Highlights (Page 169)

ചെന്നൈ: തീയേറ്ററുകളിലെ മുഴുവൻ സീറ്റുകളിലേക്കും പ്രവേശനം അനുവദിക്കാനൊരുങ്ങി തമിഴ്‌നാട്. നവംബർ 1 മുതൽ സംസ്ഥാനത്തെ തിയറ്ററുകളിലെ മുഴുവൻ സീറ്റുകളിലേക്കും പ്രവേശനം അനുവദിക്കാനാണ് തമിഴ്‌നാടിന്റെ തീരുമാനം. കടകൾക്കും ഹോട്ടലുകൾക്കും ഏർപ്പെടുത്തിയിരുന്ന പ്രവർത്തന സമയ നിയന്ത്രണവും സർക്കാർ ഒഴിവാക്കി. എല്ലാ കലാ സാംസ്‌കാരിക പരിപാടികൾക്കും അനുമതി നൽകിയിട്ടുണ്ട്.

കോവിഡ് നിയന്ത്രണങ്ങളിൽ നിരവധി ഇളവുകളാണ് തമിഴ്‌നാട് സർക്കാർ നൽകിയിട്ടുള്ളത്. കേരളം ഒഴികെയുള്ള സംസ്ഥാനങ്ങളിലേക്ക് എസി ബസ് സർവീസും പുനരാരംഭിക്കുമെന്നും അധികൃതർ അറിയിച്ചു. ഓഫിസുകളിൽ 100 ശതമാനം ഹാജറും ഇനി മുതൽ നിർബന്ധമാണ്. നവംബർ 1 ന് 1 മുതൽ 8 വരെയുള്ള ക്ലാസുകൾ ആരംഭിക്കുമെന്ന് മുഖ്യമന്ത്രി എം.കെ.സ്റ്റാലിൻ വ്യക്തമാക്കി. ഇളവുകൾ നിരീക്ഷിച്ച ശേഷം, നവംബർ 15 നു വീണ്ടും സർക്കാർ യോഗം ചേർന്നു സ്ഥിതിഗതികൾ വിലയിരുത്തുമെന്നും അദ്ദേഹം പറഞ്ഞു.

ന്യൂഡൽഹി: കേന്ദ്ര സർവീസിൽ വിവിധ തസ്തികകളിലെ 3261 ഒഴിവുകളിലേക്ക് അപേക്ഷ ക്ഷണിച്ച് സ്റ്റാഫ് സെലക്ഷൻ കമ്മീഷൻ. കേന്ദ്ര സർക്കാരിനു കീഴിലെ മന്ത്രാലയങ്ങളിലും വകുപ്പുകളിലും ഓഫീസുകളിലുമായിരിക്കും നിയമനം. ഒക്ടോബർ 25 വരെ ഒഴിവുകളിലേക്ക് ഓൺലൈനായി അപേക്ഷിക്കാം. ബിരുദം/ പ്ലസ് ടു/ എസ്എസ്എൽസി ജയിച്ചവർക്കാണ് അപേക്ഷിക്കാൻ അർഹതയുള്ളത്.

കേരളവും ലക്ഷദ്വീപും ഉൾപ്പെടുന്ന കർണാടക കേരള റീജിയണിൽ 117 ഒഴിവുണ്ട്. തസ്തിക, യോഗ്യത സംബന്ധിച്ച കൂടുതൽ വിവരങ്ങൾ വെബ്‌സൈറ്റിലെ വിജ്ഞാപനത്തിലുണ്ട്. ഓരോ തലത്തിലെയും നിശ്ചിത യോഗ്യതകൂടി പരിഗണിച്ചാണ് അപേക്ഷ അയക്കേണ്ടതെന്നാണ് നിർദ്ദേശം. ഒക്ടോബർ 25 ആണ് അപേക്ഷ നൽകാനുള്ള അവസാന തീയതി. തസ്തികകൾ, യോഗ്യത ഉൾപ്പെടെയുള്ള കൂടുതൽ വിവരങ്ങൾക്ക്: www.ssc.nic.in എന്ന വെബ്‌സൈറ്റ് സന്ദർശിക്കാം.

2022 ജനുവരിയിലോ ഫെബ്രുവരിയിലോ പരീക്ഷ നടക്കും. കർണാടക/കേരള റീജിയണിൽ ഉൾപ്പെടുന്ന കേരളത്തിൽ ഏഴ് പരീക്ഷാ കേന്ദ്രങ്ങളാണുള്ളത്. കമ്പ്യൂട്ടർ അധിഷ്ഠിത പരീക്ഷയായിരിക്കും. ഒരുമണിക്കൂറാണ് പരീക്ഷാ സമയം. ജനറൽ ഇന്റലിജൻസ്, ജനറൽ അവയർനസ്, ക്വാണ്ടിറ്റേറ്റിവ് ആപ്റ്റിറ്റിയൂഡ്, ഇംഗ്ലീഷ് ഭാഷ (അടിസ്ഥാന വിവരങ്ങൾ) എന്നീ നാല് വിഷയങ്ങളിൽനിന്ന് 25 വീതം ചോദ്യങ്ങളുണ്ടാകും. തിരുവനന്തപുരം (കോഡ്- 9211), എറണാകുളം (9213), കണ്ണൂർ (9202), കൊല്ലം (9210), കോട്ടയം (9205), കോഴിക്കോട് (9206), തൃശൂർ (9212) എന്നിവിടങ്ങളിലാണ് കേരളത്തിൽ പരീക്ഷാകേന്ദ്രങ്ങളുള്ളത്.

ന്യൂഡൽഹി: രാജ്യത്തെ മാദ്ധ്യമങ്ങൾക്കെതിരെ രൂക്ഷ വിമർശനവുമായി പ്രധാനമന്ത്രി നരേന്ദ്ര മോദി. ഹരിയാന മുഖ്യമന്ത്രി മനോഹർ ലാൽ ഖട്ടാറിനെ പിന്തുണച്ചു കൊണ്ടാണ് മാദ്ധ്യമങ്ങൾക്കെതിരെ പ്രധാനമന്ത്രി രൂക്ഷ വിമർശനം ഉന്നയിച്ചത്. ഹരിയാനയിൽ മനോഹർ ലാൽ ഖട്ടറിന്റെ നേതൃത്വത്തിലുള്ള ബി ജെ പി സർക്കാർ ജനങ്ങൾക്ക് പ്രയോജനപ്പെടുന്ന നിരവധി പദ്ധതികൾക്ക് രൂപം കൊടുക്കുന്നുണ്ടെങ്കിലും വിവാദങ്ങൾ ഉണ്ടാക്കുന്നതിലാണ് മാദ്ധ്യമങ്ങളുടെ ശ്രദ്ധയെന്ന് അദ്ദേഹം കുറ്റപ്പെടുത്തി. ഇൻഫോസിസ് ഫൗണ്ടേഷൻ സംഘടിപ്പിച്ച പരിപാടിയിലാണ് അദ്ദേഹത്തിന്റെ പരാമർശം.

സത്യസന്ധമായി പ്രവർത്തിക്കുന്ന ഒരു സർക്കാരിനെയാണ് ഹരിയാനയിൽ ജനങ്ങൾക്ക് ലഭിച്ചിരിക്കുന്നത്. വളരെ കാലങ്ങൾക്കു ശേഷം ഹരിയാനയുടെ ക്ഷേമത്തിനു വേണ്ടി പ്രവർത്തിക്കുന്ന ഒരു സർക്കാരിനെ ലഭിച്ചത് ഇപ്പോൾ മാത്രമാണ്. തനിക്ക് വളരെ നാളുകളായി അടുത്ത് അറിയാവുന്ന ആളാണ് ഹരിയാന മുഖ്യമന്ത്രി മനോഹർ ലാൽ ഖട്ടാർ. രാത്രിയെന്നോ പകലെന്നോ ഇല്ലാതെ ജനക്ഷേമപ്രവർത്തനങ്ങളെ കുറിച്ച് മാത്രം ചിന്തിക്കുന്ന വ്യക്തിയാണ് ഖട്ടാറെന്നും എന്നാൽ മാദ്ധ്യമങ്ങളിൽ ഇതൊന്നും വാർത്തയാക്കില്ലെന്ന് അദ്ദേഹം വിമർശിച്ചു.

ഹരിയാനയിൽ കാർഷിക നിയമങ്ങൾക്കെതിരെ സമരം ചെയ്യുന്ന കർഷകരെ വടി കൊണ്ട് നേരിടണമെന്നുള്ള മനോഹർലാൽ ഖട്ടാറിന്റെ പരാമർശങ്ങൾ വലിയ വിവാദം സൃഷ്ടിച്ചിരുന്നു. കേന്ദ്രത്തിന്റെ കർഷക നിയമങ്ങൾക്കെതിരെ സമരം ചെയ്യുന്ന കർഷകരെ ചുരുങ്ങിയത് 1000 പ്രവർത്തകർ വടികളുമായി നേരിടണമെന്നാണ് അദ്ദേഹം പറഞ്ഞത്.

തൃശൂർ: ഗുരുവായൂർ ക്ഷേത്രപ്രവേശന സത്യാഗ്രഹ സമരത്തിന്റെ നവതി ആഘോഷത്തിൽ മുഖ്യമന്ത്രി പിണറായി വിജയൻ പങ്കെടുക്കും. ദേവസ്വം ഭരണസമിതി യോഗമാണ് മുഖ്യമന്ത്രിയെയും ദേവസ്വം മന്ത്രി കെ രാധാകൃഷ്ണൻ ഉൾപ്പടെയുള്ള പ്രമുഖരെയും പങ്കെടുപ്പിക്കുന്നത് സംബന്ധിച്ച തീരുമാനം കൈക്കൊണ്ടത്.

ക്ഷേത്ര പുനരുദ്ധാരണത്തിന്റെ സുവർണ ജൂബിലി ആഘോഷങ്ങളിലും മുഖ്യമന്ത്രി പങ്കെടുക്കും. മുഖ്യമന്ത്രിയുടെ സൗകര്യാർത്ഥം അടുത്തമാസം ആദ്യവാരം തന്നെ പരിപാടി നടത്താനാണ് ആലോചിക്കുന്നത്. സത്യാഗ്രഹ സമര നവതിയുടെ സ്മരണിക പ്രസിദ്ധീകരിക്കാനും ദേവസ്വം ഭരണസമിതി യോഗത്തിൽ തീരുമാനമായി.