International (Page 186)

കാബൂൾ: അഫ്ഗാന്റെ ഭരണം പിടിച്ചെടുത്തതിന് പിന്നാലെ തനിസ്വരൂപം കാട്ടി താലിബാൻ. അഫ്ഗാന്റെ ഭരണം പിടിച്ചപ്പോൾ സ്ത്രീകൾക്ക് വിദ്യാഭാസത്തിനും ജോലിയ്ക്കുമുള്ള അവസരങ്ങൾ നൽകുമെന്നായിരുന്നു താലിബാൻ പറഞ്ഞിരുന്നത്. എന്നാൽ ഇപ്പോൾ തങ്ങളുടെ യഥാർത്ഥ നയം വ്യക്തമാക്കുകയാണ് താലിബാൻ. ഇതിന്റെ ഭാഗമായി ആൺകുട്ടികൾക്ക് മാത്രം സെക്കഡറി വിദ്യാഭ്യാസം ആരംഭിക്കുകയും, സ്ത്രീകളോട് തൊഴിലിന് വരേണ്ട എന്ന് അറിയിപ്പ് നൽകുകയും ചെയ്തു കഴിഞ്ഞുവെന്നാണ് വിവരം.

സ്ത്രീകൾക്ക് ചെയ്യാൻ ഒരു ജോലി മാത്രമേ ഉള്ളു എന്ന് പ്രഖ്യാപിച്ചിരിക്കുകയാണ് കാബൂളിന്റെ ആക്ടിംഗ് മേയർ ഹംദുള്ള നൊഹ്മാനി. പൊതു ശൗചാലയങ്ങൾ വൃത്തിയാക്കുക മാത്രമാണ് അവർക്ക് ഇണങ്ങുന്ന ഏക ജോലിയെന്ന് ഹംദുള്ള നൊഹ്മാനി പറയുന്നു. സ്ത്രീകൾ ഉപയോഗിക്കുന്ന ശൗചാലയങ്ങൾ മാത്രം അവർ വൃത്തിയാക്കിയാൽ മതിയെന്നും മേയർ വിശദീകരിക്കുന്നു. പുരുഷന്മാർക്ക് ചെയ്യാൻ കഴിയാത്ത ജോലികളിൽ മാത്രമേ സ്ത്രീകളെ നിയോഗിക്കു എന്ന് നേരത്തെ തന്നെ മേയർ അറിയിച്ചിരുന്നതാണ്. ചന്തകളിലുള്ള പൊതു ശൗചാലയങ്ങളിലാണ് സ്ത്രീകളെ ജോലി ചെയ്യാനായി നിയോഗിക്കുകയെന്നാണ് റിപ്പോർട്ട്.

മതനിയമങ്ങൾക്ക് അനുസൃതമായി സ്ത്രീകളുടെ അവകാശങ്ങളെ മാനിക്കുമെന്നാണ് മുൻപ് താലിബാൻ പറഞ്ഞിരുന്നത്. സ്ത്രീകൾക്ക് യൂണിവേഴ്‌സിറ്റിയിൽ ചേരാമെന്നും താലിബാൻ വാഗ്ദാനം ചെയ്തിരുന്നു. നിലവിൽ സാഹചര്യം സുരക്ഷിതമല്ലെന്നും സ്ത്രീകൾ വീട്ടിൽ തന്നെ ഇരുന്നാൽ മതിയെന്നുമാണ് ഇപ്പോൾ താലിബാൻ പറയുന്നത്.

കാബൂൾ: അഫ്ഗാനിൽ താലിബാൻ അധികാരത്തിലേറിയതിന് പിന്നാലെ സ്ത്രീകളുടെ ജീവിതമാണ് ദുരിതത്തിലായിരിക്കുന്നത്. സ്വതന്ത്രമായി ജോലി ചെയ്യുകയും പഠിക്കുകയും ചെയ്തിരുന്ന താലിബാനിലെ സ്ത്രീകൾക്ക് ഇപ്പോൾ എന്താണ് സംഭവിക്കുന്നതെന്നാണ് ലോകരാജ്യങ്ങൾ ഉറ്റുനോക്കുന്നത്. താലിബാൻ അധികാരത്തിലെത്തിയതോടെ അഫ്ഗാനിൽ സ്ത്രീകൾക്ക് വിദ്യാഭ്യാസവും ജോലി ചെയ്യാനുള്ള അവസരവും നിഷേധിച്ചിരിക്കുകയാണ്.

രാജ്യത്ത് ഉണ്ടായിരുന്ന എയർ ഹോസ്റ്റസുമാരുടെയും ഫാഷൻ ഡിസൈനർമാരുടേയും കാര്യവും കഷ്ടത്തിലായിരിക്കുകയാണ്. ഒരുപാട് ആഗ്രഹിച്ച് നേടിയ തൊഴിലുകൾ ചെയ്യാൻൃ കഴിയാതെ ഒളിവിൽ കഴിയേണ്ട അവസ്ഥയിലാണ് ഇവർ. അഫ്ഗാൻ എയർലൈൻസായ അരിയാനയിലെ എയർ ഹോസ്റ്റസും അഫ്ഗാനിലെ ഫാഷൻ ഡിസൈനർമാരുമടങ്ങുന്ന 11 പേരാണ് ഇത്തരത്തിൽ ഒളിവിൽ കഴിയുന്നത്.

താലിബാൻ അഫ്ഗാൻ പിടിച്ചടക്കിയത് ഒരു നടുക്കത്തോടെയാണ് ഈ പെൺകുട്ടികൾ ഓർക്കുന്നത്. അവസാനത്തെ ഫ്‌ളൈറ്റ് താലിബാൻ പിടിച്ചടുക്കുമ്പോൾ അക്ഷരാർത്ഥത്തിൽ ഞങ്ങൾ കരയുകയായിരുന്നുവെന്നാണ് പെൺകുട്ടികൾ പറയുന്നത്. എന്താണ് സംഭവിക്കുക എന്നത് അവ്യക്തമായിരുന്നുവെന്നും ഇനി എവിടേക്ക് പോകും എന്ന കാര്യത്തിൽ യാതൊരു ഉറപ്പും ഉണ്ടായിരുന്നില്ലെന്നും പെൺകുട്ടികൾ വ്യക്തമാക്കുന്നു.

താലിബാൻ അധികാരത്തിലെത്തി വിമാന സർവീസുകൾ ആരംഭിച്ചുവെങ്കിലും സ്ഥിതിഗതികളൊക്കെ സാധാരണ രീതിയിലാകുന്നത് വരെ തങ്ങളോട് ജോലിക്ക് വരണ്ടതില്ലെന്നാണ് അധികൃതർ അറിയിച്ചിരിക്കുന്നത്. ശാരീരീകമായും മാനസികമായും സമാധാനമില്ല. ഇനി അവർ തങ്ങളെ തിരിച്ചെടുത്താൽ തന്നെ തങ്ങളുടെ എയർ ഹോസ്റ്റസ് യൂണിഫോം ധരിക്കാൻ സാധിക്കുമോ എന്ന് യാതൊരു ഉറപ്പും ഇല്ല. സർക്കാരിന്റെ കാറിൽ ഇരിക്കാൻ തങ്ങൾക്ക് അനുവാദം ഉണ്ടാകില്ലെന്നും പെൺകുട്ടികൾ പറഞ്ഞു.

തങ്ങളുടെ സ്വപ്‌നങ്ങളാണ് തകർന്നത്. ഇനി ആ സന്തോഷ ദിനങ്ങൾ മടങ്ങി വരില്ല. ഇനി ഒരിക്കൽ പോലും എയർ ഹോസ്റ്റസായി ചിരിച്ച് നിൽക്കുന്ന ചിത്രം പകർത്താൻ സാധിക്കില്ലെന്നും പെൺകുട്ടികൾ കൂട്ടിച്ചേർത്തു.

വാഷിംഗ്ടൺ: ചൈനയുടെ വർധിച്ചു വരുന്ന സ്വാധീനത്തെ തടയാൻ വേണ്ടി ഒന്നിച്ച് പ്രവർത്തിക്കാൻ തീരുമാനിച്ചിരിക്കുകയാണ് അമേരിക്കയും ബ്രിട്ടനും ഓസ്‌ട്രേലിയയും. ഓക്കസ് എന്നാണ് ഈ പ്രതിരോധ മുന്നണിയ്ക്ക് നൽകിയിരിക്കുന്ന പേര്. യുഎസ് പ്രസിഡന്റ് ജോ ബൈഡൻ, ബ്രിട്ടിഷ് പ്രധാനമന്ത്രി ബോറിസ് ജോൺസൺ, ഓസ്‌ട്രേലിയൻ പ്രധാനമന്ത്രി സ്‌കോട് മോറിസൻ എന്നിവർ ചേർന്ന് വിഡിയോ കോൺഫറൻസിങ്ങിലൂടെയാണ് സഖ്യത്തിന് രൂപം നൽകിയത്. ചൈനയ്‌ക്കെതിരെയുള്ള പ്രതിരോധ മുന്നണിയുടെ ഭാഗമായി ഓസ്‌ട്രേലിയയ്ക്ക് വേണ്ടി ആണവോർജത്തിൽ പ്രവർത്തിക്കുന്ന അന്തർവാഹിനിവ്യൂഹം പണിയാൻ സഹായിക്കാനാണ് യുഎസും ബ്രിട്ടനും തീരുമാനിച്ചിരിക്കുന്നത്.

ഓസ്‌ട്രേലിയക്ക് ആണവോർജത്തിൽ പ്രവർത്തിക്കുന്ന അന്തർവാഹിനി പണിയുന്നതാണ് ഓക്കസ് പദ്ധതിയിലെ ആദ്യഘട്ട പ്രവർത്തനം. അഡലെയ്ഡിലായിരിക്കും അന്തർവാഹിനിയുടെ നിർമ്മാണം. ഇതു യാഥാർഥ്യമാകുന്നതോടെ ആണവോർജത്തിൽ പ്രവർത്തിക്കുന്ന അന്തർവാഹിനിയുള്ള ഏഴാമത്തെ രാജ്യം എന്ന നേട്ടം ഓസ്‌ട്രേലിയയ്ക്ക് സ്വന്തമാകും. അതേസമയം ഇതിനർഥം ഓസ്‌ട്രേലിയ ആണവായുധങ്ങളുടെ പിന്നാലെ പോകുമെന്നല്ലെന്ന് പ്രധാനമന്ത്രി സ്‌കോട് മോറിസൺ അറിയിച്ചു.

ഇക്കാര്യത്തിൽ യുഎസിന്റെയും ബ്രിട്ടന്റെയും ഉറ്റ സഖ്യകക്ഷിയായ ഫ്രാൻസിന് അതൃപ്തിയുണ്ടെന്ന റിപ്പോർട്ടുകളും പുറത്തു വരുന്നുണ്ട്. ഫ്രാൻസിന്റെ കീഴിലുള്ള നേവൽ ഗ്രൂപ് എന്ന നാവികായുധ കമ്പനിയുമായി 90 ബില്യൺ കരാറിൽ ആണവ അന്തർവാഹിനികൾക്ക് ഓസ്‌ട്രേലിയ ഓർഡർ നൽകിയിരുന്നതാണ്. ഇപ്പോൾ യുഎസും ബ്രിട്ടനും കൂടി വന്നതോടെ ഈ കരാർ ഫ്രാൻസിനു നഷ്ടമായി.

ആണവ അന്തർവാഹിനികളെ മുന്നോട്ടു നയിക്കുന്ന ന്യൂക്ലിയർ പ്രൊപ്പൽഷൻ സാങ്കേതികവിദ്യ യുഎസ് ഇതുവരെ ബ്രിട്ടനല്ലാതെ മറ്റൊരു രാജ്യത്തിനും നൽകിയിട്ടില്ല. എന്നാൽ ചൈനയ്‌ക്കെതിരെയുള്ള പ്രതിരോധ സഖ്യത്തിന്റെ ഭാഗമായി ഓസ്‌ട്രേലിയും ഇതിൽ പങ്കാളിയാകും. നിലവിൽ കോളിൻ ക്ലാസ് എന്നറിയപ്പെടുന്ന അന്തർവാഹിനികളാണ് ഓസ്‌ട്രേലിയൻ നേവിക്കുള്ളത്. ഡീസൽ ഊർജത്തിൽ പ്രവർത്തിക്കുന്ന ഇവയ്ക്ക് ഒരുപാടുകാലം കടലിൽ കിടക്കാൻ കഴിയില്ല. എന്നാൽ ആണവ പ്രൊപ്പൽഷൻ സാങ്കേതികവിദ്യ വരുന്നതോടെ ഇക്കാര്യത്തിൽ മാറ്റമാകുകയും 5 മാസത്തോളം പസഫിക് മേഖലയിൽ കിടക്കാനും വളരെ നിശ്ശബ്ദമായി പ്രവർത്തിക്കാനും ഓസ്‌ട്രേലിയൻ നേവിക്ക് അവസരമൊരുങ്ങുകയും ചെയ്യും.

കാബൂൾ: അഫ്ഗാനിസ്താനിൽ സെക്കൻഡറി ക്ലാസുകളിൽ പെൺകുട്ടികൾക്ക് വിലക്കേർപ്പെടുത്തി താലിബാൻ. ശനിയാഴ്ച ആരംഭിച്ച സെക്കൻഡറി ക്ലാസുകളിൽ ഇപ്പോൾ ആൺകുട്ടികൾ മാത്രമെയുള്ളൂവെന്നാണ് റിപ്പോർട്ട്. സ്ത്രീകൾക്ക് പഠനത്തിന് സ്വാതന്ത്ര്യം നൽകുമെന്നതടക്കമുള്ള വാഗ്ദാനങ്ങളെല്ലാം കാറ്റിൽ പറത്തിയാണ് താലിബാൻ തങ്ങളുടെ തനിനിറം വെളിപ്പെടുത്തിയിരിക്കുന്നത്.

തങ്ങൾ മാറിയെന്ന് വെളിപ്പെടുത്തിയാണ് അഫ്ഗാനിൽ താലിബാൻ അധികാരത്തിലേറിയത്. എന്നാൽ കാടത്ത ഭരണമാണ് അഫ്ഗാനിൽ താലിബാൻ കാഴ്ച്ചവെയ്ക്കുന്നതെന്നതിന്റെ സൂചനകളാണ് ഇപ്പോൾ പുറത്തു വരുന്നത്.

ക്ലാസുകളിൽ ആൺകുട്ടികളും ആൺ അദ്ധ്യാപകരും മാത്രം മതിയെന്നാണ് താലിബാൻ നൽകിയിരിക്കുന്ന നിർദ്ദേശം. ഇതോടെയാണ് പെൺകുട്ടികളില്ലാതെ ക്ലാസുകൾ ആരംഭിച്ചത്. പെൺകുട്ടികളുടെ സ്വാതന്ത്ര്യവും വിദ്യാഭ്യാസത്തിനുള്ള അവകാശവും സ്വപ്‌നങ്ങളുമാണ് താലിബാൻ ഭീകരർ ചവിട്ടി മെതിച്ചത്. ജീവിതത്തിലെ സ്വപ്‌നങ്ങളെല്ലാം തകർന്നുവെന്നാണ് താലിബാനിലെ പെൺകുട്ടികൾ പറയുന്നതെന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്. പെൺകുട്ടികളുടെ രക്ഷിതാക്കളും ആശങ്കയിലാണ്.

സ്ത്രീകളുടെ അവകാശങ്ങൾ ഇസ്ലാമിക നിയമപ്രകാരം നിലനിർത്തുമെന്നും സ്ത്രീകളോടും പെൺകുട്ടികളോടുമുള്ള വേർതിരിവ് അവസാനിപ്പിക്കുമെന്നും സ്ത്രീ വിദ്യാഭ്യാസത്തെ തടയില്ലെന്നും വ്യക്തമാക്കി ഏതാനും ദിവസങ്ങൾക്ക് മുൻപ് താലിബാൻ നൽകിയ വാഗ്ദാനങ്ങളാണ് ഇപ്പോൾ പാഴ്‌വാക്കായിരിക്കുന്നത്. സ്ത്രീകളെയും പെൺകുട്ടികളെയും എല്ലാത്തിൽനിന്നും പുറത്തുനിർത്തുന്ന പഴയ ഭീകര ഭരണത്തിലേക്കാണ് താലിബാന്റെ പോക്ക്.