കോവിഡ് വ്യാപനത്തിന് മുന്പ് വുഹാന് വൈറോളജിയിലെ ഗവേഷകര് ചികിത്സ തേടിയിരുന്നതായി റിപ്പോര്ട്ട്
വാഷിങ്ടണ്: ചൈനയിലെ വുഹാന് ഇന്സ്റ്റിറ്റ്യൂട്ട് ഓഫ് വൈറോളജിയിലെ മൂന്നുഗവേഷകര് 2019 നവംബറില് ആശുപത്രിയില് ചികിത്സ തേടിയിരുന്നതായി റിപ്പോര്ട്ട്. കൊറോണ വൈറസിന്റെ ഉത്ഭവം സംബന്ധിച്ചുളള അന്വേഷണത്തിന്റെ അടുത്ത ഘട്ടം ചര്ച്ച ചെയ്യുന്നതിനായി ലോകാരോഗ്യസംഘടനയുടെ അടുത്ത യോഗം നടക്കാനിരിക്കുന്നതിനിടയിലാണ് പുതിയ റിപ്പോര്ട്ട് പുറത്തുവന്നിരിക്കുന്നത്. മഹാമാരിയുടെ ഉത്ഭവത്തെ കുറിച്ചുളള വിദഗ്ധരുടെ ഗവേഷണങ്ങളെ ലോകാരോഗ്യസംഘടനയ്ക്കും മറ്റുഅംഗരാജ്യങ്ങള്ക്കൊപ്പവും നിന്നുകൊണ്ട് യുഎസ് സര്ക്കാര് പിന്തുണയ്ക്കുന്നതായും അവര് പറഞ്ഞു.
ജേണലില് പ്രസിദ്ധീകരിച്ച റിപ്പോര്ട്ട് സംബന്ധിച്ച് ദേശീയ സുരക്ഷാകൗണ്സില് വക്താവ് പരാമര്ശമൊന്നും നടത്തിയില്ലെങ്കിലും കോവിഡ് 19 മഹാമാരിയുടെ ആദ്യദിവസങ്ങള് സംബന്ധിച്ചും വൈറസിന്റെ ഉത്ഭവത്തെ കുറിച്ചും ബൈഡന് ഭരണകൂടത്തിന് നിരവധി ചോദ്യങ്ങളുണ്ടെന്ന് അവര് വ്യക്തമാക്കി. ഇതുവരെ വെളിപ്പെടുത്താത്ത യുഎസ് അന്വേഷണ റിപ്പോര്ട്ടിനെ ഉദ്ധരിച്ച് വാള്സ്ട്രീറ്റ് ജേണലാണ് ഇക്കാര്യം റിപ്പോര്ട്ട് ചെയ്തിരിക്കുന്നത്.
എത്ര ഗവേഷകരാണ് അസുഖബാധിതരായത്, അസുഖബാധിതരായ സമയം, ഇവരുടെ ആശുപത്രി സന്ദര്ശനം എന്നീ കാര്യങ്ങളെല്ലാം ഈ അന്വേഷണ റിപ്പോര്ട്ടിലുണ്ട്. കോവിഡ് 19 വ്യാപനത്തെ കുറിച്ച് ചൈന ലോകത്തിന് മുന്നറിയിപ്പ് നല്കുന്നതിന് ഏതാനും മാസങ്ങള്ക്ക് മുന്പാണ് ഗവേഷകര് ആശുപത്രിയില് ചികിത്സ തേടിയത്.
വൈറസിന്റെ ഉത്ഭവം വുഹാനിലെ ലാബില് നിന്നാണെന്നുളള അഭ്യൂഹങ്ങള്ക്ക് ശക്തിപകരുന്നതാണ് പുതിയ റിപ്പോര്ട്ടിലെ തെളിവുകളെന്നും അതിനാല് ഇത് സംബന്ധിച്ച് കൂടുതല് അന്വേഷണം ആവശ്യമാണെന്നും പേരുവെളിപ്പെടുത്താത്ത ഒരു ഇന്റലിജന്സ് ഉദ്യോഗസ്ഥന് പറഞ്ഞതായും ജേണല് റിപ്പോര്ട്ട് ചെയ്തിട്ടുണ്ട്. കോവിഡ് 19 ഉത്ഭവത്തെ കുറിച്ചുളള ലോകാരോഗ്യസംഘടനയുടെ പഠനം സംബന്ധിച്ച് യുഎസ്, നോര്വേ, കാനഡ, ബ്രിട്ടണ് എന്നീ രാജ്യങ്ങള് മാര്ച്ചില് ആശങ്ക പ്രകടിപ്പിച്ചിരുന്നു.
‘സാര്സ് കോവ് 2 ന്റെ ഉത്ഭവത്തെ കുറിച്ച് ലോകാരോഗ്യസംഘടന നടത്തുന്ന പഠനങ്ങളെ മുന്വിധിയോടെ സമീപിക്കുന്ന പ്രഖ്യാപനങ്ങളൊന്നും നടത്താന് ഞങ്ങള് ഉദ്ദേശിക്കുന്നില്ല. എന്നാല് അന്താരാഷ്ട്ര വിദഗ്ധര് വിശ്വനീയമായ സിദ്ധാന്തങ്ങളെ വിശദമായി വിലയിരുത്തണമെന്ന കാര്യത്തില് ഞങ്ങള്ക്ക് വ്യക്തതയുണ്ട്.’ ദേശീയ സുരക്ഷാകൗണ്സില് വക്താവ് പറയുന്നു.