Highlights (Page 170)

കോഴിക്കോട്: റോഡ് നിർമ്മാണത്തിൽ അലംഭാവം കാണിച്ച കരാറുകാർക്കെതിരെ ശക്തമായ നടപടി സ്വീകരിച്ച് പൊതുമരാമത്ത് വകുപ്പ്. കോഴിക്കോട് ജില്ലയിൽ റോഡ് നിർമ്മാണ പ്രവർത്തനങ്ങളിൽ അലംഭാവം കാണിച്ച കരാറുകാരനിൽ നിന്ന് പിഴ ഈടാക്കാൻ മന്ത്രി പി.എ മുഹമ്മദ് റിയാസ് ശുപാർശ ചെയ്തു. ദേശീയ പാത 766 ൽ നടക്കുന്ന പ്രവർത്തിയിൽ പുരോഗതി ഇല്ലാത്തതിനെ തുടർന്നാണ് കരാറുകാർക്കെതിരെ നടപടി സ്വീകരിക്കാൻ മന്ത്രി ശുപാർശ ചെയ്തത്.

നാഥ് ഇൻഫാസ്ട്രക്ചർ കമ്പനിയിൽ നിന്നും പിഴ ഈടാക്കാനാണ് മന്ത്രി ശുപാർശ ചെയ്തിരിക്കുന്നത്. ഇത് സംബന്ധിച്ച് നടപടി സ്വീകരിക്കാൻ പൊതുമരാമത്ത് എക്സിക്യുട്ടീവ് എഞ്ചിനീയർ നിർദേശം നൽകിയെന്നാണ് വിവരം. ദേശീയപാത 766 തിരുവമ്പാടിക്കടുത്ത് പുല്ലാഞ്ഞിമേട് വളവിലെ നവീകരണ പ്രവർത്തിയിലാണ് നാഥ് കൺസ്ട്രക്ഷൻസ് അലംഭാവം വരുത്തിയത്. മന്ത്രി പി.എ മുഹമ്മദ് റിയാസ് സെപ്തംബർ മാസത്തിൽ ഈ സ്ഥലം സന്ദർശിച്ച് പ്രവർത്തി സമയബന്ധിതമായി പൂർത്തിയാക്കാനുള്ള നിർദ്ദേശം നൽകിയിരുന്നു.

ഒരു ഭാഗത്തെ നിർമ്മാണ പ്രവർത്തനങ്ങൾ ഒക്ടോബർ 15 നകം തീർക്കണമെന്നായിരുന്നു നിർദ്ദേശം. എന്നാൽ കരാറുകാരൻ മന്ത്രിയുടെ നിർദേശം പാലിച്ചില്ല. തുടർന്നാണ് കർശന നടപടികളിലേക്ക് കടക്കാൻ തീരുമാനിച്ചത്. സമയബന്ധിതമായി പ്രവർത്തി പൂർത്തിയാക്കാത്ത കരാറുകാർക്കെതിരെ ശക്തമായ നടപടി സ്വീകരിക്കുമെന്ന് മന്ത്രി നേരത്തെ പ്രഖ്യാപിച്ചിരുന്നു.

ന്യൂഡൽഹി: കോൺഗ്രസിനെതിരെ രൂക്ഷ വിമർശനവുമായി പ്രധാനമന്ത്രി നരേന്ദ്ര മോദി. രാജ്യത്തെ മുൻകാല കോൺഗ്രസ് സർക്കാരുകൾക്കെതിരെയാണ് അദ്ദേഹം വിമർശനം ഉന്നയിച്ചത്. അഴിമതിക്കെതിരെ ശബ്ദിക്കാനുള്ള ഇച്ഛാശക്തി കഴിഞ്ഞ കാലത്തെ സർക്കാരിനില്ലായിരുന്നുവെന്ന് അദ്ദേഹം പറഞ്ഞു. കേന്ദ്ര വിജിലൻസ് കമ്മീഷന്റെയും സിബിഐയുടെയും സംയുക്തയോഗത്തിലായിരുന്നു അദ്ദേഹം ഇക്കാര്യങ്ങൾ അറിയിച്ചത്.

കഴിഞ്ഞ സർക്കാരിനെ നയിച്ചവരും അഴിമതിയിൽ പങ്കാളികളായിരുന്നു. എന്നാൽ ഇന്ന് കേന്ദ്രം ഭരിക്കുന്ന ബിജെപി സർക്കാരിന് അഴിമതിയെ അതിജീവിക്കാനുള്ള രാഷ്ട്രീയ ഇച്ഛാശക്തി ഉണ്ടെന്നും അദ്ദേഹം വ്യക്തമാക്കി. രാജ്യത്ത് ഭരണനിർവ്വഹണം സുതാര്യമാകണം. അഴിമതി വെച്ചുപൊറുപ്പിക്കില്ല. സാധാരണക്കാരെ പിഴിയുന്ന നടപടിക്ക് അറുതി വരുത്തുമെന്നും അദ്ദേഹം വിശദമാക്കി.

സൈബർ കുറ്റകൃത്യങ്ങൾ ഇനിയും പൂർണ്ണമായി തടയാനായിട്ടില്ല. ഇക്കാര്യത്തിൽ കൂടുതൽ ജാഗ്രത പുലർത്തണമെന്നും അദ്ദേഹം കൂട്ടിച്ചേർത്തു.

തിരുവനന്തപുരം: സംസ്ഥാനത്ത് കനത്ത മഴയെ തുടർന്ന് ഡാമുകൾ തുറന്ന് വിടുമ്പോൾ ഒഴുകി വരുന്ന മീനുകളെ പിടിക്കാൻ പുഴയിലേക്ക് ചാടുന്നവർക്ക് മുന്നറിയിപ്പ് നൽകി കേരള പോലീസ്. ഇത് അപകടകരമായ പ്രവണതയാണെന്നാണ് പോലീസ് പറയുന്നത്.

ഫേസ്ബുക്കിൽ പങ്കുവെച്ച കുറിപ്പിലൂടെയാണ് കേരളാ പോലീസ് ഇതുസംബന്ധിച്ച മുന്നറിയിപ്പ് നൽകിയത്. മീൻ പിടിക്കുന്നതിനായി ആളുകൾ പുഴയിലേക്ക് ചാടുന്ന വീഡിയോയും പോലീസ് പങ്കുവെച്ചിട്ടുണ്ട്.

ഇത്തരം പ്രവൃത്തികൾ ചെയ്യരുതെന്നും വളരെ അപകടകരമാണിതെന്നും പോലീസ് പറഞ്ഞു. ഇത്തരം പ്രവൃത്തികൾ ജീവന് തന്നെ ആപത്താണെന്നും പോലീസ് മുന്നറിയിപ്പ് നൽകി.

അതേസമയം അറബിക്കടലിൽ വെള്ളമെത്തുന്നതോടെ തിരമാല ശക്തമാകുമെന്നതിനാൽ കടൽ തീരത്തും ജാഗ്രത വേണമെന്നാണ് കാലാവസ്ഥാ വിദഗ്ധർ അറിയിച്ചിരിക്കുന്നത്. ഡാം തുറക്കുമ്പോഴുള്ള കുത്തൊഴുക്കിൽ പുഴ മുറിച്ചു കടക്കുന്നതിന് നിരോധനം ഏർപ്പെടുത്തിയിട്ടുണ്ട്. പുഴകളിൽ മീൻ പിടിത്തവും പാടില്ലെന്നുനം നദിയിൽ കുളിക്കുന്നതും തുണി അലക്കുന്നതും ഒഴിവാക്കണമെന്നും അധികൃതർ നിർദ്ദേശിച്ചു. വീഡിയോ പകർത്തൽ, സെൽഫി, ഫേസ്ബുക്ക് ലൈവ് എന്നിവയ്ക്കും കർശന നിരോധനം ഏർപ്പെടുത്തിയിരിക്കുകയാണ്.

തൊടുപുഴ: ഇടുക്കി ഡാം അടിയന്തരമായി തുറന്ന് ജലനിരപ്പ് ക്രമീകരിക്കണമെന്ന് ആവശ്യപ്പെട്ട് ഡീൻ കുര്യാക്കോസ് എംപി. സംസ്ഥാനത്തെ ഏറ്റവും വലിയ ജലവൈദ്യുത പദ്ധതിയായ ഇടുക്കി ഡാമിലെ ജലനിരപ്പ് റെഡ് അലർട്ടിലേക്ക് അടുക്കുന്ന സാഹചര്യത്തിലാണ് അദ്ദേഹം ഇക്കാര്യം ആവശ്യപ്പെട്ടത്. നിലവിൽ ഡാമിന്റെ ജലനിരപ്പ് 2397 അടി കഴിഞ്ഞു. ജലനിരപ്പ് 2397.86 ആയി ഉയർന്നാൽ റെഡ് അലർട്ട് പ്രഖ്യാപിക്കും.

രണ്ടു ദിവസത്തേക്ക് മഴയില്ലെന്നാണ് കാലാവസ്ഥാ വിദഗ്ധർ അറിയിക്കുന്നത്. എന്നാൽ അതിനു ശേഷം ശക്തമായ മഴയ്ക്ക് സാധ്യതയുണ്ട്. അതു മുന്നിൽ കണ്ട് ഡാം തുറന്നു വിട്ട് ജലം ക്രമീകരിക്കണമെന്നാണ് അദ്ദേഹം മുന്നോട്ട് വെയ്ക്കുന്ന ആവശ്യം. ഡാം തുറന്നു വിട്ട് ജനങ്ങളുടെ ജീവനും സ്വത്തിനും ഭീഷണിയുണ്ടാക്കുന്ന അവസ്ഥയുണ്ടാവരുത്. 2385 ൽ ജലനിരപ്പ് നിജപ്പെടുത്തണം. മഴ പെയ്യാൻ കാത്തിരുന്ന് പ്രളയമുണ്ടാക്കരുതെന്നും അദ്ദേഹം വ്യക്തമാക്കി.

അതേസമയം അതിതീവ്ര മഴയുടെ പശ്ചാത്തലത്തിൽ സംസ്ഥാനത്തെ വിവിധ ഡാമുകൾ തുറക്കുന്നത് തീരുമാനിക്കാൻ സർക്കാർ വിദഗ്ധ സമിതിയെ ചുമതലപ്പെടുത്തി. മഴക്കെടുതിയും ഡാമുകളുടെ ജലനിരപ്പും വിലയിരുത്താൻ ഇന്ന് ചേർന്ന ഉന്നത തല യോഗത്തിലാണ് മുഖ്യമന്ത്രി പിണറായി വിജയൻ ഇക്കാര്യം അറിയിച്ചത്. അതത് ഡാമുകളിലെ വെള്ളത്തിന്റെ അളവ് അനുസരിച്ച് ഏതൊക്കെ അണക്കെട്ടുകൾ തുറക്കണമെന്ന് വിദഗ്ധ സമിതി തീരുമാനിക്കുമെന്ന് അദ്ദേഹം പറഞ്ഞു.

അണക്കെട്ടുകൾ പെട്ടെന്ന് തുറക്കുമ്പോൾ ഉണ്ടായേക്കാവുന്ന ഭവിഷ്യത്തുകൾ ഒഴിവാക്കുവാനാണ് വിദഗ്ധ സമിതിയെ നിയോഗിച്ചത്. അണക്കെട്ട് തുറക്കുന്നതിന് മണിക്കൂറുകൾ മുമ്പ് ബന്ധപ്പെട്ട ജില്ലാ കലകളക്ടർമാർക്ക് ഇത് സംബന്ധിച്ച് കൃത്യമായ മുന്നറിയിപ്പ് നൽകണം. പ്രദേശവാസികളെ ഒഴിപ്പിക്കാനാവശ്യമായ സമയം നൽകണമെന്നും നിർദ്ദേശത്തിൽ വ്യക്തമാക്കുന്നുണ്ട്.

ബെയ്ജിങ്: ശബ്ദത്തിന്റെ അഞ്ച് മടങ്ങ് വരെ വേഗതയുള്ള, ആണവായുധങ്ങൾ വഹിക്കാൻ ശേഷിയുള്ള ഹൈപ്പർസോണിക് മിസൈലിന്റെ പരീക്ഷണം ചൈന നടത്തിയതായി റിപ്പോർട്ട്. ഓഗസ്റ്റ് മാസം ചൈന ഹൈപ്പർസോണിക് മിസൈൽ പരീക്ഷണം നടത്തിയെന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്. അമേരിക്കയുടെ രഹസ്യാന്വേഷണ വിഭാഗത്തിന് ഇതേക്കുറിച്ചുള്ള സൂചനകൾ ലഭ്യമായെങ്കിലും കൂടുതൽ വിവരങ്ങളൊന്നും ലഭിച്ചില്ലെന്നാണ് റിപ്പോർട്ട്.

അമേരിക്കയുടെ പക്കലുള്ള ഇത്തരം മിസൈലുകളെക്കാൾ പതിന്മടങ്ങ് ശേഷിയും കൃത്യതയും ഉള്ളതാണ് ചൈനയുടെ പക്കലുള്ളതെന്നാണ് വിവരം. ചൈനീസ് സൈന്യം ഹൈപ്പർസോണിക് മിസൈൽ അടങ്ങുന്ന റോക്കറ്റ് വിക്ഷേപിച്ചുവെന്നും റോക്കറ്റ് ലക്ഷ്യസ്ഥാനത്ത് എത്തുന്നതിന് തൊട്ടുമുമ്പ് കടലിൽ വീണുവെന്നും അന്താരാഷ്ട്ര മാദ്ധ്യമങ്ങൾ പറയുന്നു.

ശബ്ദത്തിന്റെ അഞ്ച് മടങ്ങ് വേഗതയിലുള്ള ഈ മിസൈലുകൾ ഉപയോഗിച്ച് അമേരിക്കയിലെ ലക്ഷ്യസ്ഥാനങ്ങൾ വരെ തകർക്കാൻ കഴിയും. ഹൈപ്പർസോണിക് ആയുധങ്ങളുടെ കാര്യത്തിൽ ചൈന കൈവരിച്ച നേട്ടം അമേരിക്കയെ പോലും ഞെട്ടിപ്പിച്ചിരിക്കുകയാണ്. ചൈനയുടെ സൈനിക ശേഷികളെക്കുറിച്ചും ഹൈപ്പർസോണിക് രംഗത്തുള്ള കഴിവുകളെക്കുറിച്ചും തങ്ങൾക്ക് ആശങ്കയുണ്ടെന്ന് അമേരിക്കയുടെ പ്രതിരോധ വകുപ്പ് പ്രസ് സെക്രട്ടറി ജോൺ കിർബി പ്രതികരിച്ചിരുന്നു.

അതേസമയം ഹൈപ്പർസോണിക് സാങ്കേതിക വിദ്യയിൽ ചൈന കൈവരിക്കുന്ന നേട്ടങ്ങൾ ഇന്ത്യയ്ക്കും ഭീഷണിയാണ്. ഇത് കണക്കിലെടുത്ത് ശക്തമായ മുന്നൊരുക്കങ്ങൾ ഇന്ത്യയും നടത്തുന്നുണ്ട്.

തിരുവനന്തപുരം: സംസ്ഥാനത്തെ ഡാമുകളിൽ ജലനിരപ്പ് ഉയരുന്നതിനാൽ എല്ലാ ജലവൈദ്യുത നിലയങ്ങളിലും മുഴുവൻ സമയം വൈദ്യുതി ഉത്പാദനം തുടർന്ന് കെഎസ്ഇബി. കെഎസ്ഇബിയുടെ വൈദ്യുത ഉത്പാദനം 31.8 ദശലക്ഷം യൂണിറ്റായി വർധിച്ചു. 71 ദശലക്ഷം യൂണിറ്റാണ് കേരളത്തിൽ പ്രതിദിനം ആവശ്യമായി വേണ്ടത്.

സംസ്ഥാനത്ത് മഴ അപ്രതീക്ഷിതമായി ശക്തി പ്രാപിച്ചതോടെ ഒക്ടോബർ മാസത്തിൽ പ്രതീക്ഷിച്ചതിനെക്കാൾ വലിയ തോതിലാണ് സംസ്ഥാനത്തെ അണക്കെട്ടുകളിലെ ജലനിരപ്പ്. മഴ വ്യാപകമായതോടെ സംസ്ഥാനത്തെ പല സ്ഥലങ്ങളിലും വൈദ്യുതി വിതരണം തകറാറിലായതിനാൽ വൈദ്യുതി ഉപയോഗത്തിൽ കുറവുണ്ടായതായാണ് റിപ്പോർട്ട്. മധ്യ കേരളത്തിലാകെ വൈദ്യുതി വിതരണം തകരാറിലായി. പൊൻകുന്നം ഡിവിഷന് കീഴിൽ വരുന്ന കാഞ്ഞിരപ്പള്ളി, പാറത്തോട്, മുണ്ടക്കയം, കൂട്ടിക്കൽ, എരുമേലി എന്നിവിടങ്ങളിലെ എല്ലാ 11 കെവി ഫീഡറുകൾ അടക്കം വ്യാപകമായി വൈദ്യുതി വിതരണം തകർന്ന നിലയിലാണുള്ളത്. മുണ്ടക്കയം ടൗണിലെ കെഎസ്ഇബി സെക്ഷൻ ഓഫീസ് വെള്ളത്തിലാണ്. പാലാ ഡിവിഷന്റെ കീഴിലും വലിയ നാശനഷ്ടമാണ് സംഭവിച്ചത്. വെള്ളം ഉയർന്ന നിലയിലുണ്ടായിരുന്ന ഈരാറ്റുപേട്ട, തീക്കോയി, പൂഞ്ഞാർ മേഖലകളിലെ എല്ലാ 11 കെവി ഫീഡറുകളും ഓഫ് ചെയ്തു. മണിമലയിൽ മാത്രം 60 ട്രാൻസ്‌ഫോർമറുകൾ കെഎസ്ഇബി ഓഫാക്കി.

വൈദ്യുതി പ്രതിസന്ധി 31 വരെ തുടരുമെന്ന് പ്രതീക്ഷിക്കുന്ന സാഹചര്യത്തിൽ ഇടുക്കി ഉൾപ്പെടെയുള്ള ജലവൈദ്യുത നിലയങ്ങൾ മുഴുവൻ സമയവും പ്രവർത്തിച്ച രാജ്യത്തെ വൈദ്യുതി വിതരണ മേഖലയെ സഹായിക്കണമെന്നാണ് സംസ്ഥാന സർക്കാരിനോട് കേന്ദ്രം ആവശ്യപ്പെട്ടിരുന്നു.