National (Page 802)

ന്യൂഡൽഹി: കോവിഡ് വാക്സിൻ സ്വീകരിച്ചവർക്ക് ടിക്കറ്റ് നിരക്കിൽ ഡിസ്‌കൗണ്ട് നൽകുമെന്ന് പ്രമുഖ വിമാന കമ്പനി. ഇൻഡിഗോ എയർലൈൻസാണ് കോവിഡ് പ്രതിരോധ വാക്‌സിൻ സ്വീകരിച്ച യാത്രികർക്ക് ടിക്കറ്റ് നിരക്കിൽ ഡിസ്‌കൗണ്ട് നൽകുമെന്ന് അറിയിച്ചിരിക്കുന്നത്.

വാക്‌സിന്റെ രണ്ടു ഡോസും സ്വീകരിച്ചവർക്കും ഒരു ഡോസെങ്കിലും സ്വീകരിച്ചവർക്കും ടിക്കറ്റ് നിരക്കിന്റെ പത്ത് ശതമാനം ഡിസ്‌കൗണ്ട് ലഭിക്കും. ബുധനാഴ്ച്ച മുതലാണ് ഡിസ്‌കൗണ്ട് ഓഫർ ലഭ്യമാകുകയെന്നും ഇൻഡിഗോ അറിയിച്ചിട്ടുണ്ട്.

പതിനെട്ടു വയസ്സിനു മുകളിൽ പ്രായമുള്ള യാത്രക്കാർക്കാണ് ഡിസ്‌കൗണ്ട് ആനുകൂല്യം ലഭിക്കുന്നത്. ടിക്കറ്റ് ബുക്ക് ചെയ്യുന്ന സമയത്ത് ഇന്ത്യയിലുണ്ടായിരിക്കണം കോവിഡ് വാക്‌സിൻ സ്വീകരിച്ചിട്ടുണ്ടായിരിക്കണം എന്നിവയാണ് ഡിസ്‌കൗണ്ട് ലഭ്യമാകാനുള്ള നിബന്ധനകൾ. ടിക്കറ്റ് നിരക്കിൽ ഡിസ്‌കൗണ്ട് ലഭിച്ച യാത്രക്കാർ കേന്ദ്ര ആരോഗ്യ മന്ത്രാലയം നൽകുന്ന കോവിഡ് വാക്‌സിനേഷൻ സർട്ടിഫിക്കറ്റ് ഹാജരാക്കുകയോ തങ്ങളുടെ വാക്‌സിനേഷൻ സ്റ്റാറ്റസ് ആരോഗ്യസേതു മൊബൈൽ ആപ്പിൽ വിമാനത്താവളത്തിലെ ചെക്ക് ഇൻ കൗണ്ടർ/ ബോർഡിങ് ഗേറ്റിൽ കാണിക്കുകയോ വേണം.

ന്യൂഡൽഹി: ഓൺലൈൻ വിപണന രംഗത്തെ സുതാര്യതയ്ക്കും ഉപഭോക്താക്കളുടെ അവകാശ സംരക്ഷണത്തിനുമായി പുതിയ നയങ്ങളുമായി കേന്ദ്രം. തിങ്കളാഴ്ച്ച കേന്ദ്രസർക്കാർ പുറത്തിറക്കിയ നിയമങ്ങളുടെ കരട് പ്രകാരം ഓൺലൈനിൽ ഫ്‌ളാഷ് സെയിലുകൾക്ക് നിരോധനം വരും. കൃത്യസമയത്ത് ഉപയോക്താവ് ഓർഡർ ചെയ്ത വസ്തു എത്തിച്ചില്ലെങ്കിൽ ഇ-കോമേഴ്‌സ് പ്ലാറ്റ്‌ഫോമുകളും ശിക്ഷ നേരിടേണ്ടി വരും. ഫുഡ് ആന്റ് കൺസ്യൂമർ അഫേഴ്‌സ് മന്ത്രാലയമാണ് പുതിയ നിയമത്തിനായുള്ള നിർദേശങ്ങൾ പുറത്തിറക്കിയത്.

ഓൺലൈൻ വിപണന രംഗത്തെ നിയന്ത്രണങ്ങൾക്കും മേഖലയിൽ കുത്തകവത്കരണം ഇല്ലാത്തതും സ്വതന്ത്ര്യവുമായ മത്സരം പ്രോത്സാഹിപ്പിക്കാനുമാണ് പുതിയ നിർദ്ദേശങ്ങളെന്നാണ് കേന്ദ്രം വ്യക്തമാക്കുന്നത്. ഓൺലൈൻ തട്ടിപ്പിന് തടയിടാനായും കച്ചവടത്തിന്റെ ധാർമ്മികതയ്ക്കുമായാണ് കേന്ദ്രം ഇത്തരത്തിലുള്ള നിർദ്ദേശങ്ങൾ മുന്നോട്ട് വെയ്ക്കുന്നത്.

സർക്കാർ പുറത്തിറക്കിയ കൺസ്യൂമർ പ്രൊട്ടക്ഷൻ (ഇ-കോമേഴ്‌സ് റൂൾ)2020 കരടുചട്ടങ്ങൾക്ക് അടുത്ത മാസം 6 വരെ ഭേദഗതികൾ നിർദേശിക്കാം. ഇ-കോമേഴ്‌സ് സൈറ്റുകളിൽ ക്രമസമാധാന സംവിധാനങ്ങളുമായി 24 മണിക്കൂറും ബന്ധം സ്ഥാപിക്കാനുള്ള സംവിധാനങ്ങൾ ഒരുക്കണമെന്നാണ് പുതിയ നിർദേശങ്ങളിൽ വ്യക്തമാക്കിയിരിക്കുന്നത്. ഉപഭോക്താവിന് നൽകുന്ന ഉത്പന്നത്തിന്റെ കാലാവധിയും ഉത്പന്നം ഏതു രാജ്യത്തു നിന്ന് ഇറക്കുമതി ചെയ്തതാണെന്നും വ്യക്തമാക്കണമെന്നും നിർദ്ദേശത്തിൽ പറയുന്നു. സേവനത്തിലുണ്ടാകുന്ന പോരായ്മയ്ക്ക് ഇ-കൊമേഴ്‌സ് സംരംഭം ഉത്തരവാദി ആയിരിക്കുമെന്നും നിർദേശങ്ങളിലുണ്ട്.

ഇ-കൊമേഴ്‌സ് സംരംഭങ്ങൾക്ക് റജിസ്‌ട്രേഷൻ നിർബന്ധമാക്കുമെന്നും കേന്ദ്രം അറിയിച്ചു. ആമസോൺ, ഫ്‌ളിപ്കാർട് തുടങ്ങിയ ഇ-കൊമേഴ്‌സ് കമ്പനികൾ വിപണിയിലെ മേൽക്കൈ ദുരുപയോഗിക്കുന്നുവെന്ന പേരിൽ കോംപറ്റീഷൻ കമ്മിഷന്റെ അന്വേഷണം നേരിടുന്നതിനിടെയാണ് കേന്ദ്രം ചട്ടങ്ങളിൽ ഭേദഗതി വരുത്തുന്നത്.

മുംബൈ: നഗരത്തിലെ മരങ്ങളുടെ സംരക്ഷണത്തിനായി ട്രീ സർജനെ നിയമിച്ച് മുംബൈ. നഗരത്തിന്റെ പ്രധാന ഭാഗങ്ങളിൽ റോഡരികിലും മറ്റുമായി വളർന്നു നിൽക്കുന്ന വർഷങ്ങൾ പഴക്കമുള്ള മരങ്ങളുടെ സംരക്ഷിക്കുന്നതിനും അവയുടെ മൂല്യനിർണയം നടത്തുന്നതിനുമാണ് ബൃഹൻ മുംബൈ മുൻസിപ്പൽ കോർപ്പറേഷൻ ട്രീ സർജന്മാരെ നിയമിച്ചത്. ആർബോറിസ്റ്റ് അല്ലെങ്കിൽ ആർബോരികൾച്ചറിസ്റ്റ് എന്നീ പേരുകളിലാണ് ട്രീസർജന്മാർ അറിയപ്പെടുക.

അപകട സാധ്യതയുള്ള സ്ഥലങ്ങളിൽ മരങ്ങളുടെ ശിഖരങ്ങളും മറ്റും വെട്ടിമാറ്റുന്നതിന് നേതൃത്വം നൽകുക, മരങ്ങളെ പരിപാലിക്കുക, മരങ്ങളെ കുറിച്ച് പഠിക്കുക എന്നിവയാണ് ട്രീ സർജന്മാരുടെ ചുമതല. പദ്ധതിയുടെ ഭാഗമായി ബിഎംസിയുടെ കീഴിലുള്ള ഡി വാർഡിൽ ആർബോറിസ്റ്റായ വൈഭവ് രാജെയെ നിയമിച്ചു. ഇതിന്റെ ഫലപ്രാപ്തി അനുസരിച്ചായിരിക്കും മുംബൈ നഗരത്തിന്റെ മറ്റ് ഭാഗങ്ങളിലേക്ക് പദ്ധതി വ്യാപിപിക്കുക. മുംബൈ നഗരത്തിലെ പ്രധാന സ്ഥലങ്ങളായ മലബാർ ഹിൽ, ടാർഡിയോ, പെഡ്ഡാർ റോഡ് എന്നിവ ഉൾപ്പെട്ടതാണ് ഡി വാർഡ്.

പ്രദേശത്തുള്ള 100 മുതൽ 150 മരങ്ങളെ അവയുടെ അപകട സാധ്യത ഒഴിവാക്കി എങ്ങനെ സംരക്ഷിക്കാം എന്നതിനെ കുറിച്ച് പഠനം നടത്തുമെന്ന് ആർബോറിസ്റ്റ് വൈഭവ് രാജെ മാദ്ധ്യമങ്ങളോട് പ്രതികരിച്ചു. വെള്ളപ്പൊക്കം, കനത്ത മഴ, കാറ്റ് എന്നിവയെല്ലാം മരങ്ങൾ കടപുഴകി വീഴുന്നതിനും ശിഖരങ്ങൾ ഒടിയുന്നതിനുമൊക്കെ കാരണമാകാറുണ്ട്. ഫംഗൽ ഇൻഫെക്ഷൻ, വേരുകൾ ഇളകുന്നതുമെല്ലാം മരങ്ങൾ പെട്ടെന്ന് നശിക്കാൻ കാരണമാകുന്നുണ്ട്. ഇത് പുറമെ നിന്നും നോക്കിയാൽ മാത്രം മനസിലാകില്ല.

മരം വീണ് അപകടം ഉണ്ടാകുന്നത് മുൻകൂട്ടി മനസ്സിലാക്കാനും അത്തരത്തിലുള്ള അപകടങ്ങൾ ഒഴിവാക്കുന്നതിനും പഠനത്തിലൂടെ സാധിക്കുമെന്നാണ് അദ്ദേഹം അഭിപ്രായപ്പെടുന്നത്. മരങ്ങളുടെ ഭൗതികമായ പ്രത്യേകതകൾ രേഖപ്പെടുത്തുകയും പിന്നീട് മരത്തിന്റെ ഘടനാപരമായ പ്രശ്‌നങ്ങൾ, ദ്രവിച്ച ഭാഗങ്ങൾ, മരങ്ങൾക്ക് എന്തെങ്കിലും രോഗം സംഭവിച്ചിട്ടുണ്ടോ തുടങ്ങിയ കാര്യങ്ങളെ കുറിച്ചെല്ലാം പഠനം നടത്തുകയും ചെയ്യും. മരം നിൽക്കുന്ന പ്രദേശത്തെക്കുറിച്ചും അവിടുത്തെ മണ്ണിന്റെ സ്വഭാവം, മരത്തിന്റെ വേരുകൾ എന്നിവയെ കുറിച്ചും പഠനം നടത്തുമെന്ന് അദ്ദേഹം അറിയിച്ചു.