ന്യൂഡല്ഹി: കേന്ദ്രസര്ക്കാരിന്റെ വാക്സിന് നയത്തിലെ മാറ്റങ്ങളെ തുടര്ന്ന് 24 മണിക്കൂറിനിടെ വാക്സിന് നല്കിയത് 86 ലക്ഷത്തില് അധികം പേര്ക്ക്. 86,16,373 വാക്സിന് ഡോസുകളാണ് തിങ്കളാഴ്ച മാത്രം വിതരണം ചെയ്തത്. പ്രതിദിന വാക്സിന് വിതരണത്തിലെ ഉയര്ന്ന കണക്കാണിത്.
കൊറോണയെ ചെറുക്കുന്നതിനുള്ള ഏറ്റവും ശക്തമായ ആയുധമാണ് വാക്സിന്. വാക്സിനെടുത്ത എല്ലാവര്ക്കും അഭിനന്ദനങ്ങള്. കൊറോണയുടെ മുന്നിര പ്രവര്ത്തകരേയും അനുമോദിക്കുന്നുവെന്ന് പ്രധാനമന്ത്രി കുറിച്ചു.
ഇന്നലെ രാജ്യത്ത് ഏറ്റവും കൂടുതല് വാക്സീന് ഡോസുകള് വിതരണം ചെയ്തത് മദ്ധ്യപ്രദേശിലാണ് 16,01,548 ഡോസുകള്. ഉത്തര്പ്രദേശ് 6,74,546, രാജസ്ഥാന് 4,30,439, മഹാരാഷ്ട്ര 3,78,945, ബംഗാള്3,17,991 എന്നിങ്ങനെയാണ് മറ്റ് ഉയര്ന്ന കണക്കുകള്.അടുത്തമാസം രാജ്യത്തെ വാക്സീന് ഉല്പാദനം 13.5 കോടിയാകുമെന്ന് കേന്ദ്ര സര്ക്കാര് അറിയിച്ചിരിക്കുന്നത്. ജൂലൈ, ഓഗസ്റ്റ് മാസങ്ങളില് പ്രതിദിനം ഒരു കോടി ഡോസ് വാക്സീന് രാജ്യത്ത് വിതരണം ചെയ്യാനാണ് കേന്ദ്രസര്ക്കാര് ലക്ഷ്യം വയ്ക്കുന്നത്.