National (Page 808)

ന്യൂഡൽഹി: കോവിഡ് പോസിറ്റീവാകുന്നവരുടെ വാക്‌സിനേഷൻ സംബന്ധിച്ച് നിർണായക വെളിപ്പെടുത്തലുമായി ഗവേഷക സംഘം. ഒരിക്കൽ കോവിഡ് ബാധിച്ചവർക്ക് വാക്‌സിനേഷൻ നൽകേണ്ടതേയില്ലെന്നാണ് ഒരു സംഘം ഗവേഷകർ അഭിപ്രായപ്പെടുന്നത്. എയിംസ് ഡോക്ടർമാരും ദേശീയ കോവിഡ് ദൗത്യ സംഘാംഗങ്ങളും ഉൾപ്പെടുന്ന ഒരു കൂട്ടം ആരോഗ്യ വിദഗ്ധരാണ് ഇത്തരമൊരു വെളിപ്പെടുത്തൽ നടത്തിയിരിക്കുന്നത്.

കോവിഡ് ബാധിച്ച് പ്രകൃതിദത്തമായ രോഗപ്രതിരോധം നേടിയവരിൽ പിന്നീട് വാക്‌സിൻ ഫലപ്രദമാണോ എന്ന കാര്യത്തിൽ ആവശ്യത്തിന് തെളിവുകളില്ലെന്നാണ് ഗവേഷക സംഘം അഭിപ്രായപ്പെടുന്നത്. ഇക്കാര്യത്തിൽ ആവശ്യത്തിന് തെളിവുകൾ ലഭിച്ച ശേഷം മാത്രം ഈ വിഭാഗത്തിലുള്ളവർക്ക് വാക്‌സിൻ എടുക്കണമോയെന്ന് തീരുമാനിച്ചാൽ മതിയെന്നും ഗവേഷകർ ശുപാർശ ചെയ്യുന്നു.

ഒരു തവണ കോവിഡ് ബാധിതരായവർക്ക് വീണ്ടും വൈറസ് പിടിപെടാൻ 10 മാസത്തേക്ക് സാധ്യതയില്ലെന്നാണ് ലണ്ടൻ യൂണിവേഴ്‌സിറ്റി കോളേജ് നടത്തിയ ഒരു പഠനത്തിൽ വ്യക്തമാക്കിയിരിക്കുന്നത്. കോവിഡിന് എതിരെ ഇവരുടെ ശരീരത്തിൽ ആവശ്യത്തിന് ആന്റി ബോഡികൾ രൂപപ്പെടുന്നുണ്ടെന്നും പഠനം പറയുന്നു. ഈ പഠനം ചൂണ്ടിക്കാട്ടിയാണ് ഗവേഷകരുടെ പരാമർശം. വാക്‌സിനേഷന്റെ ഉദ്ദേശ്യം രോഗനിയന്ത്രണം ആയതിനാൽ ഇതേവരെ വൈറസ് പിടിപെടാത്തവർക്കാകണം മുൻഗണന നൽകേണ്ടതെന്നും ഗവേഷക സംഘം ചൂണ്ടിക്കാട്ടുന്നു.

രാജ്യത്തെ വാക്‌സിൻ ലഭ്യതയിലുള്ള കുറവ് കൂടി കണക്കിലെടുത്താണ് ഗവേഷകർ ഇത്തരമൊരു നിർദ്ദേശം മുന്നോട്ട് വെയ്ക്കുന്നതെന്നാണ് വിവരം. സാർവത്രിക വാക്‌സിനേഷനേക്കാൾ മുൻഗണന വിഭാഗങ്ങളെ കേന്ദ്രീകരിച്ചുള്ള വാക്സിൻ വിതരണ സമീപനമാകും നന്നാകുക. ജില്ലാ തലത്തിൽ നടക്കുന്ന തത്സമയ സീറോ സർവേയുടെ അടിസ്ഥാനത്തിലാകണം വാക്‌സിൻ നയതന്ത്രമെന്നും വിദഗ്ധ സംഘത്തിന്റെ റിപ്പോർട്ട് ശുപാർശ ചെയ്യുന്നു.

വാക്‌സിനേഷൻ എടുത്തവരിലും എടുക്കാത്തവരിലും വീണ്ടും ഉണ്ടാകുന്ന കോവിഡ് ബാധയെ പറ്റി കൂടുതൽ പഠനങ്ങൾ ആവശ്യമാണെന്നും ഗവേഷകർ വിശദീകരിക്കുന്നു. അതേസമയം കോവിഡ് പോസിറ്റീവ് ആകുന്നവർ രോഗമുക്തി നേടി മൂന്നുമാസം കാത്തിരുന്ന ശേഷം മാത്രം കോവിഡ് വാക്‌സിൻ സ്വീകരിച്ചാൽ മതിയെന്നാണ് ആരോഗ്യ മന്ത്രാലയത്തിന്റെ നിർദ്ദേശം.

ന്യൂഡല്‍ഹി : കൊവിഡ് പ്രതിസന്ധികളെ തുടര്‍ന്ന് പിഎഫുമായി ബന്ധപ്പെട്ട എല്ലാ ക്ലെയിമുകളും ഓണ്‍ലൈനാക്കുമെന്ന് സൂചന. ഇത് സംബന്ധിച്ചുള്ള നിര്‍ദ്ദേശം എംപ്ലോയിസ് പ്രൊവിഡന്റ് ഫണ്ട് ഓര്‍ഗനൈസേഷന്‍ (ഇപിഎഫ്ഒ) പരിഗണിക്കുകയാണ്. നിലവില്‍ കൊവിഡുമായി ബന്ധപ്പെട്ട നോണ്‍ റീഫണ്ടബിള്‍ ക്ലെയിമുകള്‍ ഓണ്‍ലൈനായാണ് പരിഗണിക്കുന്നത്. സാധാരണ ക്ലെയിമുകള്‍ക്ക് ഒരു മാസം എടുക്കുമ്പോള്‍ കോവിഡ് ക്ലെയിമുകള്‍ 72 മണിക്കൂറിനുള്ളില്‍ തീര്‍പ്പാക്കും.

ഉപഭോക്താക്കളുടെ കെവൈസി വിവരങ്ങള്‍ പിഎഫിന് സമര്‍പ്പിച്ചിട്ടുളള രേഖകളുമായി ഒത്തുപോകുന്നുണ്ടെങ്കില്‍ അതും ഓണ്‍ലൈനായി തീര്‍പ്പാക്കുന്നതാണ് പരിഗണിക്കുന്നത്. കൊവിഡ് ധനകാര്യ പ്രതിസന്ധി പരിഗണിച്ച് പിഎഫില്‍ നിന്ന് 75 ശതമാനം വരെയോ മൂന്ന് മാസത്തെ അടിസ്ഥാന ശമ്പളമോ അത് പിന്‍വലിക്കാന്‍ അനുവദിച്ച് കേന്ദ്രം നേരത്തെ ഉത്തരവ് നല്‍കിയിരുന്നു.

ന്യൂഡൽഹി: കോവാക്സിന്റേയും കോവിഷീൽഡിന്റെയും വില പുനർനിർണയിക്കുന്നത് സംബന്ധിച്ച് നിർമ്മാണ കമ്പനികളുമായി കേന്ദ്ര സർക്കാർ ചർച്ച നടത്തിയേക്കുമെന്ന് റിപ്പോർട്ട്. നിലവിൽ ഒരു ഡോസ് 150 രൂപയ്ക്കാണ് കേന്ദ്രം വാങ്ങുന്നത്. ജൂൺ 21 മുതൽ രാജ്യത്തെ വാക്‌സിൻ നയത്തിൽ കേന്ദ്രം മാറ്റം വരുത്തുകയാണ്.

18 വയസ്സിന് മുകളിലുള്ള രാജ്യത്തെ 75 ശതമാനം പൗരൻമാർക്കും സൗജന്യമായി വാക്സിൻ നൽകുമെന്നാണ് കേന്ദ്രം അറിയിച്ചിട്ടുള്ളത്. നിലവിൽ സംസ്ഥാനങ്ങൾ വാങ്ങിക്കൊണ്ടിരിക്കുന്ന വാക്‌സിൻ ഡോസുകൾ ഇനി കേന്ദ്രത്തിന് വാങ്ങേണ്ടി വരും. ഈ സാഹചര്യത്തിലാണ് സർക്കാർ വാക്‌സിന്റെ വില പുനർനിർണയിക്കുന്നത് സംബന്ധിച്ച് ചർച്ച നടത്താനൊരുങ്ങുന്നതെന്നാണ് വിവരം.

25 കോടി കോവിഷീൽഡ് വാക്സിൻ ഡോസും 19 കോടി കോവാക്സിനുമാണ് 150 രൂപ വെച്ച് കേന്ദ്രം കമ്പനികളിൽ നിന്ന് ഇതുവരെ വാങ്ങിയത്. കോവാക്‌സിൻ ഒരു ഡോസിന് 400 രൂപയ്ക്കാണ് സംസ്ഥാനങ്ങൾക്ക് നൽകി കൊണ്ടിരുന്നത്. കോവിഷീൽഡ് ഒരു ഡോസന് 300 രൂപ സംസ്ഥാനങ്ങളിൽ നിന്നും ഈടാക്കിയിരുന്നു.

ന്യൂഡൽഹി: കോവിഡ് വാക്‌സിനുകളുടെ പേറ്റന്റ് പരിരക്ഷ താൽക്കാലികമായി നീക്കംചെയ്യാൻ ജി7 രാജ്യങ്ങുടെ പിന്തുണ തേടി പ്രധാനമന്ത്രി നരേന്ദ്ര മോദി. ജി7 ഉച്ചകോടിയുടെ ആദ്യ സെഷനിലെ വെർച്വൽ യോഗത്തിലാണ് അദ്ദേഹം ഇക്കാര്യം ആവശ്യപ്പെട്ടത്. കോവിഡ് മഹാമാരിയെ ആഗോളതലത്തിൽ ഫലപ്രദമായി കൈകാര്യം ചെയ്യുന്നതിന് ഏക ഭൂമി, ഏക ആരോഗ്യം എന്ന സമീപനം പിന്തുടരണമെന്നും അദ്ദേഹം പറഞ്ഞു.

കോവിഡ് വാക്‌സിനുകളുടെ നിർമാണം വർദ്ധിപ്പിക്കുന്നതിനായാണ് അവയുടെ പേറ്റന്റുകൾ താത്ക്കാലികമായി നീക്കം ചെയ്യാൻ അദ്ദേഹം ആവശ്യപ്പെട്ടത്. ഓസ്‌ട്രേലിയയും മറ്റ് ചില രാജ്യങ്ങളും നരേന്ദ്രര മോദിയുടെ ആഹ്വാനത്തെ പിന്തുണച്ചുവെന്നാണ് വിവരം.

ഭാവിയിൽ ഉണ്ടായേക്കാവുന്ന മഹാമാരികളുടെ വ്യാപനം പ്രതിരോധിക്കാൻ ആഗോള ഐക്യവും നേതൃത്വവും സഹാനുഭാവവും ആവശ്യമാണ്. ജനാധിപത്യപരവും സുതാര്യവുമായ സമൂഹങ്ങൾക്ക് ഈ വിഷയത്തിൽ പ്രത്യേക ഉത്തരവാദിത്വമുണ്ടെന്ന് അദ്ദേഹം വ്യക്തമാക്കി. ആഗോള ആരോഗ്യപരിപാലത്തിന് വേണ്ടിയുള്ള കൂട്ടായ പരിശ്രമത്തിന് ഇന്ത്യയുടെ എല്ലാ പിന്തുണയും ഉറപ്പു നൽകുന്നുവെന്നും പ്രധാനമന്ത്രി അറിയിച്ചു.

കോവിഡ് പോരാട്ടത്തിൽ ഇന്ത്യയുടെ വൈദഗ്ധ്യവും അനുഭവജ്ഞാനവും മറ്റ് വികസ്വരരാജ്യങ്ങളുമായി പങ്കുവെക്കാനാഗ്രഹിക്കുന്നു. കോവിഡ് ബാധിതരുടെ സമ്പർക്കം കണ്ടെത്താനും വാക്സിൻ വിതരണത്തിന്റെ ഏകോപനത്തിനും ഡിജിറ്റൽ മാദ്ധ്യമങ്ങൾ ഇന്ത്യ ഫലപ്രദമായി ഉപയോഗപ്പെടുത്തിയതായും അദ്ദേഹം വിശദീകരിച്ചു.

ന്യൂഡല്‍ഹി: റഷ്യയുടെ കോവിഡ് വാക്‌സിന്‍ സ്പുട്‌നിക് ജൂണ്‍ 15 മുതല്‍ ഡല്‍ഹിയിലെ ഇന്ദ്രപ്രസ്ഥ അപ്പോളോ ആശുപത്രിയില്‍ ലഭ്യമാകും. 1145 രൂപയാണ് സ്വകാര്യ ആശുപത്രികളില്‍ വാക്‌സിന്റെ വില. ഇന്ത്യയില്‍ സ്പുട്‌നിക് അഞ്ച് ഫാര്‍മ സ്ഥാപനങ്ങളാണ് നിര്മ്മിക്കുന്നത്. കോവിഡിനെതിരെ 91.6 ശതമാനം ഫലപ്രാപ്തിയാണ് വാക്‌സിന്‍ നിര്‍മ്മാതാക്കള്‍ അവകാശപ്പെടുന്നത്.കഴിഞ്ഞ മാസം റഷ്യയില്‍ നിന്ന് സ്പുട്‌നിക് വാക്‌സിന്റെ മൂന്നാമത്തെ ബാച്ച് ഇന്ത്യയിലെത്തിയിരുന്നു. മൂന്ന് മില്യണ്‍ ഡോസായിരുന്നു ഇന്ത്യയിലെത്തിയത്.

അതേസമയം, രാജ്യത്ത് കോവിഡ് ബാധിതരുടെ എണ്ണം കുറയുകയാണ്. കഴിഞ്ഞ 24 മണിക്കൂറിനിടെ 80,834 പേര്‍ക്കാണ് പുതുതായി കോവിഡ് സ്ഥിരീകരിച്ചത്. ടെസ്റ്റ് പോസിറ്റിവിറ്റി നിരക്ക് കുറയുന്നുണ്ട്. ഇതുവരെ രോഗം ബാധിച്ചവരില്‍ ഏറ്റവും കുടുതല്‍ മഹാരാഷ്ട്ര, കര്‍ണാടകം, കേരളം, തമിഴ്‌നാട്, ആന്ധ്രാപ്രദേശ് എന്നീ സംസ്ഥാനങ്ങളിലാണ്.
എന്നാല്‍, ലോകത്തെ കണക്കുകള്‍ നോക്കുമ്പോള്‍ കോവിഡ് ബാധിതരുടെ എണ്ണത്തില്‍ വര്‍ദ്ധനവാണുണ്ടാകുന്നത്. രോഗബാധിതരുടെ എണ്ണം 17.63 കോടി കടന്നു.