കമുള്ള പ്രതിരോധ നടപടികൾ അടിയന്തരമായി നടപ്പിലാക്കും. വളർത്തുമൃഗങ്ങളുടെ വാക്സിനേഷനും ലൈസൻസിംഗും ഉടൻ പൂർത്തീകരിക്കണമെന്ന് കളക്ടർ നിർദ്ദേശിച്ചു.

തെരുവുകളിൽ മാലിന്യം വലിച്ചെറിയുന്നതു നിയന്ത്രിക്കുന്നതു സംബന്ധിച്ച അവബോധം നൽകുന്നതിനായി റസ്റ്റോറന്റ് അസോസിയേഷനുകളുടെയും റസിഡൻസ് അസോസിയേഷനുകളുടെയും യോഗം വിളിക്കും. സന്നദ്ധ സംഘടനകൾ, എൻസിസി, എൻഎസ്എസ് തുടങ്ങിയവരുടെ സഹകരണവും ഉറപ്പാക്കും.

നിയമത്തിന്റെ പരിധിയിൽ തെരുവുനായ പ്രശ്നം തരണം ചെയ്യാനുള്ള പ്രവർത്തനങ്ങൾ നടപ്പാക്കുകയാണ് ലക്ഷ്യം. റസിഡൻസ് അസോസിയേഷനുകളുടെയും സന്നദ്ധ സംഘടനകളുടെയും സഹകരണത്തോടെ തെരുവുനായ്ക്കൾക്ക് വാക്‌സിൻ നൽകുന്നതിനു നടപടിയെടുക്കും. വീട്ടിൽ വളർത്തുന്ന നായ്ക്കൾക്കും വാക്സിനേഷൻ ഉറപ്പാക്കണം. നായ്ക്കളുടെ അഭയ കേന്ദ്രങ്ങൾ ഒരുക്കുന്നതിനും നടപടി സ്വീകരിക്കും. ജനപ്രതിനിധികളുടെ സഹകരണത്തോടെയാകും പദ്ധതി നടപ്പാക്കുക.

തെരുവിൽ മാലിന്യം വലിച്ചെറിയുന്നതു തെരുവ് നായ്ക്കൾ അനിയന്ത്രിതമായി വളരുന്നതിനു കാരണമായിട്ടുണ്ട്. തദ്ദേശ സ്വയംഭരണ സ്ഥാപന തലങ്ങളിൽ മാലിന്യനിർമ്മാർജ്ജനം ശക്തമാക്കണം. ഭക്ഷ്യസാധനങ്ങളും ഭക്ഷണാവശിഷ്ടങ്ങളും വലിച്ചെറിയുന്നില്ലെന്ന് ഉറപ്പാക്കാൻ നടപടി സ്വീകരിക്കണം.

നായകളെ പിടികൂടുന്നതിനുള്ള ഡോഗ് ക്യാച്ചേഴ്സിനെ കണ്ടെത്തുന്നതിനുള്ള നടപടികൾ കുടുംബശ്രീയുടെ നേതൃത്വത്തിൽ ആരംഭിച്ചിട്ടുണ്ട്. ഇവർക്ക് നായകളെ പിടികൂടുന്നതിനു പരിശീലനം നൽകും. പരിശീലനം ലഭിച്ച വാളന്റീയർമാരെ അടക്കം നിയോഗിച്ച് അതിവേഗത്തിൽ വാക്‌സിനേഷൻ നടപ്പാക്കുകയാണു ലക്ഷ്യം.

തെരുവുനായകൾക്ക് 100% വാക്‌സിനും, ബൂസ്റ്റർ വാക്‌സിനും ഉറപ്പാക്കണം. വളർത്തുമൃഗങ്ങൾക്ക് വാക്‌സിൻ ലഭ്യമാക്കുന്നതിനൊപ്പം ലൈസൻസും നൽകുന്ന വിധത്തിൽ ക്രമീകരണം ഏർപ്പെടുത്തും. ഒക്ടോബർ 30ന് അകം വളർത്തുനായ്ക്കൾക്ക് ലൈസൻസ് എടുക്കണം. എബിസി കേന്ദ്രങ്ങൾ സജ്ജമാക്കുന്ന മുറയ്ക്ക് നായ്ക്കളുടെ വന്ധ്യകരണം പ്രവർത്തനങ്ങളും ആരംഭിക്കും.

യോഗത്തിൽ ജില്ലാ പ്ലാനിംഗ് ഓഫീസർ പി.എ ഫാത്തിമ, മൃഗസംരക്ഷണ വകുപ്പ് ജോയിന്റ് ഡയറക്ടർ ഡോ.എൻ.ഉഷ റാണി, ഡെപ്യൂട്ടി ഡയറക്ടർ ഡോ. മറിയാമ്മ തോമസ്, ചീഫ് വെറ്റിനറി ഓഫീസർ ഡോ. പി.എം രജനി, വിവിധ ബ്ലോക്ക് പഞ്ചായത്ത്, ഗ്രാമ പഞ്ചായത്ത് അധ്യക്ഷർ, അംഗങ്ങൾ, മൃഗസംരക്ഷണ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

On:

പത്തനംതിട്ട: നിരവധി മാന്‍ മിസിംഗ് കേസുകളാണ് ജില്ലയില്‍ ദിനംപ്രതി റിപ്പോര്‍ട്ട് ചെയ്യുന്നത്. പെണ്‍കുട്ടികളും സ്ത്രീകളുമാണ് കാണാതാകുന്നതില്‍ കൂടുതലും. ആണ്‍കുട്ടികളും കാണാതാകുന്നവരിലുണ്ട്. വീട്ടില്‍ നിന്ന് വഴക്കിട്ട് ഇറങ്ങുന്നവരാണ് ഇതില്‍ അധികവും. ഒരുമാസം മുപ്പത് മുതല്‍ നാല്‍പ്പത്താറ് പേരെ വരെ ജില്ലയില്‍ നിന്ന് കാണാതായിട്ടുണ്ട്. ഇതില്‍ തിരിച്ച് വരാത്തവരും കണ്ടെത്താന്‍ കഴിയാത്തവരുമുണ്ട്.

അതേസമയം, വീട്ടില്‍ നിന്ന് കാണാതായ പ്രായപൂര്‍ത്തിയാകാത്ത പെണ്‍കുട്ടിയെ അന്വേഷണ സംഘം കണ്ടെത്തിയത് തമിഴ്‌നാട്ടിലെ ഒരു ലോഡ്ജിലാണ്. ഇത്തരത്തില്‍ പ്രണയത്തിന്റെ പേരില്‍ നാടും വീടും ഉപേക്ഷിച്ച് പോകുന്നവരും കാണാതാകുന്ന പട്ടികയിലുണ്ട്. ഇന്‍സ്റ്റഗ്രാം, ഫേസ്ബുക്ക്, വാട്‌സ് ആപ് തുടങ്ങിയ സോഷ്യല്‍ മീഡിയ ആപ്പുകളില്‍ വരെ വന്‍ ചതിക്കുഴികളാണ് കാത്തിരിക്കുന്നത്. ഈ വര്‍ഷം ജനുവരിയില്‍ നാല്‍പ്പത്തിരണ്ട് കേസുകള്‍ റിപ്പോര്‍ട്ട് ചെയ്തതില്‍ 28 പേരും പെണ്‍കുട്ടികളാണ്. പന്ത്രണ്ട് ആണ്‍കുട്ടികളും രണ്ട് പ്രായപൂര്‍ത്തിയാകാത്ത പെണ്‍കുട്ടികളും ഇതില്‍പ്പെടും. ഒരാളെ ഇതുവരെ കണ്ടെത്തിയിട്ടുമില്ല. എല്ലാ മാസവും ഇതേ രീതിയില്‍ കണക്കുകള്‍ ആവര്‍ത്തിക്കപ്പെടുകയാണ്.

2022 ല്‍ കാണാതായവരുടെ എണ്ണം

ജനുവരി : 42

ഫെബ്രുവരി : 33

മാര്‍ച്ച് : 36

ഏപ്രില്‍ : 46

മേയ് : 45

ജൂണ്‍ : 44

ജൂലായ് : 45

On:

ന്യൂഡല്‍ഹി: രാജ്യത്ത് അര്‍ബുദത്തിനും പ്രമേഹത്തിനും ടിബിക്കുമുള്ള മരുന്നുകളടക്കം ഉള്‍പ്പെടുത്തി അവശ്യ മരുന്നുകളുടെ പരിഷ്‌കരിച്ച പട്ടിക കേന്ദ്ര ആരോഗ്യമന്ത്രി മന്ത്രി ഡോ. മന്‍സൂഖ് മാണ്ഡവ്യ പുറത്തിറക്കി. ഇതോടെ ഈ മരുന്നുകള്‍ ഇനി ന്യായവിലക്ക് ലഭ്യമാകും.

അതേസമയം, 2015ലാണ് അവസാനമായി അവശ്യ മരുന്നുകളുടെ പട്ടിക പരിഷ്‌കരിച്ചത്. അന്നത്തേക്കാള്‍ 34 പുതിയ മരുന്നുകള്‍ കൂടി ഇപ്പോള്‍ ഉള്‍പ്പെടുത്തിയിട്ടുണ്ട്. ഇന്‍സുലിന്‍ ഗ്ലാര്‍ജിന്‍, ടിബിക്കുള്ള ഡെലാമനിഡ്, ആന്റി പാരാസൈറ്റ് തുടങ്ങിയവയും പട്ടികയില്‍ ഉണ്ട്. ആന്റിബയോട്ടിക്കുകളും വാക്‌സിനുകളും ഇതില്‍ ഉള്‍പ്പെടും. 27 വിഭാഗങ്ങളിലായി 384 മരുന്നുകളാണ് പട്ടികയില്‍ ഉള്‍പ്പെടുന്നത്. അവശ്യ മരുന്നുകളുടെ പട്ടികയിലുള്ള ഷെഡ്യൂള്‍ഡ് മരുന്നുകളുടെ വില വര്‍ധിപ്പിക്കുന്നതിനും നിയന്ത്രണമുണ്ട്.

On:

തിരുവനന്തപുരം: നിയമസഭാ കയ്യാങ്കളിക്കേസില്‍ പ്രതികളായ വിദ്യാഭ്യാസ വകുപ്പുമന്ത്രി വി. ശിവന്‍കുട്ടി ഉള്‍പ്പെടെയുള്ള ഇടതുനേതാക്കള്‍ കുറ്റപത്രം വായിച്ചു കേള്‍ക്കുന്നതിന്റെ ഭാഗമായി നാളെ കോടതിയില്‍ ഹാജരാകും. ചീഫ് ജുഡീഷ്യല്‍ മജിസ്‌ട്രേട്ട് ആര്‍. രേഖയാണ് കേസ് പരിഗണിക്കുന്നത്.

വിദ്യാഭ്യാസമന്ത്രി വി. ശിവന്‍കുട്ടി, എല്‍.ഡി.എഫ്. കണ്‍വീനര്‍ ഇ.പി. ജയരാജന്‍, കെ.ടി. ജലീല്‍ എം.എല്‍.എ., മുന്‍ എം.എല്‍.എമാരായ സി.കെ. സദാശിവന്‍, കെ. അജിത്, കെ. കുഞ്ഞഹമ്മദ് തുടങ്ങി ആറു പ്രതികളാണ് കേസിലുള്‍പ്പെട്ടിരിക്കുന്നത്. നേരത്തെ, ആറു പ്രതികളോടും ഹാജരാകാന്‍ കോടതി നിര്‍ദേശിച്ചിരുന്നു. എന്നാല്‍ ഇവര്‍ ആരും ഹാജരായില്ല. തുടര്‍ന്ന് കഴിഞ്ഞ തവണ കേസ് പരിഗണിച്ചപ്പോള്‍ നാളെ ഹാജരാകണമെന്ന് കോടതി അന്ത്യശാസനം നല്‍കുകയായിരുന്നു.

അതേസമയം, 2015 മാര്‍ച്ച് 13-നായിരുന്നു നിയമസഭയില്‍ കയ്യാങ്കളിയുണ്ടായത്. അന്നത്തെ ധനമന്ത്രി കെ.എം. മാണി ബാര്‍ക്കോഴ കേസില്‍ അകപ്പെട്ടതിന് പിന്നാലെ ഇടതുപക്ഷം പ്രതിഷേധവുമായി രംഗത്തിറങ്ങുകയായിരുന്നു. മാണിയെ ബജറ്റ് അവതരിപ്പിക്കാന്‍ അനുവദിക്കില്ല എന്ന് പറഞ്ഞാണ് അന്ന് പ്രതിപക്ഷത്തുണ്ടായിരുന്ന ഇടത് എം.എല്‍.എമാര്‍ പ്രതിഷേധിച്ചത്. തുടര്‍ന്ന് ഇത് കയ്യാങ്കളിയിലേക്കും സഭയിലെ വസ്തുവകകള്‍ തല്ലിത്തകര്‍ക്കുന്നതിലേക്കും കടക്കുകയായിരുന്നു. തുടര്‍ന്ന് പോലീസ് കേസ് എടുത്തു. 2,17,000 രൂപയുടെ നഷ്ടം നിയമസഭയ്ക്ക് സംഭവിച്ചു എന്നാണ് പോലീസിന്റെ കണ്ടെത്തല്‍.

On:

തിരുവനന്തപുരം: വിർച്വൽ സാങ്കേതികതയുടെ സഹായത്തോടെ സ്‌കൂളുകളിൽ ആരോഗ്യ പ്രതിരോധ – സംരക്ഷണ പ്ലാറ്റ്‌ഫോം ഒരുക്കുന്നു. കൊച്ചി കിൻഫ്ര ഹൈ ടെക് പാർകിലെ കേരള ടെക്നോളജി ഇന്നോവേഷൻ സോണിലെ സ്റ്റാർട് അപ് ആയ ഷോപ് ഡോക് ആണ് ഈ പദ്ധതി ആവിഷ്‌ക്കരിച്ചിട്ടുള്ളതെന്ന് ആരോഗ്യമന്ത്രി വീണാ ജോർജ് അറിയിച്ചു.

ആ പ്രൊജക്ടിന് നേതൃത്വം കൊടുക്കുന്നത് ഒരു പെൺകുട്ടിയാണെന്നത് ഏറെ സന്തോഷം നൽകുന്ന കാര്യമാണ്. പ്രൊജക്ട് ഹെഡ് മെഹ്നാസ് അബൂബക്കർ എത്തി പദ്ധതിയെക്കുറിച്ച് വിശദീകരിച്ചു. ലോകത്ത് ആദ്യമായാണ് മെറ്റവേഴ്സിൽ സ്‌കൂളുകൾക്ക് ആരോഗ്യ പ്രതിരോധ – വിദ്യാഭ്യാസ സംബന്ധമായ സേവനം ഒരുക്കുന്നതെന്ന് മെഹ്നാസ് പറഞ്ഞു.

സ്മാർട് ഹെൽത്ത് ക്ലിനിക്കുകൾ വഴി രോഗ പ്രതിരോധ പ്രവർത്തനങ്ങളും വിപുലമായ ആരോഗ്യ സംരക്ഷണ പ്രവർത്തനങ്ങളുമാണ് ആരോഗ്യ രംഗത്തെ സ്റ്റാർട് അപ്പായ ഷോപ് ഡോകിന്റെ ലക്ഷ്യം. മൈ സ്‌കൂൾ ക്ലിനിക്സ് സേവനം വെബ്സൈറ്റിനൊപ്പം മൊബൈൽ, മെറ്റാവേഴ്സ് ആപ്ലിക്കേഷനുകളിലും ലഭ്യമാകുമെന്ന് മെഹ്നാസ് അറിയിച്ചു. മെഹ്നാസിനും ടീമിനും ആശംസകൾ അറിയിക്കുന്നുവെന്നും വീണാ ജോർജ് ഫേസ്ബുക്കിൽ കുറിച്ചു.

On:

തിരുവനന്തപുരം: സംസ്ഥാന ആരോഗ്യ വകുപ്പിന്റെ ‘അൽപം ശ്രദ്ധ ആരോഗ്യം ഉറപ്പ്’ എന്ന കാമ്പയിന്റെ ഭാഗമായി വയനാട് ജില്ല ജീവിതശൈലീ രോഗ സാധ്യതാ സ്‌ക്രീനിംഗ് ആദ്യ ഘട്ടം പൂർത്തിയാക്കിയതായി ആരോഗ്യ മന്ത്രി വീണാ ജോർജ് അറിയിച്ചു. ആദ്യ ഘട്ടമായി സംസ്ഥാനത്തെ 140 നിയോജക മണ്ഡലങ്ങളിലേയും ഓരോ പഞ്ചായത്തിലാണ് പദ്ധതി ആരംഭിച്ചത്. അതിൽ വയനാട്ടിലെ നെന്മേനി, പൊഴുതന, വെള്ളമുണ്ട എന്നീ പഞ്ചായത്തുകളാണ് ലക്ഷ്യം പൂർത്തിയാക്കിയത്. ഈ പഞ്ചായത്തുകളിലെ ചുള്ളിയോട് പിഎച്ച്‌സി, ചീരാൽ പിഎച്ച്‌സി, പൊഴുതന എഫ്എച്ച്‌സി, സുഗന്ധഗിരി പിഎച്ച്‌സി, വെള്ളമുണ്ട പിഎച്ച്‌സി, പൊരുന്നന്നൂർ സിഎച്ച്‌സി എന്നീ ആശുപത്രികൾ ഇതിൽ പങ്കാളികളായി. ഈ യജ്ഞം വിജയിപ്പിക്കാൻ പ്രയത്‌നിച്ച വയനാട് ഡിഎംഒ, ഡെപ്യൂട്ടി ഡിഎംഒ, ഡിപിഎം, ആർദ്രം, ഇ ഹെൽത്ത് കോ ഓർഡിനേറ്റർമാർ, ആശവർക്കർമാർ തുടങ്ങിയ എല്ലാവരേയും മന്ത്രി അഭിനന്ദിച്ചു.

വയനാട് ജില്ലയിൽ ഈ കാമ്പയിന്റെ ഭാഗമായി 30 വയസിന് മുകളിലുള്ള 55,703 പേരെയാണ് ആരോഗ്യ പ്രവർത്തകർ വീട്ടിലെത്തി സ്‌ക്രീനിംഗ് നടത്തി രോഗ സാധ്യത വിലയിരുത്തിയത്. ജില്ലയിൽ ഇല്ലാത്തവരൊഴികെ ഈ പഞ്ചായത്തുകളിലെ 97 ശതമാനത്തോളം പേരെ സ്‌ക്രീൻ ചെയ്യാൻ സാധിച്ചിട്ടുണ്ട്. അതിൽ 10,575 പേരാണ് ഏതെങ്കിലും റിസ്‌ക് ഫാക്ടറിൽ ഉള്ളവർ. ഇവരിൽ ആവശ്യമുള്ളവർക്ക് സൗജന്യ രോഗ നിർണയവും ചികിത്സയും ലഭ്യമാക്കുന്നു.

സംസ്ഥാന വ്യാപകമായി ഇതുവരെ 17 ലക്ഷത്തിലധികം പേരെ വീട്ടിലെത്തി ജീവിതശൈലീ രോഗ നിർണയ സ്‌ക്രീനിംഗ് നടത്തി. ആകെ 17,15,457 പേരെ സ്‌ക്രീനിംഗ് നടത്തിയതിൽ 19.18 ശതമാനം പേർ (3,29,028) ഏതെങ്കിലും ഒരു ഗുരുതര രോഗം വരുന്നതിനുള്ള റിസ്‌ക് ഫാക്ടർ ഗ്രൂപ്പിൽ വന്നിട്ടുണ്ട്. ഇവരെ വിദഗ്ധ പരിശോധനയ്ക്ക് വിധേയമാക്കിയിരിക്കുകയാണ്. 10.96 ശതമാനം പേർക്ക് (1,87,925) രക്താതിമർദ്ദവും, 8.72 ശതമാനം പേർക്ക് (1,49,567) പ്രമേഹവും, 4.55 ശതമാനം പേർക്ക് (69,561) ഇവ രണ്ടും സ്ഥിരീകരിച്ചതായി കണ്ടെത്തിയിട്ടുണ്ട്.