International (Page 187)

കൊളംബോ: കോവിഡ് വൈറസ് വ്യാപനത്തെ തുടർന്ന് കടുത്ത സാമ്പത്തിക പ്രതിസന്ധിയിലായി ശ്രീലങ്കയും മാലിദ്വീപും. കൂടുതലായും വിനോദസഞ്ചാരത്തെ ആശ്രയിക്കുന്ന ശ്രീലങ്കയിലും മാലിദ്വീപിലും സഞ്ചാരികൾ എത്താതായതോടെ വരുമാനത്തിൽ വലിയ രീതിയിൽ ഇടിവുണ്ടായിരിക്കുകയാണ്. മൊത്തം ഉത്പാദനം ഇടിഞ്ഞതിനാൽ സമ്പദ്വ്യവസ്ഥയിൽ വലിയ തകർച്ച ഉണ്ടായി. ഇരുരാജ്യങ്ങളുടെയും മൊത്തം ആഭ്യന്തര ഉൽപാദനത്തിന്റെ 100 ശതമാനത്തിൽ കൂടുതൽ ആകും ഈ വർഷം കടം എന്നാണ് റിപ്പോർട്ടുകൾ.

വെറും അഞ്ചു ലക്ഷം മാത്രം ജനസംഖ്യയുള്ള മാലിദ്വീപിനെ കോവിഡ് വൈറസിന്റെ ഡെൽറ്റ വേരിയന്റ് വളരെ രൂക്ഷമായാണ് ബാധിച്ചത്. മെയ് മാസം വൈറസ് ഒരു ദിവസം കൊണ്ട് ആയിരത്തിൽ മൂന്ന് പേരിലേക്ക് വീതമാണ് എത്തിയത് . പിന്നീട് രോഗ വ്യാപനം വർധിച്ചു. പിന്നീട് രോഗവ്യാപനത്തിൽ കുറവ് വന്നതോടെ ടൂറിസം മേഖലയിൽ മാലിദ്വീപ് ഇളവുകൾ പ്രഖ്യാപിച്ചിരുന്നു. ഇതോടെ സന്ദർശകരുടെ എണ്ണം ഉയരാൻ തുടങ്ങി. 2019 ആഗസ്റ്റിലെ സന്ദർശകരുടെ എണ്ണത്തിനൊപ്പം തന്നെ സന്ദർശകർ എത്തുന്നത് രാജ്യത്തിന് പുതിയ പ്രതീക്ഷകൾ നൽകുന്നുണ്ട്.

എന്നാൽ ശ്രീലങ്കയുടെ സ്ഥിതി വളരെ മോശമാണ്. കോവിഡ് വ്യാപനത്തിന് അയവ് വന്നതോടെ ശ്രീലങ്കയിൽ ഇപ്പോൾ സാമ്പത്തിക അടിയന്തരാവസ്ഥ പ്രഖ്യാപിച്ചിരിക്കുകയാണ്. ഭക്ഷ്യോൽപ്പന്നങ്ങൾക്കായി ഇറക്കുമതിയെ കൂടുതൽ ആശ്രയിക്കുന്ന ശ്രീലങ്കക്ക് ഇറക്കുമതിക്കുള്ള വിദേശ നാണ്യ ശേഖരം പോലും ഇല്ലെന്നാണ് വിവരം. മൊത്തം ആഭ്യന്തര ഉത്പാദനത്തേക്കാൾ 107.9 ശതമാനമാണ് രാജ്യത്തിന്റെ പൊതുകടം. ശ്രീലങ്കൻ രൂപയുടെ വിനിമയ മൂല്യവും കുത്തനെ ഇടിയുന്നുണ്ട്. കോവിഡ് പ്രതിസന്ധി തുടങ്ങിയത് മുതൽ ഒൻപത് ശതമാനത്തോളമാണ് രൂപയുടെ മൂല്യത്തിലെ ഇടിവ്. ശ്രീലങ്കൻ രൂപയുടെ മൂല്യം ഇടിഞ്ഞതിനാൽ ടൂറിസം ഇളവുകൾ പ്രയോജനപ്പെടുത്തി ടൂറിസ്റ്റുകൾ എത്തിയാലും കാര്യമായ നേട്ടമില്ല. ഇറക്കുമതി ചെയ്ത അരി, പഞ്ചസാര, പാൽ, പയർവർഗ്ഗങ്ങൾ, ധാന്യങ്ങൾ എന്നിവയുടെ കടുത്ത ക്ഷാമം നേരിടുകയാണ് ശ്രീലങ്ക. ആഗസ്റ്റ് 31 മുതലാണ് രാജ്യത്ത് സാമ്പത്തിക അടിയന്തരാവസ്ഥ പ്രഖ്യാപിച്ചത്.

വാഷിംഗ്ടൺ: പാകിസ്താനുമായുളള തങ്ങളുടെ ബന്ധത്തെ വരുന്ന ആഴ്ചകളിൽ വിശദമായി വിശകലനം ചെയ്യുമെന്ന് വ്യക്തമാക്കി അമേരിക്ക. യു.എസ് സ്റ്റേറ്റ് സെക്രട്ടറി ആന്റണി ബ്ലിങ്കനാണ് ഇക്കാര്യം അറിയിച്ചത്. അമേരിക്കൻ ജനപ്രതിനിധി സഭയിലായിരുന്നു ബ്ലിങ്കന്റെ പ്രതികരണം.

പാകിസ്താൻ താലിബാൻ അംഗങ്ങൾക്ക് സുരക്ഷിതമായ ഒളിത്താവളം നൽകുകയും അവരെ സംരക്ഷിക്കുകയും ചെയ്യുന്നുണ്ട്. ഇക്കാര്യം താമസിയാതെ അമേരിക്കൻ ഭരണകൂടം വിശകലനത്തിന് വിധേയമാക്കുമെന്നാണ് അദ്ദേഹം പറയുന്നത്. അഫ്ഗാനിസ്താനിൽ കഴിഞ്ഞ 20 വർഷങ്ങളായി പാകിസ്ഥാൻ നടത്തുന്ന ഇടപെടലും വരും ആഴ്ചകളിൽ അവർ നടത്താൻ പോകുന്ന ഇടപെടലുകളും നിരീക്ഷിക്കുമെന്നും അദ്ദേഹം മുന്നറിയിപ്പ് നൽകി. പാകിസ്താന് അഫ്ഗാനിസസ്താനിൽ അമേരിയ്ക്കയ്ക്കുളളതിൽ നിന്നും വ്യത്യസ്തമായി ചില താൽപര്യങ്ങളുണ്ടെന്നും അദ്ദേഹം ആരോപിച്ചു.

അമേരിക്കയും യൂറോപ്യൻ രാജ്യങ്ങളും അഫ്ഗാനിലെ താലിബാൻ സർക്കാരിനെ അംഗീകരിച്ചിട്ടില്ല. കഴിഞ്ഞ രണ്ട് പതിറ്റാണ്ടായി അമേരിക്കൻ പ്രതിരോധത്തിനെതിരെ താലിബാന് പരോക്ഷമായി ശക്തമായ പിന്തുണ നൽകുന്നവരാണ് പാകിസ്താൻ. എന്നാൽ ഇത് അംഗീകരിക്കാൻ പാകിസ്താൻ ഇതുവരെ തയ്യാറായിട്ടില്ല.

കാബൂള്‍: എല്ലാ വിഭാഗങ്ങള്‍ക്കും പ്രാതിനിധ്യം നല്‍കാതെ രൂപീകരിച്ച താലിബാന്‍ സര്‍ക്കാരിനെ അംഗീകരിക്കാന്‍ കഴിയില്ലെന്ന് ഫ്രാന്‍സ്. അതുകൊണ്ട് തന്നെ താലിബാന്‍ സര്‍ക്കാരിനെ അംഗീകരിക്കാന്‍ കഴിയില്ലെന്ന് ഫ്രാന്‍സിന്‍റെ വിദേശകാര്യമന്ത്രി ജീന്‍ വെസ് ലെ ഡ്രിയാന്‍ വ്യക്തമാക്കി.

ഒരിക്കലും ഈ താലിബാന്‍ സര്‍ക്കാരുമായി ഫ്രാന്‍സിന് ബന്ധമുണ്ടാകില്ലെന്നും അദ്ദേഹം പറഞ്ഞു. ഈ സര്‍ക്കാരുമായി ഒരു ഇടപാടുകള്‍ക്ക് ഫ്രാന്‍സ് ഉണ്ടായിരിക്കില്ലെന്നും വിദേശകാര്യമന്ത്രി ജീന്‍ വെസ് ലെ ഡ്രിയാന്‍ പറഞ്ഞു.

താലിബാന്‍ സര്‍ക്കാരിന് മുന്നില്‍ ഒരു പിടി വ്യവസ്ഥകള്‍ വെച്ചിട്ടുണ്ടെന്നും അക്കാര്യത്തില്‍ എന്തെങ്കിലും നടപടിയുണ്ടാകുമോ എന്ന കാര്യം കാത്തിരിക്കുകയാണെന്നും അദ്ദേഹം പറഞ്ഞു. ഫ്രാന്‍സ് 5 ബ്രോഡ്കാസ്റ്റില്‍ വന്ന അഭിമുഖത്തിലാണ് അദ്ദേഹം നയം വ്യക്തമാക്കിയത്.

വിദേശപൗരന്മാരെയും അഫ്ഗാന്‍ പൗരന്‍മാരെയും പോകാന്‍ അനുവദിക്കാമെന്ന് താലിബാന്‍ പറഞ്ഞെങ്കിലും ഇക്കാര്യത്തില്‍ താലിബാന്‍റെ ഭാഗത്ത് നിന്നും അനുകൂല നിലപാട് ഉണ്ടായിട്ടില്ല. താലിബാന്‍ എല്ലാവരെയും ഉള്‍ച്ചേര്‍ത്തിട്ടുള്ള, എല്ലാവര്‍ക്കും പ്രാതിനിധ്യമുള്ള സര്‍ക്കാര്‍ രൂപീകരിക്കുമെന്ന് പറഞ്ഞെങ്കിലും അതുണ്ടായില്ല. എന്തായാലും ഇപ്പോള്‍ ഫ്രാന്‍സ് ഒരു പിടി വ്യവസ്ഥകള്‍ മുന്നോട്ട് വെച്ചിട്ടുണ്ട്. അത് അംഗീകരിച്ചാല്‍ മാത്രമേ താലിബാന്‍ സര്‍ക്കാരിനെ അംഗീകരിക്കാന്‍ കഴിയൂ. ജപ്പാന്‍, യുഎസ്, കാനഡ എന്നീ രാജ്യങ്ങളും താലിബാന്‍ സര്‍ക്കാരിനെ അംഗീകരിക്കേണ്ട എന്ന നിലപാടിലാണെന്നറിയുന്നു.

മുല്ല മുഹമ്മദ് ഹസൻ അഖുന്‍ദ് പ്രധാനമന്ത്രിയായുള്ള 33-അംഗ താലിബാന്‍ സര്‍ക്കാര്‍ കഴിഞ്ഞ വ്യാഴാഴ്ചയാണ് അധികാരമേറ്റത്. ഇതില്‍ പാകിസ്ഥാന് അധികാരമുള്ള ഹഖാനി ശൃംഖലയും പഷ്തൂണ്‍ വംശജര്‍ക്കുമാണ് പുതിയ താലിബാന്‍ സര്‍ക്കാരില്‍ അധികാരമുള്ളത്.

വാഷിംഗ്ടൺ: മരിച്ചെന്ന് കരുതിയ അൽ ഖ്വയ്ദ തീവ്രവാദി നേതാവിന്റെ വീഡിയോ സന്ദേശം പുറത്ത്. അയ്മാൻ അൽ സവാഹിരിയുടെ എന്ന ഭീകര നേതാവിന്റെ വീഡിയോ സന്ദേശമാണ് പുറത്തു വന്നിരിക്കുന്നത്. സെപ്തംബർ 11 ആക്രമണത്തിന്റെ ഇരുപതാം വാർഷികത്തിലാണ് വീഡിയോ സന്ദേശം പുറത്തുവിട്ടിരിക്കുന്നത്.

ഒസാമ ബിൻ ലാദന്റെ മരണത്തെ തുടർന്നാണ് സവാഹിരി അൽ ഖ്വയ്ദയുടെ നേതൃത്വം ഏറ്റെടുത്തത്. പിന്നീട് ഒളിവിൽ പോയ ഇയാൾ മരണപ്പെട്ടതായുള്ള വാർത്തകൽ പുറത്തു വന്നിരുന്നു. 2020 നവംബറിൽ രോഗബാധയെതുടർന്ന് സവാഹിരി മരണപ്പെട്ടുവെന്നായിരുന്നു റിപ്പോർട്ടുകൾ. എന്നാൽ കഴിഞ്ഞ ദിവസം പുറത്തുവിട്ട വീഡിയോയിൽ പൂർണ്ണ ആരോഗ്യവാനായ സവാഹിരിയെയാണ് കാണാൻ കഴിയുന്നത്.

2020 ൽ കൊല്ലപ്പെട്ട നിരവധി തീവ്രവാദികൾക്ക് വീഡിയോയിൽ സവാഹിരി വീര പരിവേശം നൽകുന്നുണ്ട്. 20 വർഷത്തെ യുദ്ധത്തിനു ശേഷം അമേരിക്ക അഫ്ഗാനിൽ നിന്നും തോറ്റ് മടങ്ങിയെന്നും സെപ്തംബർ പതിനൊന്നിന് അൽ ഖ്വയ്ദ വേൾഡ് ട്രേഡ് സെന്ററിൽ നടത്തിയ ആക്രമണം അമേരിക്കയുടെ നെഞ്ചത്ത് ഏറ്റ വലിയൊരു മുറിവായിരുന്നെന്നും വീഡിയോയിൽ പറയുന്നു. അതേസമയം അഫ്ഗാനിസ്താനിൽ പുതുതായി അധികാരമേറ്റെടുത്ത താലിബാൻ നേതൃത്വത്തെ കുറിച്ച് യാതൊരു പരാമർശവും വീഡിയോയിൽ ഇല്ല.

മോസ്‌കോ: അഫ്ഗാനിലെ പുതിയ താലിബാൻ സർക്കാരിന്റെ ഉദ്ഘാടന ചടങ്ങിൽ റഷ്യ പങ്കെടുക്കില്ല. റഷ്യൻ ഗവൺമെന്റിന്റെ ആസ്ഥാനമായ ക്രെംലിനാണ് ഇക്കാര്യം അറിയിച്ചത്. താലിബാൻ സർക്കാരിന്റെ ഉദ്ഘാടന ചടങ്ങിൽ അംബാസഡർ തലത്തിലുള്ള ഉദ്യോഗസ്ഥർ രാജ്യത്തെ പ്രതിനിധാനം ചെയ്യുമെന്ന് റഷ്യയുടെ പാർലമെന്റിന്റെ ഉപരിസഭയുടെ സ്പീക്കർ പറഞ്ഞിരുന്നതായാണ് ആർ.ഐ.എ ന്യൂസ് ഏജൻസി റിപ്പോർട്ട് ചെയ്തിരുന്നത്.

പാകിസ്ഥാൻ, ചൈന, റഷ്യ തുടങ്ങി നിരവധി രാജ്യങ്ങളെ പുതിയ സർക്കാർ രൂപീകരണ ചടങ്ങിൽ പങ്കെടുക്കാൻ താലിബാൻ ക്ഷണിച്ചതായുള്ള റിപ്പോർട്ടുകൾ പുറത്ത വന്നിരുന്നു. അഫ്ഗാനിൽ ഇപ്പോഴും തങ്ങളുടെ എംബസികൾ പ്രവർത്തിപ്പിക്കുന്ന ചുരുക്കം ചില രാജ്യങ്ങളിൽ ഉൾപ്പെടുന്നവയാണ് ഈ മൂന്ന് രാജ്യങ്ങളും. അഫ്ഗാൻ വിഷയത്തിലെ റഷ്യയുടെയും ചൈനയുടെയും നീക്കങ്ങളെ ലോകരാജ്യങ്ങൾ ഏറെ ശ്രദ്ധയോടെ നീരീക്ഷിച്ചുകൊണ്ടിരിക്കുകയാണ്.

യു.എൻ ഭീകരപ്പട്ടികയിലുളള താലിബാൻ നേതാവ് മുല്ല മുഹമ്മദ് ഹസ്സൻ അഖുന്ദിനെയാണ് തങ്ങളുടെ ഇടക്കാല സർക്കാരിന്റെ നേതാവായി താലിബാൻ തെരഞ്ഞെടുത്തത്. താലിബാൻ സഹസ്ഥാപകൻ അബ്ദുൾ ഗനി ബരാദറാണ് ഉപനേതാവ്. ആഭ്യന്തരത്തിന്റെ ചുമതല നൽകയിരിക്കുന്ന ഹഖാനി ഗ്രൂപ്പിനാണ്. സിറാജുദ്ദീൻ ഹഖാനിയ്ക്കാണ് ആഭ്യന്തര മന്ത്രി സ്ഥാനം.