തിരുവനന്തപുരം: ക്രിക്കറ്റ് താരം എസ് ശ്രീശാന്ത് സിനിമയിലേക്ക് തിരിച്ചെത്തുന്നു. എൻ.എൻ.ജി ഫിലിംസിന്റെ ബാനറിൽ നിരുപ് ഗുപ്ത നിർമ്മിക്കുന്ന ബോളിവുഡ് ചിത്രമായ ‘പട്ടാ’യിലെ നായക വേഷത്തിലൂടെയാണ് ശ്രീശാന്ത് സിനിമയിലേക്ക് തിരിച്ചെത്തുന്നത്. ആർ. രാധാകൃഷ്ണന്റെ സംവിധാനത്തിലൊരുങ്ങുന്ന ചിത്രം ഒരു പൊളിറ്റിക്കൽ ത്രില്ലറാണ്.
ആക്ഷനും സംഗീതത്തിനും തുല്യപ്രാധാന്യമാണ് സിനിമയിലുള്ളത്. ചിത്രത്തിന്റെ രചന നിർവഹിക്കുന്നതും രാധാകൃഷ്ണൻ തന്നെയാണ്. സിബിഐ ഉദ്യോഗസ്ഥനെയാണ് ചിത്രത്തിൽ ശ്രീശാന്ത് അവതരിപ്പിക്കുന്നത്. ശ്രീശാന്തിനൊപ്പം ബോളിവുഡിലെ പ്രമുഖ താരങ്ങളും ചിത്രത്തിൽ വേഷമിടുന്നുണ്ടെന്നാണ് വിവരം.
ചിത്രത്തിന്റെ ഛായാഗ്രഹണം നിർവ്വഹിക്കുന്നത് പ്രകാശ്കുട്ടിയാണ്. സുരേഷ് യു.ആർ.എസാണ് എഡിറ്റിംഗ്. സംഗീത സംവിധാനം സുരേഷ് പീറ്റേഴ്സും സ്പോട്ട് എഡിറ്റിംഗ് രതിൻ രാധാകൃഷ്ണനുമാണ് നിർവ്വഹിക്കുന്നത്. 2017 -ൽ സുരേഷ് ഗോവിന്ദിന്റെ സംവിധാനത്തിലൊരുക്കിയ ടിം 5 ആയിരുന്നു ശ്രീശാന്ത് അഭിനയിച്ച മലയാള സിനിമ. ഹിന്ദി, കന്നട എന്നീ ഭാഷകളിലും ശ്രീശാന്ത് വേഷമിട്ടിട്ടുണ്ട്.